Read Aramaic Peshita 1 Peter 1 Bible Online

1 Peter 1 - Aramaic Peshita bible

1 Peter 1

¹ܦܲܛܪܘܿܣ ܫܠܝܼܚܵܐ ܕܝܼܫܘܿܥ ܡܫܝܼܚܵܐ. ܠܲܓ݂̈ܒܲܝܵܐ ܘܬ݂ܵܘܬܵܒܹ̈ܐ ܕܲܙܪܝܼܥܝܼܢ ܒܦܘܼܢܛܘܿܣ. ܘܲܒ݂ܓ݂ܵܠܵܛܝܼܵܐ. ܘܲܒ݂ܩܵܦܵܕ݂ܘܿܩܝܼܵܐ ܘܒ݂ܵܐܣܝܼܵܐ. ܘܲܒ݂ܒܹܬ݂ܘܿܢܝܼܵܐ.

²ܐܲܝܠܹܝܢ ܕܐܸܬ݂ܓ݁ܒ݂ܝܼܘ ܒܲܡܩܲܕܡܘܼܬ݂ ܝܼܕ݂ܲܥܬܹܗ ܕܐܲܠܵܗܵܐ ܐܲܒ݂ܵܐ ܒܩܲܕܝܼܫܘܼܬ݂ܵܐ ܕܪܘܼܚܵܐ. ܕܢܸܗܘܘܿܢ ܠܡܲܫܡܲܥܬ݂ܵܐ ܘܠܲܪܣܵܣ ܕܡܹܗ ܕܝܼܫܘܿܥ ܡܫܝܼܚܵܐ. ܛܲܝܒܘܼܬ݂ܵܐ ܘܲܫܠܵܡܵܐ ܢܸܣܓܹ݁ܐ ܠܘܵܬ݂ܟ݂ܘܿܢ.

³ܡܒܲܪܲܟ݂ ܗ݇ܘܼ ܐܲܠܵܗܵܐ ܐܲܒ݂ܘܼܗܝ ܕܡܵܪܲܢ ܝܼܫܘܿܥ ܡܫܝܼܚܵܐ. ܗܵܘ ܕܒܲܚܢܵܢܹܗ ܣܲܓܿܝܼܐܵܐ ܐܵܘܠܕܲܢ ܡܸܢ ܕܪܹܫ. ܒܲܩܝܵܡܬܹ݁ܗ ܕܝܼܫܘܿܥ ܡܫܝܼܚܵܐ. ܠܣܲܒ݂ܪܵܐ ܕܚܲܝܹ̈ܐ.

⁴ܘܲܠܝܵܪܬܘܼܬ݂ܵܐ ܕܠܵܐ ܡܸܬ݂ܚܲܒܠܵܐ ܘܠܵܐ ܡܸܬܿܛܲܢܦܵܐ ܘܠܵܐ ܚܵܡܝܵܐ. ܗܵܝ ܕܲܡܛܲܝܒ݂ܵܐ ܠܟ݂ܘܿܢ ܒܲܫܡܲܝܵܐ.

⁵ܟܲܕ݂ ܢܛܝܼܪܝܼܢ ܐ̄ܢܬܘܿܢ ܒܚܲܝܠܵܐ ܕܐܲܠܵܗܵܐ ܘܲܒ݂ܗܲܝܡܵܢܘܼܬ݂ܵܐ. ܠܚܲܝܹ̈ܐ ܕܲܡܛܲܝܒ݂ܝܼܢ ܕܢܸܬ݂ܓ݁ܠܘܿܢ ܠܙܲܒ݂ܢܹ̈ܐ ܐ̄ܚܪ̈ܵܝܹܐ:

⁶ܕܲܒ݂ܗܘܿܢ ܬܸܚܕܘܿܢ ܠܥܵܠܲܡ. ܐܵܦܸܢ ܒܗܵܢܵܐ ܙܲܒ݂ܢܵܐ ܩܲܠܝܼܠ ܡܸܬ݁ܬ݁ܥܝܼܩܝܼܢ ܐ̄ܢܬܘܿܢ ܒܢܸܣܝܘܿܢܹ̈ܐ ܡܫܲܚܠܦܹ̈ܐ ܕܥܵܕܹܝܢ ܥܠܲܝܟܿܘܿܢ.

