Read Aramaic Peshita Hebrews 7 Bible Online

Hebrews 7 - Aramaic Peshita bible

Hebrews 7

¹ܗܵܢܵܐ ܕܹܝܢ ܡܲܠܟ݁ܝܼܙܕܸܩ ܐܝܼܬ݂ܵܘܗܝ ܡܠܸܟ݂ ܫܵܠܝܼܡ ܟܘܼܡܪܵܐ ܕܐܲܠܵܗܵܐ ܡܪܲܝܡܵܐ. ܘܗܘܼ ܐܲܪܥܹܗ ܠܐܲܒ݂ܪܵܗܵܡ. ܟܲܕ݂ ܗܦܲܟ݂ ܡܸܢ ܚܲܪܒܵܐ ܕܡܲܠܟܹ̈ܐ. ܘܒܲܪܟܹܗ.

²ܘܠܹܗ ܦܪܲܫ ܐܲܒ݂ܪܵܗܵܡ ܡܲܥܣܵܪܹ̈ܐ ܡܸܢ ܟܠܡܸܕܸܡ ܕܐܝܼܬ݂ ܗ̄ܘܵܐ ܥܲܡܹܗ. ܡܸܬ݂ܦܲܫܲܩ ܕܹܝܢ ܫܡܹܗ ܡܲܠܟܵܐ ܕܟܹܐܢܘܼܬ݂ܵܐ. ܘܬ݂ܘܼܒ݂ ܡܠܸܟ݂ ܫܵܠܝܼܡ ܕܐܝܼܬ݂ܵܘܗܝ ܡܲܠܟܵܐ ܕܲܫܠܵܡܵܐ.

³ܕܠܵܐ ܐܲܒ݂ܘܼܗܝ ܘܠܵܐ ܐܸܡܹܗ ܐܸܬ݂ܟܬܸܒ݂ܘ ܒܫܲܪܒܿܬ݂ܵܐ. ܘܠܵܐ ܪܹܫܝܼܬ݂ܵܐ ܕܝܵܘܡܵܘ̈ܗܝ ܘܠܵܐ ܫܘܼܠܵܡܵܐ ܕܚܲܝܵܘ̈ܗܝ. ܐܸܠܵܐ ܒܲܕ݂ܡܘܼܬ݂ܵܐ ܕܲܒ݂ܪܹܗ ܕܐܲܠܵܗܵܐ ܡܩܵܘܝܵܐ ܟܘܼܡܪܘܼܬܹܗ ܠܥܵܠܲܡ.

⁴ܚܙܵܘ ܕܹܝܢ. ܟܡܵܐ ܪܲܒ ܗܵܢܵܐ. ܕܐܲܒ݂ܪܵܗܵܡ ܪܹܫ ܐܲܒ݂ܵܗ̈ܵܬ݂ܵܐ ܠܹܗ ܝܲܗ̄ܒ݂ ܡܲܥܣܵܪܹ̈ܐ ܕ(ܘ)ܪܹ̈ܫܝܵܬ݂ܵܐ.

⁵ܐܲܝܠܹܝܢ ܓܹܝܪ ܡܸܢ ܒܢܲܝ̈ ܠܹܘܝܼ ܕܲܡܩܲܒܠܝܼܢ ܗ̄ܘܼܵܘ ܟܘܼܡܪܘܼܬ݂ܵܐ: ܦܘܼܩܕܵܢܵܐ ܐܝܼܬ݂ ܗ̄ܘܵܐ ܠܗܘܿܢ ܕܢܵܡܘܿܣܵܐ. ܕܢܸܣܒ݂ܘܼܢ ܡܲܥܣܵܪܹ̈ܐ ܡܸܢ ܥܲܡܵܐ ܗܸܢܘܿܢ ܡܸܢ ܐܲܚܲܝ̈ܗܘܿܢ. ܟܲܕ݂ ܐܵܦ ܗܸܢܘܿܢ ܡܸܢ ܚܲܨܹܗ ܕܐܲܒ݂ܪܵܗܵܡ ܢܦܲܩܘ.

