Read Aramaic Peshita Judges 1 Bible Online

Judges 1 - Aramaic Peshita bible

Judges 1

¹ܘܡ̣ܢ ܒܵܬܲܪ ܕܡܝܼܬ̣ ܝܼܫܘܿܥ ܒܲܪܢܘܿܢ ܥܲܒ̣ܕܹ̇ܗ ܕܡܵܪܝܵܐ: ܫܲܐܠܸܘ ܒ̈ܢܲܝ ܝܼܣܪܵܝܹܠ ܒܡܵܪܝܵܐ ܘܐܵܡ̇ܪܝܼܢ: ܡܲܢܘܼ ܠܲܢ ܥܲܠ ܟܢܲܥ̈ܢܵܝܹܐ ܒܪܹܫܵܐ: ܠܡܸܬ̣ܟܲܬܵܫܘܼ ܥܲܡܗܘܿܢ ܒܲܩܪܵܒ̣ܵܐ.

²ܘܐܸܡܲܪ ܡܵܪܝܵܐ ܝܼܗܘܼܕܼܵܐ ܢܸܣܲܩ: ܗܵܐ ܐܲܫܠܸܡ̇ܬܵܗ̇ ܠܐܲܪܥܵܐ ܒܐܝܼܕܼܵܘ̈ܗܝ.

³ܘܐܸܡܲܪ ܝܼܗܘܼܕܼܵܐ ܠܫܸܡܥܘܿܢ ܐܲܚܘܼܗܝ: ܣܲܩ ܥܲܡܝ ܒܦܸܨܲܬ̣ܝ: ܘܢܸܬ̣ܟܲܬܲܫ ܥܲܡ ܟܢܲܥ̈ܢܵܝܹܐ: ܘܐܸܙܲܠ ܐܵܦ ܐܸܢܵܐ ܥܲܡܵܟ̣ ܒܦܸܨܬ̣ܵܟ. ܘܐܸܙܲܠ ܥܲܡܹܗ ܫܸܡܥܘܿܢ.

⁴ܘܐܸܙܲܠ ܝܼܗܘܼܕܼܵܐ: ܘܐܫܠܸܡ ܐܸܢܘܿܢ ܡܵܪܝܵܐ ܠܲܟ̣ܢܲܥ̈ܢܵܝܹܐ: ܘܲܠܦܲܪ̈ܙܵܝܹܐ ܒܐܝܼܕܲܝ̈ܗܘܿܢ: ܘܲܚܪܲܒ̣ܘ ܡܸܢܗܘܿܢ ܒܒ̣ܵܙܵܩ: ܥܸܣܪܵܐ ܐܲܠܦ̈ܝܼܢ ܓܲܒ̣ܪ̈ܝܼܢ.

⁵ܘܐܸܫܟ̇ܚܘܼܗܝ ܠܡܵܪܵܗ̇ ܕܒ̣ܵܙܵܩ ܒܒ̣ܵܙܵܩ: ܘܐܸܬ̣ܟܲܬܲܫ̣ܘ ܥܲܡܹܗ: ܘܲܚܪܲܒ̣ܘ ܠܲܟ̣ܢܲܥܢܵܝܹܐ ܘܲܠܦܲܪ̈ܙܵܝܹܐ.

⁶ܘܲܥܪܲܩ̣ ܡܵܪܵܗ̇ ܕܒ̣ܵܙܵܩ: ܘܲܪܕܲܦ̣ܘ ܒܵܬ̣ܪܹܗ ܘܐܲܚܕ̇ܘܼܗܝ: ܘܦܲܣܸܩ̣ܘ ܟܪ̈ܵܘܵܬ̣ܵܐ ܕܐܝܼܕܼܵܘ̈ܗܝ ܘܲܕܼܪܸ̈ܓ̣ܠܵܘܗܝ.

