Read Aramaic Peshita 1 John 4 Bible Online

1 John 4 - Aramaic Peshita bible

1 John 4

¹ܚܲܒܝܼܒܲܝ̈. ܠܵܐ ܠܟ݂ܠ ܪ̈ܘܼܚܝܼܢ ܬܿܗܲܝܡܢܘܼܢ. ܐܸܠܵܐ ܗܘܲܝܬܿܘܿܢ ܦܵܪܫܝܼܢ ܪ̈ܘܼܚܹܐ. ܐܸܢ ܡܸܢ ܐܲܠܵܗܵܐ ܐܝܼܬܲܝܗܹܝܢ. ܡܛܠ ܕܣܲܓܝܼ̈ܐܹܐ ܢܒ݂ܝܹ̈ܐ ܕܲܓܵܠܹ̈ܐ ܢܦܲܩܘ ܒܹܗ ܒܥܵܠܡܵܐ.

²ܒܗܵܕܹܐ ܡܸܬ݂ܝܲܕ݂ܥܵܐ ܪܘܼܚܹܗ ܕܐܲܠܵܗܵܐ. ܟܠ ܪܘܼܚܵܐ ܕܡܵܘ̈ܕܝܵܢ (ܕܡܵܘܕܝܵܐ) ܕܝܼܫܘܿܥ ܡܫܝܼܚܵܐ ܐܸܬ݂ܵܐ ܒܲܒ݂ܣܲܪ. ܡܸܢ ܐܲܠܵܗܵܐ ܗܝܼ.

³ܘܟ݂ܠ ܪܘܼܚܵܐ ܕܠܵܐ ܡܵܘܕܝܵܐ ܕܝܼܫܘܿܥ ܐܸܬ݂ܵܐ ܒܲܒ݂ܣܲܪ. ܠܲܝܬܹܿܝܗ݁ ܡܸܢ ܐܲܠܵܗܵܐ. ܐܸܠܵܐ ܗܵܕܹܐ ܡܸܢ ܡܫܝܼܚܵܐ ܗܝܼ ܕܲܓܵܠܵܐ. ܗܵܘ ܕܲܫܡܲܥܬܿܘܿܢ ܕܐܵܬܹܐ. ܘܗܵܫܵܐ ܒܥܵܠܡܵܐ ܐܝܼܬ݂ܵܘܗܝ ܡܸܢ ܟܲܕܘܼ.

⁴ܐܲܢܬܿܘܿܢ ܕܹܝܢ ܡܸܢ ܐܲܠܵܗܵܐ ܐܝܼܬܲܝܟ݁ܘܿܢ ܒ̈ܢܲܝܵܐ. ܘܲܙܟܲܝܬܿܘܿܢ ܐܸܢܘܿܢ. ܡܛܠ ܕܪܲܒ ܗܘܼ ܕܲܒ݂ܟ݂ܘܿܢ. ܡܸܢ ܗܵܘ ܕܲܒ݂ܥܵܠܡܵܐ.

⁵ܘܗܵܠܹܝܢ ܡܸܢ ܥܵܠܡܵܐ ܐܸܢܘܿܢ. ܡܛܠ ܗܵܢܵܐ ܡܸܢ ܥܵܠܡܵܐ ܡܡܲܠܠܝܼܢ. ܘܥܵܠܡܵܐ ܠܗܘܿܢ ܫܵܡܲܥ.

⁶ܚܢܲܢ ܕܹܝܢ ܡܸܢ ܐܲܠܵܗܵܐ ܚܢܲܢ. ܘܗܵܘ ܕܝܵܕ݂ܲܥ ܠܐܲܠܵܗܵܐ. ܫܵܡܲܥ ܠܲܢ. ܘܗܵܘ ܕܠܵܐ ܐܝܼܬ݂ܵܘܗܝ ܡܸܢ ܐܲܠܵܗܵܐ. ܠܵܐ ܫܵܡܲܥ ܠܲܢ. ܒܵܗܿ ܒܗܵܕܹܐ ܡܸܣܬܲܟܠܝܼܢ ܚ̄ܢܲܢ ܠܪܘܼܚܵܐ ܕܲܫܪܵܪܵܐ. ܘܲܠܪܘܼܚܵܐ ܕܡܲܛܥܝܵܢܘܼܬ݂ܵܐ.

