Read Aramaic Peshita Hebrews 8 Bible Online

Hebrews 8 - Aramaic Peshita bible

Hebrews 8

¹ܪܹܫܵܐ ܕܹܝܢ ܕܟ݂ܠܗܹܝܢ ܐܝܼܬ݂ ܠܲܢ ܪܲܒ ܟܘܼܡܪܹ̈ܐ. ܐܲܝܢܵܐ ܕܝܼܬܸܒ݂ ܡܸܢ ܝܲܡܝܼܢܵܐ ܕܟ݂ܘܼܪܣܝܵܐ ܕܪܲܒܘܼܬ݂ܵܐ ܒܲܫܡܲܝܵܐ.

²ܘܲܗܘܵܐ ܡܫܲܡܫܵܢܵܐ ܕܒܹܝܬ݂ ܩܘܼܕ݂ܫܵܐ ܘܲܕ݂ܡܲܫܟ݁ܢܵܐ ܕܲܫܪܵܪܵܐ. ܗܵܘ ܕܲܩܒܲܥ ܐܲܠܵܗܵܐ ܘܠܵܐ ܒܲܪܢܵܫܵܐ.

³ܟܠ ܪܲܒܟܘܼܡܪܹ̈ܐ ܓܹܝܪ ܕܩܵܐܹܡ. ܕܲܢܩܲܪܸܒ݂ ܩܘܼܪ̈ܒܵܢܹܐ ܘܕ݂ܸܒ݂ܚܹ̈ܐ. ܡܛܠ ܗܵܢܵܐ ܙܵܕ݂ܩܵܐ ܗ̄ܘܵܬ݂ ܐܵܦ ܠܗܵܢܵܐ. ܕܢܸܗܘܹܐ ܐܝܼܬ݂ ܠܹܗ ܡܸܕܸܡ ܕܲܢܩܲܪܸܒ݂.

⁴ܘܐܸܠܘܼ ܒܐܲܪܥܵܐ ܗ̄ܘܵܐ. ܐܵܦܠܵܐ ܟܘܼܡܪܵܐ ܗܵܘܹܐ ܗ̄ܘܵܐ. ܡܛܠ ܕܐܝܼܬܲܝܗܘܿܢ ܗ̄ܘܼܵܘ ܟܘܼܡܪܹ̈ܐ ܕܲܡܩܲܪܒ݂ܝܼܢ ܗ̄ܘܼܵܘ ܩܘܼܪ̈ܒܵܢܹܐ ܐܲܝܟ݂ ܕܲܒ݂ܢܵܡܘܿܣܵܐ.

⁵ܗܵܢܘܿܢ ܕܲܡܫܲܡܫܝܼܢ ܠܲܕ݂ܡܘܼܬ݂ܵܐ ܘܲܠܛܸܠܵܢܝܼܬ݂ܵܐ ܕܗܵܠܹܝܢ ܕܒܲܫܡܲܝܵܐ. ܐܲܝܟ݂ ܕܐܸܬ݂ܐܡܲܪ ܠܡܘܼܫܹܐ ܟܲܕ݂ ܥܵܒܹܿܕ݂ ܗ̄ܘܵܐ ܡܲܫܟ݁ܢܵܐ. ܕܲܚܙܝܼ ܘܲܥܒܸܕ݂ ܟܠܡܸܕܸܡ ܒܲܕ݂ܡܘܼܬ݂ܵܐ ܗܵܝ ܕܐܸܬ݂ܚܲܙܝܲܬ݂ ܠܵܟ݂ ܒܛܘܼܪܵܐ.

⁶ܗܵܫܵܐ ܕܹܝܢ ܬܸܫܡܸܫܬܵܐ ܕܲܡܝܲܬܿܪܵܐ ܡܸܢ ܗܵܝ ܩܲܒܸܠ ܝܼܫܘܿܥ ܡܫܝܼܚܵܐ. ܐܲܝܟ݂ ܡܵܐ ܕܲܡܝܲܬܿܪܵܐ ܐܵܦ ܕܝܵܬܹܩܹܐ ܗܵܝ ܕܲܥܒ݂ܝܼܕ݂ ܒܵܗܿ ܡܸܨܥܵܝܵܐ ܘܲܒ݂ܫܘܼܘܕܵܝܹ̈ܐ ܕܲܡܝܲܬܿܪܝܼܢ. ܡܸܢ ܕܗܵܝ ܐܸܬ݂ܝܲܗܒܲܬ݂.

⁷ܐܸܠܘܼ ܓܹܝܪ ܐܝܼܬܹܝܗܿ ܗ̄ܘܵܬ݂ ܩܲܕ݂ܡܵܝܬܵܐ ܕܠܵܐ ܪܸܫܝܵܢ. ܠܲܝܬܿ ܗ̄ܘܵܐ ܐܲܬ݂ܪܵܐ ܠܗܵܕܹܐ ܕܬܲܪܬܹܿܝܢ.

