Read Aramaic Peshita Judges 11 Bible Online

Judges 11 - Aramaic Peshita bible

Judges 11

¹ܘܢܲܦ̮ܬܲܚ ܓܸܠܥܵܕܼܵܝܵܐ ܓܲܢ̄ܒܵܪ ܗ̄ܘ̣ܵܐ ܚܲܝܠܹܗ: ܘܗ̤ܘ ܒܲܪ ܐܲܢ̄ܬ̇ܬ̣ܵܐ ܗ̄ܘ̣ܵܐ ܙܵܢܝܼܬ̣ܵܐ: ܘܐܵܘܠܸܕܼ ܓܸܠܥܵܕܼ ܠܢܲܦ̮ܬܲܚ.

²ܘܝܸܠܕܲܬ̤ ܐܲܢ̄ܬ̇ܬܹܗ ܕܓܸܠܥܵܕܼ ܠܹܗ ܒ̈ܢܲܝܵܐ: ܘܲܪܒ̣ܵܘ ܒܢܹ̈ܝܗ̇ ܕܐܲܢ̄ܬ̇ܬ̣ܵܐ ܘܛܲܪܕ̇ܘܼܗܝ ܠܢܲܦ̮ܬܲܚ: ܘܐܵܡ̇ܪܝܼܢ ܠܵܐ ܢܹܐܪܲܬ̣ ܒܹܝܬ̣ ܐܲܒ̣ܘܼܢ: ܡܸܛܠ ܕܒܲܪ ܐܲܢ̄ܬ̇ܬ̣ܵܐ ܗ̄ܘ̣ ܐ̄ܚܪܹܬ̣ܵܐ.

³ܘܲܥܪܲܩ ܢܲܦ̮ܬܲܚ ܡ̣ܢ ܩܕܼܵܡ ܐܲܚܵܘ̈ܗܝ: ܘܝܼܬܸܒ̣ ܒܐܲܪܥܵܐ ܛܵܒ̣ܬ̣ܵܐ: ܘܐܸܬ̣ܠܲܒܲܛܘ ܠܘܵܬ̣ ܢܲܦ̮ܬܲܚ ܐ̄ܢܵܫܵܐ ܣܪ̈ܝܼܩܹܐ: ܘܲܢܦܲܩ̣ܘ ܥܲܡܹܗ.

⁴ܘܲܗܘ̤ܵܐ ܡ̣ܢ ܒܵܬܲܪ ܝܵܘ̈ܡܵܬ̣ܵܐ: ܐܸܬ̣ܟܲܬܲܫ̣ܘ ܒ̈ܢܲܝ ܥܲܡܘܿܢ ܥܲܡ ܝܼܣܪܵܝܹܠ.

⁵ܘܟܲܕܼ ܐܹܬ̣ܟܲܬܲܫ̣ܘ ܒ̈ܢܲܝ ܥܲܡܘܿܢ ܥܲܡ ܒ̈ܢܲܝ ܝܼܣܪܵܝܹܠ: ܐܸܙܲܠ̣ܘ ܩܲܫܝܼܫܹ̈ܐ ܕܓܸܠܥܵܕܼ ܠܡܸܕܼܒ̇ܪܹܗ ܠܢܲܦ̮ܬܲܚ ܡ̣ܢ ܐܲܪܥܵܐ ܛܵܒ̣ܬ̣ܵܐ.

⁶ܘܐܸܡܲܪܘ ܠܢܲܦ̮ܬܲܚ: ܬܵܐ ܗ̤ܘܝܼ ܠܲܢ ܪܹܫܵܐ: ܘܢܸܬ̣ܟܲܬܲܫ ܥܲܡ ܒ̈ܢܲܝ ܥܲܡܘܿܢ.

