Read Aramaic Peshita 2 Peter 2 Bible Online

2 Peter 2 - Aramaic Peshita bible

2 Peter 2

¹ܗܘܵܘ ܕܹܝܢ ܐܵܦ ܢܒ݂ܝܹ̈ܐ ܕܲܓܵܠܹ̈ܐ ܒܥܲܡܵܐ. ܐܲܝܟ݂ ܕܐܵܦ ܒܟ݂ܘܿܢ ܢܸܗܘܘܿܢ ܡܲܠܦܵܢܹ̈ܐ ܕܲܓܵܠܹ̈ܐ ܐܲܝܠܹܝܢ ܕܡܲܥܠܝܼܢ ܗܹܪܹ̈ܣܝܼܵܣ ܕܐܲܒ݂ܕ݂ܵܢܵܐ. ܘܲܒ݂ܡܵܪܵܐ ܕܲܙܒܲܢ ܐܸܢܘܿܢ ܟܵܦܪܝܼܢ. ܟܲܕ݂ ܡܲܝܬܿܝܼܢ ܥܲܠ ܢܲܦ̮ܫܗܘܿܢ ܐܲܒ݂ܕܵܢܵܐ ܡܣܲܪܗܒ݂ܵܐ.

²ܘܣܲܓܝܼ̈ܐܹܐ ܢܹܐܙܠ̄ܘܼܢ ܒܵܬܲܪ ܛܲܢܦܘܼܬ݂ܵܐ ܕܝܼܠܗܘܿܢ. ܗܵܠܹܝܢ ܕܡܛܠܵܬ݂ܗܘܿܢ ܐܘܼܪܚܵܐ ܕܲܫܪܵܪܵܐ ܬܸܬ݂ܓܲܕܲܦ.

³ܘܲܒ݂ܥܵܠܘܿܒ݂ܘܼܬ݂ܵܐ ܘܲܒ݂ܡܸܠܹ̈ܐ ܕܒܸܕ݂ܝܵܐ (ܘܲܒ݂ܠܲܥܒ݁ܘܼܬ݂ܵܐ ܒܡܸܠܹ̈ܐ ܘܒܸܕ݂ܝܵܐ) ܢܸܬܿܬܲܓ݁ܪܘܼܢ ܒܟ݂ܘܿܢ ܗܵܠܹܝܢ ܕܕ݂ܝܼܢܗܘܿܢ ܡܸܢ ܩܕ݂ܝܼܡ ܠܵܐ ܒܵܛܹܠ. ܘܐܲܒ݂ܕܵܢܗܘܿܢ ܠܵܐ ܢܵܐܹܡ.

⁴ܐܸܢ ܓܹܝܪ ܐܲܠܵܗܵܐ ܥܲܠ ܡܲܠܲܐܟܹ̈ܐ ܕܲܚܛܵܘ ܠܵܐ ܚܵܣ݂. ܐܸܠܵܐ ܒܫܸܫ̈ܠܵܬ݂ܵܐ ܕܥܲܡܛܵܢܵܐ ܥܲܓܸ݁ܢ ܐܸܢܘܿܢ ܒܬܲܚ̈ܬܵܝܵܬ݂ܵܐ: ܘܐܲܫܠܸܡ ܐܸܢܘܿܢ ܕܢܸܬ݂ܢܲܛܪܘܼܢ ܠܕ݂ܝܼܢܵܐ (ܠܕ݂ܝܼܢܵܐ ܕܫܘܼܢܵܩܵܐ).

⁵ܘܥܲܠ ܥܵܠܡܵܐ ܩܲܕ݂ܡܵܝܵܐ ܠܵܐ ܚܵܣ݂. ܐܸܠܵܐ ܠܢܘ݁ܚ ܕܲܬ݂ܡܵܢܝܵܐ ܟܵܪܘܿܙܵܐ ܕܟܹܐܢܘܼܬ݂ܵܐ ܢܛܲܪ. ܟܲܕ݂ ܛܵܘܦܵܢܵܐ ܥܲܠ ܥܵܠܡܵܐ ܕܪ̈ܲܫܝܼܥܹܐ ܐܲܝܬܿܝܼ.

