Read Aramaic Peshita 1 Peter 5 Bible Online

1 Peter 5 - Aramaic Peshita bible

1 Peter 5

¹ܒܵܥܹܐ ܐ̄ܢܵܐ ܕܹܝܢ ܡܸܢ ܩܲܫܝܼܫܹ̈ܐ ܕܐܝܼܬ݂ ܒܟ݂ܘܿܢ. ܐܸܢܵܐ ܩܲܫܝܼܫܵܐ ܚܲܒ݂ܪܟ݂ܘܿܢ. ܘܣܵܗܕܵܐ ܕܚܲܫܵܘ̈ܗܝ ܕܲܡܫܝܼܚܵܐ. ܘܫܵܘܬܵܦܵܐ ܕܫܘܼܒ݂ܚܹܗ ܗܵܘ ܕܲܥܬ݂ܝܼܕ݂ ܕܢܸܬ݂ܓ݁ܠܹܐ.

²ܪܥܵܘ ܡܲܪܥܝܼܬ݂ܵܐ ܕܐܲܠܵܗܵܐ ܕܡܲܫܠܡܵܐ ܠܟ݂ܘܿܢ. ܘܲܣܥܘܿܪܘ ܪܘܼܚܵܢܵܐܝܼܬ݂. ܠܵܐ ܒܲܩܛܝܼܪܵܐ. ܐܸܠܵܐ ܒܨܸܒ݂ܝܵܢܵܐ. ܠܵܐ ܒܝܘܼܬ݂ܪ̈ܵܢܹܐ ܛܲܢ̈ܦܹܐ. ܐܸܠܵܐ ܡܸܢ ܟܠܹܗ ܠܸܒܟ݂ܘܿܢ.

³ܠܵܐ ܐܲܝܟ݂ ܡܵܪ̈ܲܝܵܐ ܕܡܲܪܥܝܼܬ݂ܵܐ. ܐܸܠܵܐ ܐܲܝܟ݂ ܕܬܸܗܘܘܿܢ ܠܗܘܿܢ ܕܡܘܼܬ݂ܵܐ ܫܲܦܝܼܪܬܵܐ.

⁴ܕܟܲܕ݂ ܢܸܬ݂ܓ݁ܠܹܐ ܪܲܒ ܪ̈ܵܥܵܘܵܬ݂ܵܐ. ܬܿܩܲܒܠܘܼܢ ܡܸܢܹܗ ܟܠܝܼܠܵܐ ܕܫܘܼܒ݂ܚܵܐ ܕܠܵܐ ܚܵܡܹܐ.

⁵ܘܐܲܢ̄ܬܿܘܿܢ ܥܠܲܝܡܹ̈ܐ. ܐܸܫܬܲܥܒܲܕ݂ܘ ܠܩܲܫܝܼܫܲܝ̈ܟ݁ܘܿܢ. ܘܐܸܬ݂ܥܲܛܦܘ ܚܝܼܨܵܐܝܼܬ݂ ܡܲܟ݁ܝܼܟ݂ܘܬ݂ ܪܸܥܝܵܢܵܐ ܠܘܵܬ݂ ܚܕ݂ܵܕܹ̈ܐ. ܡܛܠ ܕܐܲܠܵܗܵܐ ܣܲܩܘܼܒ݂ܠܵܐ ܗ̄ܘܼ ܕܐܲܝܠܹܝܢ ܕܡܸܬ݁ܬ݁ܪܝܼܡܝܼܢ. ܘܲܠܡܲܟ݁ܝܼܟܹ̈ܐ ܝܵܗܹܒ݂ ܛܲܝܒܘܼܬ݂ܵܐ.

⁶ܐܸܬ݂ܡܲܟܲܟ݂ܘ ܗܵܟܹܝܠ ܬܚܹܝܬ݂ ܐܝܼܕ݂ܗ ܬܲܩܝܼܦܬܵܐ ܕܐܲܠܵܗܵܐ. ܕܗܝܼ ܬܪܝܼܡܟ݂ܘܿܢ ܒܙܲܒ݂ܢܵܐ ܕܙܵܕܹܩ.

⁷ܘܨܸܦܬ݂ܟ݂ܘܿܢ ܟܠܵܗܿ ܫܕ݂ܵܘ ܥܲܠ ܐܲܠܵܗܵܐ. ܕܠܹܗ ܒܛܝܼܠ ܥܠܲܝܟܿܘܿܢ.