⁷ܘܐܸܡܲܪ ܢܲܦ̮ܬܲܚ ܠܩܲܫܝܼܫܹ̈ܐ ܕܓܸܠܥܵܕܼ: ܠܵܐ ܐܲܢ̄ܬ̇ܘܿܢ ܣܢܲܝܬ̇ܘܿܢܵܢܝ ܘܲܛܪܲܕ̇ܬ̇ܘܿܢܵܢܝ ܡ̣ܢ ܒܹܝܬ̣ ܐܵܒ̣ܝ: ܘܗܵܫܵܐ ܡܵܢܵܐ ܐܸܬܲܝܬ̇ܘܿܢ ܠܘܵܬ̣ܝ ܟܲܕܼ ܥܵܩܲܬ̤ ܠܟ̣ܘܿܢ.

⁸ܘܐܸܡܲܪܘ ܠܹܗ ܩܲܫܝܼܫܹ̈ܐ ܕܓܸܠܥܵܕܼ ܠܢܲܦ̮ܬܲܚ: ܡܸܛܠ ܗܵܢܵܐ ܗܵܫܵܐ ܗܵܐ ܐܸܬܲܝܢ ܠܘܵܬ̣ܵܟ̣: ܙܸܠ ܥܲܡܲܢ ܘܢܸܬ̣ܟܲܬܲܫ ܥܲܡ ܒ̈ܢܲܝ ܥܲܡܘܿܢ: ܘܗ̤ܘܝܼ ܪܹܫܵܐ ܠܟ̣ܠ ܝܵܬ̣ܒܲܝ̈ ܓܸܠܥܵܕܼ.

⁹ܘܐܸܡܲܪ ܢܲܦ̮ܬܲܚ ܠܩܲܫܝܼܫܹ̈ܐ ܕܓܸܠܥܵܕܼ: ܐܸܢ ܡܵܗܦܟ̣ܝܼܢ ܐ̄ܢܬ̇ܘܿܢ ܠܝܼ ܕܐܸܬ̣ܟܲܬܲܫ ܥܲܡ ܒ̈ܢܲܝ ܥܲܡܘܿܢ: ܘܡܲܫܠܸܡ ܠܗܘܿܢ ܡܵܪܝܵܐ ܩܕܼܵܡܲܝ: ܐܸܢܵܐ ܐܸܗܘܹܐ ܠܟ̣ܘܿܢ ܪܹܫܵܐ.

¹⁰ܘܐܸܡܲܪܘ ܠܹܗ ܩܲܫܝܼܫܹ̈ܐ ܕܓܸܠܥܵܕܼ: ܡܵܪܝܵܐ ܢܸܗܘܹܐ ܫܵܡܘܿܥܵܐ ܒܲܝܢܵܬܲܢ: ܐܸܠܵܐ ܐܲܝܟ ܡܸܠܬ̣ܵܟ̣ ܗܵܟܲܢܵܐ ܢܸܥܒܸ̇ܕܼ.

¹¹ܘܐܸܙܲܠ ܢܲܦ̮ܬܲܚ ܥܲܡ ܩܲܫܝܼܫܹ̈ܐ ܕܓܸܠܥܵܕܼ: ܘܐܲܩܝܼܡܘܼܗܝ ܥܠܲܝܗܘܿܢ ܪܹܫܵܐ ܘܫܲܠܝܼܛܵܐ: ܘܐܸܡܲܪ ܢܲܦ̮ܬܲܚ ܟܠܗܹܝܢ ܡܸܠܵܘ̈ܗܝ ܩܕܼܵܡ ܡܵܪܝܵܐ ܒܡܲܨܦܝܵܐ.

¹²ܘܫܲܕܲܪ ܢܲܦ̮ܬܲܚ ܐܝܼܙ̈ܓܲܕܹ̇ܐ ܠܘܵܬ̣ ܡܲܠܟܵܐ ܕܲܒ̣̈ܢܲܝ ܥܲܡܘܿܢ ܠܡܹܐܡܲܪ ܠܹܗ: ܡܵܐ ܠܝܼ ܘܠܵܟ̣ ܕܐܸܬܲܝܬ̇ ܠܡܸܬ̣ܟܲܬܵܫܘܼ ܒܐܲܪܥܝ.

