Read Aramaic Peshita 2 Peter 1 Bible Online

2 Peter 1 - Aramaic Peshita bible

2 Peter 1

¹ܫܸܡܥܘܿܢ ܦܲܛܪܘܿܣ ܥܲܒ݂ܕܵܐ ܘܲܫܠܝܼܚܵܐ ܕܝܼܫܘܿܥ ܡܫܝܼܚܵܐ. ܠܐܲܝܠܹܝܢ ܕܲܠܗܲܝܡܵܢܘܼܬ݂ܵܐ ܫܵܘܝܲܬ݂ ܒܐܝܼܩܵܪܵܐ ܥܲܡܲܢ ܐܸܫܬܿܘܝܼܘ. ܒܙܲܕܝܼܩܘܼܬ݂ܵܐ ܕܡܵܪܲܢ ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ.

²ܛܲܝܒܘܼܬ݂ܵܐ ܘܲܫܠܵܡܵܐ ܢܸܣܓܹ݁ܐ ܠܟ݂ܘܿܢ. ܒܫܘܼܘܕܵܥܵܐ ܕܡܵܪܲܢ ܝܼܫܘܿܥ ܡܫܝܼܚܵܐ.

³ܐܲܝܟ݂ ܡܲܢ ܕܟ݂ܠܗܹܝܢ ܐܲܝܠܹܝܢ ܕܐܝܼܬܲܝܗܹܝܢ ܕܚܲܝܠܵܐ ܐܲܠܵܗܵܝܵܐ: ܠܘܵܬ݂ ܚܲܝܹ̈ܐ ܘܕ݂ܸܚܠܲܬ݂ ܐܲܠܵܗܵܐ ܝܲܗ̄ܒ݂. ܒܝܲܕ݂ ܫܘܼܘܕܵܥܵܐ ܕܗܵܘ ܕܲܩܪܵܐ ܠܲܢ. ܒܬܸܫܒܿܘܿܚܬܵܐ ܕܝܼܠܹܗ ܘܲܡܝܲܬܿܪܘܼܬ݂ܵܐ.

⁴ܕܒ݂ܐܝܼܕ݂ܲܝ̈ܗܹܝܢ ܫܘܼܘܕܵܝܹ̈ܐ ܪܵܘܪ̈ܒܹܐ ܘܝܲܩܝܼܪܹ̈ܐ ܠܟ݂ܘܿܢ ܝܲܗ̄ܒ݂. ܕܲܒ݂ܝܲܕ݂ ܗܵܠܹܝܢ ܬܸܗܘܘܿܢ ܫܵܘܬܵܦܹ̈ܐ ܕܲܟ݂ܝܵܢܵܐ ܐܲܠܵܗܵܝܵܐ. ܟܲܕ݂ ܥܵܪܩܝܼܢ ܐ̄ܢܬܘܿܢ ܡܸܢ ܚܒ݂ܵܠܵܐ ܕܲܪ̈ܓ݂ܝܼܓ݂ܵܬ݂ܵܐ ܕܲܒ݂ܥܵܠܡܵܐ.

⁵ܘܗܝܼ ܕܹܝܢ ܗܵܕܹܐ ܟܲܕ݂ ܫܩܵܠ ܛܲܥܢܵܐ ܟܠܹܗ ܡܲܥܠܝܼܢ ܐ݇ܢܬܘܿܢ. ܐܵܘܣܸܦܘ ܥܲܠ ܗܲܝܡܵܢܘܼܬ݂ܟ݂ܘܿܢ. ܡܝܲܬܿܪܘܼܬ݂ܵܐ. ܥܲܠ ܕܹܝܢ ܡܝܲܬܿܪܘܼܬ݂ܵܐ. ܝܼܕ݂ܲܥܬ݂ܵܐ.

