Read Aramaic Peshita Hebrews 2 Bible Online

Hebrews 2 - Aramaic Peshita bible

Hebrews 2

¹ܡܛܠ ܗܵܢܵܐ ܚܲܝܵܒ݂ܝܼܢ ܚ̄ܢܲܢ. ܕܝܲܬܝܼܪܵܐܝܼܬ݂ ܢܸܗܘܹܐ ܙܗܝܼܪܝܼܢ ܒܡܸܕܸܡ ܕܲܫܡܲܥܢ ܕܠܵܐ ܢܸܦܸܠ.

²ܐܸܢ ܓܹܝܪ ܡܸܠܬ݂ܵܐ ܕܐܸܬ݂ܡܲܠܠܲܬ݂ ܒܝܲܕ݂ ܡܲܠܲܐܟܹ̈ܐ ܐܸܫܬܲܪܪܲܬ݂: ܘܟ݂ܠ ܕܫܲܡܥܵܗܿ ܘܲܥܒܲܪ ܥܠܹܝܗܿ ܩܲܒܸܠ ܦܘܼܪܥܵܢܵܐ ܒܟܹܐܢܘܼܬ݂ܵܐ.

³ܐܲܝܟܲܢܵܐ ܚܢܲܢ ܢܸܥܪܘܿܩ. ܐܸܢ ܢܸܒ݂ܣܹܐ ܥܲܠ ܐܲܝܠܹܝܢ ܕܗܸܢܘܿܢ ܐܸܢܘܿܢ ܚܲܝܲܝ̈ܢ: ܗܵܢܘܿܢ ܕܫܲܪܝܼܘ ܡܸܢ ܡܵܪܲܢ ܠܡܸܬ݂ܡܲܠܵܠܘ. ܘܡܸܢ ܐܲܝܠܹܝܢ ܕܡܸܢܹܗ ܫܡܲܥܘ ܒܲܢ ܐܸܫܬܲܪܲܪܘ.

⁴ܟܲܕ݂ ܣܵܗܹܕ݂ ܥܠܲܝܗܘܿܢ ܐܲܠܵܗܵܐ. ܒܐܵܬ݂ܘ̈ܵܬ݂ܵܐ. ܘܲܒ݂ܬܸܕ݂ܡܪ̈ܵܬ݂ܵܐ. ܘܲܒ݂ܚܲܝ̈ܠܹܐ ܡܫܲܚܠܦܹ̈ܐ. ܘܲܒ݂ܦܘܼܠܵܓ݂ܹ̈ܐ ܕܪܘܼܚܵܐ ܕܩܘܼܕ݂ܫܵܐ. ܕܐܸܬ݂ܝܼܗܸܒ݂ܘ ܐܲܝܟ݂ ܨܸܒ݂ܝܵܢܹܗ.

⁵ܠܵܐ ܗ̄ܘܵܐ ܓܹܝܪ ܠܡܲܠܲܐܟܹ̈ܐ ܫܲܥܒܸܕ݂ ܥܵܠܡܵܐ ܕܲܥܬ݂ܝܼܕ݂ ܕܲܥܠܵܘܗܝ ܡܡܲܠܠܝܼܢ ܚ̄ܢܲܢ.

⁶ܐܸܠܵܐ ܐܲܝܟ݂ ܕܡܲܣܗܸܕ݂ ܟܬ݂ܵܒ݂ܵܐ ܘܐܵܡܲܪ. ܡܵܢܵܘ ܓܲܒ݂ܪܵܐ ܕܲܥܗܲܕܬܵܝܗܝ. ܘܲܒ݂ܪܹܗ ܕܐ̄ܢܵܫܵܐ ܕܲܣܥܲܪܬܵܝܗܝ.

