Read Aramaic Peshita 1 John 1 Bible Online

1 John 1 - Aramaic Peshita bible

1 John 1

¹ܡܣܲܒܪܝܼܢ ܚ̄ܢܲܢ ܠܟ݂ܘܿܢ. ܠܗܵܘ ܕܐܝܼܬ݂ܵܘܗܝ ܗܘܵܐ ܡܸܢ ܒܪܵܫܝܼܬ. ܗܵܘ ܕܲܫܡܲܥܢ ܘܲܚܙܲܝܢܵܝܗܝ ܒܥܲܝܢܲܝ̈ܢ. ܚܙܲܝܢ ܘܓܲܫ̣ܢ ܒܐܝܼܕ݂ܲܝ̈ܢ. ܗܵܘ ܕܐܝܼܬ݂ܵܘܗܝ ܡܸܠܬ݂ܵܐ ܕܚܲܝܹ̈ܐ.

²ܘܚܲܝܹ̈ܐ ܐܸܬ݂ܓ݁ܠܝܼܘ. ܘܲܚܙܲܝܢ ܘܣܵܗܕܝܼܢ ܚ̄ܢܲܢ. ܘܡܲܟ݂ܪܙܝܼܢ ܚ̄ܢܲܢ ܠܟ݂ܘܿܢ ܚܲܝܹ̈ܐ ܕܲܠܥܵܠܲܡ. ܗܵܢܘܿܢ ܕܐܝܼܬܲܝܗܘܿܢ ܗܘܵܘ ܠܘܵܬ݂ ܐܲܒ݂ܵܐ. ܘܐܸܬ݂ܓ݁ܠܝܼܘ ܠܲܢ.

³ܘܡܸܕܸܡ ܕܲܚܙܲܝܢ ܘܲܫܡܲܥܢ. ܡܵܘܕܥܝܼܢ ܚ̄ܢܲܢ ܐܵܦ ܠܟ݂ܘܿܢ. ܕܬܸܗܘܹܐ ܠܟ݂ܘܿܢ ܫܵܘܬܵܦܘܼܬ݂ܵܐ ܥܲܡܲܢ. ܘܫܵܘܬܵܦܘܼܬܲܢ ܕܹܝܢ ܕܝܼܠܲܢ ܐܝܼܬܹܝܗ݁. ܥܲܡ ܐܲܒ݂ܵܐ ܘܥܲܡ ܒܪܹܗ ܝܼܫܘܿܥ ܡܫܝܼܚܵܐ.

⁴ܘܗܵܠܹܝܢ ܟܵܬ݂ܒ݁ܝܼܢ ܚ̄ܢܲܢ ܠܟ݂ܘܿܢ. ܕܚܲܕ݂ܘܼܬܲܢ ܕܲܒ݂ܟ݂ܘܿܢ ܬܸܗܘܹܐ ܡܫܲܡܠܝܵܐ.

⁵ܘܗܵܕܹܐ ܗܝܼ ܣܒܲܪܬ݂ܵܐ ܕܲܫܡܲܥܢ ܡܸܢܹܗ. ܘܲܡܣܲܒܪܝܼܢ ܚ̄ܢܲܢ ܠܟ݂ܘܿܢ. ܕܐܲܠܵܗܵܐ ܢܘܼܗܪܵܐ ܗ̄ܘܼ. ܘܚܸܫܘܿܟ݂ܵܐ ܟܠ ܟܠܹܗ ܠܲܝܬܿ ܒܹܗ.

⁶ܘܐܸܢ ܐܵܡܪܝܼܢ ܚ̄ܢܲܢ ܕܫܵܘܬܵܦܘܼܬ݂ܵܐ ܐܝܼܬ݂ ܠܲܢ ܥܲܡܹܗ ܘܲܡܗܲܠܟ݂ܝܼܢ ܚ̄ܢܲܢ ܒܚܸܫܘܿܟ݂ܵܐ. ܕܲܓܵܠܹ̈ܐ ܚܢܲܢ ܘܠܵܘ ܒܲܫܪܵܪܵܐ ܪܵܕܹܝܢ ܚ̄ܢܲܢ.

⁷ܐܸܢ ܕܹܝܢ ܒܢܘܼܗܪܵܐ ܡܗܲܠܟ݂ܝܼܢ ܚ̄ܢܲܢ ܐܲܝܟ݂ ܕܗܘܼ ܐܝܼܬ݂ܵܘܗܝ ܒܢܘܼܗܪܵܐ. ܐܝܼܬ݂ ܠܲܢ ܫܵܘܬܵܦܘܼܬ݂ܵܐ ܥܲܡ ܚܕ݂ܵܕܹ̈ܐ: ܘܲܕ݂ܡܵܐ ܕܝܼܫܘܿܥ ܒܪܹܗ ܡܕ݂ܲܟܹܐ ܠܲܢ ܡܸܢ ܟܠܗܘܿܢ ܚܛܵܗܲܝ̈ܢ.

⁸ܘܐܸܢ ܢܹܐܡܲܪ ܕܠܲܝܬܿ ܠܲܢ ܚܛܝܼܬ݂ܵܐ. ܢܲܦ̮ܫܲܢ ܡܲܛܥܹܝܢ ܚ̄ܢܲܢ. ܘܲܫܪܵܪܵܐ ܠܲܝܬܿ ܒܲܢ.

⁹ܐܸܢ ܕܹܝܢ ܡܵܘܕܹܝܢ ܚ̄ܢܲܢ ܒܲܚܛܵܗܲܝ̈ܢ. ܡܗܲܝܡܲܢ ܗܘܼ ܘܙܲܕܝܼܩ ܕܢܸܫܒ݁ܘܼܩ ܠܲܢ ܚܛܵܗܲܝ̈ܢ. ܘܲܢܕ݂ܲܟܹܝܢ ܡܸܢ ܟܠܹܗ ܥܵܘܠܲܢ.

¹⁰ܘܐܸܢ ܐܵܡܪܝܼܢ ܚ̄ܢܲܢ ܕܠܵܐ ܚܛܲܝܢ. ܥܵܒ݂ܕܝܼܢ ܚ̄ܢܲܢ ܠܹܗ ܕܲܓܵܠܵܐ. ܘܡܸܠܬܹܗ ܠܲܝܬܿ ܠܘܵܬܲܢ.