⁶ܗܵܢܵܐ ܕܹܝܢ ܕܠܵܐ ܟܬ݂ܝܼܒ݂ ܒܫܲܪ̈ܒ݂ܵܬ݂ܗܘܿܢ. ܡܲܥܣܵܪܹ̈ܐ ܫܩܲܠ ܡܸܢ ܐܲܒ݂ܪܵܗܵܡ. ܘܒܲܪܟܹܗ ܠܗܵܘ ܕܩܲܒܸܠ ܡܘܼܠܟܵܢܵܐ.

⁷ܕܠܵܐ ܚܸܪܝܵܢܵܐ ܕܹܝܢ ܗܵܘ ܕܲܒ݂ܨܝܼܪ. ܡܸܬ݂ܒܲܪܲܟ݂ ܡܸܢ ܗܵܘ ܕܲܡܝܲܬܲܪ ܡܸܢܹܗ.

⁸ܘܗܵܪܟܵܐ ܒܢܲܝ̈ܢܵܫܵܐ ܕܡܵܝܬܿܝܼܢ ܢܵܣܒܝܼܢ ܡܲܥܣܵܪܹ̈ܐ. ܠܗܲܠ ܕܹܝܢ ܗܵܘ ܕܐܲܣܗܸܕ݂ ܥܠܵܘܗܝ ܟܬ݂ܵܒ݂ܵܐ. ܕܚܲܝ ܗ̄ܘܼ.

⁹ܘܐܲܝܟ݂ ܐ̄ܢܵܫ ܢܹܐܡܲܪ ܒܝܲܕ݂ ܐܲܒ݂ܪܵܗܵܡ ܐܵܦ ܠܹܘܝܼ ܗܵܘ ܕܡܲܥܣܵܪܹ̈ܐ ܢܵܣܹܒ݂ ܗ̄ܘܵܐ. ܐܵܦ ܗܘܼ ܐܸܬ݂ܥܲܣܲܪ.

¹⁰ܥܕ݂ܲܟܹܝܠ ܓܹܝܪ ܒܚܲܨܹܗ ܗܘܵܐ ܕܐܲܒ݂ܘܼܗܝ. ܟܲܕ݂ ܐܲܪܥܹܗ ܠܡܲܠܟ݁ܝܼܙܕܸܩ.

¹¹ܐܸܠܘܼ ܗܵܟܹܝܠ ܓܡܝܼܪܘܼܬ݂ܵܐ ܒܝܲܕ݂ ܟܘܼܡܪܘܼܬ݂ܵܐ ܕܠܹܘܵܝܹ̈ܐ ܐܝܼܬܹܝܗܿ ܗ̄ܘܵܬ݂. ܕܒ݂ܵܗܿ ܣܝܼܡ ܢܵܡܘܿܣܵܐ ܠܥܲܡܵܐ. ܠܡܵܢܵܐ ܡܸܬ݂ܒܥܹܐ ܗ̄ܘܵܐ ܟܘܼܡܪܵܐ ܐ̄ܚܪܹܢܵܐ ܕܲܢܩܘܼܡ ܒܲܕ݂ܡܘܼܬܹܗ ܕܡܲܠܟ݁ܝܼܙܕܸܩ. ܐܸܡܲܪ ܕܹܝܢ ܕܒܲܕ݂ܡܘܼܬܹܗ ܕܐܲܗܪܘܿܢ ܢܸܗܘܹܐ.

¹²ܐܸܠܵܐ ܐܲܝܟܲܢܵܐ ܕܲܗܘܵܐ ܫܘܼܚܠܵܦܵܐ ܒܟ݂ܘܼܡܪܘܼܬ݂ܵܐ. ܗܵܟܲܢܵܐ ܗܘܵܐ ܫܘܼܚܠܵܦܵܐ ܐܵܦ ܒܢܵܡܘܿܣܵܐ.

¹³ܗܵܘ ܓܹܝܪ ܕܐܸܬ݂ܐܡܲܪ ܥܠܵܘܗܝ ܗܵܠܹܝܢ. ܡܸܢ ܫܲܪܒܿܬ݂ܵܐ ܗ̄ܘܼ ܐ̄ܚܪܹܬ݂ܵܐ ܐܸܬ݂ܝܼܠܸܕ݂. ܕܐ̄ܢܵܫ ܡܸܡܬ݂ܘܿܡ ܡܸܢܵܗ݁ ܠܵܐ ܫܲܡܸܫ ܒܡܲܕ݂ܒܚܵܐ.