¹³ܘܐܸܡܲܪ ܡܲܠܟܵܐ ܕܲܒ̣̈ܢܲܝ ܥܲܡܘܿܢ ܠܐܝܼܙܓܲܕܵܘ̈ܗܝ ܕܢܲܦ̮ܬܲܚ: ܡܸܛܠ ܕܲܢܣܲܒ̣ܘ ܗ̄ܘ̣ܵܘ ܒ̈ܢܲܝ ܝܼܣܪܵܝܹܠ ܐܲܪܥܝ: ܟܲܕܼ ܣܵܠܩܝܼܢ ܗ̄ܘ̣ܵܘ ܡ̣ܢ ܐܲܪܥܵܐ ܕܡܸܨܪܹܝܢ: ܡܟܢ ܐܲܪܢܘܿܢ ܘܲܥܕܲܡܵܐ ܠܐܵܒ̣ܵܩ: ܘܲܥܕܲܡܵܐ ܠܝܘܿܪܕ̇ܢܵܢ: ܗܵܫܵܐ ܦܲܢܵܐ ܐܸܢܹܝܢ ܠܝܼ ܒܲܫܠܵܡܵܐ.

¹⁴ܘܲܗܦܲܟ̣ ܬܘܼܒ̣ ܢܲܦ̮ܬܲܚ: ܘܫܲܕܲܪ ܐܸܓܪ̈ܵܬ̣ܵܐ ܘܐܝܼܙ̈ܓܲܕܹ̇ܐ ܠܘܵܬ̣ ܡܲܠܟܵܐ ܕܲܒ̣̈ܢܲܝ ܥܲܡܘܿܢ.

¹⁵ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܢܲܦ̮ܬܲܚ: ܠܵܐ ܢܣܲܒ̣ ܝܼܣܪܵܝܹܠ ܐܲܪܥܵܐ ܕܡܘܼܐܵܒ̣: ܘܐܲܪܥܵܐ ܕܲܒ̣̈ܢܲܝ ܥܲܡܘܿܢ.

¹⁶ܡܸܛܠ ܟܲܕܼ ܣܵܠܩܝܼܢ ܗ̄ܘ̣ܵܘ ܡ̣ܢ ܡܸܨܪܹܝܢ: ܗܲܠܸܟ̣ܘ ܗ̄ܘ̣ܵܘ ܒ̈ܢܲܝ ܝܼܣܪܵܝܹܠ ܒܡܲܕܼܒ̇ܪܵܐ: ܥܕܲܡܵܐ ܠܝܲܡܵܐ ܕܣܘܿܦ: ܘܡܲܛܝܼܘ ܠܲܪܩܸܡ.

¹⁷ܘܫܲܕܲܪ ܗ̄ܘ̣ܵܐ ܝܼܣܪܵܝܹܠ ܐܝܼܙ̈ܓܲܕܹ̇ܐ ܠܘܵܬ̣ ܡܲܠܟܵܐ ܕܐܲܕܼܘܿܡ: ܠܡܹܐܡܲܪ ܠܹܗ: ܢܸܥܒܲܪ ܒܐܲܪܥܵܟ̣. ܘܠܵܐ ܫ̣ܡܲܥ ܡܲܠܟܵܐ ܕܐܲܕܼܘܿܡ: ܘܐܵܦ ܠܡܲܠܟܵܐ ܕܡܘܼܐܵܒ̣ ܫܠܲܚ̣ ܘܠܵܐ ܐܸܬ̇ܛܦܝܼܣ ܠܹܗ. ܘܝܸܬܸܒ̣ ܝܼܣܪܵܝܹܠ ܒܲܪܩܸܡ.

¹⁸ܘܗܲܠܸܟ̣ ܒܡܲܕܼܒ̇ܪܵܐ: ܘܐܸܬ̣ܟ̇ܪܸܟ̣ ܐܲܪܥܵܐ ܕܐܲܕܼܘܿܡ: ܘܐܲܪܥܵܐ ܕܡܘܼܐܵܒ̣: ܘܲܫܪܵܘ ܒܥܸܒ̣ܪܵܐ ܕܐܲܪܢܘܿܢ: ܘܠܵܐ ܥܲܠ̣ܘ ܒܲܬ̣ܚܘܼܡܵܐ ܕܡܘܼܐܵܒ̣: ܡܸܛܠ ܕܐܲܪܢܘܿܢ ܬܚܘܼܡܵܐ ܗ̄ܘ̣ܵܐ ܕܡܘܼܐܵܒ̣.

