Read Aramaic Peshita 2 Peter 3 Bible Online

2 Peter 3 - Aramaic Peshita bible

2 Peter 3

¹ܗܵܕܹܐ ܡܸܢ ܟܲܕܘܼ ܚܲܒܝܼܒܲܝ̈. ܐܸܓܲܪܬܵܐ ܕܬܲܪܬܹܿܝܢ ܟܵܬܹܒ݂ ܐ̄ܢܵܐ ܠܟ݂ܘܿܢ. ܗܵܠܹܝܢ ܕܲܒ݂ܗܹܝܢ ܡܥܝܼܪ ܐ̄ܢܵܐ ܒܥܘܼܗܕܵܢܵܐ ܠܪܸܥܝܵܢܟ݂ܘܿܢ ܫܲܦܝܵܐ.

²ܕܬܸܬܥܗܕ݂ܘܼܢ ܠܡܸܠܹ̈ܐ ܕܩܲܕܸܡ ܐܸܬ݂ܐܡܲܪ ܡܸܢ ܢܒ݂ܝܹ̈ܐ ܩܲܕܝܼܫܹ̈ܐ: ܘܲܠܦܘܼܩܕܵܢܹܗ ܕܡܵܪܲܢ ܘܦܵܪܘܿܩܲܢ ܕܲܒ݂ܝܲܕ݂ ܫܠܝܼܚܹ̈ܐ:

³ܟܲܕ݂ ܗܵܕܹܐ ܠܘܼܩܕ݂ܲܡ ܝܵܕ݂ܥܝܼܢ ܐܢ̄ܬܘܿܢ. ܕܢܹܐܬ݂ܘܿܢ ܒܚܲܪܬ݂ܵܐ ܕܝܵܘ̈ܡܵܬ݂ܵܐ ܡܒܲܙܚܵܢܹ̈ܐ ܕܲܡܒܲܙܚܝܼܢ ܟܲܕ݂ ܐܲܝܟ݂ ܪ̈ܓ݂ܝܼܓ݂ܵܬ݂ܵܐ ܕܝܼܠܗܘܿܢ ܡܗܲܠܟ݂ܝܼܢ

⁴ܘܐܵܡܪܝܼܢ. ܕܐܲܝܟܵܐ ܐܝܼܬ݂ܵܘܗܝ ܡܘܼܠܟܵܢܵܐ ܕܡܹܐܬ݂ܝܼܬܹܗ. ܡܸܢ ܟܲܕ݂ ܓܹܝܪ ܐܲܒ݂̈ܵܗܵܬܲܢ ܫܟܸܒ݂ܘ. ܟܠܡܸܕܸܡ ܗܵܟܲܢܵܐ ܡܟܲܬܲܪ. ܡܸܢ ܫܘܼܪܵܝܵܗܿ ܕܲܒ݂ܪܝܼܬ݂ܵܐ.

⁵ܛܵܥܝܵܐ ܠܗܘܿܢ ܓܹܝܪ ܗܵܕܹܐ ܟܲܕ݂ ܨܵܒܹܝܢ. ܕܲܫܡܲܝܵܐ ܐܝܼܬܲܝܗܘܿܢ ܗ̄ܘܼܵܘ ܡܸܢ ܩܕ݂ܝܼܡ ܘܐܲܪܥܵܐ. ܡܸܢ ܡܲܝ̈ܵܐ ܘܲܒ݂ܝܲܕ݂ ܡܲܝ̈ܵܐ ܩܵܡܲܬ݂. ܒܡܸܠܬ݂ܵܐ ܕܐܲܠܵܗܵܐ.

⁶ܗܵܠܹܝܢ ܕܒ݂ܐܝܼܕ݂ܲܝ̈ܗܘܿܢ ܥܵܠܡܵܐ ܕܗܵܝܕܹܝܢ ܛܵܦ̣ ܒܡܲܝ̈ܵܐ. ܘܐܸܒܲܕ݂.

⁷ܫܡܲܝܵܐ ܕܹܝܢ ܕܗܵܫܵܐ ܘܐܲܪܥܵܐ ܒܡܸܠܬ݂ܵܐ ܕܝܼܠܹܗ ܐܲܣܝܼܢܝܼܢ ܟܲܕ݂ ܠܢܘܼܪܵܐ ܡܸܬ݂ܢܲܛܪܝܼܢ. ܠܝܵܘܡܵܐ ܕܕ݂ܝܼܢܵܐ ܘܕ݂ܲܐܒ݂ܕܵܢܵܐ ܕܲܒ݂ܢܲܝ̈ܢܵܫܵܐ ܪ̈ܲܫܝܼܥܹܐ.

