Read Aramaic Peshita James 3 Bible Online

James 3 - Aramaic Peshita bible

James 3

¹ܠܵܐ ܣܲܓܝܼ̈ܐܹܐ ܡܲܠܦܵܢܹ̈ܐ ܢܸܗܘܘܿܢ ܒܟ݂ܘܿܢ. ܐܲܚܲܝ̈. ܐܸܠܵܐ ܗܘܲܝܬܿܘܿܢ ܝܵܕ݂ܥܝܼܢ. ܕܕ݂ܝܼܢܵܐ ܝܲܬܝܼܪܵܐ ܚܲܝܵܒ݂ܝܼܢ ܚ̄ܢܲܢ.

²ܣܲܓܝܼ̈ܐܵܬ݂ܵܐ ܓܹܝܪ ܡܸܫܬܲܪܥܝܼܢ ܚ̄ܢܲܢ ܟܠܲܢ. ܟܠ ܕܲܒ݂ܡܸܠܬ݂ܵܐ ܠܵܐ ܫܵܪܲܥ. ܗܵܢܵܐ ܐܝܼܬ݂ܵܘܗܝ ܓܲܒ݂ܪܵܐ ܓܡܝܼܪܵܐ. ܕܡܸܫܟܲܚ ܢܫܲܥܒܸܕ݂ ܐܵܦ ܟܠܹܗ ܦܲܓ݂ܪܹܗ.

³ܗܵܐ ܓܹܝܪ ܦܓ݂ܘܼܕܹ̈ܐ ܒܦܘܼܡܵܐ ܕܪ̈ܲܟ݂ܫܵܐ ܪܵܡܹܝܢ ܚ̄ܢܲܢ. ܐܲܝܟ݂ ܕܢܸܫܬܲܥܒܕ݂ܘܼܢ ܠܲܢ. ܘܟ݂ܠܹܗ ܓܘܼܫܡܗܘܿܢ ܡܲܗܦܟ݂ܝܼܢ ܚ̄ܢܲܢ.

⁴ܐܵܦ ܐܸܠܦܹ̈ܐ ܥܲܫ̈ܝܼܢܵܬ݂ܵܐ ܟܲܕ݂ ܕܒ݂ܝܼܪ̈ܵܢ ܠܗܹܝܢ ܪ̈ܘܼܚܹܐ ܩܲܫ̈ܝܵܬ݂ܵܐ. ܡܸܢ ܩܲܝܣܵܐ ܙܥܘܿܪܵܐ ܡܸܬ݂ܢܲܬܿܦܵܢ: ܠܐܲܬܲܪ ܕܚܵܐܲܪ ܨܸܒ݂ܝܵܢܹܗ ܕܗܵܘ ܕܲܡܕ݂ܲܒܲܪ.

⁵ܗܵܟܲܢܵܐ ܐܵܦ ܠܸܫܵܢܵܐ. ܗܲܕܡܵܐ ܗ̄ܘܼ ܙܥܘܿܪܵܐ ܘܡܸܫܬܲܥܠܹܐ. ܐܵܦ ܢܘܼܪܵܐ ܙܥܘܿܪܬܵܐ ܥܵܒܹ̈ܐ ܣܲܓܝܼ̈ܐܹܐ ܡܵܘܩܕ݂ܵܐ.

⁶ܘܠܸܫܵܢܵܐ ܢܘܼܪܵܐ ܗ̄ܘܼ. ܘܥܵܠܡܵܐ ܕܲܚܛܝܼܬ݂ܵܐ ܐܲܝܟ݂ ܥܵܒ݂ܵܐ ܗ̄ܘܼ. ܘܗܘܼ ܠܸܫܵܢܵܐ ܟܲܕ݂ ܐܝܼܬ݂ܵܘܗܝ ܒܗܲܕܵܡܲܝ̈ܢ. ܡܟܲܬܿܡ ܠܹܗ ܠܟ݂ܠܹܗ ܦܲܓ݂ܪܲܢ. ܘܡܵܘܩܸܕ݂ ܝܘܼܒܵܠܹ̈ܐ ܕܫܲܪ̈ܒ݂ܵܬܲܢ ܕܪܵܗܛܝܼܢ ܐܲܝܟ݂ ܓܝܼܓ݂ܠܹ̈ܐ. ܘܝܵܩܹܕ݂ ܐܵܦ ܗܘܼ ܒܢܘܼܪܵܐ.

⁷ܟܠܗܘܿܢ ܓܹܝܪ ܟܝܵܢܹ̈ܐ ܕܚܲܝ̈ܘܵܬ݂ܵܐ ܘܲܕ݂ܦܵܪܲܚܬ݂ܵܐ. ܘܪ̈ܲܚܫܵܐ ܕܝܲܡܵܐ ܘܲܕ݂ܝܲܒ݂ܫܵܐ. ܡܸܫܬܲܥܒܕ݂ܝܼܢ ܠܲܟ݂ܝܵܢܵܐ ܕܐ̄ܢܵܫܘܼܬ݂ܵܐ.

⁸ܠܸܫܵܢܵܐ ܕܹܝܢ ܐ̄ܢܵܫ ܠܵܐ ܐܸܫܟܲܚ ܕܢܸܟ݂ܒܫܝܼܘܗܝ. ܒܝܼܫܬܵܐ ܗܵܕܹܐ (ܒܝܼܫܬܵܐ ܗ݇ܝܼ ܗܵܕܹܐ) ܕܠܵܐ ܡܸܬܿܬܲܟ݂ܣܵܐ. ܡܠܹܐ ܗܘܼ ܣܲܡܵܐ ܕܡܵܘܬܵܐ.