¹⁹ܘܫܲܕܲܪ ܗ̄ܘ̣ܵܐ ܝܼܣܪܵܝܹܠ ܐܝܼܙ̈ܓܲܕܹܐ ܠܘܵܬ̣ ܣܝܼܚܘܿܢ ܡܲܠܟܵܐ ܕܐܵܡܘܿܪ̈ܵܝܹܐ: ܘܡܲܠܟܵܐ ܕܚܸܫܒ̇ܘܿܢ. ܘܐܸܡܲܪ ܠܹܗ ܝܼܣܪܵܝܹܠ: ܢܸܥܒܲܪ ܒܐܲܪܥܵܟ̣ ܥܕܲܡܵܐ ܠܐܲܪܥܝ.

²⁰ܘܠܵܐ ܗܲܝܡܸܢ ܣܝܼܚܘܿܢ ܠܝܼܣܪܵܝܹܠ ܕܢܸܥܒܲܪ ܒܲܬ̣ܚܘܼܡܹܗ: ܘܟܲܢܸܫ ܣܝܼܚܘܿܢ ܠܟ̣ܠܹܗ ܥܲܡܹܗ: ܘܲܫܪܵܘ ܒܝܵܗܵܨ: ܘܐܸܬ̣ܟܲܬܲܫ̣ ܥܲܡ ܝܼܣܪܵܝܹܠ.

²¹ܘܐܲܫܠܸܡ ܡܵܪܝܵܐ ܐܲܠܵܗܲܢ ܠܣܝܼܚܘܿܢ ܘܲܠܟ̣ܠܹܗ ܥܲܡܹܗ ܒܐܝܼܕܼܵܐ ܕܝܼܣܪܵܝܹܠ: ܘܐܵܘܒܸ̇ܕܼ ܝܼܣܪܵܝܹܠ ܐܲܪܥܵܐ ܕܐܵܡܘܿܪ̈ܵܝܹܐ.

²²ܘܝܼܪܸܬ̣ܘ ܟܠܹܗ ܬܚܘܼܡܗܘܿܢ: ܡ̣ܢ ܐܲܪܢܘܿܢ ܘܲܥܕܲܡܵܐ ܠܐܵܒ̣ܵܩ: ܘܡ̣ܢ ܡܲܕܼܒ̇ܪܵܐ ܘܲܥܕܲܡܵܐ ܠܝܘܿܪܕ̇ܢܵܢ.

²³ܘܗܵܫܵܐ ܡܵܪܝܵܐ ܐܲܠܵܗܵܐ ܐܵܘܒܸ̇ܕܼ ܠܐܵܡܘܿܪ̈ܵܝܹܐ ܡ̣ܢ ܩܕܼܵܡ ܥܲܡܹܗ ܝܼܣܪܵܝܹܠ: ܘܐܲܢ̄ܬ̇ ܝܵܪܹܬ̣ ܐܲܢ̄ܬ̇ ܠܗܘܿܢ.

²⁴ܠܵܐ ܗ̄ܘ̣ܵܐ ܡܸܕܸ̇ܡ ܕܐܵܘ̱ܪܬ̣ܵܟ̣ ܟܵܡܘܿܫ ܐܲܠܵܗܵܟ̣ ܝܵܪܹܬ̣ ܐܲܢ̄ܬ̇. ܘܡܸܕܸ̇ܡ ܕܐܵܘܒܸ̇ܕܼ ܡܵܪܝܵܐ ܐܲܠܵܗܲܢ ܡ̣ܢ ܩܕܼܵܡܲܝܢ: ܠܹܗ ܗ̄ܘ̣ ܝܵܪܬ̇ܝܼܢܲܢ.

