Read Aramaic Peshita 1 John 3 Bible Online

1 John 3 - Aramaic Peshita bible

1 John 3

¹ܘܲܚܙܵܘ ܕܲܟ݂ܡܵܐ ܣܲܓܝܼ ܚܘܼܒܹܗ ܕܐܲܒ݂ܵܐ ܠܘܵܬܲܢ. ܕܲܒ݂̈ܢܲܝܵܐ ܩܪܵܢ. ܐܵܦ ܥܲܒ݂ܕܲܢ. ܡܛܠ ܗܵܢܵܐ ܥܵܠܡܵܐ ܠܵܐ ܝܵܕ݂ܲܥ ܠܲܢ. ܡܛܠ ܕܐܵܦܠܵܐ ܠܹܗ ܝܼܕ݂ܲܥ.

²ܚܲܒܝܼܒܲܝ̈. ܗܵܫܵܐ ܒܢܵܘ̈ܗܝ ܚܢܲܢ ܕܐܲܠܵܗܵܐ. ܘܠܵܐ ܐܸܬ݂ܓ݁ܠܝܼ ܥܕ݂ܲܡܵܐ ܠܗܵܫܵܐ. ܡܵܢܵܐ ܥܬ݂ܝܼܕ݂ܝܼܢ ܚ̄ܢܲܢ ܕܢܸܗܘܹܐ. ܝܵܕ݂ܥܝܼܢ ܚ̄ܢܲܢ ܕܹܝܢ ܕܡܵܐ ܕܐܸܬ݂ܓ݁ܠܝܼ. ܒܲܕ݂ܡܘܼܬܹܗ ܗܵܘܹܝܢ ܚ̄ܢܲܢ. ܘܚܵܙܹܝܢ ܚ̄ܢܲܢ ܠܹܗ ܐܲܝܟ݂ ܡܸܕܸܡ ܕܐܝܼܬ݂ܵܘܗܝ.

³ܘܟ݂ܠ ܐܲܝܢܵܐ ܕܐܝܼܬ݂ ܠܹܗ ܥܠܵܘܗܝ ܗܵܢܵܐ ܣܲܒ݂ܪܵܐ. ܡܕ݂ܲܟܐ ܢܲܦ̮ܫܹܗ ܐܲܝܟ݂ ܕܗܘܼ ܕܟܹܐ ܗ̄ܘܼ.

⁴ܡܲܢ ܕܹܝܢ ܕܥܵܒܹܿܕ݂ ܚܛܝܼܬ݂ܵܐ. ܥܵܘܠܵܐ ܣܵܥܲܪ. ܚܛܝܼܬ݂ܵܐ ܓܹܝܪ ܟܠܵܗܿ ܥܵܘܠܵܐ ܗܝܼ.

⁵ܘܝܵܕ݂ܥܝܼܢ ܐܢ݇ܬܿܘܿܢ. ܕܗܵܘ ܕܐܸܬ݂ܓ݁ܠܝܼ ܕܢܸܣܲܒ݂ ܚܛܵܗܲܝ̈ܢ. ܘܲܚܛܝܼܬ݂ܵܐ ܒܹܗ ܠܲܝܬܿ.

⁶ܘܟ݂ܠ ܕܒܹܗ ܡܩܵܘܹܐ. ܠܵܐ ܚܵܛܹܐ. ܘܟ݂ܠ ܕܚܵܛܹܐ. ܠܵܐ ܚܙܵܝܗܝ ܘܠܵܐ ܝܲܕ݂ܥܹܗ.

⁷ܒܢܲܝ̈. ܠܵܐ ܐ݇ܢܵܫ ܢܲܛܥܹܝܟ݂ܘܿܢ. ܗܵܘ ܕܥܵܒܹܿܕ݂ ܙܲܕܝܼܩܘܼܬ݂ܵܐ. ܙܲܕܝܼܩܵܐ ܗܘܼ. ܐܲܝܟ݂ ܕܐܵܦ ܗܘܼ ܡܫܝܼܚܵܐ ܐܝܼܬ݂ܵܘܗܝ ܙܲܕܝܼܩܵܐ.

⁸ܗܵܘ ܕܣܵܥܲܪ ܚܛܝܼܬ݂ܵܐ. ܡܸܢ ܣܵܛܵܢܵܐ ܗܘܼ. ܡܛܠ ܕܡܸܢ ܪܹܫܝܼܬ݂ܵܐ ܗܘܼ ܣܵܛܵܢܵܐ ܚܲܛܵܝܵܐ ܗܘܼ. ܘܡܛܠ ܗܵܢܵܐ ܐܸܬ݂ܚܙܝܼ ܒܪܹܗ ܕܐܲܠܵܗܵܐ. ܕܢܸܫܪܹܐ ܥܒ݂ܵܕ݂ܵܘ̈ܗܝ ܕܣܵܛܵܢܵܐ.