⁷ܘܐܸܡܲܪ ܡܵܪܵܗ̇ ܕܒ̣ܵܙܵܩ: ܫܲܒ̣ܥܝܼܢ ܡܲܠܟ̇ܝܼ̈ܢ ܕܲܡܦܲܣ̈ܩܵܢ ܗ̄ܘܲܝ̈ ܟܪ̈ܵܘܵܬ̣ܵܐ ܕܐܝܼܕܲܝ̈ܗܘܿܢ ܘܲܕܼܪܸ̈ܓ̣ܠܲܝܗܘܿܢ: ܡܠܲܩܛܝܼܢ ܗ̄ܘ̣ܵܘ ܠܲܚܡܵܐ ܡ̣ܢ ܬܚܹܝܬ̣ ܦܵܬ̣ܘܿܪܝ: ܐܲܝܟ̣ ܡܵܐ ܕܥܸܒ̣ܕܹ̇ܬ̣ ܗܵܟܲܢܵܐ ܦܲܪܥܲܢܝ ܐܲܠܵܗܵܐ. ܘܐܲܥܠܘܼܗܝ ܠܐܘܿܪܸܫܠܸܡ: ܘܡܝܼܬ̣ ܬܲܡܵܢ.

⁸ܘܐܸܬ̣ܟܲܬܲܫ̣ܘ ܒ̈ܢܲܝ ܝܼܗܘܼܕܼܵܐ ܒܐܘܿܪܸܫܠܸܡ ܘܟܲܒ̣ܫܘܼܗ̇: ܘܲܡ̣ܚܵܐܘܼܗ̇ ܒܦܘܼܡܵܐ ܕܚܲܪܒܵܐ: ܘܲܠܩܘܼܪ̈ܝܵܗ̇ ܐܵܘܩܸܕܼܘ ܒܢܘܼܪܵܐ.

⁹ܘܒ̣ܵܬܲܪ ܗܵܝܕܹ̇ܝܢ: ܢܚܸܬ̣ܘ ܒ̈ܢܲܝ ܝܼܗܘܼܕܼܵܐ ܠܡܸܬ̣ܟܲܬܵܫܘܼ ܥܲܡ ܟܢܲܥ̈ܢܵܝܹܐ: ܝܵܬ̣ܒܲܝ̈ ܛܘܼܪܵܐ ܘܬܲܝ̱ܡܢܵܐ ܘܲܦܩܲܥܬ̣ܵܐ.

¹⁰ܘܐܸܙܲܠ ܝܼܗܘܼܕܼܵܐ ܥܲܠ ܟܢܲܥ̈ܢܵܝܹܐ ܕܝܵܬ̣ܒ̇ܝܼܢ ܒܚܸܒ̣ܪܘܿܢ: ܘܲܫܡܵܗ̇ ܕܚܸܒ̣ܪܘܿܢ ܡ̣ܢ ܩܕܼܝܼܡ ܩܘܼܪܝܲܬ̣ ܐܲܪܒܲܥ: ܘܩܲܛܸܠ̣ܘ ܠܫܝܼܫܲܝ: ܘܠܲܐܚܝܼܡܵܢ: ܘܲܠܬ̣ܘܼܠܡܲܝ ܒ̈ܢܲܝ ܓܲܢ̄ܒܵܪܹ̈ܐ.

¹¹ܘܐܸܙܲܠܘ ܡ̣ܢ ܬܲܡܵܢ ܥܲܠ ܝܵܬ̣ܒܲܝ̈ ܕܵܒ̣ܝܼܪ: ܘܲܫܡܵܗ̇ ܕܕܼܵܒ̣ܝܼܪ ܡ̣ܢ ܩܕܼܝܼܡ ܩܘܼܪܝܲܬ̣ ܣܸܦܪܵܐ.