²⁵ܗܵܫܵܐ ܡܛܵܒ̣ ܐܲܢ̄ܬ̇ ܡ̣ܢ ܒܵܠܵܩ ܒܲܪ ܨܦܘܿܪ ܡܲܠܟܵܐ ܕܡܘܼܐܵܒ̣: ܕܲܠܡܵܐ ܡܸܬ̣ܚܪܵܝܘܼ ܐܸܬ̣ܚ̄ܪܝܼ ܗ̄ܘ̣ܵܐ ܥܲܡ ܝܼܣܪܵܝܹܠ: ܐܵܘ ܡܸܬ̣ܟܲܬܵܫܘ ܐܸܬ̣ܟܲܬܲܫ̣ ܗ̄ܘ̣ܵܐ ܥܲܡܗܘܿܢ.

²⁶ܟܲܕܼ ܝܼܬܸܒ̣ ܝܼܣܪܵܝܹܠ ܒܚܸܫܒ̇ܘܿܢ ܘܲܒ̣ܟܲܦܪ̈ܘܿܢܹܝܗ̇: ܘܲܒ̣ܥܲܕܘܵܥܝܼܪ ܘܲܒ̣ܟܲܦܪ̈ܘܿܢܹܝܗ̇: ܘܲܒ̣ܟ̣ܠܗܘܿܢ ܩܘܼܪ̈ܝܵܐ ܕܥܲܠ ܓܹܢ̄ܒ̣ ܐܲܪܢܘܿܢ ܬܠܵܬ̣ܡܵܐܐ ܫܢ̈ܝܼܢ: ܠܡܵܢܵܐ ܠܵܐ ܐܲܥܕ̇ܝܼܬ̇ܘܿܢ ܐܸܢܹܝܢ ܒܙܲܒ̣ܢܵܐ ܗܵܘ̇.

²⁷ܐܸܠܵܐ ܐܸܢܵܐ ܗܵܫܵܐ ܠܵܐ ܚܛܹ̇ܝܬ̣ ܠܵܟ̣: ܘܐܲܢ̄ܬ̇ ܥܵܒܹܕܼ ܐܲܢ̄ܬ̇ ܥܲܡܝ ܒܝܼܫܬܵܐ ܠܡܸܬ̣ܟܲܬܵܫܘܼ ܥܲܡܝ: ܢܕܼܘܼܢ ܡܵܪܝܵܐ ܝܵܘܡܵܢܵܐ ܒܲܝܢܲܝ ܒ̈ܢܲܝ ܝܼܣܪܵܝܹܠ: ܘܲܠܒܹܝܬ̣ ܒ̈ܢܲܝ ܥܲܡܘܿܢ.

²⁸ܘܠܵܐ ܫ̣ܡܲܥ ܡܲܠܟܵܐ ܕܲܒ̣̈ܢܲܝ ܥܲܡܘܿܢ ܠܡܸܠܵܘ̈ܗܝ ܕܢܲܦ̮ܬܲܚ ܕܲܫ̣ܠܲܚ ܠܹܗ.

²⁹ܘܲܗܘ̤ܵܬ̣ ܥܲܠ ܢܲܦ̮ܬܲܚ ܪܘܼܚܹܗ ܕܡܵܪܝܵܐ: ܘܲܥ̣ܒܲܪ ܠܓܸܠܥܵܕܼ ܘܠܲܡܢܲܫܹܐ: ܘܲܥ̣ܒܲܪ ܠܡܲܨܦܝܵܐ ܕܓܸܠܥܵܕܼ: ܘܡ̣ܢ ܡܲܨܦܝܵܐ ܕܓܸܠܥܵܕܼ ܥ̣ܒܲܪ ܠܲܒ̣̈ܢܲܝ ܥܲܡܘܿܢ.