⁷ܐܲܡܸܟ݂ܬܵܝܗܝ ܩܲܠܝܼܠ ܡܸܢ ܡܲܠܲܐܟܹ̈ܐ. ܬܸܫܒܿܘܿܚܬܵܐ ܘܐܝܼܩܵܪܵܐ ܣܵܡܬܿ ܒܪܹܫܹܗ. ܘܐܲܫܠܸܛܬܵܝܗܝ ܒܲܥܒ݂ܵܕ݂ܵܐ ܕܐܝܼܕ݂ܲܝ̈ܟ.

⁸ܘܟ݂ܠ ܡܸܕܸܡ ܫܲܥܒܸܕܬܿ ܬܚܹܝܬ݂ ܪܸ̈ܓ݂ܠܵܘܗܝ. ܒܗܵܝ ܕܹܝܢ ܕܟܠ ܡܸܕܸܡ ܫܲܥܒܸܕ݂ ܠܹܗ. ܠܵܐ ܫܒܲܩ ܡܸܕܸܡ ܕܠܵܐ ܡܫܲܥܒܲܕ݂. ܗܵܫܵܐ ܕܹܝܢ ܠܵܐ ܥܕ݂ܲܟܹܝܠ ܚܵܙܹܝܢ ܚ̄ܢܲܢ. ܕܟ݂ܠ ܡܸܕܸܡ ܡܫܲܥܒܲܕ݂ ܠܹܗ.

⁹ܗܵܘ ܕܹܝܢ ܕܡܲܟ݂ ܩܲܠܝܼܠ ܡܸܢ ܡܲܠܲܐܟܹ̈ܐ ܚܵܙܹܝܢ ܚ̄ܢܲܢ. ܕܗܘܸܝܘܼ ܝܼܫܘܿܥ ܡܛܠ ܚܲܫܵܐ ܕܡܵܘܬܹ݁ܗ. ܘܬܸܫܒܿܘܿܚܬܵܐ ܘܐܝܼܩܵܪܵܐ ܣܝܼܡ ܒܪܹܫܹܗ. ܗܘܼ ܓܹܝܪ ܒܛܲܝܒܘܼܬܹܗ ܐܲܠܵܗܵܐ ܚܠܵܦ ܟܠܢܵܫ ܛܥܸܡ ܡܵܘܬܵܐ.

¹⁰ܝܵܐܹܐ ܗ̄ܘܵܐ ܓܹܝܪ ܠܗܵܘ ܕܟ݂ܠ ܒܐܝܼܕ݂ܹܗ ܘܟ݂ܠ ܡܛܠܵܬܹܗ: ܘܲܒ݂̈ܢܲܝܵܐ ܣܲܓܝܼ̈ܐܹܐ ܐܲܥܸܠ ܠܬܸܫܒܿܘܿܚܬܵܐ. ܕܲܠܪܹܫܵܐ ܕܚܲܝܲܝ̈ܗܘܿܢ ܒܚܲܫܹܗ ܢܸܓ݂ܡܪܝܼܘܗܝ

¹¹ܗܵܘ ܓܹܝܪ ܕܩܲܕܸܫ ܘܗܵܢܘܿܢ ܕܐܸܬ݂ܩܲܕܲܫܘ. ܡܸܢ ܚܲܕ݂ ܐܸܢܘܿܢ ܟܠܗܘܿܢ. ܡܛܠ ܗܵܢܵܐ ܠܵܐ ܒܵܗܹܬ݂ ܕܢܸܩܪܹܐ ܐܸܢܘܿܢ ܐܲܚܵܘ̈ܗܝ:

¹²ܟܲܕ݂ ܐܵܡܲܪ ܐܹܣܲܒܲܪ ܫܡܵܟ݂ ܠܐܲܚܲܝ̈. ܘܲܒ݂ܓ݂ܵܘܵܗܿ ܕܥܹܕܬܵܐ ܐܹܫܲܒܚܵܟ݂.

