Read Aramaic Peshita 1 John 5 Bible Online

1 John 5 - Aramaic Peshita bible

1 John 5

¹ܟܠ ܕܲܡܗܲܝܡܸܢ ܕܝܼܫܘܿܥ ܐܝܼܬ݂ܵܘܗܝ ܡܫܝܼܚܵܐ. ܡܸܢ ܐܲܠܵܗܵܐ ܝܼܠܝܼܕ݂. ܘܟ݂ܠ ܕܡܲܚܸܒ݂ ܠܝܵܠܘܿܕ݂ܵܐ. ܡܲܚܸܒ݂ ܐܵܦ ܠܗܵܘ ܕܐܸܬ݂ܝܼܠܸܕ݂ ܡܸܢܹܗ.

²ܘܲܒ݂ܗܵܕܹܐ ܝܵܕ݂ܥܝܼܢ ܚ̄ܢܲܢ ܕܡܲܚܒ݂ܝܼܢ ܚ̄ܢܲܢ ܠܲܒ݂ܢܵܘ̈ܗܝ ܕܐܲܠܵܗܵܐ. ܡܵܐ ܕܠܲܐܠܵܗܵܐ ܡܲܚܒ݂ܝܼܢ ܚ̄ܢܲܢ ܘܥܵܒ݂ܕܝܼܢ ܚ̄ܢܲܢ ܦܘܼܩܕܵܢܵܘ̈ܗܝ.

³ܗܵܢܵܐ ܗܘܼ ܓܹܝܪ ܚܘܼܒܹܗ ܕܐܲܠܵܗܵܐ. ܕܢܸܛܲܪ ܦܘܼܩܕܵܢܵܘ̈ܗܝ. ܘܦܘܼܩܕܵܢܵܘ̈ܗܝ ܠܵܐ ܝܲܩܝܼܪܝܼܢ.

⁴ܡܛܠ ܕܟܠ ܕܝܼܠܝܼܕ݂ ܡܸܢ ܐܲܠܵܗܵܐ. ܙܵܟܹܐ ܠܹܗ ܠܥܵܠܡܵܐ. ܘܗܵܕܹܐ ܗܝܼ ܙܵܟ݂ܘܼܬ݂ܵܐ ܕܲܙܟ݂ܵܬܹܗ ܠܥܵܠܡܵܐ. ܗܲܝܡܵܢܘܼܬܲܢ.

⁵ܡܲܢܘܼ ܓܹܝܪ ܕܙܵܟܹܐ ܠܹܗ ܠܥܵܠܡܵܐ. ܐܸܠܵܐ ܗܵܘ ܕܲܡܗܲܝܡܸܢ ܕܝܼܫܘܿܥ ܒܪܹܗ ܗ̄ܘܼ ܕܐܲܠܵܗܵܐ.

⁶ܗܵܢܵܘ ܕܐܸܬ݂ܵܐ ܒܝܲܕ݂ ܡܲܝ̈ܵܐ ܘܲܕ݂ܡܵܐ ܝܼܫܘܿܥ ܡܫܝܼܚܵܐ. ܠܵܐ ܗܘܵܐ ܒܡܲܝ̈ܵܐ ܒܲܠܚܘܿܕ݂. ܐܸܠܵܐ ܒܡܲܝ̈ܵܐ ܘܲܕ݂ܡܵܐ.

⁷ܘܪܘܼܚܵܐ ܡܲܣܗܕ݂ܵܐ. ܕܗܝܼ ܪܘܼܚܵܐ ܐܝܼܬܹܝܗܿ ܫܪܵܪܵܐ.

⁸ܘܐܝܼܬܲܝܗܘܿܢ ܬܠܵܬ݂ܵܐ ܣܵܗܕܝܼܢ. ܪܘܼܚܵܐ ܘܡܲܝ̈ܵܐ ܘܲܕ݂ܡܵܐ. ܘܲܬ݂ܠܵܬܲܝܗܘܿܢ ܒܚܲܕ݂ ܐܸܢܘܿܢ.