⁶ܘܟܲܕ݂ ܠܲܡܕ݂ܝܼ̈ܢܵܬ݂ܵܐ ܕܲܣܕ݂ܘܿܡ ܘܲܕ݂ܥܵܡܘܿܪܵܐ ܐܵܘܩܸܕ݂. ܘܒܲܗܦܘܼܟ݂ܝܵܐ ܚܲܝܸܒ݂ ܐܸܢܹܝܢ: ܟܲܕ݂ ܬܲܚܘܝܼܬ݂ܵܐ ܠܪ̈ܲܫܝܼܥܹܐ ܕܲܥܬ݂ܝܼܕ݂ܝܼܢ ܕܢܸܗܘܘܿܢ ܣ̣ܵܡ.

⁷ܐܵܦ ܠܠܘܿܛ ܙܲܕܝܼܩܵܐ ܕܡܸܬ݂ܩܲܦܲܚ ܗ̄ܘܵܐ ܡܸܢ ܗܘܼܦܵܟ݂ܵܐ ܕܲܒ݂ܛܲܢܦܘܼܬ݂ܵܐ ܕܗܵܠܹܝܢ ܕܲܕ݂ܠܵܐ ܢܵܡܘܿܣܵܐ ܐܝܼܬܲܝܗܘܿܢ ܗ̄ܘ̣ܵܘ ܦܲܨܝܼ.

⁸ܒܲܚܙܵܬ݂ܵܐ ܓܹܝܪ ܘܲܒ݂ܫܸܡܥܵܐ ܟܲܕ݂ ܥܵܡܲܪ ܗ̄ܘܵܐ ܟܹܐܢܵܐ ܗܵܘ ܒܲܝܢܵܬ݂ܗܘܿܢ. ܝܘܿܡ ܡܸܢ ܝܘܿܡ ܠܢܲܦ̮ܫܹܗ ܙܲܕܝܼܩܬܵܐ ܒܲܥܒ݂ܵܕܹ̈ܐ ܕܠܵܐ ܢܵܡܘܿܣ ܡܫܲܢܸܩ ܗ̄ܘܵܐ.

⁹ܝܵܕ݂ܲܥ ܗܘܼ ܡܵܪܝܵܐ ܕܢܸܦܪܘܿܩ ܡܸܢ ܐܘܼܠܨܵܢܵܐ ܠܐܲܝܠܹܝܢ ܕܕ݂ܵܚܠܝܼܢ ܠܹܗ. ܠܥܵܘܵܠܹ̈ܐ ܕܹܝܢ ܠܝܵܘܡܵܐ ܕܕ݂ܝܼܢܵܐ ܟܲܕ݂ ܡܸܫܬܲܢܩܝܼܢ ܢܸܛܲܪ.

¹⁰ܝܲܬܝܼܪܵܐܝܼܬ݂ ܕܹܝܢ ܠܐܲܝܠܹܝܢ ܕܒܵܬܲܪ ܒܸܣܪܵܐ ܒܪܸܓ݁ܬ݂ܵܐ ܕܛܲܡܐܘܼܬ݂ܵܐ ܐܵܙܠ̄ܝܼܢ. ܘܥܲܠ ܡܵܪܘܼܬ݂ܵܐ ܡܒܲܣܪܝܼܢ. ܡܲܪ̈ܵܚܹܐ ܘܲܡܫܲܩ̈ܠܹܐ. ܕܡܸܢ ܬܸܫܒܿܘܿܚܬܵܐ ܠܵܐ ܙܵܝܥܝܼܢ ܟܲܕ݂ ܡܓܲܕܦܝܼܢ.

¹¹ܐܲܝܟܵܐ ܕܡܲܠܲܐܟܹ̈ܐ ܕܲܒ݂ܚܲܝܠܵܐ ܘܲܒ݂ܥܘܼܫܢܵܐ ܪܵܘܪܒ݂ܝܼܢ ܡܸܢܗܘܿܢ. ܠܵܐ ܡܲܝܬܹܿܝܢ ܥܠܲܝܗܘܿܢ ܡܸܢ ܡܵܪܝܵܐ ܕܝܼܢܵܐ ܕܓ݂ܘܼܕܵܦܵܐ.

¹²ܗܵܠܹܝܢ ܕܹܝܢ ܕܐܲܝܟ݂ ܚܲܝ̈ܘܵܬ݂ܵܐ ܚܲܪ̈ܫܵܬ݂ܵܐ ܗ̄ܘܼܵܘ ܒܲܟ݂ܝܵܢܵܐ ܠܚܲܪܒܵܐ ܘܠܲܚܒ݂ܵܠܵܐ. ܟܲܕ݂ ܒܐܲܝܠܹܝܢ ܕܠܵܐ ܝܵܕ݂ܥܝܼܢ ܡܓܲܕܦܝܼܢ. ܒܲܚܒ݂ܵܠܵܐ ܕܝܼܠܗܘܿܢ ܢܸܬ݂ܚܲܒܠܘܼܢ.