⁹ܟܠ ܕܐܸܬ݂ܝܼܠܸܕ݂ ܡܸܢ ܐܲܠܵܗܵܐ. ܚܛܝܼܬ݂ܵܐ ܠܵܐ ܥܵܒܹܿܕ݂. ܡܛܠ ܕܙܲܪܥܹܗ ܒܹܗ ܐܝܼܬ݂ܵܘܗܝ. ܘܠܵܐ ܡܸܫܟܲܚ ܠܡܸܚܛܵܐ. ܕܡܸܢ ܐܲܠܵܗܵܐ ܐܸܬ݂ܝܼܠܸܕ݂.

¹⁰ܒܗܵܕܹܐ ܡܸܬ݂ܦܲܪܫܝܼܢ ܒܢܵܘ̈ܗܝ ܕܐܲܠܵܗܵܐ. ܡܸܢ ܒܢܵܘ̈ܗܝ ܕܣܵܛܵܢܵܐ. ܟܠ ܕܠܵܐ ܥܵܒܹܿܕ݂ ܙܲܕܝܼܩܘܼܬ݂ܵܐ ܘܠܵܐ ܡܲܚܸܒ݂ ܠܐܲܚܘܼܗܝ. ܠܲܝܬܵܘܗܝ ܡܸܢ ܐܲܠܵܗܵܐ

¹¹ܕܗܵܢܵܘ ܦܘܼܩܕܵܢܵܐ ܕܲܫܡܲܥܬܿܘܿܢ ܡܸܢ ܩܕ݂ܝܼܡ. ܕܬܲܚܒ݂ܘܼܢ ܚܲܕ݂ ܠܚܲܕ݂.

¹²ܠܵܘ ܐܲܝܟ݂ ܩܵܐܹܝܢ ܗܵܘ ܕܐܝܼܬ݂ܵܘܗܝ ܗܘܵܐ ܡܸܢ ܒܝܼܫܵܐ ܘܲܩܛܲܠ ܠܐܲܚܘܼܗܝ. ܘܡܛܠ ܡܵܢܵܐ ܩܲܛܠܹܗ. ܐܸܠܵܐ ܡܛܠ ܕܒ݂ܝܼܫܝܼܢ ܗܘܵܘ ܥܒ݂ܵܕ݂ܵܘ̈ܗܝ: ܘܕ݂ܲܐܚܘܼܗܝ ܙܲܕܝܼܩܝܼܢ.

¹³ܘܠܵܐ ܬܸܬܿܕܲܡܪܘܼܢ ܐܲܚܲܝ̈. ܐܸܢ ܣܵܢܹܐ ܠܟ݂ܘܿܢ ܥܵܠܡܵܐ.

¹⁴ܚܢܲܢ ܝܵܕ݂ܥܝܼܢ ܚ̄ܢܲܢ ܕܫܲܢܝܼܢܲܢ ܡܸܢ ܡܵܘܬܵܐ ܠܚܲܝܹ̈ܐ: ܒܗܵܕܹܐ ܕܡܲܚܒ݂ܝܼܢ ܚ̄ܢܲܢ ܠܐܲܚܲܝ̈ܢ. ܗܵܘ ܕܠܵܐ ܡܲܚܸܒ݂ ܠܐܲܚܘܼܗܝ. ܡܩܵܘܹܐ ܒܡܵܘܬܵܐ.

¹⁵ܟܠ ܓܹܝܪ ܕܣܵܢܹܐ ܠܐܲܚܘܼܗܝ. ܩܵܛܹܠ ܐܢܵܫܵܐ ܗܘܼ. ܘܝܵܕ݂ܥܝܼܢ ܐܢ݇ܬܿܘܿܢ ܕܟܠ ܕܩܵܛܹܠ ܐܢܵܫܵܐ. ܠܵܐ ܡܸܫܟܿܚܝܼܢ ܡܩܵܘܹܝܢ ܒܹܗ ܚܲܝܹ̈ܐ ܕܲܠܥܵܠܲܡ.

