Read Aramaic Peshita Hebrews 3 Bible Online

Hebrews 3 - Aramaic Peshita bible

Hebrews 3

¹ܡܸܟܹܝܠ ܐܲܚܲܝ̈ ܩܲܕ݁ܝܼܫܹ̈ܐ ܕܐܸܬ݂ܩܪܝܼܬܿܘܿܢ ܒܩܸܪܝܵܢܵܐ ܕܡܸܢ ܫܡܲܝܵܐ. ܚܙܵܐܘܼܗܝ ܠܗܵܢܵܐ ܫܠܝܼܚܵܐ ܘܪܲܒܟܘܼܡܪܹ̈ܐ ܕܬ݂ܵܘܕܝܼܬܲܢ ܝܼܫܘܿܥ ܡܫܝܼܚܵܐ.

²ܕܲܡܗܲܝܡܲܢ ܠܡܲܢ ܕܥܲܒ݂ܕܹܗ ܐܲܝܟ݂ ܡܘܼܫܹܐ ܒܟ݂ܠܹܗ ܒܲܝܬܹ݁ܗ.

³ܣܲܓܿܝܼܐܵܐ ܗ݇ܝܼ ܓܹܝܪ ܬܸܫܒܘܿܚܬܹ݁ܗ ܕܗܵܢܵܐ ܛܵܒ݂ ܡܸܢ ܕܡܘܼܫܹܐ. ܐܲܝܟܲܢܵܐ ܕܣܲܓܝܼ ܐܝܼܩܵܪܵܐ ܕܒܲܢܵܝܹܗ ܕܒܲܝܬܵܐ ܛܵܒ݂ ܡܸܢ ܒܸܢܝܵܢܹܗ.

⁴ܟܠ ܒܲܝܬܵܐ ܓܹܝܪ ܡܸܢ ܐ̄ܢܵܫܐ ܗܘܼ ܡܸܬ݂ܒܢܹܐ. ܗܵܘ ܕܹܝܢ ܕܒ݂ܵܢܹܐ ܟܠ ܐܲܠܵܗܵܐ ܗ̄ܘܼ.

⁵ܘܡܘܼܫܹܐ ܐܲܝܟ݂ ܥܲܒ݂ܕܵܐ ܐܸܬ݂ܗܲܝܡܲܢ ܒܒܲܝܬܵܐ ܟܠܹܗ: ܠܣܵܗܕܘܼܬ݂ܵܐ ܕܐܲܝܠܹܝܢ ܕܲܥܬ݂ܝܼ̈ܕ݂ܵܢ ܗ̄ܘܲܝ̈ ܠܡܸܬ݂ܡܲܠܵܠܘܼ ܒܐܝܼܕܹܗ.

⁶ܡܫܝܼܚܵܐ ܕܹܝܢ ܐܲܝܟ݂ ܒܪܵܐ ܥܲܠ ܒܲܝܬܹ݁ܗ. ܘܐܝܼܬ݂ܵܘܗܝ ܒܲܝܬܹ݁ܗ ܚܢܲܢ. ܐܸܢ ܥܕ݂ܲܡܵܐ ܠܚܲܪܬ݂ܵܐ ܢܹܐܚܘܿܕ݂ ܓܲܠܝܘܼܬ݂ ܐܲܦܹ̈ܐ ܘܫܘܼܒ݂ܗܵܪܵܐ ܕܣܲܒ݂ܪܹܗ.

⁷ܡܛܠ ܕܐܸܡܪܲܬ݂ ܪܘܼܚܵܐ ܕܩܘܼܕ݂ܫܵܐ. ܕܝܵܘܡܵܢܵܐ ܐܸܢ ܒܩܵܠܹܗ ܬܸܫܡܥܘܼܢ.

⁸ܠܵܐ ܬܿܩܲܫܘܿܢ ܠܸܒܵܘܵܬ݂ܟ݂̈ܘܿܢ ܠܡܲܪܓܵܙܘܼܬܹܗ. ܐܲܝܟ݂ ܡܡܲܪܡܪ̈ܵܢܹܐ ܘܐܲܝܟ݂ ܝܵܘܡܵܐ ܕܢܸܣܝܘܿܢܵܐ ܕܲܒ݂ܡܲܕ݂ܒܪܵܐ.

⁹ܕܢܲܣܝܘܼܢܝ ܐܲܒ݂ܵܗܲܝ̈ܟܿܘܿܢ: ܘܲܒ݂ܩܵܘ ܚܙܵܘ ܥܒ݂ܵܕ݂ܲܝ̈ ܐܲܪܒܥܝܼܢ ܫܢ̈ܝܼܢ.

