Read Aramaic Peshita Hebrews 6 Bible Online

Hebrews 6 - Aramaic Peshita bible

Hebrews 6

¹ܡܛܠ ܗܵܢܵܐ ܢܸܫܒ݁ܘܿܩ ܫܘܼܪܵܝܵܐ ܕܡܸܠܬܹܗ ܕܲܡܫܝܼܚܵܐ ܘܢܹܐܬܹܐ ܠܲܓ݂ܡܝܼܪܘܼܬ݂ܵܐ. ܐܵܘ ܠܡܵܐ ܬܘܼܒ݂ ܫܲܬ݂ܐܣܬܵܐ ܐ̄ܚܪܹܬ݂ܵܐ ܡܲܪܡܹܝܢ ܐ݇ܢܬܿܘܿܢ. ܠܲܬ݂ܝܵܒ݂ܘܼܬ݂ܵܐ ܡܸܢ ܥܒ݂ܵܕܹ̈ܐ ܡܝܼܬܹ̈ܐ. ܘܲܠܗܲܝܡܵܢܘܼܬ݂ܵܐ ܕܒܲܐܠܵܗܵܐ.

²ܘܲܠܝܘܼܠܦܵܢܵܐ ܕܡܲܥܡܘܿܕ݂ܝܼܬ݂ܵܐ ܘܕ݂ܲܣܝܵܡ ܐܝܼܕ݂ܵܐ. ܘܠܲܩܝܵܡܬܵܐ ܕܡܸܢ ܒܹܝܬ݂ ܡܝܼܬܹ̈ܐ. ܘܲܠܕ݂ܝܼܢܵܐ ܕܲܠܥܵܠܲܡ.

³ܐܸܢ ܡܵܪܝܵܐ ܡܲܦܸܣ. ܢܸܥܒܸܕ݂ ܗܵܕܹܐ.

⁴ܐܸܠܵܐ ܠܵܐ ܡܸܫܟܿܚܝܼܢ ܗܵܢܘܿܢ ܕܲܚܕ݂ܵܐ ܙܒܲܢ ܠܡܲܥܡܘܿܕ݂ܝܼܬ݂ܵܐ ܢܚܸܬ݂ܘ ܘܲܛܥܸܡܘ ܡܵܘܗܲܒ݂ܬܵܐ ܕܡܸܢ ܫܡܲܝܵܐ. ܘܲܢܣܲܒ݂ܘ ܪܘܼܚܵܐ ܕܩܘܼܕ݂ܫܵܐ.

⁵ܘܲܛܥܸܡܘ ܡܸܠܬ݂ܵܐ ܛܵܒ݂ܬ݂ܵܐ ܕܐܲܠܵܗܵܐ. ܘܚܲܝܠܵܐ ܕܥܵܠܡܵܐ ܕܲܥܬ݂ܝܼܕ݂.

⁶ܕܬ݂ܘܼܒ݂ ܢܸܚܛܘܿܢ. ܕܡܸܢ ܕܪܹܫ ܢܸܬ݂ܚܲܕܬ݂ܘܼܢ ܠܲܬ݂ܝܵܒ݂ܘܼܬ݂ܵܐ. ܘܡܸܢ ܕܪܹܫ ܢܸܙܩܦܘܼܢ ܠܲܒ݂ܪܹܗ ܕܐܲܠܵܗܵܐ ܘܲܢܨܲܥܪܘܼܢ.

⁷ܐܲܪܥܵܐ ܓܹܝܪ ܕܐܸܫܬܿܝܲܬ݂ ܡܸܛܪܵܐ ܕܐܸܬ݂ܵܐ ܠܵܗܿ ܙܲܒ݂ܢ̈ܝܼܢ ܣܲܓܝܼ̈ܐܵܢ: ܘܐܵܘܥܝܲܬ݂ ܥܸܣܒܵܐ ܕܚܵܫܲܚ ܠܗܵܢܘܿܢ ܕܡܛܠܬ݂ܗܘܿܢ ܡܸܬ݂ܦܲܠܚܵܐ. ܡܩܲܒܠܵܐ ܒܘܼܪܟܬ݂ܵܐ ܡܸܢ ܐܲܠܵܗܵܐ.

⁸ܐܸܢ ܗܘܼ ܕܹܝܢ ܕܬܲܦܸܩ ܩܘܼܪ̈ܛܒܹܐ ܘܕ݂ܲܪܕܪܹ̈ܐ. ܗܵܘܝܵܐ ܠܵܗܿ ܡܲܣܠܲܝܬܵܐ ܘܠܵܐ ܪܲܚܝܼܩܵܐ ܡܸܢ ܠܵܘܛܬ݂ܵܐ. ܐܸܠܵܐ ܚܲܪܬ݂ܵܗܿ ܝܲܩܕܢܵܐ ܗܘܼ.

⁹ܡܦܝܼܣܝܼܢ ܚ̄ܢܲܢ ܕܹܝܢ ܥܠܲܝܟܿܘܿܢ ܐܲܚܲܝ̈ ܐܲܝܠܹܝܢ ܕܫܲܦܝܼܪ̈ܵܢ ܘܩܲܪ̈ܝܼܒ݂ܵܢ ܠܚܲܝܹ̈ܐ. ܐܵܦܸܢ ܗܵܟܲܢܵܐ ܡܡܲܠܠܝܼܢ ܚ̄ܢܲܢ.