⁸ܗܵܕܹܐ ܕܹܝܢ ܚܕ݂ܵܐ ܠܵܐ ܬܸܛܥܹܝܟ݂ܘܿܢ ܚܲܒܝܼܒܲܝ̈. ܕܚܲܕ݂ ܝܵܘܡܵܐ ܠܡܵܪܝܵܐ ܐܲܝܟ݂ ܐܵܠܹܦ ܫܢ̈ܝܼܢ ܐܝܼܬ݂ܵܘܗܝ. ܘܐܵܠܹܦ ܫܢ̈ܝܼܢ. ܐܲܝܟ݂ ܝܵܘܡܵܐ ܚܲܕ݂.

⁹ܠܵܐ ܡܸܫܬܵܘܚܲܪ ܡܵܪܝܵܐ ܒܡܘܼܠܟܵܢܵܘ̈ܗܝ ܐܲܝܟ݂ ܕܐ̄ܢܵܫ̈ܝܼܢ ܫܘܼܘܚܵܪܵܐ ܡܲܣܒܪܝܼܢ. ܐܸܠܵܐ ܡܲܓܲܪ ܪܘܼܚܹܗ ܡܛܠܵܬ݂ܟ݂ܘܿܢ. ܒܲܕ݂ܠܵܐ ܨܵܒܹܐ ܕܐ̄ܢܵܫ ܢܹܐܒܲܕ݂. ܐܸܠܵܐ ܟܠܢܵܫ ܠܲܬ݂ܝܵܒ݂ܘܼܬ݂ܵܐ ܢܹܐܬܹܐ.

¹⁰ܐܵܬܹܐ ܕܹܝܢ ܝܵܘܡܹܗ ܕܡܵܪܝܵܐ ܐܲܝܟ݂ ܓܲܢܵܒ݂ܵܐ. ܗܵܘ ܕܒܹܗ ܫܡܲܝܵܐ ܡܸܢ ܫܹܠܝ ܥܵܒ݂ܪܝܼܢ. ܐܸܣܛܘܼܟ݂ܣܹ̈ܐ ܕܹܝܢ ܟܲܕ݂ ܝܵܩܕܝܼܢ ܢܸܫܬܿܪܘܿܢ. ܘܐܲܪܥܵܐ ܘܲܥܒ݂ܵܕܹ̈ܐ ܕܒ݂ܵܗܿ. ܬܸܫܬܿܟܲܚ (ܬܹܐܩܲܕ݂).

¹¹ܟܲܕ݂ ܗܵܟܹܝܠ ܗܵܠܹܝܢ ܟܠܗܘܿܢ ܡܸܫܬܪܹܝܢ (ܟܠܗܹܝܢ ܡܸܫܬܲܪ̈ܝܵܢ). ܕܐܲܝܟ݂ ܐܲܝܠܹܝܢ ܙܵܕܹܩ ܠܟ݂ܘܿܢ ܕܬܸܗܘܘܿܢ ܒܗܘܼܦܵܟܲܝ̈ܟܘܿܢ (ܒܗܘܼܦܵܟܹ̈ܐ) ܩܲܕܝܼܫܹ̈ܐ ܘܲܒ݂ܕܸܚܠܲܬ݂ ܐܲܠܵܗܵܐ.

¹²ܟܲܕ݂ ܡܣܲܟܹܝܢ ܐ̄ܢܬܘܿܢ ܘܣܵܘܚܝܼܢ ܐ̄ܢܬܘܿܢ ܠܡܹܐܬ݂ܝܼܬ݂ܵܐ ܕܝܵܘܡܹܗ ܕܐܲܠܵܗܵܐ. ܗܵܘ ܕܒܹܗ ܫܡܲܝܵܐ ܟܲܕ݂ ܡܸܬ݂ܒܲܚܪܝܼܢ ܒܢܘܼܪܵܐ. ܢܸܫܬܿܪܘܿܢ. ܘܐܸܣܛܘܼܟ݂ܣܹ̈ܐ ܟܲܕ݂ ܝܵܩܕܝܼܢ. ܢܫܘܼܚܘܼܢ.

¹³ܠܲܫܡܲܝܵܐ ܕܹܝܢ ܚܲܕ݂ܬܹ̈ܐ ܘܐܲܪܥܵܐ ܚܕ݂ܲܬ݂ܵܐ. ܐܲܝܟ݂ ܡܘܼܠܟܵܢܵܐ ܕܝܼܠܹܗ. ܡܣܲܟܹܝܢ ܚ̄ܢܲܢ. ܗܵܠܹܝܢ ܕܲܒ݂ܗܘܿܢ ܙܲܕܝܼܩܘܼܬ݂ܵܐ ܥܵܡܪܵܐ.