¹²ܘܐܸܡܲܪ ܟܵܠܵܒ̣: ܡ̇ܢ ܕܢܸܟ̣ܒ̇ܫܝܼܗ̇ ܠܩܘܼܪܝܲܬ̣ ܣܸܦܪܵܐ ܘܢܸܚ̱ܪܒ̣ܝܼܗ̇: ܐܸܬܸ̇ܠ ܠܹܗ ܠܥܲܟ̣ܣܵܐ ܒܪܲܬ̣ܝ ܐܲܢ̄ܬ̇ܬ̣ܵܐ.

¹³ܘܟܲܒ̣ܫܵܗ̇ ܥܲܬ̣ܢܵܐܹܝܠ ܒܲܪ ܩܲܢܲܙ ܐܲܚܘܼܗܝ ܕܟ̣ܵܠܵܒ̣ ܕܲܙܥܘܿܪ ܡܸܢܹܗ. ܘܝܲܗ̄ܒ̣ ܠܹܗ ܠܥܲܟ̣ܣܵܐ ܒܲܪܬܹܗ ܐܲܢ̄ܬ̇ܬ̣ܵܐ.

¹⁴ܘܟܲܕܼ ܥܵܐܠܵܐ: ܐܸܬ̣ܓܲܪܓܲܬ̤ ܠܡܸܫܐܸܠ ܡ̣ܢ ܐܲܒ̣ܘܼܗܝ ܚܲܩܠܵܐ: ܘܐܸܬ̣ܪܲܟ̣ܢܲܬ̤ ܡ̣ܢ ܚܡܵܪܵܐ. ܐܵܡܲܪ ܠܵܗ̇ ܟܵܠܵܒ̣: ܡܵܐ ܠܹܟ̣ܝ ܒܪܲܬ̣ܝ.

¹⁵ܐܵܡ̇ܪܵܐ ܠܹܗ. ܗܲܒ̣ ܠܝܼ ܒܘܼܪܟ̇ܬ̣ܵܐ: ܡܸܛܠ ܕܒܲܐܪܥܵܐ ܕܬܲܝ̱ܡܢܵܐ ܝܲܗ̄ܒܬܵܢܝ: ܗܲܒ̣ܠܝܼ ܒܹܝܬ̣ ܫܸܩܝܵܐ ܕܡܲـ̈ـܝܵܐ. ܘܝܲܗ̄ܒ̣ ܠܵܗ̇ ܟܵܠܵܒ̣ ܒܹܝܬ̣ ܫܸܩܝܵܐ ܥܸܠܵܝܬܵܐ ܘܒܹܝܬ̣ ܫܸܩܝܵܐ ܬܲܚܬܵܝܬܵܐ.

¹⁶ܘܲܒ̣̈ܢܲܝ ܩܝܼܢܲܝ ܚܡܘܼܗܝ ܕܡܘܼܫܹܐ: ܡܠܸܩ̣ܘ ܡ̣ܢ ܩܪܹܝܼܬ̣ܵܐ ܕܕܸܩ̈ܠܹܐ ܥܲܡ ܒ̈ܢܲܝ ܝܼܗܘܼܕܼܵܐ: ܠܡܲܕܼܒ̇ܪܵܐ ܕܲܝܗܘܼܕܼܵܐ ܕܲܒ̣ܬܲܝ̱ܡܢܵܐ ܕܥܵܕܲܪ: ܘܐܸܙܲܠ̣ܘ ܘܐܵܘܬܸ̇ܒ̣ܘ ܠܥܲܡܵܐ.

¹⁷ܘܐܸܙܲܠ ܫܸܡܥܘܿܢ ܥܲܡ ܝܼܗܘܼܕܼܵܐ ܐܲܚܘܼܗܝ: ܘܲܡܚ̣ܵܘ ܠܲܟ̣ܢܲܥܢܵܝܹ̈ܐ ܕܝܵܬ̣ܒ̇ܝܼܢ ܒܨܘܼܦܵܬ̣ ܘܐܲܚ̱ܪܡܘܼܗ̇: ܘܲܩܪܵܘ ܫܡܵܗ̇ ܕܲܩܪܝܼܬ̣ܵܐ ܚܸܪܡܵܐ.

