Read Aramaic Peshita James 1 Bible Online

James 1 - Aramaic Peshita bible

James 1

¹ܝܲܥܩܘܿܒ݂ ܥܲܒ݂ܕܹܗ ܕܐܲܠܵܗܵܐ: ܘܲܕ݂ܡܵܪܲܢ ܝܼܫܘܿܥ ܡܫܝܼܚܵܐ. ܠܬܲܪܬܲܥܣܪܹ̈ܐ ܫܲܪ̈ܒ݂ܵܢ ܕܲܙܪ̈ܝܼܥܵܢ ܒܥܲܡ̈ܡܹܐ. ܫܠܵܡ.

²ܟܠ ܚܲܕ݂ܘܵܐ ܬܸܗܘܹܐ ܠܟ݂ܘܿܢ ܐܲܚܲܝ̈: ܟܲܕ݂ ܬܸܥܠܘܼܢ ܠܢܸܣܝܘܿܢܹ̈ܐ ܡܫܲܚܠܦܹ̈ܐ ܘܣܲܓܝܼ̈ܐܹܐ.

³ܝܵܕ݂ܥܝܼܢ ܐ̄ܢܬܘܿܢ ܓܹܝܪ ܕܒ݂ܘܩܝܵܐ ܕܗܲܝܡܵܢܘܼܬ݂ܵܐ. ܡܲܩܢܹܐ ܠܟ݂ܘܿܢ ܡܣܲܝܒܪܵܢܘܼܬ݂ܵܐ.

⁴ܠܵܗܿ ܕܹܝܢ ܠܲܡܣܲܝܒܪܵܢܘܼܬ݂ܵܐ. ܢܸܗܘܹܐ ܠܵܗܿ ܥܒ݂ܵܕ݂ܵܐ ܡܫܲܡܠܝܵܐ. ܕܬܸܗܘܘܿܢ ܓܡܝܼܪܝܼܢ ܘܲܡܫܲܠܡܵܢܝܼܢ. ܘܲܒ݂ܡܸܕܸܡ ܠܵܐ ܗܘܲܝܬܿܘܿܢ ܚܲܣܝܼܪܝܼܢ.

⁵ܐܸܢ ܐ̄ܢܵܫ ܕܹܝܢ ܡܸܢܟ݂ܘܿܢ ܚܣܝܼܪ ܡܸܢ ܚܸܟ݂ܡܬ݂ܵܐ. ܢܸܫܐܲܠ ܡܸܢ ܐܲܠܵܗܵܐ ܕܝܵܗܹܒ݂ ܠܟ݂ܠ ܦܫܝܼܛܵܐܝܼܬ݂ ܘܠܵܐ ܡܚܲܣܸܕ݂. ܘܡܸܬ݂ܝܲܗܒܵܐ ܠܹܗ.

⁶ܢܸܫܐܲܠ ܕܹܝܢ ܒܗܲܝܡܵܢܘܼܬ݂ܵܐ ܟܲܕ݂ ܠܵܐ ܡܸܬ݂ܦܲܠܲܓ݂. ܗܵܘ ܓܹܝܪ ܕܡܸܬ݂ܦܲܠܲܓ݂. ܕܵܡܹܐ ܠܓܲܠ̈ܠܹܐ ܕܝܲܡܵܐ ܕܫܵܓ݂ܫܵܐ ܠܗܘܿܢ ܪܘܼܚܵܐ.

⁷ܘܠܵܐ ܢܸܣܒܲܪ ܗܵܘ ܒܲܪܢܵܫܵܐ ܕܢܵܣܹܒ݂ ܡܸܕܸܡ ܡܸܢ ܡܵܪܝܵܐ.

⁸ܐܲܝܢܵܐ ܕܲܦܠܝܼܓ݂ ܒܪܸܥܝܵܢܹܗ. ܘܲܫܓ݂ܝܼܫ ܒܟ݂ܠܗܹܝܢ ܐܘܼܪ̈ܚܵܬܹܗ.

⁹ܢܸܫܬܲܒ݂ܗܲܪ ܕܹܝܢ ܐܲܚܵܐ ܡܲܟ݁ܝܼܟ݂ܵܐ ܒܪܘܼܡܪܵܡܹܗ.

¹⁰ܘܥܲܬܿܝܼܪܵܐ ܒܡܘܼܟܵܟܹܗ. ܡܛܠ ܕܐܲܝܟ݂ ܗܲܒܵܒ݂ܵܐ ܕܥܸܣܒܵܐ. ܗܵܟܲܢܵܐ ܥܵܒܲܪ.