⁷ܚܲܒܝܼܒܲܝ̈. ܢܲܚܸܒ݂ ܚܲܕ݂ ܠܚܲܕ݂. ܡܛܠ ܕܚܘܼܒܵܐ ܡܸܢ ܐܲܠܵܗܵܐ ܗܘܼ. ܘܟ݂ܠ ܡܲܢ ܕܡܲܚܸܒ݂. ܡܸܢ ܐܲܠܵܗܵܐ ܝܼܠܝܼܕ݂. ܘܝܵܕ݂ܲܥ ܠܐܲܠܵܗܵܐ.

⁸ܡܛܠ ܕܐܲܠܵܗܵܐ ܚܘܼܒܵܐ ܗܘܼ. ܘܟ݂ܠ ܕܠܵܐ ܡܲܚܸܒ݂. ܠܵܐ ܝܵܕ݂ܲܥ ܠܐܲܠܵܗܵܐ.

⁹ܒܗܵܕܹܐ ܐܸܬ݂ܝܼܕ݂ܲܥ ܚܘܼܒܹܗ ܕܐܲܠܵܗܵܐ ܕܲܠܘܵܬܲܢ. ܕܠܲܒ݂ܪܹܗ ܝܼܚܝܼܕ݂ܵܝܵܐ ܫܲܕܲܪ ܐܲܠܵܗܵܐ ܠܥܵܠܡܵܐ ܕܢܸܚܹܐ ܒܐܝܼܕ݂ܹܗ.

¹⁰ܒܗܵܢܵܐ ܐܝܼܬ݂ܵܘܗܝ ܚܘܼܒܵܐ. ܠܵܐ ܗܘܵܐ ܕܲܚܢܲܢ ܐܲܚܸܒ݂ܢ ܠܐܲܠܵܗܵܐ. ܐܸܠܵܐ ܗܘܼ ܐܲܚܒܲܢ. ܘܫܲܕܲܪ ܠܲܒ݂ܪܹܗ ܚܘܼܣܵܝܵܐ ܥܲܠ ܐܲܦܲܝ̈ ܚܛܵܗܲܝ̈ܢ.

¹¹ܚܲܒܝܼܒܲܝ̈. ܐܸܢ ܗܵܟܲܢܵܐ ܐܲܚܒܲܢ ܐܲܠܵܗܵܐ. ܐܵܦ ܚܢܲܢ ܚܲܝܵܒ݂ܝܼܢ ܚ̄ܢܲܢ ܚܲܕ݂ ܠܚܲܕ݂ ܠܡܲܚܵܒ݂ܘܼ.

¹²ܠܐܲܠܵܗܵܐ ܡܸܡܬ݂ܘܿܡ ܐ̄ܢܵܫ ܠܵܐ ܚܙܵܝܗܝ. ܐܸܢ ܕܹܝܢ ܢܲܚܸܒ݂ ܚܲܕ݂ ܠܚܲܕ݂. ܐܲܠܵܗܵܐ ܒܲܢ ܡܩܵܘܹܐ. ܘܚܘܼܒܹܗ ܡܸܫܬܲܡܠܹܐ ܒܲܢ.

¹³ܘܲܒ݂ܗܵܕܹܐ ܝܵܕ݂ܥܝܼܢ ܚ̄ܢܲܢ ܕܒܹܗ ܡܩܵܘܹܝܢ ܚ̄ܢܲܢ. ܘܗܘܼ ܡܩܵܘܹܐ ܒܲܢ. ܕܡܸܢ ܪܘܼܚܹܗ ܝܲܗܒ݂ ܠܲܢ.

¹⁴ܘܲܚܢܲܢ ܚܙܲܝܢ ܘܡܲܣܗܕ݂ܝܼܢ ܚ̄ܢܲܢ. ܕܐܲܒ݂ܵܐ ܫܲܕܲܪ ܠܲܒ݂ܪܹܗ ܦܵܪܘܿܩܵܐ ܠܥܵܠܡܵܐ.