¹⁸ܘܟ̣ܒܲܫ ܝܼܗܘܼܕܼܵܐ ܠܥܵܐܙܵܐ ܘܠܲܬ̣ܚܘܼܡܹ̈ܝܗ: ܘܠܲܐܫܩܵܠܘܿܢ ܘܠܲܬ̣ܚܘܼܡܹ̈ܝܗ̇: ܘܲܠܥܸܩܪܘܿܢ ܘܠܲܬ̣ܚܘܼܡܹ̈ܝܗ̇.

¹⁹ܘܲܗܘ̤ܵܐ ܡܵܪܝܵܐ ܥܲܡ ܝܼܗܘܼܕܼܵܐ ܘܝܼܪܸܬ̣ܘ ܛܘܼܪܵܐ: ܡܸܛܠ ܕܠܵܐ ܚܪܲܒ̣ܘ ܠܝܵܬ̣ܒܲܝ̈ ܥܘܼܡܩܵܐ: ܕܡܲܪ̈ܟ̇ܒ̣ܵܬ̣ܵܐ ܕܦܲܪܙܠܵܐ ܐܝܼܬ̣ ܠܗܘܿܢ.

²⁰ܘܝܲܗ̄ܒ̣ܘ ܠܟ̣ܵܠܵܒ̣ ܚܸܒ̣ܪܘܿܢ ܐܲܝܟ̣ ܕܐܸܡܲܪ ܡܘܼܫܹܐ: ܘܩܲܛܸܠܘ ܘܐܵܘܒܸ̇ܕܼܘ ܡ̣ܢ ܬܲܡܵܢ ܬܠܵܬ̣ܵܐ ܒ̈ܢܲܝ ܓܲܢ̄ܒܵܪܹ̈ܐ.

²¹ܘܲܠܝܵܒ̣ܘܿܣܵܝܹ̈ܐ ܕܝܵܬ̣ܒ̇ܝܼܢ ܒܐܘܿܪܸܫܠܸܡ: ܠܵܐ ܐܵܘܒܸ̇ܕܼܘ ܒ̈ܢܲܝ ܒܸܢܝܵܡܹܝܢ: ܘܝܼܬܸܒ̣ܘ ܝܵܒ̣̈ܘܿܣܵܝܹܐ ܥܲܡ ܒ̈ܢܲܝ ܒܸܢܝܵܡܹܝܢ ܒܐܘܿܪܸܫܠܸܡ ܥܕܲܡܵܐ ܠܝܵܘܡܵܢܵܐ.

²²ܘܲܣܠܸܩ̣ܘ ܕܒܹܝܬ̣ ܝܵܘܣܸܦ ܘܐܵܦ ܗܸܢܘܿܢ ܠܒܹܝܬ̣ ܐܹܝܠ ܘܡܵܪܝܵܐ ܥܲܡܗܘܿܢ.

²³ܘܦܵܫܘ ܕܒܹܝܬ̣ ܝܵܘܣܸܦ ܒܒܹܝܬ̣ ܐܹܝܠ: ܘܲܫܡܵܗ̇ ܕܲܩܪܝܼܬ̣ܵܐ ܡ̣ܢ ܩܕܼܝܼܡ ܠܘܵܙ.

²⁴ܘܲܚܙܵܘ ܢܵܛܘܼܪܹ̈ܐ ܓܲܒ̣ܪܵܐ ܕܢܵܦܹ̇ܩ ܡ̣ܢ ܩܪܝܼܬ̣ܵܐ ܘܐܵܡ̇ܪܝܼܢ ܠܹܗ: ܚܵܘܵܢ ܐܲܝܢܵܘ ܡܲܥܠܵܢܵܐ ܕܲܩܪܝܼܬ̣ܵܐ: ܘܢܸܥܒܸ̇ܕܼ ܥܲܡܵܟ̣ ܫܠܵܡܵܐ.