¹⁶ܒܗܵܕܹܐ ܝܵܕ݂ܥܝܼܢ ܚ̄ܢܲܢ ܚܘܼܒܹܗ ܕܲܠܘܵܬܲܢ. ܕܗܘܼ ܝܲܗܒ݂ ܢܲܦ̮ܫܹܗ ܚܠܵܦܲܝܢ. ܘܐܵܦ ܚܢܲܢ ܙܵܕܹܩ ܠܲܢ. ܕܥܲܠ ܐܲܦܲܝ̈ ܐܲܚܲܝ̈ܢ ܢܸܬܸܿܠ ܢܲܦ̮̈ܫܵܬܲܢ.

¹⁷ܘܐܲܝܢܵܐ ܕܐܝܼܬ݂ ܠܹܗ ܩܸܢܝܵܢܵܐ ܕܥܵܠܡܵܐ. ܘܢܸܚܙܹܐ ܠܐܲܚܘܼܗܝ ܕܲܣܢܝܼܩ. ܘܢܹܐܚܘܿܕ݂ ܪ̈ܲܚܡܵܘܗܝ ܡܸܢܹܗ. ܐܲܝܟܲܢܵܐ ܐܝܼܬ݂ ܒܹܗ ܚܘܼܒܹܗ ܕܐܲܠܵܗܵܐ.

¹⁸ܒܢܲܝ̈. ܠܵܐ ܢܲܚܸܒ݂ ܚܲܕ݂ ܠܚܲܕ݂ ܒܡܸܠܹ̈ܐ ܘܲܒ݂ܠܸܫܵܢܵܐ. ܐܸܠܵܐ ܒܲܥܒ݂ܵܕܹ̈ܐ ܘܒܲܫܪܵܪܵܐ.

¹⁹ܘܲܒ݂ܗܵܕܹܐ ܡܸܫܬܵܘܕܥܝܼܢ ܚ̄ܢܲܢ. ܕܡܸܢ ܫܪܵܪܵܐ ܐܝܼܬܲܝܢ. ܘܲܩܕ݂ܵܡ ܕܢܹܐܬܹܐ ܗܘܼ. ܡܦܝܼܣܝܼܢ ܚ̄ܢܲܢ ܠܸܒܲܢ.

²⁰ܕܐܸܢ ܗܘܼ ܠܸܒܲܢ ܒܵܣܲܪ ܠܲܢ. ܟܡܵܐ ܐܲܠܵܗܵܐ ܕܪܲܒ ܡܸܢ ܠܸܒܲܢ ܘܝܵܕ݂ܲܥ ܟܠܡܸܕ݂ܡ.

²¹ܚܲܒܝܼܒܲܝ̈. ܐܸܢ ܠܸܒܲܢ ܠܵܐ ܒܵܣܲܪ ܠܲܢ. ܓܵܠ̈ܝܵܢ ܐܸܢܹܝܢ ܐܲܦܲܝ̈ܢ ܩܕ݂ܵܡ ܐܲܠܵܗܵܐ.

²²ܘܟ݂ܠܡܸܕܸܡ ܕܫܵܐܠܝܼܢ ܚ̄ܢܲܢ. ܢܵܣܒܝܼܢ ܚ̄ܢܲܢ ܡܸܢܹܗ. ܡܛܠ ܕܢܵܛܪܝܼܢ ܚ̄ܢܲܢ ܦܘܼܩܕܵܢܵܘ̈ܗܝ: ܘܫܲܦܝܼܪ̈ܵܬ݂ܵܐ ܣܵܥܪܝܼܢ ܚ̄ܢܲܢ ܩܕ݂ܵܡܵܘܗܝ.

²³ܘܗܵܢܵܐ ܗ̄ܘܼ ܦܘܼܩܕܵܢܹܗ. ܕܲܢܗܲܝܡܸܢ ܒܲܫܡܵܐ ܕܲܒ݂ܪܹܗ ܝܼܫܘܿܥ ܡܫܝܼܚܵܐ. ܘܢܲܚܸܒ݂ ܚܲܕ݂ ܠܚܲܕ݂. ܐܲܝܟ݂ ܕܦܲܩܕܲܢ.

²⁴ܘܐܲܝܢܵܐ ܕܢܵܛܲܪ ܦܘܼܩܕܵܢܵܘ̈ܗܝ. ܒܹܗ ܡܸܬ݂ܢܛܲܪ. ܘܗܘܼ ܫܵܪܹܐ ܒܹܗ. ܘܲܒ݂ܗܵܕܹܐ ܡܸܣܬܲܟܠܝܼܢ ܚ̄ܢܲܢ ܕܫܵܪܹܐ ܒܲܢ. ܡܸܢ ܪܘܼܚܹܗ ܗܵܝ ܕܝܲܗܒ݂ ܠܲܢ.