Read Aramaic Peshita James 5 Bible Online

James 5 - Aramaic Peshita bible

James 5

¹ܐܘܿ ܥܲܬܿܝܼܪܹ̈ܐ ܐܲܝܠܸܠܘ ܘܲܒ݂ܟ݂ܵܘ ܥܲܠ ܕܘܼܘܵܢܹ̈ܐ ܕܐܵܬܹܝܢ ܥܠܲܝܟܿܘܿܢ.

²ܥܘܬ݂ܪܟ݂ܘܿܢ ܓܹܝܪ ܐܸܬ݂ܚܲܒܲܠ ܘܲܣܪܝܼ. ܘܡܵܐܢܲܝ̈ܟܿܘܿܢ ܐܸܬ݂ܐܟܸܠܘ ܡܸܢ ܣܵܣܵܐ.

³ܘܕ݂ܲܗܒ݂ܟ݂ܘܿܢ ܘܣܹܐܡܟ݂ܘܿܢ ܐܲܫܚܸܬ݂ ܠܹܗ. ܘܫܘܼܚܬܿܗܘܿܢ ܗܵܘܝܵܐ ܠܣܵܗܕܘܼܬ݂ܵܐ ܥܠܲܝܟܿܘܿܢ. ܘܗܝܼ ܥܬ݂ܝܼܕ݂ܵܐ ܕܬܹܐܟ݂ܘܿܠ ܒܸܣܪܟ݂ܘܿܢ. ܢܘܼܪܵܐ ܟܲܢܸܫܬܿܘܿܢ ܠܟ݂ܘܿܢ ܠܝܵܘ̈ܡܵܬ݂ܵܐ ܐ̄ܚܪ̈ܵܝܹܐ.

⁴ܗܵܐ ܐܲܓ݂ܪܵܐ ܕܦܵܥ̈ܠܹܐ ܕܲܚܨܲܕ݂ܘ ܐܲܪ̈ܥܵܬ݂ܟ݂ܘܿܢ: ܗܵܘ ܕܲܛܠܲܡܬܿܘܿܢ. ܩܵܥܹܐ. ܘܲܓ݂ܥܵܬ݂ܵܐ ܕܚܵܨܘܿܕܹ̈ܐ ܠܸܐܕ݂ܢܵܘ̈ܗܝ ܕܡܵܪܝܵܐ ܨܒ݂ܵܐܘܼܬ݂ ܥܸܠܲܬ̤.

⁵ܒܣܸܡܬܿܘܿܢ ܓܹܝܪ ܥܲܠ ܐܲܪܥܵܐ ܘܐܸܬ݂ܠܲܥܲܒ݂ܬܿܘܿܢ. ܘܬܲܪܣܝܼܢ ܐ݇ܢܬܿܘܿܢ ܦܲܓ݂ܪ̈ܲܝܟ݁ܘܿܢ ܐܲܝܟ݂ ܕܲܠܝܵܘܡܵܐ ܕܢܸܟ݂ܣܬ݂ܵܐ.

⁶ܚܲܝܸܒ݂ܬܿܘܿܢ ܘܲܩܛܲܠܬܿܘܿܢ ܠܙܲܕܝܼܩܵܐ. ܘܠܵܐ ܩܵܡ ܠܘܼܩܒܲܠܟ݂ܘܿܢ.

⁷ܐܲܢ̄ܬܿܘܿܢ ܕܹܝܢ ܐܲܚܲܝ̈. ܐܲܓܲܪܘ ܪܘܼܚܟ݂ܘܿܢ ܥܕ݂ܲܡܵܐ ܠܡܹܐܬ݂ܝܼܬܹܗ ܕܡܵܪܝܵܐ. ܐܲܝܟ݂ ܐܲܟܵܪܵܐ ܕܲܡܣܲܟܹܐ ܠܦܹܐܪܹ̈ܐ ܝܲܩܝܼܪܹ̈ܐ ܕܐܲܪܥܹܗ. ܘܡܲܓܲܪ ܪܘܼܚܹܗ ܥܠܲܝܗܘܿܢ. ܥܕ݂ܲܡܵܐ ܕܢܵܣܹܒ݂ ܡܸܛܪܵܐ ܒܟ݂ܝܼܪܵܝܵܐ ܘܲܠܩܝܼܫܵܝܵܐ.

