Read Aramaic Peshita Judges 13 Bible Online

Judges 13 - Aramaic Peshita bible

Judges 13

¹ܘܐܵܘܣܸܦܘ ܬܘܼܒ̣ ܒ̈ܢܲܝ ܝܼܣܪܵܝܹܠ ܠܡܸܥܒܲܕܼ ܕܒ̣ܝܼܫ ܩܕܼܵܡ ܡܵܪܝܵܐ: ܘܐܲܫܠܸܡ ܐܸܢܘܿܢ ܡܵܪܝܵܐ ܒܐܝܼܕܼܵܐ ܕܲܦܠܸܫܬܵܝܹ̈ܐ ܐܲܪܒ̇ܥܝܼܢ ܫܢ̈ܝܼܢ.

²ܘܲܗܘ̤ܵܐ ܓܲܒ̣ܪܵܐ ܚܲܕܼ ܡ̣ܢ ܨܸܕܼܥܵܐ: ܡ̣ܢ ܫܲܪܒ̇ܬ̣ܵܐ ܕܕܼܵܢ: ܘܲܫܡܹܗ ܡܢܘܿܚ: ܘܐܲܢ̄ܬ̇ܬܹܗ ܥܩܲܪܬ̣ܵܐ ܗ̄ܘ̣ܵܬ̣ ܘܠܵܐ ܝܵܠܕܵܐ.

³ܘܐܸܬ̣ܚܙܝܼ ܡܲܠܲܐܟܹܗ ܕܡܵܪܝܵܐ ܠܐܲܢ̄ܬ̇ܬ̣ܵܐ ܗܵܝ̇: ܘܐܸܡܲܪ ܠܵܗ̇: ܗܵܐ ܐܲܢ̄ܬ̇ܝ ܥܲܩܪܵܐ ܘܠܵܐ ܝܵܠܕܵܐ: ܗܵܫܵܐ ܬܸܒ̣ܛܢܝܼܢ ܘܬܹܐܠܕ̇ܝܼܢ ܒܪܵܐ.

⁴ܐܸܙܕܲܗ̄ܪܝ ܕܲܠܡܵܐ ܬܸܫܬܹ̇ܝܢ ܚܲܡܪܵܐ ܐܵܘ ܫܲܟ̣ܪܵܐ. ܘܠܵܐ ܬܹܐܟ̣ܠܝܼܢ ܟܠ ܡܸܕܸ̇ܡ ܕܲܛܡܲܐ.

⁵ܡܸܛܠ ܕܗܵܐ ܒܵܛܢܵܐ ܐܲܢ̄ܬ̇ܝ ܘܝܵܠܕܵܐ ܐܲܢ̄ܬ̇ܝ ܒܪܵܐ: ܘܲܡܕܲܟܝܵܐ ܠܵܐ ܢܸܣܲܩ ܥܲܠ ܪܹܫܹܗ: ܡܸܛܠ ܕܲܢܙܝܼܪܹܗ ܕܐܲܠܵܗܵܐ ܢܸܗܘܹܐ ܛܲܠܝܵܐ ܡ̣ܢ ܡܲܪܒ̇ܥܵܐ: ܘܗ̤ܘ ܢܫܲܪܸܐ ܠܡܸܦܪܲܩ ܠܝܼܣܪܵܝܹܠ ܡ̣ܢ ܐܝܼܕܼܵܐ ܕܲܦܠܸܫܬܵܝܹ̈ܐ.

⁶ܘܐܸܬ̣ܵܬ̣ ܐܲܢ̄ܬ̇ܬ̣ܵܐ ܘܐܸܡܪܲܬ̤ ܠܒ̣ܵܥܠܵܗ̇: ܓܲܒ̣ܪܵܐ ܕܐܲܠܵܗܵܐ ܐܸܬ̣ܵܐ ܠܘܵܬ̣ܝ: ܘܐܸܬ̣ܚ̄ܙܝܼ ܠܝܼ ܒܚܸܙܘܵܐ ܕܡܲܠܲܐܟ̣ܵܐ ܕܐܲܠܵܗܵܐ: ܘܙܵܥܹܬ̣ ܛܵܒ̣: ܘܠܵܐ ܫܲܐܠܬܹ̇ܗ ܡ̣ܢ ܐܲܝܡܸܟܵܐ ܗ̄ܘ̣: ܘܲܫܡܹܗ ܠܵܐ ܚܵܘܝܼ̈ܢܝ.