²⁵ܘܚܵܘܝܼ ܐܸܢܘܿܢ ܡܲܥܠܵܢܵܐ ܕܲܩܪܝܼܬ̣ܵܐ: ܘܲܡ̣ܚܵܘ ܠܲܩܪܝܼܬ̣ܵܐ ܒܦܘܼܡܵܐ ܕܚܲܪܒܵܐ: ܘܲܠܓܲܒ̣ܪܵܐ ܗܵܘ̇ ܘܲܠܟ̣ܠܵܗ̇ ܫܲܪܒ̇ܬܹܗ ܫܲܒ̣ܩܘܼܗܝ.

²⁶ܘܐܸܙܲܠ ܓܲܒ̣ܪܵܐ ܗܵܘ̇ ܠܐܲܪܥܵܐ ܕܚܹܬ̣ܵܝܹ̈ܐ ܘܲܒ̣ܢܵܐ ܩܪܝܼܬ̣ܵܐ: ܘܲܩܪܵܐ ܫܡܵܗ̇ ܠܘܿܙ: ܘܗ̤ܘܝܘܼ ܫܡܵܗ̇ ܥܕܲܡܵܐ ܠܝܵܘܡܵܢܵܐ.

²⁷ܘܠܵܐ ܚܪܲܒ̣ ܡܢܲܫܹܐ ܠܒܹܝܬ̣ ܫܵܐܲܢ ܘܲܠܟܲܦܪ̈ܘܿܢܹܝܗ̇: ܘܲܠܬܲܥܢܵܟ ܘܲܠܟܲܦܪ̈ܘܿܢܹܝܗ̇: ܘܲܠܝܵܬ̣ܒܲܝ̈ ܕܘܿܪ ܘܲܠܟܲܦܪ̈ܘܿܢܹܝܗ̇: ܘܲܠܝܵܬ̣ܒܲܝ̈ ܐܲܒ̣ܝܼܢܥܵܡ ܘܲܠܟܲܦܪ̈ܘܿܢܹܝܗ̇: ܘܲܠܝܵܬ̣ܒܲܝ̈ ܡܲܓܕ̇ܘܼ ܘܲܠܟܲܦܪ̈ܘܿܢܹܝܗ̇: ܐܸܫܬܲܥܒܲܕܼ ܟܝܼܥܢܵܝܵܐ ܕܝܵܬܹܒ̣ ܒܐܲܪܥܵܐ ܗܵܝ̇.

²⁸ܘܟܲܕܼ ܐܸܬ̣ܚܲܝܲܠ ܝܼܣܪܵܝܹܠ: ܟܲܒ̣ܫܹܗ ܠܲܟ̣ܢܲܥܢܵܝܵܐ ܒܡܲܕܲܐܬ̣ܵܐ: ܘܡܵܘܒܵܕܼܘ ܠܵܐ ܐܵܘܒ̇ܕܹܗ.

²⁹ܘܐܲܦܪܹܝܡ ܠܵܐ ܐܵܘܒܸ̇ܕ ܠܲܟ̣ܢܲܥܢܵܝܵܐ ܕܝܵܬܹܒ̣ ܒܓ̣ܵܙܵܪ: ܘܝܼܬܸܒ̣ܘ ܟܢܲܥܢܵܝܹ̈ܐ ܒܲܝܢܵܬ̣ܗܘܿܢ ܒܓ̣ܵܙܵܪ.

³⁰ܘܲܙܒ̣ܘܿܠܘܿܢ ܠܵܐ ܐܵܘܒܸ̇ܕܼ ܠܝܵܬ̣ܒܲܝ̈ ܩܸܛܪܘܿܢ ܘܲܠܝܵܬ̣ܒܲܝ̈ ܝܲܗܠܝܼܠ. ܘܝܼܬܸܒ̣ܘ ܟܢܲܥܢܵܝܹ̈ܐ ܥܲܡܹܗ: ܘܐܸܬ̣ܟ̇ܒܸܫܘ ܒܡܲܕܲܐܬ̣ܵܐ.