¹¹ܕܢܲܚ ܓܹܝܪ ܫܸܡܫܵܐ ܒܚܘܼܡܹܗ ܘܡܵܘܒܸܫ ܠܹܗ ܠܥܸܣܒܵܐ. ܘܗܲܒܵܒܹܗ ܢܵܦܹ̇ܠ. ܘܫܘܼܦܪܵܐ ܕܚܸܙܘܹܗ ܐܵܒܹܕ݂. ܗܵܟܲܢܵܐ ܐܵܦ ܥܲܬܿܝܼܪܵܐ ܚܵܡܹܐ ܒܗܘܼܦܵܟ݂ܵܘ̈ܗܝ.

¹²ܛܘܼܒ݂ܵܘܗܝ ܠܓܲܒ݂ܪܵܐ ܕܲܡܣܲܝܒܲܪ ܢܸܣܝܘܿܢܹ̈ܐ. ܕܡܵܐ ܕܐܸܬ݂ܒܚܲܪ. ܢܵܣܹܒ݂ ܟܠܝܼܠܵܐ ܕܚܲܝܹ̈ܐ: ܗܵܘ ܕܲܡܠܲܟ݂ ܐܲܠܵܗܵܐ ܠܐܲܝܠܹܝܢ ܕܪܵܚܡܝܼܢ ܠܹܗ.

¹³ܠܵܐ ܢܹܐܡܲܪ ܐ̄ܢܵܫ ܟܲܕ݂ ܡܸܬ݂ܢܲܣܹܐ. ܕܡܸܢ ܐܲܠܵܗܵܐ ܡܸܬ݂ܢܲܣܹܐ ܐ̄ܢܵܐ. ܐܲܠܵܗܵܐ ܓܹܝܪ ܠܵܐ ܡܢܲܣܲܝ ܒܒ݂ܝܼ̈ܫܵܬ݂ܵܐ. ܘܗܘܼ ܠܐ̄ܢܵܫ ܠܵܐ ܡܢܲܣܹܐ.

¹⁴ܐܸܠܵܐ ܐ̄ܢܵܫ ܐ̄ܢܵܫ ܡܸܢ ܪܸܓ݁ܬܹܗ ܗܘܼ ܡܸܬ݂ܢܲܣܹܐ ܘܡܸܬ݂ܪܲܓ݂ܪܲܓ݂ ܘܡܸܬ݂ܢܓܸܕ݂.

¹⁵ܘܗܵܕܹܐ ܪܸܓ݁ܬ݂ܵܐ ܒܵܛܢܵܐ ܘܝܵܠܕܵܐ ܚܛܝܼܬ݂ܵܐ. ܚܛܝܼܬ݂ܵܐ ܕܹܝܢ ܡܵܐ ܕܐܸܬ݂ܓܲܡܪܲܬ̤. ܝܵܠܕܵܐ ܡܵܘܬܵܐ.

¹⁶ܠܵܐ ܬܸܛܥܘܿܢ. ܐܲܚܲܝ̈ ܚܲܒܝܼܒܹ̈ܐ.

¹⁷ܟܠ ܡܵܘܗܲܒ݂ܬܵܐ ܛܵܒ݂ܬ݂ܵܐ ܘܲܡܫܲܡܠܲܝܬܵܐ ܡܸܢ ܠܥܸܠ ܢܵܚܬܵܐ. ܡܸܢ ܐܲܒ݂ܵܐ ܕܢܲܗܝܼܪܹ̈ܐ. ܗܵܘ ܕܠܲܝܬܿ ܠܘܵܬܹܗ ܫܘܼܚܠܵܦܵܐ ܡܸܕܸܡ. ܐܵܦܠܵܐ ܛܸܠܵܢܝܼܬ݂ܵܐ ܕܫܘܼܓ݂ܢܵܝܵܐ.

¹⁸ܗܘܸܝܘܼ ܨܒ݂ܵܐ ܘܝܲܠܕܲܢ ܒܡܸܠܬ݂ܵܐ ܕܩܘܼܫܬܵܐ. ܕܢܸܗܘܹܐ ܪܹܫܝܼܬ݂ܵܐ ܕܒܸܪ̈ܝܵܬܹܗ.

¹⁹ܘܐܲܢ̄ܬܿܘܿܢ ܐܲܚܲܝ̈ ܚܲܒܝܼܒܹ̈ܐ. ܟܠܢܵܫ ܡܸܢܟ݂ܘܿܢ ܢܸܗܘܹܐ ܡܣܲܪܗܲܒ݂ ܠܡܸܫܡܲܥ. ܘܡܵܘܚܲܪ ܠܲܡܡܲܠܵܠܘ. ܘܡܵܘܚܲܪ ܠܡܸܪܓܲܙ.