¹⁴ܡܛܠ ܗܵܢܵܐ ܚܲܒܝܼܒܲܝ̈. ܟܲܕ݂ ܠܗܵܠܹܝܢ ܡܣܲܟܹܝܢ ܐܢ̄ܬܘܿܢ. ܝܼܨܲܦܘ ܕܲܕ݂ܠܵܐ ܟܘܼܬ݂ܡܵܐ ܘܲܕ݂ܠܵܐ ܡܘܼܡܵܐ. ܠܹܗ ܬܸܫܬܲܟ݂ܚܘܼܢ ܒܲܫܠܵܡܵܐ.

¹⁵ܘܲܠܡܲܓ݁ܪܲܬ݂ ܪܘܼܚܹܗ ܕܡܵܪܝܵܐ (ܕܡܵܪܲܢ) ܦܘܼܪܩܵܢܵܐ ܬܸܚܫܒ݂ܘܼܢ. ܐܲܝܟܲܢܵܐ ܕܐܵܦ ܐܲܚܘܼܢ ܚܲܒܝܼܒ݂ܵܐ ܦܵܘܠܘܿܣ. ܐܲܝܟ݂ ܚܸܟ݂ܡܬ݂ܵܐ ܕܐܸܬ݂ܝܲܗܒܲܬ̤ ܠܹܗ. ܟܬܲܒ݂ ܠܟ݂ܘܿܢ.

¹⁶ܐܲܝܟܲܢܵܐ ܕܲܒ݂ܟ݂ܠܗܹܝܢ ܐܸܓ݁ܪ̈ܵܬܹܗ ܡܲܠܸܠ ܒܗܹܝܢ ܥܲܠ ܗܵܠܹܝܢ. ܐܲܝܠܹܝܢ ܕܐܝܼܬ݂ ܒܗܹܝܢ ܡܸܕܸܡ ܕܲܥܣܝܼܩ ܠܣܘܼܟܵܠܵܐ. ܗܵܠܹܝܢ ܕܐܲܝܠܹܝܢ ܕܲܕ݂ܠܵܐ ܝܘܼܠܦܵܢܵܐ ܐܸܢܘܿܢ ܘܠܵܐ ܣܡܝܼܟ݂ܝܼܢ. ܡܥܲܩܡܝܼܢ ܠܗܹܝܢ. ܐܲܝܟ݂ ܕܐܵܦ ܠܗܵܠܹܝܢ ܟܬ݂ܵܒܹ̈ܐ ܕܫܲܪܟܵܐ. ܠܘܵܬ݂ ܐܲܒ݂ܕܵܢܵܐ ܕܝܼܠܗܘܿܢ (ܐܲܒ݂ܕܵܢܗܘܿܢ).

¹⁷ܐܲܢ̄ܬܿܘܿܢ ܗܵܟܹܝܠ ܚܲܒܝܼܒܲܝ̈. ܟܲܕ݂ ܩܵܕ݂ܡܝܼܢ ܐ̄ܢܬܘܿܢ ܝܵܕ݂ܥܝܼܢ ܛܲܪܘ ܢܲܦ̮ܫܟ݂ܘܿܢ. ܕܕ݂ܲܠܡܵܐ ܟܲܕ݂ ܐܵܙܠ̄ܝܼܢ ܐ̄ܢܬܘܿܢ ܒܵܬܲܪ ܛܵܥܝܘܼܬ݂ܵܐ ܕܐܲܝܠܹܝܢ ܕܲܕ݂ܠܵܐ ܢܵܡܘܿܣ ܐܸܢܘܿܢ. ܬܸܦܠܘܼܢ ܡܸܢ ܣܵܡܟܵܐ ܕܝܼܠܟ݂ܘܿܢ (ܡܣܲܬ݁ܬ݂ܘܼܟ݂ܘܼܢ).

¹⁸ܗܘܲܝܬܿܘܿܢ ܕܹܝܢ ܡܸܬ݂ܪܲܒܹܝܢ ܒܛܲܝܒܘܼܬ݂ܵܐ. ܘܒ݂ܝܼܕ݂ܲܥܬ݂ܵܐ ܕܡܵܪܲܢ ܘܦܵܪܘܿܩܲܢ ܝܼܫܘܿܥ ܡܫܝܼܚܵܐ ܘܕ݂ܲܐܠܵܗܵܐ ܐܲܒ݂ܵܐ. ܕܠܹܗ ܬܸܫܒܿܘܿܚܬܵܐ ܐܵܦ ܗܵܫܵܐ ܘܲܒܟ݂ܠܙܒܲܢ ܘܲܠܝܵܘܡܲܝ̈ (ܘܲܠܝܘܿܡ) ܥܵܠܡܵܐ. ܐܵܡܹܝܢ.