¹⁵ܟܠ ܕܡܵܘܕܹܐ ܒܝܼܫܘܿܥ ܕܗܘܸܝܘܼ ܒܪܹܗ ܕܐܲܠܵܗܵܐ. ܐܲܠܵܗܵܐ ܒܹܗ ܡܩܵܘܹܐ. ܘܗܘܼ ܡܩܵܘܹܐ ܒܐܲܠܵܗܵܐ.

¹⁶ܘܲܚܢܲܢ ܗܲܝܡܸܢܢ ܘܝܼܕ݂ܲܥܢ ܚܘܼܒܵܐ. ܕܐܝܼܬ݂ ܠܹܗ ܠܐܲܠܵܗܵܐ ܨܸܐܕ݂ܲܝܢ. ܐܲܠܵܗܵܐ ܓܹܝܪ ܚܘܼܒܵܐ ܗܘܼ. ܘܟ݂ܠ ܕܲܡܩܵܘܹܐ ܒܚܘܼܒܵܐ. ܒܐܲܠܵܗܵܐ ܡܩܵܘܹܐ.

¹⁷ܘܲܒ݂ܗܵܕܹܐ ܡܸܫܬܲܠܲܡ ܚܘܼܒܹܗ ܥܲܡܲܢ. ܕܓܲܠܝܘܼܬ݂ ܐܲܦܹ̈ܐ ܬܸܗܘܹܐ ܠܲܢ ܒܝܵܘܡܵܐ ܕܕ݂ܝܼܢܵܐ. ܡܛܠ ܕܐܲܝܟ݂ ܕܲܗܘܵܐ ܗ̤ܘ. ܗܵܟܲܢܵܐ ܐܵܦ ܚܢܲܢ ܐܝܼܬܲܝܢ ܒܗܵܢܵܐ ܥܵܠܡܵܐ.

¹⁸ܕܸܚܠܬ݂ܵܐ ܒܚܘܼܒܵܐ ܠܲܝܬܿ. ܐܸܠܵܐ ܚܘܼܒܵܐ ܡܫܲܡܠܝܵܐ. ܠܒܲܪ ܫܵܕܹܐ ܠܵܗܿ ܠܕ݂ܸܚܠܬ݂ܵܐ. ܡܛܠ ܕܕ݂ܸܚܠܬ݂ܵܐ ܒܩܸܢܛܵܐ ܐܝܼܬܹܝܗܿ. ܗܵܘ ܕܹܝܢ ܕܕ݂ܵܚܹܠ. ܠܵܐ ܡܫܲܡܠܲܝ ܒܚܘܼܒܵܐ.

¹⁹ܚܢܲܢ ܗܵܟܹܝܠ ܢܲܚܸܒ݂ ܠܐܲܠܵܗܵܐ. ܡܛܠ ܕܗܘܼ ܩܲܕ݂ܡܵܝܼܬ݂ ܐܲܚܒܲܢ.

²⁰ܐܸܢ ܕܹܝܢ ܐ̄ܢܵܫ ܢܹܐܡܲܪ ܕܡܲܚܸܒ݂ ܐ̄ܢܵܐ ܠܐܲܠܵܗܵܐ. ܘܠܲܐܚܘܼܗܝ ܣܵܢܹܐ. ܕܲܓܵܠܵܐ ܗܘܼ. ܗܵܘ ܓܹܝܪ ܕܠܲܐܚܘܼܗܝ ܕܡܸܬ݂ܚܙܹܐ ܠܵܐ ܡܲܚܸܒ݂. ܠܐܲܠܵܗܵܐ ܗܵܘ ܕܠܵܐ ܡܸܬ݂ܚܙܹܐ ܐܲܝܟܲܢܵܐ ܡܸܫܟܲܚ ܕܢܲܚܸܒ݂.

²¹ܘܗܵܢܵܐ ܦܘܼܩܕܵܢܵܐ ܩܲܒܸܠܢ ܡܸܢܹܗ. ܕܟܠ ܕܡܲܚܸܒ݂ ܠܐܲܠܵܗܵܐ. ܢܲܚܸܒ݂ ܐܵܦ ܠܐܲܚܘܼܗܝ.