²⁰ܪܘܼܓ݂ܙܹܗ ܓܹܝܪ ܕܓܲܒ݂ܪܵܐ. ܙܲܕܝܼܩܘܼܬ݂ܵܐ ܕܐܲܠܵܗܵܐ ܠܵܐ ܥܵܒܹܿܕ݂.

²¹ܡܛܠ ܗܵܢܵܐ ܐܲܪܚܸܩܘ ܡܸܢܟ݂ܘܿܢ ܟܠܵܗܿ ܛܲܢܦܘܼܬ݂ܵܐ ܘܣܘܿܓ݂ܵܐܐ ܕܒ݂ܝܼܫܘܼܬ݂ܵܐ. ܘܲܒ݂ܡܲܟ݁ܝܼܟ݂ܘܼܬ݂ܵܐ ܩܲܒܸܠܘ ܡܸܠܬ݂ܵܐ ܕܲܢܨܝܼܒ݂ܵܐ ܒܲܟ݂ܝܵܢܲܢ. ܕܗܝܼ ܡܸܫܟܚܵܐ ܕܬܲܚܹܐ ܐܸܢܹܝܢ ܢܲܦ̮ܫܵܬ݂ܟ݂̈ܘܿܢ.

²²ܗܘܵܘ ܕܹܝܢ ܥܵܒ݂ܘܿܕܹ̈ܐ ܕܡܸܠܬ݂ܵܐ ܘܠܵܐ ܫܵܡܘܿܥܹܐ ܒܲܠܚܘܿܕ݂. ܘܠܵܐ ܬܲܛܥܘܿܢ ܢܲܦ̮ܫܵܬ݂ܟ݂̈ܘܿܢ.

²³ܐܸܢ ܐ̄ܢܵܫ ܓܹܝܪ ܢܸܗܘܹܐ ܫܵܡܘܿܥܵܗܿ ܕܡܸܠܬ݂ܵܐ ܘܠܵܐ ܥܵܒ݂ܘܿܕ݂ܵܗܿ. ܗܵܢܵܐ ܕܵܡܹܐ ܠܗܵܘ ܕܲܚܙܵܐ ܐܲܦܵܘ̈ܗܝ ܒܡܲܚܙܝܼܬ݂ܵܐ.

²⁴ܚܙܵܐ ܓܹܝܪ ܢܲܦ̮ܫܹܗ. ܘܲܥܒܲܪ. ܘܲܛܥܵܐ ܕܐܲܝܟܲܢܵܐ ܗܘܵܐ.

²⁵ܟܠ ܕܹܝܢ ܕܚܵܪ ܒܢܵܡܘܿܣܵܐ ܡܫܲܠܡܵܢܵܐ ܕܚܹܐܪܘܼܬ݂ܵܐ ܘܩܵܘܝܼ ܒܹܗ. ܠܵܐ ܗܘܵܐ ܫܵܡܘܿܥܵܐ ܕܫܸܡܥܵܐ ܕܡܸܬܿܛܥܹܐ. ܐܸܠܵܐ ܥܵܒ݂ܘܿܕ݂ܵܐ ܕܲܥܒ݂ܵܕܹ̈ܐ. ܘܗܵܢܵܐ ܛܘܼܒ݂ܵܢܵܐ ܢܸܗܘܹܐ ܒܲܥܒ݂ܵܕܹ̈ܗ.

²⁶ܘܐܸܢ ܐ̄ܢܵܫ ܣܵܒܲܪ ܕܲܡܫܲܡܸܫ ܠܐܲܠܵܗܵܐ. ܘܠܵܐ ܐܵܚܹܕ݂ ܠܸܫܵܢܹܗ. ܐܸܠܵܐ ܡܲܛܥܹܐ ܠܹܗ ܠܸܒܹܗ. ܕܗܵܢܵܐ ܣܪܝܼܩܵܐ ܗܝܼ ܬܸܫܡܸܫܬܹ݁ܗ.

²⁷ܬܸܫܡܸܫܬܵܐ ܓܹܝܪ ܕܟ݂ܝܼܬ݂ܵܐ ܘܩܲܕܝܼܫܬܵܐ ܩܕ݂ܵܡ ܐܲܠܵܗܵܐ ܐܲܒ݂ܵܐ. ܗܵܕܹܐ ܗܝܼ. ܠܡܸܣܥܲܪ ܝܲܬ݂ܡܹ̈ܐ ܘܐܲܪ̈ܡܠܵܬ݂ܵܐ ܒܐܘܼܠܨܵܢܲܝ̈ܗܘܿܢ. ܘܲܠܡܸܛܲܪ ܐ̄ܢܵܫ ܢܲܦ̮ܫܹܗ ܡܸܢ ܥܵܠܡܵܐ. ܕܠܵܐ ܛܘܼܠܫܵܐ.