⁷ܐܲܝܟܲܢܵܐ ܕܒ݂ܘܼܚܪܵܢܵܐ ܕܗܲܝܡܵܢܘܼܬ݂ܟ݂ܘܿܢ ܢܸܬ݂ܚܙܹܐ. ܕܲܡܝܲܬܲܪ ܡܸܢ ܕܲܗܒ݂ܵܐ ܣܢܝܼܢܵܐ ܕܐܸܬ݂ܒܩܝܼ ܒܢܘܼܪܵܐ. ܠܬܸܫܒܿܘܿܚܬܵܐ ܘܠܐܝܼܩܵܪܵܐ ܘܲܠܩܘܼܠܵܣܵܐ. ܒܓܸܠܝܵܢܹܗ ܕܝܼܫܘܿܥ ܡܫܝܼܚܵܐ.

⁸ܗܵܘ ܕܠܵܐ ܚܙܲܝܬܿܘܿܢܵܝܗܝ ܘܡܲܚܒ݂ܝܼܢ ܐ̄ܢܬܘܿܢ ܠܹܗ. ܘܲܒ݂ܗܲܝܡܵܢܘܼܬܹܗ ܪܵܘܙܝܼܢ ܐ̄ܢܬܘܿܢ ܒܚܲܕ݂ܘܼܬ݂ܵܐ ܡܫܲܒܲܚܬܵܐ ܕܠܵܐ ܡܸܬ݂ܡܲܠܠܵܐ.

⁹ܕܲܬ݂ܩܲܒܠܘܼܢ ܦܘܼܪܥܵܢܵܐ ܕܗܲܝܡܵܢܘܼܬ݂ܟ݂ܘܿܢ. ܚܲܝܹ̈ܐ ܕܢܲܦ̮ܫܵܬ݂ܟ݂̈ܘܿܢ.

¹⁰ܗܵܢܘܿܢ ܚܲܝܹ̈ܐ ܕܥܲܩܸܒ݂ܘ ܗ̄ܘܼܵܘ ܥܠܲܝܗܘܿܢ ܢܒ݂ܝܹ̈ܐ: ܟܲܕ݂ ܐܸܬ݂ܢܲܒܝܼܘ ܥܲܠ ܛܲܝܒܘܼܬ݂ܵܐ ܕܲܥܬ݂ܝܼܕ݂ܵܐ ܗܘܸܵܬ݂ ܕܬܸܬ݂ܝܼܗܸܒ݂ ܠܟ݂ܘܿܢ.

¹¹ܘܲܒ݂ܨܵܘ ܕܒܲܐܝܢܵܐ ܙܲܒ݂ܢܵܐ ܡܚܵܘܝܵܐ ܘܡܲܣܗܕ݂ܵܐ ܪܘܼܚܹܗ ܕܲܡܫܝܼܚܵܐ ܕܥܵܡܪܵܐ ܒܗܘܿܢ. ܕܲܥܬ݂ܝܼܕ݂ܝܼܢ ܚܲܫܵܘ̈ܗܝ ܕܲܡܫܝܼܚܵܐ ܘܬܸܫܒ݁ܘܿܚܬܹ݁ܗ ܕܡܸܢ ܒܵܬܲܪܟܸܢ.

¹²ܘܐܸܬ݂ܓ݁ܠܝܼ ܠܗܘܿܢ ܟܠ ܕܒ݂ܵܨܹܝܢ ܗ̄ܘܼܵܘ. ܡܛܠ ܕܠܵܘ ܠܢܲܦ̮ܫܗܘܿܢ ܒܵܥܹܝܢ ܗ̄ܘܼܵܘ. ܐܸܠܵܐ ܠܲܢ ܕܝܼܠܲܢ ܡܸܬ݂ܢܲܒܹܝܢ ܗ̄ܘܼܵܘ. ܐܲܝܠܹܝܢ ܕܗܵܫܵܐ ܐܸܬ݂ܓ݁ܠܝܼ ܠܟ݂ܘܿܢ. ܒܝܲܕ݂ ܐܲܝܠܹܝܢ ܕܣܲܒܲܪܢܵܟ݂ܘܿܢ. ܒܪܘܼܚܵܐ ܕܩܘܼܕ݂ܫܵܐ ܕܐܸܫܬܲܕܲܪ ܡܸܢ ܫܡܲܝܵܐ. ܕܲܒ݂ܗܹܝܢ ܒܗܵܠܹܝܢ ܡܸܬ݂ܪܲܓ݂ܪܓ݂ܝܼܢ ܐܵܦ ܡܲܠܲܐܟܹ̈ܐ. ܕܲܢܕ݂ܝܼܩܘܼܢ.