⁸ܗܵܟܲܢܵܐ ܐܵܦ ܐܲܢ̄ܬܿܘܿܢ ܐܲܓܲܪܘ ܪܘܼܚܟ݂ܘܿܢ. ܘܠܸܒܵܘܵܬ݂ܟ݂̈ܘܿܢ ܫܲܪܲܪܘ. ܩܸܪܒܲܬ݂ ܠܵܗܿ ܓܹܝܪ ܡܹܐܬ݂ܝܼܬܹܗ ܕܡܵܪܲܢ.

⁹ܠܵܐ ܬܸܬܲܢܚܘܼܢ ܚܲܕ݂ ܥܲܠ ܚܲܕ݂ ܐܲܚܲܝ̈. ܕܠܵܐ ܬܸܬܿܕ݂ܝܼܢܘܼܢ. ܗܵܐ ܓܹܝܪ ܕܝܼܢܵܐ ܩܕ݂ܵܡ ܬܲܪܥܵܐ ܩܵܐܹܡ.

¹⁰ܕܡܘܼܬ݂ܵܐ ܠܲܢܒ݂ܝܹ̈ܐ ܣܲܒ݂ܘ ܠܟ݂ܘܿܢ ܐܲܚܲܝ̈. ܠܡܲܓ݁ܪܲܬ݂ ܪܘܼܚܵܐ ܕܐܘܼܠܨܵܢܲܝ̈ܟ݁ܘܿܢ. ܗܵܢܘܿܢ ܕܡܲܠܸܠܘ ܒܲܫܡܹܗ ܕܡܵܪܝܵܐ.

¹¹ܗܵܐ ܓܹܝܪ ܝܵܗܒܝܼܢ ܚ̄ܢܲܢ ܛܘܼܒ݂ܵܐ ܠܐܲܝܠܹܝܢ ܕܣܲܝܒܲܪܘ. ܫܡܲܥܬܿܘܿܢ ܡܣܲܝܒܪܵܢܘܼܬܹܗ ܕܐܝܼܘܿܒ݂. ܘܚܲܪܬ݂ܵܐ ܕܲܥܒܲܕ݂ ܠܹܗ ܡܵܪܝܵܐ. ܚܙܲܝܬܿܘܿܢ. ܡܛܠ ܕܲܡܪܲܚܡܵܢ ܗܘܼ ܡܵܪܝܵܐ ܘܲܡܪܲܚܦܵܢ.

¹²ܩܕ݂ܵܡ ܟܠܡܸܕܸܡ ܕܹܝܢ ܐܲܚܲܝ̈. ܠܵܐ ܗܘܲܝܬܿܘܿܢ ܝܵܡܹܝܢ. ܠܵܐ ܒܲܫܡܲܝܵܐ ܘܠܵܐ ܒܐܲܪܥܵܐ. ܐܵܦܠܵܐ ܒܡܵܘܡܵܬ݂ܵܐ ܐ̄ܚܪܹܬ݂ܵܐ. ܐܸܠܵܐ ܬܸܗܘܹܐ ܡܸܠܲܬ݂ܟ݂ܘܿܢ. ܐܹܝܢ ܐܹܝܢ ܘܠܵܐ ܠܵܐ. ܕܠܵܐ ܬܸܬ݂ܚܲܝܒ݂ܘܼܢ ܬܚܹܝܬ݂ ܕܝܼܢܵܐ.

¹³ܘܐܸܢ ܐ̄ܢܵܫ ܡܸܢܟ݂ܘܿܢ ܢܸܗܘܹܐ ܒܐܘܼܠܨܵܢܵܐ. ܢܸܗܘܹܐ ܡܨܲܠܹܐ. ܘܐܸܢ ܚܵܕܹܐ. ܢܸܗܘܹܐ ܡܙܲܡܲܪ.