⁸ܪܵܫܹܐ ܠܗܘܿܢ ܓܹܝܪ ܘܐܵܡܲܪ. ܕܗܵܐ ܝܵܘ̈ܡܵܬ݂ܵܐ ܐܵܬܹ݁ܝܢ ܐܵܡܲܪ ܡܵܪܝܵܐ. ܘܐܸܓ݂ܡܘܿܪ ܥܲܠ ܒܲܝܬܵܐ ܕܒܹܝܬ݂ ܝܼܣܪܵܝܹܠ ܘܥܲܠ ܒܲܝܬܵܐ ܕܒܹܝܬ݂ ܝܼܗܘܼܕ݂ܵܐ ܕܝܵܬܹܩܹܐ ܚܕ݂ܲܬ݂ܵܐ.

⁹ܠܵܐ ܐܲܝܟ݂ ܗܵܝ ܕܝܵܬܹܩܹܐ ܕܝܸܗܒܹܬ݂ ܠܐܲܒ݂ܵܗܲܝ̈ܗܘܿܢ ܒܝܵܘܡܵܐ ܕܐܸܚܕܹܬ݂ ܒܐܝܼܕ݂ܗܘܿܢ ܘܐܲܦܩܹܬ݂ ܐܸܢܘܿܢ ܡܸܢ ܐܲܪܥܵܐ ܕܡܸܨܪܹܝܢ. ܡܛܠ ܕܗܸܢܘܿܢ ܠܵܐ ܩܵܘܝܼܘ ܒܕ݂ܝܵܬܹܩܹܐ ܕܝܼܠܝ. ܐܵܦ ܐܸܢܵܐ ܒܣܹܝܬ݂ ܒܗܘܿܢ. ܐܸܡܲܪ ܡܵܪܝܵܐ.

¹⁰ܗܵܕܹܐ ܕܹܝܢ ܕܝܵܬܹܩܹܐ ܕܐܸܬܸܿܠ ܠܒܲܝܬܵܐ ܕܒܹܝܬ݂ ܝܼܣܪܵܝܹܠ. ܒܵܬܲܪ ܝܵܘ̈ܡܵܬ݂ܵܐ ܗܵܢܘܿܢ ܐܵܡܲܪ ܡܵܪܝܵܐ. ܐܸܬܿܠܝܼܘܗܝ ܠܢܵܡܘܿܣܝ ܒܡܲܕܥܲܝ̈ܗܘܿܢ. ܘܥܲܠ ܠܸܒ̈ܵܘܵܬ݂ܗܘܿܢ ܐܸܟ݂ܬܿܒ݂ܝܼܘܗܝ. ܘܐܸܗܘܹܐ ܠܗܘܿܢ ܐܸܢܵܐ ܐܲܠܵܗܵܐ. ܘܗܸܢܘܿܢ ܢܸܗܘܘܿܢ ܠܝܼ ܥܲܡܵܐ.

¹¹ܘܠܵܐ ܢܲܠܸܦ ܐ̄ܢܵܫ ܠܒܲܪ ܡܕ݂ܝܼܢ݇ܬܹ݁ܗ ܐܵܦܠܵܐ ܠܐܲܚܘܼܗܝ. ܘܢܹܐܡܲܪ ܕܕܲܥ ܠܡܵܪܝܵܐ. ܡܛܠ ܕܟ݂ܠܗܘܿܢ ܢܸܕ݂ܥܘܼܢܵܢܝ. ܡܸܢ ܙܥܘܿܪܗܘܿܢ ܘܲܥܕ݂ܲܡܵܐ ܠܩܲܫܝܼܫܗܘܿܢ.

¹²ܘܐܹܚܲܣܹܐ ܐܸܢܘܿܢ ܡܸܢ ܥܵܘܠܗܘܿܢ. ܘܲܚܛܵܗܲܝ̈ܗܘܿܢ ܬܘܼܒ݂ ܠܵܐ ܐܸܬܿܕܟܲܪ ܠܗܘܿܢ.

¹³ܒܗܵܝ ܕܐܸܡܲܪ ܚܕ݂ܲܬ݂ܵܐ. ܠܩܲܕ݂ܡܵܝܬܵܐ ܐܲܥܬܿܩܵܗܿ. ܘܐܲܝܢܵܐ ܕܲܥܬܸܩ ܘܲܣܐܸܒ݂. ܩܲܪܝܼܒ݂ ܗܘܼ ܠܲܚܒ݂ܵܠܵܐ.