⁶ܥܲܠ ܕܹܝܢ ܝܼܕ݂ܲܥܬ݂ܵܐ. ܡܚܲܡܣܢܵܢܘܼܬ݂ܵܐ. ܥܲܠ ܕܹܝܢ ܡܚܲܡܣܢܵܢܘܼܬ݂ܵܐ. ܡܣܲܝܒܪܵܢܘܼܬ݂ܵܐ. ܥܲܠ ܕܹܝܢ ܡܣܲܝܒܪܵܢܘܼܬ݂ܵܐ. ܕܸܚܠܲܬ݂ ܐܲܠܵܗܵܐ.

⁷ܥܲܠ ܕܹܝܢ ܕܸܚܠܲܬ݂ ܐܲܠܵܗܵܐ. ܪܸܚܡܲܬ݂ ܐܲܚܘܼܬ݂ܵܐ. ܥܲܠ ܕܹܝܢ ܪܸܚܡܲܬ݂ ܐܲܚܘܼܬ݂ܵܐ. ܚܘܼܒܵܐ.

⁸ܗܵܠܹܝܢ ܓܹܝܪ ܟܲܕ݂ ܫܟ݂ܝܼ̈ܚܵܢ ܠܟ݂ܘܿܢ ܘܝܲܬܝܼܪ̈ܵܢ. ܠܵܐ ܗ̄ܘܵܐ ܒܲܛܝܼ̈ܠܹܐ ܐܵܦܠܵܐ ܕܠܵܐ ܦܹܐܪܹ̈ܐ ܡܩܝܼ̈ܡܵܢ ܠܟ݂ܘܿܢ. ܒܫܘܼܘܕܵܥܹܗ ܕܡܵܪܲܢ ܝܼܫܘܿܥ ܡܫܝܼܚܵܐ.

⁹ܗܵܘ ܓܹܝܪ ܕܠܵܐ ܫܟ݂ܝܼ̈ܚܵܢ ܠܹܗ ܗܵܠܹܝܢ. ܣܲܡܝܵܐ ܐܝܼܬ݂ܵܘܗܝ ܕܠܵܐ ܚܵܙܹܐ. ܕܲܛܥܵܐ ܕܘܼܟܵܝܵܐ ܕܲܚܛܵܗܵܘ̈ܗܝ ܩܲܕ݂ܡܵܝܹ̈ܐ.

¹⁰ܘܥܲܠ ܗܵܝ ܝܲܬܝܼܪܵܐܝܼܬ݂ ܐܲܚܲܝ̈. ܝܼܨܲܦܘ ܕܲܒ݂ܝܲܕ݂ ܥܒ݂ܵܕ݂ܲܝ̈ܟ݁ܘܿܢ ܛܵܒܹ̈ܐ: ܩܪܵܝܬܿܟ݂ܘܿܢ ܘܲܓ݂ܒ݂ܝܼܬ݂ܟ݂ܘܿܢ (ܘܓܲܒ݂ܝܘܼܬ݂ܟ݂ܘܿܢ) ܡܫܲܪܲܪܬܵܐ ܬܸܥܒ݁ܕ݂ܘܼܢ. ܟܲܕ݂ ܓܹܝܪ ܗܵܠܹܝܢ ܥܵܒ݂ܕ݁ܝܼܢ ܐܢ̄ܬܘܿܢ. ܠܵܐ ܡܬ݂ܘܿܡ ܡܸܫܬܲܪܥܝܼܢ ܐܢ̄ܬܘܿܢ.

¹¹ܗܵܟܲܢܵܐ ܓܹܝܪ ܥܲܬܿܝܼܪܵܐܝܼܬ݂ ܡܸܬ݂ܝܲܗ̄ܒܵܐ ܠܟ݂ܘܿܢ. ܡܲܥܲܠܬܵܐ ܕܡܲܠܟܘܼܬ݂ܵܐ ܕܲܠܥܵܠܲܡ ܕܡܵܪܲܢ ܘܦܵܪܘܿܩܲܢ. ܝܼܫܘܿܥ ܡܫܝܼܚܵܐ.