¹⁰ܡܛܠ ܗܵܢܵܐ ܡܸܐܢܲܬ݂ ܠܝܼ ܒܕ݂ܵܪܵܐ ܗܵܘ ܘܐܸܡܪܹܬ݂. ܕܥܲܡܵܐ ܗ̄ܘܼ ܕܛܵܥܹܐ ܠܸܒܗܘܿܢ. ܘܗܸܢܘܿܢ ܠܵܐ ܝܼܕ݂ܲܥܘ ܐܘܼܪ̈ܚܵܬ݂ܝ.

¹¹ܘܐܲܝܟ݂ ܕܝܼܡܝܼܬ݂ ܒܪܘܼܓ݂ܙܝ ܕܠܵܐ ܢܸܥܠܘܼܢ ܠܲܢܝܵܚܬܿܝ.

¹²ܐܸܙܕܲܗ̄ܪܘ ܗܵܟܹܝܠ ܐܲܚܲܝ̈. ܕܲܠܡܵܐ ܢܸܗܘܹܐ ܒܐ̄ܢܵܫ ܡܸܢܟ݂ܘܿܢ ܠܸܒܵܐ ܒܝܼܫܵܐ ܕܠܵܐ ܡܗܲܝܡܸܢ. ܘܬܸܦܪܩܘܼܢ ܡܸܢ ܐܲܠܵܗܵܐ ܚܲܝܵܐ.

¹³ܐܸܠܵܐ ܒܥܵܘ ܡܸܢ ܢܲܦ̮ܫܟ݂ܘܿܢ ܟܠܗܘܿܢ ܝܵܘ̈ܡܵܬ݂ܵܐ ܥܕ݂ܲܡܵܐ ܠܝܵܘܡܵܐ ܕܡܸܬ݂ܩܪܹܐ ܝܵܘܡܵܢܵܐ. ܕܠܵܐ ܢܸܬ݂ܩܲܫܹܐ ܐ̄ܢܵܫ ܡܸܢܟ݂ܘܿܢ ܒܛܵܥܝܘܼܬ݂ܵܐ ܕܲܚܛܝܼܬ݂ܵܐ.

¹⁴ܐܸܬ݂ܚܲܠܲܛܢ ܓܹܝܪ ܥܲܡ ܡܫܝܼܚܵܐ. ܐܸܢ ܡܸܢ ܪܹܫܝܼܬ݂ܵܐ ܘܲܥܕ݂ܲܡܵܐ ܠܲܐ݇ܚܪܵܝܬܵܐ. ܒܹܗ ܒܲܩܝܵܡܵܐ ܗܵܢܵܐ ܫܲܪܝܼܪܵܐ ܢܚܲܡܣܸܢ.

¹⁵ܐܲܝܟܲܢܵܐ ܕܐܲܡܝܼܪ. ܕܝܵܘܡܵܢܵܐ ܐܸܢ ܒܲܪ݇ܬ݂ ܩܵܠܹܗ ܬܸܫܡܥܘܼܢ. ܠܵܐ ܬܿܩܲܫܘܿܢ ܠܸܒܵܘܵܬ݂ܟ݂̈ܘܿܢ ܠܡܲܪܓܵܙܘܼܬܹܗ.

¹⁶ܡܲܢ ܐܸܢܘܿܢ ܓܹܝܪ ܗܵܢܘܿܢ ܕܲܫܡܲܥܘ ܘܐܲܪܓ݁ܙܘܼܗܝ. ܠܵܐ ܟܠܗܘܿܢ ܗܵܠܹܝܢ ܕܲܢܦܲܩܘ ܡܸܢ ܡܸܨܪܹܝܢ ܒܝܲܕ݂ ܡܘܼܫܹܐ.

¹⁷ܘܒܲܐܝܠܹܝܢ ܡܸܐܢܲܬ݂ ܠܹܗ ܐܲܪܒܥܝܼܢ ܫܢ̈ܝܼܢ. ܐܸܠܵܐ ܒܗܵܢܘܿܢ ܕܲܚܛܵܘ ܘܓܲܪ̈ܡܲܝܗܘܿܢ ܢܦܲܠܘ ܒܡܲܕ݂ܒܪܵܐ.

¹⁸ܘܥܲܠ ܐܲܝܠܹܝܢ ܝܼܡܵܐ ܕܠܵܐ ܢܸܥܠܘܼܢ ܠܲܢܝܵܚܬܹ݁ܗ. ܐܸܠܵܐ ܥܲܠ ܗܵܢܘܿܢ ܕܠܵܐ ܐܸܬܿܛܦܝܼܣܘ.

¹⁹ܘܚܵܙܹܝܢ ܚ̄ܢܲܢ ܕܠܵܐ ܐܸܫܟܲܚܘ ܠܡܸܥܲܠ ܡܛܠ ܕܠܵܐ ܗܲܝܡܸܢܘ.