⁷ܘܐܸܡܲܪ ܠܝܼ: ܕܗܵܐ ܒܵܛܢܵܐ ܐܲܢ̄ܬ̇ܝ ܘܝܵܠܕܵܐ ܐܲܢ̄ܬܲܝ ܒܪܵܐ: ܡܸܟܹ̇ܝܠ ܠܵܐ ܬܸܫܬܹ̇ܝܢ ܚܲܡܪܵܐ ܘܫܲܟ̣ܪܵܐ: ܘܠܵܐ ܬܹܐܟ̣ܠܝܼܢ ܟܠ ܡܸܕܸ̇ܡ ܕܲܛܡܲܐ: ܡܸܛܠ ܕܲܢܙܝܼܪܹܗ ܕܐܲܠܵܗܵܐ ܢܸܗܘܹܐ ܛܲܠܝܵܐ ܡ̣ܢ ܡܲܪܒ̇ܥܵܐ ܥܕܲܡܵܐ ܠܝܵܘܡܵܐ ܕܡܵܐܹ̇ܬ̣.

⁸ܘܲܒ̣ܥܵܐ ܡܢܘܿܚ ܡ̣ܢ ܡܵܪܝܵܐ ܘܐܸܡܲܪ: ܒܒ̣ܵܥܘܼ ܡܵܪܝܵܐ: ܓܲܒ̣ܪܵܐ ܕܐܲܠܵܗܵܐ ܕܫܲܕܲܪܬ̇: ܢܹܐܬܹܐ ܬܘܼܒ̣ ܠܘܵܬܲܢ: ܘܢܲܠܦܲܢ ܡܵܢܵܐ ܢܸܥܒܸ̇ܕܼ ܠܹܗ ܠܛܲܠܝܵܐ ܕܡܸܬ̣̱ܝܼܠܸܕܼ.

⁹ܘܲܫ̣ܡܲܥ ܡܵܪܝܵܐ ܒܩܵܠܹܗ ܕܲܡܢܘܿܚ: ܘܐܸܬ̣ܵܐ ܬܘܼܒ̣ ܡܲܠܲܐܟܹ̇ܗ ܕܡܵܪܝܵܐ ܠܘܵܬ̣ ܐܲܢ̄ܬ̇ܬ̣ܵܐ: ܘܗ̤ܝ ܝܵܬ̣ܒܵܐ ܗ̄ܘ̣ܵܬ̣ ܒܚܲܩܠܵܐ: ܘܲܡܢܘܿܚ ܒܲܥܠܵܗ̇ ܠܵܐ ܗ̄ܘ̣ܵܐ ܠܘܵܬ̣ܵܗ̇.

¹⁰ܘܐܸܣܬܲܪ̱ܗܒܲܬ̤ ܐܲܢ̄ܬ̇ܬ̣ܵܐ: ܘܪܸܗܛܲܬ̤ ܘܚܵܘܝܲܬ̤ ܠܒܲܥܠܵܗ̇: ܘܐܵܡ̇ܪܵܐ ܠܹܗ: ܗܵܐ ܐܸܬ̣ܚ̄ܙܝܼ ܠܝܼ ܓܲܒ̣ܪܵܐ ܕܐܸܬ̣ܵܐ ܒܗܵܘ̇ ܝܵܘܡܵܐ ܠܘܵܬ̣ܝ.