⁸ܐܸܬ݁ܬ݁ܥܝܼܪܘ (ܘܐܸܬ݁ܬ݁ܥܝܼܪܘ) ܘܲܥܗܲܕ݂ܘ. ܡܛܠ ܕܲܒ݂ܥܸܠܕܒ݂ܵܒ݂ܟ݂ܘܿܢ ܣܵܛܵܢܵܐ ܐܲܝܟ݂ ܐܲܪܝܵܐ ܢܵܗܹܡ ܘܲܡܗܲܠܸܟ݂. ܘܒ݂ܵܥܹܐ. ܕܲܠܡܲܢܘܼ ܢܸܒ݂ܠܲܥ.

⁹ܩܘܼܡܘ ܗܵܟܹܝܠ ܠܩܘܒ݂ܠܹܗ. ܟܲܕ݂ ܡܫܲܪܪܝܼܢ ܐ̄ܢܬܘܿܢ ܒܗܲܝܡܵܢܘܼܬ݂ܵܐ. ܘܕ݂ܲܥܘ ܕܐܵܦ ܥܲܠ ܐܲܚܲܝ̈ܟ݁ܘܿܢ ܕܲܒ݂ܥܵܠܡܵܐ. ܗܸܢܘܿܢ ܗܵܠܹܝܢ ܚܲܫܹ̈ܐ ܥܵܪܨܝܼܢ.

¹⁰ܐܲܠܵܗܵܐ ܕܹܝܢ ܕܛܲܝܒܘܼܬ݂ܵܐ. ܗܵܘ ܕܲܩܪܵܢ ܠܫܘܼܒ݂ܚܹܗ ܕܲܠܥܵܠܲܡ. ܒܝܲܕ݂ ܝܼܫܘܿܥ ܡܫܝܼܚܵܐ. ܗܵܘ ܕܝܲܗ̄ܒ݂ ܠܲܢ. ܕܟܲܕ݂ ܢܣܲܝܒܲܪ ܗܵܠܹܝܢ ܐܘܼܠܨܵܢܹ̈ܐ ܙܥܘܿܪܹ̈ܐ. ܕܢܸܬ݂ܚܲܝܲܠ ܘܢܸܫܬܲܪܲܪ ܘܢܸܬ݂ܩܲܝܲܡ ܒܹܗ ܠܥܵܠܲܡ.

¹¹ܕܠܹܗ ܫܘܼܒ݂ܚܵܐ ܘܐܘܼܚܕ݂ܵܢܵܐ ܘܐܝܼܩܵܪܵܐ. ܠܥܵܠܲܡ ܥܵܠܡܝܼܢ. ܐܵܡܹܝܢ.

¹²ܗܵܠܹܝܢ ܙܥܘܿܪ̈ܝܵܬ݂ܵܐ ܐܲܝܟ݂ ܕܣܵܒܲܪ ܐ̄ܢܵܐ ܟܸܬ݂ܒܹܬ݂ ܠܟ݂ܘܿܢ. ܒܝܲܕ݂ ܣܸܠܘܿܢܘܿܣ ܐܲܚܵܐ ܡܗܲܝܡܢܵܐ. ܘܲܡܦܵܣ ܐ̄ܢܵܐ ܘܣܵܗܹܕ݂ ܐ̄ܢܵܐ. ܕܗܵܕܹܐ ܗܝܼ ܛܲܝܒܘܼܬ݂ܵܐ ܫܲܪܝܼܪܬܵܐ ܕܐܲܠܵܗܵܐ. ܗܵܕܹܐ ܕܩܵܝܡܝܼܢ ܐ̄ܢܬܘܿܢ ܒܵܗܿ.

¹³ܫܵܐܠܵܐ ܫܠܵܡܟ݂ܘܿܢ ܥܹܕܬܵܐ ܓܒ݂ܝܼܬ݂ܵܐ ܕܲܒ݂ܒ݂ܵܒܹܠ. ܘܡܲܪܩܘܿܣ ܒܹܪܝ.

¹⁴ܫܲܐܠܘ ܒܲܫܠܵܡܵܐ ܚܲܕ݂ ܕܚܲܕ݂ ܒܢܘܼܫܩܬ݂ܵܐ ܩܲܕܝܼܫܬܵܐ. ܫܠܵܡܵܐ ܥܲܡ ܟܠܗܘܿܢ ܐܲܝܠܹܝܢ ܕܒܲܡܫܝܼܚܵܐ ܐܸܢܘܿܢ. ܐܵܡܹܝܢ.