³⁰ܘܲܢܕܲܪ ܢܲܦ̮ܬܲܚ ܢܸܕܼܪܵܐ ܠܡܵܪܝܵܐ: ܘܐܸܡܲܪ: ܐܸܢ ܡܲܫܠܵܡܘܼ ܬܲܫܠܸܡ ܠܲܒ̣̈ܢܲܝ ܥܲܡܘܿܢ ܒܐܝܼܕܲܝ̈.

³¹ܡ̇ܢ ܕܢܵܦܹ̇ܩ ܡ̣ܢ ܬܲܪܥܵܐ ܕܒܲܝܬ̇ܝ ܠܐܘܼܪܥܝ: ܡܵܐ ܕܐܸܬܹܝܬ̣ ܒܲܫܠܵܡܵܐ ܡ̣ܢ ܒ̈ܢܲܝ ܥܲܡܘܿܢ: ܢܸܗܘܹܐ ܠܡܵܪܝܵܐ: ܘܐܲܣܩܝܼܘܗܝ ܠܲܥܠܵܬ̣ܵܐ.

³²ܘܲܥܒܲܪ ܢܲܦ̮ܬܲܚ ܥܲܠ ܒ̈ܢܲܝ ܥܲܡܘܿܢ: ܠܡܸܬ̣ܟܲܬܵܫܘܼ ܥܲܡܗܘܿܢ: ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܹܗ.

³³ܘܲܡ̣ܚܵܐ ܐܸܢܘܿܢ ܡ̣ܢ ܥܲܕܼܘܵܥܝܼܪ ܘܲܥܕܲܡܵܐ ܠܡܲܥܠܵܢܵܐ ܕܡܵܟ̣ܝܼܪ: ܥܸܣܪܝܼܢ ܩܘܼܪ̈ܝܵܐ: ܘܲܥܕܲܡܵܐ ܠܐܵܒ̣ܠ ܟܲܪ̈ܡܝܼܢ: ܡܚܘܿܬ̣ܵܐ ܪܲܒ̇ܬ̣ܵܐ ܕܛܵܒ̣. ܘܐܸܬ̇ܬ̇ܒܲܪܘ ܒ̈ܢܲܝ ܥܲܡܘܿܢ ܩܕܼܵܡ ܒ̈ܢܲܝ ܝܼܣܪܵܝܹܠ.

³⁴ܘܐܸܬ̣ܵܐ ܢܲܦ̮ܬܲܚ ܠܡܲܨܦܝܵܐ ܠܒܲܝܬܹ̇ܗ: ܘܗܵܐ ܒܲܪܬܹܗ ܢܸܦܩܲܬ̤ ܠܐܘܼܪܥܹܗ ܒܲܦ̈ܠܲܓܹ̇ܐ ܘܒܲܪ̈ܒ̣ܝܼܥܵܐ: ܘܗ̤ܝ ܝܼܚܝܼܕܼܵܝܬܵܐ ܗ̄ܘ̣ܵܬ̣ ܠܹܗ: ܘܠܲܝܬ̇ ܗ̄ܘ̣ܵܐ ܠܹܗ ܒܪܵܐ ܐܵܘ ܒܲܪܬ̣ܵܐ ܠܒܲܪ ܡܸܢܵܗ̇.

³⁵ܘܟܲܕܼ ܚ̣ܙܵܗ̇ ܨܲܪܝܼ ܠܒ̣ܘܼܫܵܘ̈ܗܝ: ܘܐܸܡܲܪ: ܐܘܿܗ̇ ܒܪܲܬ̣ܝ ܡܸܣܚܲܦ ܣܚܲܦܬ̇ܝܼܢܝ: ܘܐܲܢ̄ܬ̇ܝ ܗ̤ܘܲܝܬ̇ܝ ܝܵܘܡܵܢܵܐ ܡ̣ܢ ܣܵܚܘܿܦܲܝ̈: ܕܗܵܐ ܐܸܢܵܐ ܦܸܬ̣ܚܹܬ̣ ܦܘܼܡܝ ܠܘܵܬ̣ ܐܲܠܵܗܵܐ: ܘܠܵܐ ܡܸܫܟܲܚ ܐ̄ܢܵܐ ܕܐܸܗܦܘܿܟ̣.