³¹ܘܐܵܫܹܝܪ ܠܵܐ ܐܵܘܒܸ̇ܕܼ ܠܝܵܬ̣ܒܲܝ̈ ܥܲܟ̇ܘܿ: ܘܲܠܝܵܬ̣ܒܲܝ̈ ܨܲܝܕ̇ܘܿܢ: ܘܠܲܚܒܸܠ: ܘܠܐܝܼܙܒܸ̇ܠ: ܘܲܠܚܲܠܒ̣ܵܐ: ܘܠܵܐܦܵܩ: ܘܲܠܪܵܚܘܿܒ̣.

³²ܘܝܼܬܸܒ̣ ܐܵܫܹܝܪ ܒܲܝܢܵܬ̣ ܟܢܲܥܢܵܝܹ̈ܐ ܝܵܬ̣ܒܲܝ̈ ܐܲܪܥܵܐ: ܡܸܛܠ ܕܠܵܐ ܐܵܘܒܸ̇ܕܼ ܐܸܢܘܿܢ.

³³ܘܢܲܦ̮ܬܵܠܝܼ ܠܵܐ ܐܵܘܒܸ̇ܕ ܠܝܵܬ̣ܒܲܝ̈ ܒܹܝܬ̣ ܫܡܸܫ: ܘܲܠܝܵܬ̣ܒܲܝ̈ ܒܹܝܬ̣ ܥܢܵܬ̣: ܘܝܼܬܸܒ̣ܘ ܒܹܝܬ̣ ܟܢܲܥܢܵܝܹܐ ܝܵܬ̣ܒܲܝ̈ ܐܲܪܥܵܐ: ܘܝܵܬ̣ܒܲܝ̈ ܒܹܝܬ̣ ܫܡܸܫ: ܘܝܵܬ̣ܒܲܝ̈ ܒܹܝܬ̣ ܥܢܵܬ̣: ܘܐܸܬ̣ܟ̇ܒܸܫܘ ܠܗܘܿܢ ܒܡܲܕܲܐܬ̣ܵܐ.

³⁴ܘܐܲܪܚܸܩ̣ܘ ܐܸܢܘܿܢ ܠܐܵܡܘܿܪ̈ܵܝܹܐ ܒ̈ܢܲܝ ܕܵܢ ܠܛܘܼܪܵܐ: ܡܸܛܠ ܕܠܵܐ ܫܒܲܩ̣ܘ ܐܸܢܘܿܢ ܠܡܸܚܲܬ̣ ܠܥܘܼܡܩܵܐ.

³⁵ܘܐܸܬ̇ܛܦܝܼܣܘ ܐܵܡܘܿܪ̈ܵܝܹܐ ܠܡܸܬܲܒ̣ ܒܐܲܪܥܵܐ ܕܲܚܕܸܣ ܒܛܘܼܪܵܐ: ܒܐܲܠܘܿܢ ܘܲܒ̣ܫܲܥ̱ܠܒ̣ܝܼܢ: ܘܥܸܫܢܲܬ̤ ܐܝܼܕܼܵܐ ܕܒܹܝܬ̣ ܝܵܘܣܸܦ: ܘܐܸܬ̣ܟ̇ܒܸܫܘ ܒܡܲܕܲܐܬ̣ܵܐ.

³⁶ܘܲܬ̣ܚܘܼܡܵܐ ܕܐܵܡܘܿܪ̈ܵܝܹܐ: ܡ̣ܢ ܡܲܣܩܵܢܵܐ ܕܥܸܩܪܘܿܢ ܡ̣ܢ ܫܩܝܼܦܵܐ ܘܲܠܥܸܠ.