¹³ܟܲܕ݂ ܐܲܝܠܹܝܢ ܕܗܵܘܹܐ ܒܗܘܿܢ ܥܵܘܠܵܐ. ܐܲܓ݂ܪܵܐ ܕܥܵܘܠܵܐ( ܟܲܕ݂ ܢܵܣܒܝܼܢ ܐܲܓ݂ܪܵܐ ܕܥܵܘܠܵܐ) ܗܲܢܝܼܐܘܼܬ݂ܵܐ ܚܫܝܼܒ݂ ܠܗܘܿܢ. ܒܘܼܣܵܡܵܐ ܕܲܗܘܵܐ ܒܐܝܼܡܵܡܵܐ (ܒܘܼܣܵܡܵܐ ܕܝܵܘܡܵܐ). ܡܟܲܬܿܡܹ̈ܐ ܘܡܲܠܝܲܝ̈ ܡܘܼܡܹ̈ܐ. ܕܟܲܕ݂ ܡܸܬ݂ܒܲܣܡܝܼܢ ܒܲܢ̈ܝܵܚܵܬ݂ܗܘܿܢ ܡܸܬ݂ܦܲܢܩܝܼܢ. (ܒܲܢ̈ܝܵܚܵܬ݂ܗܘܿܢ. ܒܡܸܫܬܘܼܬ݂ܵܐ ܥܲܡܟ݂ܘܿܢ) ܡܸܬ݂ܦܲܢܩܝܼܢ.

¹⁴ܟܲܕ݂ ܥܲܝܢܹ̈ܐ ܐܝܼܬ݂ ܠܗܘܿܢ ܕܡܲܠ̈ܝܵܢ ܓܵܘܪܵܐ ܘܲܚܛܵܗܹ̈ܐ ܕܠܵܐ ܡܵܘܦܹܝܢ. ܟܲܕ݂ ܡܫܲܕܠܝܼܢ ܠܢܲܦ̮̈ܫܵܬ݂ܵܐ ܕܠܵܐ ܣܡ̈ܝܼܟ݂ܵܢ. ܘܠܸܒܵܐ ܕܲܡܕ݂ܲܪܲܫ ܒܥܵܠܘܿܒ݂ܘܼܬ݂ܵܐ (ܒܠܲܥܒ݁ܘܼܬ݂ܵܐ) ܐܝܼܬ݂ ܠܗܘܿܢ. ܒ̈ܢܲܝܵܐ ܕܠܵܘܛܬ݂ܵܐ.

¹⁵ܕܟܲܕ݂ ܫܒܲܩܘ ܐܘܼܪܚܵܐ ܬܪܝܼܨܬܵܐ. ܫܓ݂ܵܘ ܘܐܸܙܲܠܘ ܒܐܘܼܪܚܵܐ ܕܒܸܠܥܲܡ ܒܲܪ ܒܥܘܿܪ. ܗܵܘ ܕܐܲܓ݂ܪܵܐ ܕܥܵܘܠܵܐ ܐܲܚܸܒ݂.

¹⁶ܡܲܟ݁ܣܵܢܘܼܬ݂ܵܐ ܕܹܝܢ ܕܲܗܘܵܬ݂ ܠܹܗ ܠܡܸܬ݂ܥܲܒ݂ܪܵܢܘܼܬܹܗ. ܐܲܬܵܢܵܐ ܕܠܵܐ ܩܵܠܵܐ. ܕܲܒ݂ܩܵܠܵܐ ܕܲܒ݂ܢܲܝ̈ܢܵܫܵܐ ܡܲܠܠܲܬ݂ ܟܠܵܬ݂ ܠܫܵܛܝܘܼܬܹܗ ܕܲܢܒ݂ܝܼܵܐ.

¹⁷ܗܵܠܹܝܢ ܐܸܢܘܿܢ ܡܥܝܼܢܹ̈ܐ ܕܠܵܐ ܡܲܝ̈ܵܐ. ܥܢܵܢܹ̈ܐ ܕܡܸܢ ܥܲܠܥܵܠܵܐ ܡܸܬ݂ܪ̈ܲܕ݂ܦܵܢ. ܗܵܠܹܝܢ ܕܥܲܡܛܵܢܵܐ ܕܚܸܫܘܿܟ݂ܵܐ ܢܛܝܼܪ ܠܗܘܿܢ.