¹⁰ܠܵܐ ܗ̄ܘܵܐ ܓܹܝܪ ܥܵܘܵܠ ܐܲܠܵܗܵܐ. ܕܢܸܛܥܹܐ ܥܒ݂ܵܕ݂ܲܝ̈ܟ݁ܘܿܢ. ܘܚܘܼܒܟ݂ܘܿܢ ܗܵܘ ܕܚܵܘܝܼܬܿܘܿܢ ܒܲܫܡܹܗ. ܕܫܲܡܸܫܬܿܘܿܢ ܠܩܲܕ݁ܝܼܫܹ̈ܐ ܘܲܡܫܲܡܫܝܼܢ ܐ̄ܢܬܘܿܢ.

¹¹ܨܵܒܹܝܢ ܚ̄ܢܲܢ ܕܹܝܢ. ܕܐ̄ܢܵܫ ܐ̄ܢܵܫ ܡܸܢܟ݂ܘܿܢ ܗܝ̤ ܗܵܕܹܐ ܚܦܝܼܛܘܼܬ݂ܵܐ ܢܚܵܘܹܐ. ܠܫܘܼܡܠܵܝܵܐ ܕܣܲܒ݂ܪܟ݂ܘܿܢ ܥܕ݂ܲܡܵܐ ܠܚܲܪܬ݂ܵܐ.

¹²ܘܲܕ݂ܠܵܐ ܬܸܬ݂ܩܲܛܲܥ ܠܟ݂ܘܿܢ. ܐܸܠܵܐ ܕܬܸܗܘܘܿܢ ܡܡܲܪ̈ܝܵܢܹܐ ܠܗܵܢܘܿܢ ܕܲܒ݂ܗܲܝܡܵܢܘܼܬ݂ܵܐ ܘܲܒ݂ܢܲܓ݁ܝܼܪܘܼܬ݂ ܪܘܼܚܵܐ ܗܘܵܘ ܝܵܪ̈ܬܹܐ ܕܡܘܼܠܟܵܢܵܐ.

¹³ܠܐܲܒ݂ܪܵܗܵܡ ܓܹܝܪ ܟܲܕ݂ ܡܠܲܟ݂ ܠܹܗ ܐܲܠܵܗܵܐ: ܡܛܠ ܕܠܲܝܬܿ ܗ̄ܘܵܐ ܠܹܗ ܕܪܲܒ ܡܸܢܹܗ ܕܢܹܐܡܹܐ ܒܹܗ. ܝܼܡܵܐ ܒܢܲܦ̮ܫܹܗ.

¹⁴ܘܐܸܡܲܪ. ܕܲܡܒܲܪܵܟ݂ܘ ܐܹܒܲܪܟ݂ܵܟ݂. ܘܡܲܣܓܵܝܘܼ ܐܲܣܓܹ݁ܝܟ݂.

¹⁵ܘܗܵܟܲܢܵܐ ܐܲܓܲܪ ܪܘܼܚܹܗ ܘܩܲܒܸܠ ܡܘܼܠܟܵܢܵܐ.

¹⁶ܒܢܲܝ̈ܢܵܫܵܐ ܓܹܝܪ ܒܲܕ݂ܪܲܒ ܡܸܢܗܘܿܢ ܝܵܡܹܝܢ. ܘܥܲܠ ܟܠ ܚܸܪܝܵܢ ܕܗܵܘܹܐ ܒܲܝܢܵܬ݂ܗܘܿܢ. ܫܘܼܠܵܡܵܐ ܫܲܪܝܼܪܵܐ ܒܡܵܘ̈ܡܵܬ݂ܵܐ ܗܵܘܹܐ ܠܹܗ.

¹⁷ܡܛܠ ܗܵܢܵܐ ܝܲܬܝܼܪܵܐܝܼܬ݂ ܨܒ݂ܵܐ ܐܲܠܵܗܵܐ. ܕܲܢܚܵܘܹܐ ܠܝܵܪ̈ܬܹܐ ܕܡܘܼܠܟܵܢܵܐ. ܕܫܘܼܘܕܵܝܹܗ ܠܵܐ ܡܸܫܬܲܚܠܲܦ. ܘܚܲܒ݂ܫܹܗ ܒܡܵܘ̈ܡܵܬ݂ܵܐ.

¹⁸ܕܲܒ݂ܬܲܪܬܹܿܝܢ ܨܸܒ݂̈ܘܵܢ ܕܠܵܐ ܡܸܫܬܲܚ̈ܠܦܵܢ: ܕܠܵܐ ܡܸܫܟܲܚ ܐܲܠܵܗܵܐ ܕܲܢܕ݂ܲܓܸܠ ܒܗܹܝܢ. ܒܘܼܝܵܐܵܐ ܪܲܒܵܐ ܢܸܗܘܹܐ ܠܲܢ ܕܐܸܬ݂ܓܵܘܲܣܢ ܒܹܗ. ܘܢܹܐܚܘܿܕ݂ ܣܲܒ݂ܪܵܐ ܕܲܡܠܝܼܟ݂ ܠܲܢ.

¹⁹ܗܵܘ ܕܐܝܼܬ݂ܵܘܗܝ ܠܲܢ ܐܲܝܟ݂ ܐܹܘܩܝܼܢܵܐ. ܕܲܠܒ݂ܝܼܟ݂ ܒܢܲܦ̮ܫܲܢ ܕܠܵܐ ܬܸܬܿܙܝܼܥ. ܘܥܵܐܹܠ ܠܓ݂ܵܘ ܡܸܢ ܐܲܦܲܝ̈ ܬܲܪܥܵܐ.

²⁰ܟܲܪ ܕܩܲܕܸܡ ܥܲܠ ܚܠܵܦܲܝܢ ܝܼܫܘܿܥ. ܘܲܗܘܵܐ ܟܘܼܡܪܵܐ ܠܥܵܠܲܡ ܒܲܕ݂ܡܘܼܬܹܗ ܕܡܲܠܟ݁ܝܼܙܕܸܩ.