¹⁴ܘܐܸܢ ܟܪܝܼܗ. ܢܸܩܪܹܐ ܠܩܲܫܝܼܫܹ̈ܐ ܕܥܹܕܬܵܐ ܘܲܢܨܲܠܘܼܢ ܥܠܵܘܗܝ. ܘܢܸܡܫܚܘܼܢܹܗ ܡܸܫܚܵܐ ܒܲܫܡܹܗ ܕܡܵܪܲܢ.

¹⁵ܘܲܨܠܘܿܬ݂ܵܐ ܕܗܲܝܡܵܢܘܼܬ݂ܵܐ ܡܲܚܠܡܵܐ ܠܹܗ ܠܗܵܘ ܕܲܟ݂ܪܝܼܗ. ܘܲܡܩܝܼܡ ܠܹܗ ܡܵܪܲܢ. ܘܐܸܢ ܚܛܵܗܹ̈ܐ ܥܒ݂ܝܼܕ݂ܝܼܢ ܠܹܗ. ܡܸܫܬܲܒ݂ܩܝܼܢ ܠܹܗ.

¹⁶ܗܘܲܝܬܿܘܿܢ ܕܹܝܢ ܡܵܘܕܹܝܢ ܣܲܟ݂ܠܘܵܬ݂ܟ݂̈ܘܿܢ ܚܲܕ݂ ܠܚܲܕ݂. ܘܲܗܘܲܝܬܿܘܿܢ ܡܨܲܠܹܝܢ ܚܲܕ݂ ܥܲܠ ܚܲܕ݂. ܕܬܸܬ݂ܐܲܣܘܿܢ. ܪܲܒ ܗܘܼ ܓܹܝܪ ܚܲܝܠܵܗܿ ܕܲܨܠܘܿܬ݂ܵܐ ܐܲܝܕ݂ܵܐ ܕܙܲܕܝܼܩܵܐ ܡܨܲܠܹܐ ܠܵܗܿ.

¹⁷ܐܵܦ ܐܹܠܝܼܵܐ ܒܲܪܢܵܫܵܐ ܗܘܵܐ ܚܵܫܘܿܫܵܐ ܐܲܟ݂ܘܵܬܲܢ. ܘܨܲܠܝܼ ܕܠܵܐ ܢܸܚܘܿܬ݂ ܡܸܛܪܵܐ ܥܲܠ ܐܲܪܥܵܐ. ܘܠܵܐ ܢܚܸܬ݂ ܬܠܵܬ݂ ܫܢ̈ܝܼܢ ܘܸܫܬܵܐ ܝܲܪ̈ܚܝܼܢ.

¹⁸ܘܬ݂ܘܼܒ݂ ܨܲܠܝܼ. ܘܲܫܡܲܝܵܐ ܝܲܗ̄ܒ݂ܘ ܡܸܛܪܵܐ. ܘܐܲܪܥܵܐ ܝܸܗܒܲܬ݂ ܦܹܐܪܹ̈ܝܗ݁.

¹⁹ܐܲܚܲܝ̈. ܐܸܢ ܐ̄ܢܵܫ ܡܸܢܟ݂ܘܿܢ ܢܸܛܥܹܐ ܡܸܢ ܐܘܼܪܚܵܐ ܕܩܘܼܫܬܵܐ. ܘܢܲܦܢܹܝܘܗܝ ܐ̄ܢܵܫ ܡܸܢ ܛܵܥܝܘܼܬܹܗ.

²⁰ܢܸܕܲܥ ܕܗܵܘ ܕܡܲܗܦܸܟ݂ ܠܚܲܛܵܝܵܐ ܡܸܢ ܛܵܥܝܘܼܬ݂ܵܐ ܕܐܘܼܪܚܹܗ. ܡܲܚܹܐ ܢܲܦ̮ܫܹܗ ܡܸܢ ܡܵܘܬܵܐ. ܘܥܵܛܹܐ ܣܘܿܓ݂ܵܐܐ ܕܲܚܛܵܗܵܘ̈ܗܝ.