¹¹ܘܩܵܡ ܡܢܘܿܚ ܘܐܸܙܲܠ ܥܲܡ ܐܲܢ̄ܬ̇ܬܹܗ: ܘܐܸܬ̣ܵܐ ܠܘܵܬ̣ ܓܲܒ̣ܪܵܐ: ܘܐܸܡܲܪ ܠܹܗ: ܐܲܢ̄ܬ̇ ܗ̄ܘ̣ ܓܲܒ̣ܪܵܐ ܕܡܲܠܠܸܬ̇ ܥܲܡ ܗܵܕܹܐ ܐܲܢ̄ܬ̇ܬ̣ܵܐ. ܘܐܸܡܲܪ ܐܸܢܵܐ ܗ̄ܘ̣.

¹²ܘܐܸܡܲܪ ܡܢܘܿܚ: ܗܵܫܵܐ ܗܵܘܹ̇ܐ ܦܸܬ̣ܓ̣ܵܡܵܟ̣: ܐܸܡܲܪ ܠܝܼ ܡܵܢܵܘ ܕܝܼܢܹܗ ܕܛܲܠܝܵܐ ܘܥܲܒ̣ܕܼܵܘ̈ܗܝ.

¹³ܘܐܸܡܲܪ ܡܲܠܲܐܟܹ̇ܗ ܕܡܵܪܝܵܐ ܠܲܡܢܘܿܚ: ܡ̣ܢ ܟܠ ܡܸܕܸ̇ܡ ܕܐܸܡ̇ܪܹܬ̣ ܠܐܲܢ̄ܬ̇ܬ̣ܵܐ ܬܸܙܕ̇ܗܲܪ.

¹⁴ܘܡ̣ܢ ܟܠ ܕܢܵܦܹ̇ܩ ܡ̣ܢ ܓܦܸܬܵܐ ܠܵܐ ܬܹܐܟ̣ܘܿܠ: ܘܚܲܡܪܵܐ ܘܫܲܟ̣ܪܵܐ ܠܵܐ ܬܸܫܬܹ̇ܐ: ܘܟ̣ܠ ܕܲܛܡܲܐ ܠܵܐ ܬܹܐܟ̣ܘܿܠ: ܘܟ̣ܠ ܕܦܲܩܸܕ̇ܬܵܗ̇ ܬܸܛܲܪ.

¹⁵ܘܐܸܡܲܪ ܡܢܘܿܚ ܠܡܲܠܲܟܹܗ ܕܡܵܪܝܵܐ: ܢܸܟ̣ܠܹܝܟ ܘܢܸܥܒܸ̇ܕܼ ܓܲܕܼܝܵܐ ܕܥܸܙܹ̈ܐ ܩܕܼܵܡܲܝܟ.

¹⁶ܘܐܸܡܲܪ ܡܲܠܲܐܟܹ̇ܗ ܕܡܵܪܝܵܐ ܠܲܡܢܘܿܚ: ܐܸܢ ܬܸܟ̣ܠܹܝܢܝ ܠܵܐ ܐܹܟܘܿܠ ܡ̣ܢ ܠܲܚܡܵܟ̣. ܘܐܸܢ ܬܲܣܸܩ ܥܠܵܬ̣ܵܐ: ܠܡܵܪܝܵܐ ܬܲܣܩܝܼܗ̇ ܡܸܛܠ ܕܠܵܐ ܝܵܕܼܵܥ ܗ̄ܘ̣ܵܐ ܡܢܘܿܚ ܕܡܲܠܲܟܹ̇ܗ ܗ̄ܘ̣ ܕܡܵܪܝܵܐ.

¹⁷ܘܐܸܡܲܪ ܡܢܘܿܚ ܠܡܲܠܲܐܟܹܗ ܕܡܵܪܝܵܐ: ܡܵܢܵܘ ܫܡܵܟ̣ ܕܡܵܐ ܕܲܗܘ̤ܵܐ ܦܸܬ̣ܓ̣ܵܡܵܟ̣ ܢܸܩܪܹܝܟ.