¹³ܘܬ݂ܘܼܒ݂. ܕܐܸܢܵܐ ܐܸܗܘܹܐ ܬܿܟ݂ܝܼܠ ܥܠܵܘܗܝ. ܘܬ݂ܘܼܒ݂. ܗܵܐ ܐܸܢܵܐ ܘܲܒ݂̈ܢܲܝܵܐ ܕܝܲܗ̄ܒ݂ ܠܝܼ ܐܲܠܵܗܵܐ.

¹⁴ܡܛܠ ܓܹܝܪ ܕܲܒ݂̈ܢܲܝܵܐ ܐܸܫܬܵܘܬܲܦܘ ܒܒܸܣܪܵܐ ܘܲܕ݂ܡܵܐ. ܐܵܦ ܗܘܼ ܒܵܗܿ ܒܲܕ݂ܡܘܼܬ݂ܵܐ ܐܸܫܬܵܘܬܲܦ ܒܗܹܝܢ ܒܗܵܠܹܝܢ. ܕܲܒ݂ܡܵܘܬܹ݁ܗ ܢܒܲܛܸܠ ܠܡܲܢ ܕܐܲܚܝܼܕ݂ ܫܘܼܠܛܵܢܵܐ ܕܡܵܘܬܵܐ ܕܐܝܼܬ݂ܵܘܗܝ ܣܵܛܵܢܵܐ.

¹⁵ܘܢܸܫܪܹܐ ܠܗܵܢܘܿܢ ܐܲܝܠܹܝܢ ܕܲܒ݂ܕ݂ܸܚܠܬ݂ܵܐ ܕܡܵܘܬܵܐ ܒܟ݂ܠܗܘܿܢ ܚܲܝܲܝ̈ܗܘܿܢ ܡܫܲܥܒܕ݂ܝܼܢ ܗ̄ܘܼܵܘ ܠܥܲܒ݂ܕܘܼܬ݂ܵܐ.

¹⁶ܠܵܐ ܗ̄ܘܵܐ ܓܹܝܪ ܥܲܠ ܡܲܠܲܐܟܹ̈ܐ ܡܲܫܠܲܛ ܗ̄ܘܵܐ ܡܵܘܬܵܐ. ܐܸܠܵܐ ܥܲܠ ܙܲܪܥܹܗ ܕܐܲܒ݂ܪܵܗܵܡ ܡܲܫܠܲܛ ܗ̄ܘܵܐ. (ܠܵܐ ܗ̄ܘܵܐ ܓܹܝܪ ܡܸܢ ܡܲܠܲܐܟܹ̈ܐ ܢܣܲܒ݂. ܐܸܠܵܐ ܡܸܢ ܙܲܪܥܹܗ ܕܐܲܒ݂ܪܵܗܵܡ ܢܣܲܒ݂.)

¹⁷ܡܛܠ ܗܵܢܵܐ (ܗܵܕܹܐ) ܙܵܕܹܩ ܗ̄ܘܵܐ. ܕܲܒܟ݂ܠ ܡܸܕܸܡ ܢܸܬܿܕܲܡܹܐ ܠܐܲܚܵܘ̈ܗܝ: ܕܢܸܗܘܹܐ ܡܪܲܚܡܵܢܵܐ ܘܪܲܒ݂ ܟܘܼܡܪܹ̈ܐ ܡܗܲܝܡܢܵܐ ܒܕ݂ܲܐܠܵܗܵܐ. ܘܢܸܗܘܹܐ ܡܚܲܣܹܐ ܥܲܠ ܚܛܵܗܵܘ̈ܗܝ ܕܥܲܡܵܐ.

¹⁸ܒܗܵܝ ܓܹܝܪ ܕܗܘܼ ܚܲܫ ܘܐܸܬ݂ܢܲܣܝܼ. ܡܸܫܟܲܚ ܕܲܢܥܲܕܲܪ ܠܐܲܝܠܹܝܢ ܕܡܸܬ݂ܢܲܣܹܝܢ.