³⁶ܘܐܸܡܪܲܬ̤ ܠܹܗ ܒܲܪܬܹܗ: ܐܵܒ̣ܝ ܦܬܲܚܬ̇ ܦܘܼܡܵܟ̣ ܠܘܵܬ̣ ܐܲܠܵܗܵܐ: ܥܒܸܕܼ ܠܝܼ ܐܲܝܟ̣ ܡܸܕܸ̇ܡ ܕܲܢ̣ܦܲܩ ܡ̣ܢ ܦܘܼܡܵܟ̣: ܡ̣ܢ ܒܵܬܲܪ ܕܲܥ̣ܒܲܕܼ ܠܵܟ̣ ܡܵܪܝܵܐ ܢܩܲܡܬ̣ܵܐ ܡ̣ܢ ܒܥܸܠܕ̇ܒ̣ܵܒܲܝ̈ܟ ܡ̣ܢ ܒ̈ܢܲܝ ܥܲܡܘܿܢ.

³⁷ܘܐܵܡ̇ܪܵܐ ܠܐܲܒ̣ܘܼܗܝ: ܒܲܠܚܘܿܕܼ ܥܒܸܕܼ ܠܝܼ ܗܵܕܹܐ: ܐܲܪܦܵܢܝ ܬܪܹܝܢ ܝܲܪ̈ܚܝܼܢ: ܘܐܸܙܲܠ ܐܹܗܲܠܸܟ̣ ܥܲܠ ܛܘܼܪܹ̈ܐ: ܘܐܸܒ̣ܟܹ̇ܐ ܥܲܠ ܒܬ̣ܘܼܠܘܼܬ̣ܝ ܐܸܢܵܐ ܘܚܲܒ̣ܪ̈ܵܬ̣ܝ.

³⁸ܘܐܸܡܲܪ ܠܵܗ̇ ܙܸܠܝ: ܘܫܲܕ̇ܪܵܗ̇ ܬܪܹܝܢ ܝܲܪ̈ܚܝܼܢ: ܘܐܸܙܲܠ̄ܬ̇ ܗ̤ܝ ܘܚܲܒ̣ܪ̈ܵܬ̣ܵܗ̇: ܘܲܒ̣ܟ̣ܵܬ̣ ܥܲܠ ܒܬ̣ܘܼܠܘܼܬ̣ܵܗ̇ ܥܲܠ ܛܘܼܪܹ̈ܐ.

³⁹ܘܡ̣ܢ ܒܵܬܲܪ ܬܪܹܝܢ ܝܲܪ̈ܚܝܼܢ: ܐܸܬ̣ܵܬ̤ ܠܘܵܬ̣ ܐܲܒ̣ܘܼܗ̇: ܘܲܥ̣ܒܲܕܼ ܠܵܗ̇ ܐܲܝܟ̣ ܢܸܕܼܪܵܐ ܕܲܢܕܲܪ: ܘܗ̤ܘ ܠܵܐ ܚܲܟ̣ܡܵܗ̇ ܓܒܲܪ: ܘܲܗܘ̤ܵܬ̣ ܠܵܗ̇ ܐܵܬ̤ܵܐ ܒܲܝܢܵܬ̣ ܒ̈ܢܲܝ ܝܼܣܪܵܝܹܠ.

⁴⁰ܘܡ̣ܢ ܥܸܕܵܢ ܠܥܸܕܵܢ: ܐܵܙܵܠ̄ܢ ܗ̄ܘܲܝ̈ ܒ̈ܢܵܬ̣ ܝܼܣܪܵܝܹܠ: ܘܒ̣ܵܟ̣̈ܝܵܢ ܘܐܵܠ̈ܝܵܢ ܥܲܠ ܒܲܪܬܹܗ ܕܢܲܦ̮ܬܲܚ ܓܸܠܥܵܕܼܵܝܵܐ: ܐܲܪܒ̇ܥܵܐ ܝܵܘ̈ܡܝܼܢ ܒܫܲܢ̄ܬܵܐ.