¹³ܡܛܠ ܗܵܢܵܐ ܚܙܘܿܩܘ ܚܲܨܹ̈ܐ ܕܬܲܪ̈ܥܝܵܬ݂ܟ݂ܘܿܢ. ܘܐܸܬ݁ܬ݁ܥܝܼܪܘ ܓܡܝܼܪܵܐܝܼܬ݂. ܘܣܲܒܲܪܘ ܥܲܠ ܚܲܕ݂ܘܼܬ݂ܵܐ ܕܐܵܬ݂ܝܵܐ ܠܟ݂ܘܿܢ. ܒܓܸܠܝܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

¹⁴ܐܲܝܟ݂ ܒ̈ܢܲܝܵܐ ܡܸܫܬܲܡܥܵܢܹ̈ܐ. ܘܠܵܐ ܬܸܫܬܵܘܬܿܦܘܼܢ ܬܘܼܒ݂ ܠܲܪ̈ܓ݂ܝܼܓ݂ܵܬ݂ܟ݂ܘܿܢ ܩܲܕ݂̈ܡܵܝܵܬ݂ܵܐ: ܐܲܝܠܹܝܢ ܕܪܵܓ݁ܝܼܢ ܗܘܲܝܬܿܘܿܢ ܕܠܵܐ ܒܝܼܕ݂ܲܥܬ݂ܵܐ.

¹⁵ܐܸܠܵܐ ܗܘܵܘ ܩܲܕܝܼܫܝܼܢ ܒܟ݂ܠܗܘܿܢ ܗܘܦܵܟܲܝ̈ܟ݁ܘܿܢ: ܐܲܝܟ݂ ܕܩܲܕܝܼܫ ܗ݇ܘܼ ܡܲܢ ܕܲܩܪܵܟ݂ܘܿܢ.

¹⁶ܡܛܠ ܕܲܟ݂ܬ݂ܝܼܒ݂. ܕܲܗܘܲܝܬܿܘܿܢ ܩܲܕܝܼܫܝܼܢ ܐܲܝܟܲܢܵܐ ܕܐܵܦ ܐܸܢܵܐ ܩܲܕܝܼܫ ܐ̄ܢܵܐ.

¹⁷ܘܐܸܢ ܗܘܼ ܕܐܲܒ݂ܵܐ ܩܵܪܹܝܢ ܐܢ̄ܬܘܿܢ. ܗܵܘ ܕܠܲܝܬܿ ܩܕ݂ܵܡܵܘܗܝ ܡܲܣܲܒ݂ ܒܐܲܦܹ̈ܐ: ܘܕ݂ܵܐܹܢ ܠܟ݂ܠܢܵܫ ܐܲܝܟ݂ ܥܒ݂ܵܕ݂ܵܘ̈ܗܝ. ܒܕ݂ܸܚܠܬ݂ܵܐ ܐܸܬܿܕܲܒܲܪܘ ܒܙܲܒ݂ܢܵܐ ܗܵܢܵܐ ܕܬ݂ܵܘܬܵܒ݂ܘܼܬ݂ܟ݂ܘܿܢ.

¹⁸ܟܲܕ݂ ܝܵܕ݂ܥܝܼܢ ܐ̄ܢܬܘܿܢ ܕܠܵܐ ܒܟܸܣܦܵܐ ܕܒ݂ܵܠܹܐ ܘܠܵܐ ܒܕ݂ܲܗܒ݂ܵܐ. ܐܸܬ݂ܦܪܸܩܬܿܘܿܢ ܡܸܢ ܥܒ݂ܵܕ݂ܲܝ̈ܟ݁ܘܿܢ ܣܪ̈ܝܼܩܹܐ: ܗܵܢܘܿܢ ܕܩܲܒܸܠܬܿܘܿܢ ܡܸܢ ܐܲܒ݂ܵܗܲܝ̈ܟܿܘܿܢ.