¹²ܘܥܲܠ ܗܵܕܹܐ ܠܵܐ ܡܲܡܐܸܢ ܐ̄ܢܵܐ (ܡܵܐܢܵܐ ܠܝܼ). ܡܸܢ ܕܡܲܥܗܸܕ݂ ܐ̄ܢܵܐ ܠܟ݂ܘܿܢ (ܕܐܲܥܗܸܕ݂ ܠܟ݂ܘܿܢ) ܐܲܡܝܼܢܵܐܝܼܬ݂ ܥܲܠ ܗܵܠܹܝܢ. ܟܲܕ݂ ܛܵܒ݂ ܐܵܦ ܝܵܕ݂ܥܝܼܢ ܐ̄ܢܬܘܿܢ ܘܲܣܡܝܼܟ݂ܝܼܢ ܐ̄ܢܬܘܿܢ ܥܲܠ ܫܪܵܪܵܐ ܗܵܢܵܐ.

¹³ܕܟܹܐܢܵܐ ܕܹܝܢ ܐܸܣܬܲܒ݂ܪܲܬ݂ ܠܝܼ. ܕܲܟ݂ܡܵܐ ܕܐܝܼܬܲܝ ܒܦܲܓ݂ܪܵܐ ܗܵܢܵܐ. ܐܲܥܝܼܪܟ݂ܘܿܢ ܒܥܘܼܗܕܵܢܵܐ.

¹⁴ܟܲܕ݂ ܝܵܕ݂ܲܥ ܐ̄ܢܵܐ. ܕܥܘܼܢܕܵܢܵܐ ܕܦܲܓ݂ܪܝ (ܕܥܘܼܢܕܵܢܝ ܡ݂ܢ ܡܲܫܟܢܵܐ ܗܵܢܵܐ) ܒܲܥܓܲܠ ܗܵܘܹܐ. ܐܲܝܟܲܢܵܐ ܕܐܵܦ ܡܵܪܲܢ ܝܼܫܘܿܥ ܡܫܝܼܚܵܐ ܐܵܘܕܥܲܢܝ.

¹⁵ܝܵܨܹܦ ܐ̄ܢܵܐ ܕܹܝܢ. ܕܐܵܦ ܐܲܡܝܼܢܵܐܝܼܬ݂ ܗ̄ܘܵܐ ܐܝܼܬ݂ ܠܟ݂ܘܿܢ (ܬܸܗܘܹܐ ܠܟ݂ܘܿܢ). ܕܐܵܦ ܡܸܢ ܒܵܬܲܪ ܡܲܦܩܵܢܵܐ ܕܝܼܠܝ ܥܘܼܗܕܵܢܵܐ ܕܗܵܠܹܝܢ ܬܸܗܘܘܿܢ ܥܵܒ݂ܕܝܼܢ.

¹⁶ܠܵܐ ܗ̄ܘܵܐ ܓܹܝܪ ܟܲܕ݂ ܒܵܬܲܪ ܡܲܬ݂̈ܠܹܐ ܕܲܥܒ݂ܝܼܕ݂ܝܼܢ ܒܐܘܼܡܵܢܘܼܬ݂ܵܐ ܐܵܙܠܝܼܢ ܚ̄ܢܲܢ. ܐܵܘܕܲܥܢܵܟ݂ܘܿܢ ܚܲܝܠܹܗ ܘܡܹܐܬ݂ܝܼܬܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܐܸܠܵܐ ܟܲܕ݂ ܚܲܙܵܝܹ̈ܐ ܗ̄ܘܲܝܢ ܕܪܲܒܘܼܬ݂ܵܐ ܕܝܼܠܹܗ (ܕܪܲܒܘܼܬܹܗ).