¹⁴ܓܲܠܝܵܐ ܗ݇ܝܼ ܓܹܝܪ. ܕܡܸܢ ܝܼܗܘܼܕ݂ܵܐ ܕܢܲܚ ܡܵܪܲܢ. ܡܸܢ ܫܲܪܒܿܬ݂ܵܐ ܕܠܵܐ ܐܸܡܲܪ ܥܠܹܝܗܿ ܡܘܼܫܹܐ ܡܸܕܸܡ ܥܲܠ ܟܘܼܡܪܘܼܬ݂ܵܐ.

¹⁵ܘܝܲܬܝܼܪܵܐܝܼܬ݂ ܬܘܼܒ݂ ܝܼܕ݂ܝܼܥܵܐ ܒܗܵܝ ܕܐܵܡܲܪ. ܕܒܲܕ݂ܡܘܼܬܹܗ ܕܡܲܠܟ݁ܝܼܙܕܸܩ ܩܵܐܹܡ ܟܘܼܡܪܵܐ ܐ̄ܚܪܹܢܵܐ.

¹⁶ܗܵܘ ܕܠܵܐ ܗ̄ܘܵܐ ܒܢܵܡܘܿܣܵܐ ܕܦܘܼܩܕܵܢܹ̈ܐ ܦܲܓ݂ܪ̈ܵܢܵܝܹܐ ܗܵܘܹܐ. ܐܸܠܵܐ ܒܚܲܝܠܵܐ ܕܚܲܝܹ̈ܐ ܕܠܵܐ ܡܸܫܬܪܹܝܢ.

¹⁷ܡܲܣܗܸܕ݂ ܓܹܝܪ ܥܠܵܘܗܝ. ܕܐܲܢ̄ܬܿ ܗܘܼ ܟܘܼܡܪܵܐ ܠܥܵܠܲܡ ܒܲܕ݂ܡܘܼܬܹܗ ܕܡܲܠܟ݁ܝܼܙܕܸܩ.

¹⁸ܫܘܼܚܠܵܦܵܐ ܕܹܝܢ ܕܲܗܘܵܐ ܠܦܘܼܩܕܵܢܵܐ ܩܲܕ݂ܡܵܝܵܐ. ܡܛܠ ܡܚܝܼܠܘܼܬܹܗ. ܘܲܕ݂ܝܘܼܬ݂ܪܵܢ ܠܲܝܬܿ ܗ̄ܘܵܐ ܒܹܗ.

¹⁹ܡܸܕܸܡ ܓܹܝܪ ܠܵܐ ܓܡܲܪ ܢܵܡܘܿܣܵܐ. ܥܲܠ ܕܹܝܢ ܚܠܵܦܵܘܗܝ. ܣܲܒ݂ܪܵܐ ܕܲܡܝܲܬܲܪ ܡܸܢܹܗ ܕܒܹܗ ܡܸܬ݂ܩܲܪܒ݂ܝܼܢ ܚ̄ܢܲܢ ܠܐܲܠܵܗܵܐ.

²⁰ܘܫܲܪܪܹܗ ܠܲܢ ܒܡܵܘ̈ܡܵܬ݂ܵܐ.

²¹ܗܵܢܘܿܢ ܓܹܝܪ ܕܠܵܐ ܡܵܘ̈ܡܵܬ݂ܵܐ ܗܘܵܘ ܟܘܼܡܪܹ̈ܐ. ܗܵܢܵܐ ܕܹܝܢ ܒܡܵܘ̈ܡܵܬ݂ܵܐ: ܐܲܝܟ݂ ܕܐܸܡܲܪ ܠܹܗ ܒܝܲܕ݂ ܕܵܘܝܼܕ݂. ܕܝܼܡܵܐ ܡܵܪܝܵܐ ܘܠܵܐ ܢܕ݂ܲܓܸܠ. ܕܐܲܢ̄ܬܿ ܗܘܼ ܟܘܼܡܪܵܐ ܠܥܵܠܲܡ ܒܲܕ݂ܡܘܼܬܹܗ ܕܡܲܠܟ݁ܝܼܙܕܸܩ.