⁹ܐܸܢ ܣܵܗܕܘܼܬ݂ܵܐ ܕܲܒ݂ܢܲܝ̈ܢܵܫܵܐ ܡܩܲܒܠܝܼܢ ܚܢܲܢ. ܚܲܕ݂ ܟܡܵܐ ܣܵܗܕܘܼܬܹܗ ܕܐܲܠܵܗܵܐ ܕܪܲܒܵܐ ܗܝܼ. ܘܗܵܕܹܐ ܗܝܼ ܣܵܗܕܘܼܬܹܗ ܕܐܲܠܵܗܵܐ ܕܐܲܣܗܸܕ݂ ܥܲܠ ܒܪܹܗ.

¹⁰ܟܠܡܲܢ ܕܲܡܗܲܝܡܸܢ ܒܲܒ݂ܪܹܗ ܕܐܲܠܵܗܵܐ. ܐܝܼܬ݂ ܠܹܗ ܗܵܕܹܐ ܣܵܗܕܘܼܬ݂ܵܐ ܒܢܲܦ̮ܫܹܗ. ܟܠ ܕܠܵܐ ܡܗܲܝܡܸܢ. ܠܐܲܠܵܗܵܐ ܕܲܓܵܠܵܐ ܥܲܒ݂ܕܹܗ. ܒܲܕ݂ܠܵܐ ܗܲܝܡܸܢ ܠܣܵܗܕܘܼܬ݂ܵܐ ܕܐܲܣܗܸܕ݂ ܐܲܠܵܗܵܐ ܥܲܠ ܒܪܹܗ.

¹¹ܘܗܵܕܹܐ ܗܝܼ ܣܵܗܕܘܼܬ݂ܵܐ. ܕܚܲܝܹ̈ܐ ܕܲܠܥܵܠܲܡ ܝܲܗܒ݂ ܠܲܢ ܐܲܠܵܗܵܐ. ܘܗܸܢܘܿܢ ܚܲܝܹ̈ܐ ܒܲܒ݂ܪܹܗ ܐܝܼܬܲܝܗܘܿܢ.

¹²ܟܠ ܕܲܐܚܝܼܕ݂ ܠܲܒ݂ܪܵܐ. ܐܲܚܝܼܕ݂ ܐܵܦ ܠܚܲܝܹ̈ܐ. ܘܟ݂ܠ ܕܠܵܐ ܐܲܚܝܼܕ݂ ܠܲܒ݂ܪܹܗ ܕܐܲܠܵܗܵܐ. ܠܲܝܬܿ ܠܹܗ ܚܲܝܹ̈ܐ.

¹³ܗܵܠܹܝܢ ܟܸܬ݂ܒܹܬ݂ ܠܟ݂ܘܿܢ. ܕܬܸܕ݂ܥܘܼܢ ܕܚܲܝܹ̈ܐ ܕܲܠܥܵܠܲܡ ܐܝܼܬ݂ ܠܟ݂ܘܿܢ. ܠܐܲܝܠܹܝܢ ܕܗܲܝܡܸܢܬܿܘܿܢ ܒܲܫܡܹܗ ܕܲܒ݂ܪܹܗ ܕܐܲܠܵܗܵܐ.

¹⁴ܘܗܵܕܹܐ ܦܲܪܹܗܣܝܼܵܐ ܐܝܼܬ݂ ܠܲܢ ܠܘܵܬܹܗ. ܕܟܠ ܕܫܵܐܠܝܼܢ ܚ̄ܢܲܢ ܠܹܗ ܐܲܝܟ݂ ܨܸܒ݂ܝܵܢܹܗ. ܫܵܡܲܥ ܠܲܢ.