¹⁷ܟܲܕ݂ ܓܹܝܪ ܢܣܲܒ݂ ܡܸܢ ܐܲܠܵܗܵܐ ܐܲܒ݂ܵܐ ܐܝܼܩܵܪܵܐ ܘܬܸܫܒܿܘܿܚܬܵܐ: ܟܲܕ݂ ܩܵܠܵܐ ܐܸܬ݂ܵܐ ܠܹܗ ܕܐܲܝܟ݂ ܗܵܢܵܐ ܡܸܢ ܬܸܫܒܿܘܿܚܬܵܐ ܦܲܐܝܲܬ݂ ܒܪܲܒܘܼܬ݂ܵܗ݁: ܕܗܵܢܵܘ ܒܹܪܝ ܗܵܘ ܚܲܒܝܼܒ݂ܵܐ ܗܵܘ ܕܒܹܗ ܐܸܨܛܒ݂ܝܼܬ݂.

¹⁸ܐܵܦ ܚܢܲܢ ܠܹܗ ܠܗܵܢܵܐ ܩܵܠܵܐ ܫܡܲܥܢܲܢ ܡܸܢ ܫܡܲܝܵܐ ܕܐܸܬ݂ܵܐ ܠܹܗ. ܟܲܕ݂ ܐܝܼܬܲܝܢ ܗ̄ܘܲܝܢ ܥܲܡܹܗ ܒܛܘܼܪܵܐ ܩܲܕܝܼܫܵܐ.

¹⁹ܘܐܝܼܬ݂ ܠܲܢ ܕܫܲܪܝܼܪܵܐ ܐܵܦ ܡܸܠܬ݂ܵܐ ܕܲܢܒ݂ܝܼܘܼܬ݂ܵܐ. ܗܵܝ ܕܫܲܦܝܼܪ ܥܵܒ݂ܕܝܼܢ ܐܢ̄ܬܘܿܢ. ܟܲܕ݂ ܒܵܗܿ ܚܵܝܪܝܼܢ ܐܢ̄ܬܘܿܢ. ܐܲܝܟ݂ ܕܒܲܫܪܵܓ݂ܵܐ ܕܡܲܢܗܲܪ ܒܐܲܬ݂ܪܵܐ ܥܲܡܘܼܛܵܐ. ܥܕ݂ܲܡܵܐ ܕܐܝܼܡܵܡܵܐ ܢܸܢܗܲܪ. ܘܫܸܡܫܵܐ ܢܸܕ݂ܢܲܚ ܒܠܸܒܵܘܵܬ݂ܟ݂̈ܘܿܢ.

²⁰ܟܲܕ݂ ܗܵܕܹܐ ܠܘܼܩܕ݂ܲܡ ܝܵܕ݂ܥܝܼܢ ܐܢ̄ܬܘܿܢ. ܕܟ݂ܠ ܢܒ݂ܝܼܘܼܬ݂ܵܐ ܫܪܵܝܵܐ ܕܲܟ݂ܬ݂ܵܒ݂ܵܐ ܕܝܼܠܵܗܿ ܠܵܐ ܗܵܘܝܵܐ.

²¹ܠܵܐ ܗ̄ܘܵܐ ܓܹܝܪ ܒܨܸܒ݂ܝܵܢܵܐ ܕܒܲܪܢܵܫܵܐ. ܐܸܬܲܬܸ ܡܸܢ ܡܬ݂ܘܿܡ ܢܒ݂ܝܼܘܼܬ݂ܵܐ. ܐܸܠܵܐ ܟܲܕ݂ ܡܸܢ ܪܘܼܚܵܐ ܩܲܕܝܼܫܵܐ ܡܸܬ݂ܢܲܓ݂ܕܝܼܢ. ܡܲܠܸܠܘ ܩܲܕܝܼܫܹ̈ܐ ܒܢܲܝ̈ܢܵܫܵܐ ܕܐܲܠܵܗܵܐ.