²²ܗܵܢܵܐ ܟܠܹܗ ܡܝܲܬܿܪܵܐ ܕܝܵܬܹܩܹܐ ܗܵܕܹܐ ܕܲܗܘܵܐ ܒܵܗܿ ܥܲܪܵܒ݂ܵܐ ܝܼܫܘܿܥ.

²³ܘܗܵܢܘܿܢ ܗܘܵܘ ܟܘܼܡܪܹ̈ܐ ܣܲܓܝܼ̈ܐܹܐ. ܡܛܠ ܕܡܵܝܬܿܝܼܢ ܗ̄ܘ̣ܵܘ. ܘܠܵܐ ܡܸܫܬܲܒ݂ܩܝܼܢ ܗ̄ܘܼܵܘ ܕܲܢܩܵܘܘܿܢ.

²⁴ܗܵܢܵܐ ܕܹܝܢ ܡܛܠ ܕܲܠܥܵܠܲܡ ܩܲܝܵܡ. ܠܵܐ ܥܵܒ݂ܪܵܐ ܟܘܼܡܪܘܼܬܹܗ.

²⁵ܘܡܸܫܟܲܚ ܠܡܲܚܵܝܘܼ ܠܥܵܠܲܡ. ܠܐܲܝܠܹܝܢ ܕܡܸܬ݂ܩܲܪܒ݂ܝܼܢ ܒܐܝܼܕ݂ܹܗ ܠܐܲܠܵܗܵܐ. ܚܲܝ ܗܘܼ ܓܹܝܪ ܒܟ݂ܠܙܒܲܢ ܘܡܲܣܸܩ ܨܠܘܿܬ݂ܵܐ ܚܠܵܦܲܝܗܘܿܢ.

²⁶ܕܐܲܝܟ݂ ܗܵܢܵܐ ܓܹܝܪ ܟܘܼܡܪܵܐ ܐܵܦ ܙܵܕܹܩ ܗ̄ܘܵܐ ܠܲܢ. ܕܲܟ݂ܝܵܐ. ܕܠܵܐ ܒܝܼܫܘܼ. ܘܲܕ݂ܠܵܐ ܛܘܼܠܫܵܐ. ܕܦܲܪܝܼܩ ܡܸܢ ܚܛܵܗܹ̈ܐ ܘܲܡܪܲܝܲܡ ܠܥܸܠ ܡܸܢ ܫܡܲܝܵܐ.

²⁷ܘܠܲܝܬܿ ܠܹܗ ܐܘܼܠܨܵܢܵܐ ܟܠܝܘܿܡ ܐܲܝܟ݂ ܪ̈ܲܒܲܝ ܟܘܼܡܪܹ̈ܐ: ܕܠܘܼܩܕ݂ܲܡ ܚܠܵܦ ܚܛܵܗܵܘ̈ܗܝ ܢܩܲܪܸܒ݂ ܕܸܒ݂ܚܹ̈ܐ ܘܗܵܝܕܹܝܢ. ܚܠܵܦ ܥܲܡܵܐ. ܗܵܕܹܐ ܓܹܝܪ ܥܲܒ݂ܕܵܗ݁ ܚܕ݂ܵܐ ܙܒܲܢ ܒܢܲܦ̮ܫܹܗ ܕܩܲܪܸܒ݂.

²⁸ܢܵܡܘܿܣܵܐ ܓܹܝܪ ܒܢܲܝ̈ܢܵܫܵܐ ܗܘܼ ܟܪ̈ܝܼܗܹܐ ܡܩܝܼܡ ܟܘܼܡܪܹ̈ܐ. ܡܸܠܬ݂ܵܐ ܕܹܝܢ ܕܡܵܘ̈ܡܵܬ݂ܵܐ ܕܲܗܘܵܬ݂ ܒܵܬܲܪ ܢܵܡܘܿܣܵܐ. ܒܪܵܐ ܓܡܝܼܪܵܐ ܠܥܵܠܲܡ.