¹⁹ܐܸܠܵܐ ܒܲܕ݂ܡܵܐ ܝܲܩܝܼܪܵܐ ܕܐܸܡܪܵܐ ܕܡܘܼܡܵܐ ܘܛܘܼܠܫܵܐ ܠܲܝܬܿ ܒܹܗ. ܕܐܝܼܬ݂ܵܘܗܝ ܡܫܝܼܚܵܐ.

²⁰ܗܵܘ ܕܲܡܩܲܕܲܡ ܗ̄ܘܵܐ ܦܪܝܼܫ ܠܵܗ݁ ܠܗܵܕܹܐ. ܡܸܢ ܩܕ݂ܵܡ ܬܲܪ̈ܡܝܵܬܹܗ ܕܥܵܠܡܵܐ. ܘܐܸܬ݂ܓ݁ܠܝܼ ܒܐܲܚܪ̈ܵܝܲܬܿܗܘܿܢ (ܒܚܲܪܬ݂ܗܘܿܢ) ܕܙܲܒ݂ܢܹ̈ܐ ܡܛܠܵܬ݂ܟ݂ܘܿܢ.

²¹ܐܲܝܠܹܝܢ ܕܒ݂ܐܝܼܕ݂ܗ ܗܲܝܡܸܢܬܿܘܿܢ ܒܐܲܠܵܗܵܐ ܗܵܘ ܕܐܲܩܝܼܡܹܗ ܡܸܢ ܒܹܝܬ݂ ܡܝܼܬܹ̈ܐ: ܘܝܲܗ̄ܒ݂ ܠܹܗ ܫܘܼܒ݂ܚܵܐ. ܕܗܲܝܡܵܢܘܼܬ݂ܟ݂ܘܿܢ ܘܣܲܒ݂ܪܟ݂ܘܿܢ ܢܸܗܘܹܐ ܥܲܠ ܐܲܠܵܗܵܐ.

²²ܟܲܕ݂ ܢܸܗܘ̈ܝܵܢ ܩܲܕܝܼ̈ܫܵܢ ܢܲܦ̮ܫܵܬ݂ܟ݂̈ܘܿܢ ܒܡܸܫܬܲܡܥܵܢܘܼܬܹܗ ܕܲܫܪܵܪܵܐ. ܘܢܸܗܘ̈ܝܵܢ ܡܲܠ̈ܝܵܢ ܚܘܼܒܵܐ ܕܠܵܐ ܡܲܣܲܒ݂ ܒܐܲܦܹ̈ܐ. ܕܡܸܢ ܠܸܒܵܐ ܕܲܟ݂ܝܵܐ ܘܲܓ݂ܡܝܼܪܵܐ. ܬܸܗܘܘܿܢ ܡܲܚܒ݂ܝܼܢ ܚܲܕ݂ ܠܚܲܕ݂.

²³ܐܲܝܟ݂ ܐ̄ܢܵܫܵܐ ܕܡܸܢ ܕܪܹܫ ܐܸܬ݂ܝܼܠܸܕ݁ܬܿܘܿܢ. ܠܵܐ ܡܸܢ ܙܲܪܥܵܐ ܕܒ݂ܵܠܹܐ. ܐܸܠܵܐ ܡܸܢ ܐܲܝܢܵܐ ܕܠܵܐ ܒܵܠܹܐ. ܒܡܸܠܬ݂ܵܐ ܚܲܝܬ݂ܵܐ ܕܐܲܠܵܗܵܐ ܕܩܲܝܵܡܵܐ ܠܥܵܠܲܡ.

²⁴ܡܛܠ ܕܟ݂ܠ ܒܣܲܪ ܥܡܝܼܪܵܐ. ܘܟ݂ܠܵܗܿ ܝܵܐܝܘܼܬܹܗ ܐܲܝܟ݂ ܥܘܼܦܝܵܐ ܕܚܲܩܠܵܐ. ܝܵܒܹ݁ܫ ܥܡܝܼܪܵܐ ܘܚܵܡܹܐ ܥܘܼܦܝܵܐ.

²⁵ܘܡܸܠܬܹܗ ܕܐܲܠܵܗܲܢ ܩܲܝܵܡܵܐ ܠܥܵܠܡܝܼܢ. ܘܗܵܕܹܐ ܗܝܼ ܡܸܠܬ݂ܵܐ ܗܵܝ ܕܐܸܣܬܲܒܲܪܬܿܘܿܢ.