¹⁸ܟܲܕ݂ ܓܹܝܪ ܓܘܼܢܚܵܐ ܕܲܣܪܝܼܩܘܼܬ݂ܵܐ ܡܡܲܠܠܝܼܢ. ܡܫܲܕܠܝܼܢ ܒܲܪ̈ܓ݂ܝܼܓ݂ܵܬ݂ܵܐ ܛܲܢ̈ܦܵܬ݂ܵܐ ܕܒܸܣܪܵܐ. ܠܐܲܝܠܹܝܢ ܕܒܲܡܠܹܐ ܩܲܠܝܼܠ ܥܵܪܩܝܼܢ ܡܸܢ ܐܲܝܠܹܝܢ ܕܲܒ݂ܛܵܥܝܘܼܬ݂ܵܐ ܡܸܬ݂ܗܲܦܟ݂ܝܼܢ.

¹⁹ܘܚܹܐܪܘܼܬ݂ܵܐ ܠܗܘܿܢ ܡܸܫܬܵܘܕܹܝܢ. ܟܲܕ݂ ܗܸܢܘܿܢ ܥܲܒ݂ܕܹ̈ܐ ܐܝܼܬܲܝܗܘܿܢ ܕܲܚܒ݂ܵܠܵܐ. ܠܗܵܘ ܓܹܝܪ ܡܸܕܸܡ ܕܐ̄ܢܵܫ ܙܟܸܐ ܠܹܗ (ܙܟܸܐ ܡܸܢܹܗ). ܠܗܵܢܵܐ ܐܵܦ ܡܫܲܥܒܲܕ݂.

²⁰ܐܸܢ ܓܹܝܪ ܟܲܕ݂ (ܐܸܢ ܓܹܝܪ) ܥܪܲܩܘ ܡܸܢ ܛܲܢ̈ܦܘܵܬܹܗ ܕܥܵܠܡܵܐ ܒܫܘܼܘܕܵܥܹܗ ܕܡܵܪܲܢ ܝܼܫܘܿܥ ܡܫܝܼܚܵܐ ܘܦܵܪܘܿܩܲܢ. ܒܗܹܝܢ ܒܗܵܠܹܝܢ ܟܲܕ݂ ܡܸܬ݂ܥܲܪܙܠܝܼܢ ܬܘܼܒ݂ ܡܸܙܕܟܹܝܢ. ܗܘܸܵܬ݂ ܠܵܗܿ ܚܲܪܬ݂ܗܘܿܢ. ܕܒ݂ܝܼܫܵܐ ܡܸܢ ܩܲܕ݂ܡܵܝܬܵܐ.

²¹ܦܲܩܵܚ ܗ̄ܘܵܐ ܠܗܘܿܢ ܓܹܝܪ ܕܠܵܐ ܢܸܫܬܵܘܕܥܘܼܢ ܠܐܘܼܪܚܵܐ ܕܙܲܕܝܼܩܘܼܬ݂ܵܐ. ܐܵܘ ܕܟܲܕ݂ ܐܸܫܬܵܘܕܲܥܘ ܠܒ݂ܵܬ݂ܪܵܐ (ܠܒܸܣܬܪܵܐ) ܢܸܗܦܟ݂ܘܿܢ ܡܸܢ ܦܘܼܩܕܵܢܵܐ ܩܲܕܝܼܫܵܐ ܕܐܸܫܬܿܠܸܡ ܠܗܘܿܢ.

²²ܓܕ݂ܲܫ ܠܗܘܿܢ ܕܹܝܢ ܗܵܠܹܝܢ (ܓܕ݂ܲܫ ܠܗܘܿܢ ܕܹܝܢ) ܕܡܲܬ݂ܠܵܐ ܫܲܪܝܼܪܵܐ. ܕܟܲܠܒܵܐ (ܟܲܠܒܵܐ) ܕܗܵܦܹܟ݂ ܥܲܠ ܬܝܘܿܒܹܗ. ܘܲܚܙܝܼܪܬܵܐ (ܚܙܝܼܪܬܵܐ) ܕܲܣܚܵܬ̤ ܒܥܘܼܪܓܵܠܵܐ ܕܲܣܝܵܢܵܐ.