¹⁵ܘܐܸܢ ܡܦܵܣܝܼܢ ܚ̄ܢܲܢ ܕܫܵܡܲܥ ܠܲܢ ܥܲܠ ܡܸܕܸܡ ܕܫܵܐܠܝܼܢ ܚ̄ܢܲܢ ܡܸܢܹܗ. ܬܟ݂ܝܼܠܝܼܢ ܚ̄ܢܲܢ ܕܩܲܒܸܠܢ ܡܸܢ ܟܲܕܘܼ ܫܹܐ̈ܠܵܬܲܢ ܕܲܫܐܸܠܢ ܡܸܢܹܗ.

¹⁶ܐܸܢ ܐܢܵܫ ܢܸܚܙܹܐ ܠܐܲܚܘܼܗܝ ܕܚܵܛܹܐ ܚܛܵܗܵܐ ܕܠܵܐ ܡܚܲܝܲܒ݂ ܠܡܵܘܬܵܐ. ܢܸܫܐܲܠ ܘܡܸܬ݂ܝܲܗܒܝܼܢ ܠܹܗ ܚܲܝܹ̈ܐ: ܠܐܲܝܠܹܝܢ ܕܠܵܐ ܗܘܵܐ ܐܲܝܟ݂ ܕܲܠܡܵܘܬܵܐ ܚܵܛܹܝܢ. ܐܝܼܬ݂ ܓܹܝܪ ܚܛܵܗܵܐ ܕܡܵܘܬܵܐ. ܠܵܐ ܗܘܵܐ ܥܲܠ ܗܵܢܵܐ ܐܵܡܲܪ ܐ݇ܢܵܐ ܕܢܸܒ݂ܥܹܐ ܐ݇ܢܵܫ.

¹⁷ܟܠ ܥܵܘܠܵܐ ܓܹܝܪ ܚܛܝܼܬ݂ܵܐ ܗܘܼ. ܘܐܝܼܬ݂ ܚܛܵܗܵܐ ܕܠܵܐ ܗܘܵܐ ܕܡܵܘܬܵܐ ܗܘܼ.

¹⁸ܘܝܵܕ݂ܥܝܼܢ ܚ̄ܢܲܢ ܕܟܠ ܕܝܼܠܝܼܕ݂ ܡܸܢ ܐܲܠܵܗܵܐ. ܠܵܐ ܚܵܛܹܐ. ܗܵܘ ܓܹܝܪ ܕܝܼܠܝܼܕ݂ ܡܸܢ ܐܲܠܵܗܵܐ. ܢܵܛܲܪ ܢܲܦ̮ܫܹܗ. ܘܒ݂ܝܼܫܵܐ ܠܵܐ ܡܸܬ݂ܩܲܪܲܒ݂ ܠܹܗ.

¹⁹ܝܵܕ݂ܥܝܼܢ ܚ̄ܢܲܢ ܕܡܸܢ ܐܲܠܵܗܵܐ ܚܢܲܢ. ܘܥܵܠܡܵܐ ܟܠܹܗ ܒܒ݂ܝܼܫܵܐ ܗܘܼ ܣܝܼܡ.

²⁰ܘܝܵܕ݂ܥܝܼܢ ܚ̄ܢܲܢ ܕܲܒ݂ܪܹܗ ܕܐܲܠܵܗܵܐ ܐܸܬ݂ܵܐ. ܘܝܲܗܒ݂ ܠܲܢ ܡܲܕܥܵܐ ܕܢܸܕܲܥ ܠܫܲܪܝܼܪܵܐ. ܘܢܸܗܘܹܐ ܒܹܗ ܒܫܲܪܝܼܪܵܐ. ܒܲܒ݂ܪܹܗ ܝܼܫܘܿܥ ܡܫܝܼܚܵܐ. ܗܵܢܵܘ ܐܲܠܵܗܵܐ ܫܲܪܝܼܪܵܐ ܘܚܲܝܹ̈ܐ ܕܲܠܥܵܠܲܡ.

²¹ܒܢܲܝ̈. ܛܲܪܘ ܢܲܦ̮ܫܟ݂ܘܿܢ ܡܸܢ ܕܸܚܠܲܬ݂ ܦܬܲܟ݂ܪܹ̈ܐ.