⁹ܒܹܗ ܡܒܲܪܟ݂ܝܼܢ ܚ̄ܢܲܢ ܠܡܵܪܝܵܐ ܘܐܲܒ݂ܵܐ. ܘܒܹܗ ܠܵܝܛܝܼܢ ܚ̄ܢܲܢ ܠܲܒ݂ܢܲܝ̈ܢܵܫܵܐ ܕܒܲܕ݂ܡܘܼܬ݂ܵܐ ܕܐܲܠܵܗܵܐ ܥܒ݂ܝܼܕ݂ܝܼܢ.

¹⁰ܘܡܸܢܹܗ ܡܸܢ ܦܘܼܡܵܐ ܢܵܦ̈ܩܵܢ ܒܘܼܪ̈ܟܵܬ݂ܵܐ ܘܠܵܘ̈ܛܵܬ݂ܵܐ. ܠܵܐ ܘܵܠܹܐ ܐܲܚܲܝ̈. ܕܗܵܠܹܝܢ ܗܵܟܲܢܵܐ ܢܸܣܬܲܥܪ̈ܵܢ.

¹¹ܕܲܠܡܵܐ ܡܸܫܟܚܵܐ ܕܡܸܢ ܚܲܕ݂ ܡܲܒܘܿܥܵܐ. ܢܸܦܩܘܼܢ ܡܲܝ̈ܵܐ ܚ̈ܠܲܝܵܐ ܘܡܲܪܝܼܪܹ̈ܐ.

¹²ܐܵܘ ܕܲܠܡܵܐ ܡܸܫܟܚܵܐ ܬܹܬܵܐ ܐܲܚܲܝ̈. ܕܙܲܝ̈ܬܹܐ ܬܸܥܒܸܿܕ݂. ܐܵܘ ܓܦܸܬܵܐ ܬܹܐܢܹ̈ܐ. ܗܵܟܲܢܵܐ ܐܵܦ ܠܵܐ ܡܲܝ̈ܵܐ ܡܲܠܝܼܚܹ̈ܐ ܡܸܫܟܿܚܝܼܢ. ܕܢܸܬ݂ܥܲܒ݂ܕܘܼܢ ܚ̈ܠܲܝܵܐ.

¹³ܡܲܢܘܼ ܡܸܢܟ݂ܘܿܢ ܕܚܲܟܝܼܡ ܘܲܪܕܹܐ. ܢܚܵܘܹܐ ܥܒ݂ܵܕ݂ܵܘ̈ܗܝ ܒܗܘܼܦܵܟܹ̈ܐ ܫܲܦܝܼܪܹ̈ܐ. ܒܚܸܟ݂ܡܬ݂ܵܐ ܡܲܟ݁ܝܼܟ݂ܬܵܐ.

¹⁴ܐܸܢ ܕܹܝܢ ܚܣܵܡܵܐ ܡܲܪܝܼܪܵܐ ܐܝܼܬ݂ ܒܟ݂ܘܿܢ. ܐܵܘ ܚܸܪܝܵܢܵܐ ܒܠܸܒܲܝ̈ܟ݁ܘܿܢ. ܠܵܐ ܬܸܬ݂ܚܲܬܿܪܘܼܢ ܥܲܠ ܩܘܼܫܬܵܐ ܘܲܬܿܕ݂ܲܓ݁ܠܘܼܢ.

¹⁵ܡܛܠ ܕܗܵܕܹܐ ܚܸܟ݂ܡܬ݂ܵܐ ܡܸܢ ܠܥܸܠ ܠܵܐ ܢܸܚܬܲܬ݂. ܐܸܠܵܐ ܐܝܼܬܹܝܗܿ ܐܲܪܥܵܢܵܝܬܵܐ. ܡܸܢ ܚܘܼܫܵܒܹ̈ܐ ܕܢܲܦ̮ܫܵܐ. ܘܡܸܢ ܫܹܐܕܹ̈ܐ.

¹⁶ܐܲܝܟܵܐ ܓܹܝܪ ܕܐܝܼܬ݂ ܚܣܵܡܵܐ ܘܚܸܪܝܵܢܵܐ. ܬܲܡܵܢ ܐܵܦ ܕܠܘܼܚܝܵܐ ܘܟ݂ܠܡܸܕܸܡ ܕܒ݂ܝܼܫ.

¹⁷ܚܸܟ݂ܡܬ݂ܵܐ ܕܹܝܢ ܕܡܸܢ ܠܥܸܠ. ܕܲܟ݂ܝܵܐ ܗܝܼ ܘܡܲܠܝܵܐ ܫܠܵܡܵܐ. ܘܡܲܟܝܼܟ݂ܵܐ ܘܡܸܫܬܲܡܥܵܢܝܵܐ. ܘܡܲܠܝܵܐ ܪ̈ܲܚܡܹܐ ܘܦܹܐܪܹ̈ܐ ܛܵܒܹ̈ܐ. ܘܲܕ݂ܠܵܐ ܦܵܠܓ݁ܘܼܬ݂ܵܐ ܗܝܼ. ܘܒܲܐܦܹ̈ܐ ܠܵܐ ܢܵܣܒܵܐ.

¹⁸ܦܹܐܪܹ̈ܐ ܕܹܝܢ ܕܙܲܕܝܼܩܘܼܬ݂ܵܐ. ܒܫܲܝܢܵܐ ܡܸܙܕܲܪܥܝܼܢ ܠܐܲܝܠܹܝܢ ܕܥܵܒ݂ܕܝܼܢ ܫܠܵܡܵܐ.