¹⁸ܘܐܸܡܲܪ ܠܹܗ ܡܲܠܲܐܟܹܗ ܕܡܵܪܝܵܐ: ܠܡܵܢܵܐ ܫܵܐܹܠ ܐܲܢ̄ܬ̇ ܥܲܠ ܫܹܡܝ ܕܗ̤ܘ ܡܫܲܒܲܚ.

¹⁹ܘܲܢܣܲܒ̣ ܡܢܘܿܚ ܓܲܕܼܝܵܐ ܕܥܸܙܹ̈ܐ: ܘܲܣܡܝܼܕܼܵܐ: ܘܐܲܣܸܩ ܥܲܠ ܟܹܐܦܵܐ ܠܡܵܪܝܵܐ ܘܲܡܫܲܒܲܚ ܗ̄ܘ̣ܵܐ ܠܡܵܪܝܵܐ.

²⁰ܘܲܡܢܘܿܚ ܘܐܲܢ̄ܬ̇ܬܹܗ ܚܵܙܹܝܢ ܗ̄ܘ̣ܵܘ: ܟܲܕܼ ܣܸܠܩܲܬ̤ ܫܲܠܗܹܒ̣ܝܼܬ̣ܵܐ ܕܢܘܼܪܵܐ ܡ̣ܢ ܟܹܐܦܵܐ ܠܲܫܡܲܝܵܐ: ܘܲܣܠܸܩ ܡܲܠܲܐܟܹܗ ܕܡܵܪܝܵܐ ܒܫܵܠܗܹܒ̣ܝܼܬ̣ܵܐ ܕܡܲܕܼܒ̇ܚܵܐ: ܘܲܡܢܘܿܚ ܘܐܲܢ̄ܬ̇ܬܹܗ ܚ̣ܙܵܘ: ܘܲܢܦܲܠܘ ܥܲܠ ܐܲܦܲܝ̈ܗܘܿܢ ܥܲܠ ܐܲܪܥܵܐ: ܘܲܣܓܸܕܼܘ.

²¹ܘܠܵܐ ܐܵܘܣܸܦ ܬܘܼܒ̣ ܡܲܠܲܐܟܹܗ ܕܡܵܪܝܵܐ ܠܡܸܬ̣ܚܙܵܝܘܼ ܠܲܡܢܘܿܚ ܘܠܲܐܢ̄ܬ̇ܬܹܗ: ܘܗܵܝܕܹ̇ܝܢ ܝܼܕܲܥ̣ܘ ܡܢܘܿܚ ܘܐܲܢ̄ܬ̇ܬܹܗ: ܕܡܲܠܲܐܟܹܗ ܗ̄ܘ̣ ܕܡܵܪܝܵܐ.

²²ܘܐܸܡܲܪ ܡܢܘܿܚ ܠܐܲܢ̄ܬ̇ܬܹܗ: ܡܡܵܬ̣ ܡܵܝܬܝܼܢ ܚ̄ܢܲܢ: ܡܸܛܠ ܕܠܲܐܠܵܗܵܐ ܚܙܲܝܢ.

²³ܘܐܸܡܪܲܬ̤ ܠܹܗ ܐܲܢ̄ܬ̇ܬܹܗ: ܐܸܠܘܼ ܨܵܒܹ̇ܐ ܗ̄ܘ̣ܵܐ ܐܲܠܵܗܵܐ ܕܲܢܡܝܼܬܲܢ: ܠܵܐ ܡܩܲܒܸ̇ܠ ܗ̄ܘ̣ܵܐ ܡܸܢܲܢ ܥܠܵܬ̣ܵܐ ܘܲܣܡܝܼܕܼܵܐ: ܘܠܵܐ ܡܚܵܘܸܐ ܗ̄ܘ̣ܵܐ ܠܲܢ ܗܵܠܹܝܢ ܟܠܗܹܝܢ ܒܗܵܢܵܐ ܙܲܒ̣ܢܵܐ: ܘܠܵܐ ܡܲܫܡܲܥ ܗ̄ܘ̣ܵܐ ܠܲܢ ܗܵܠܹܝܢ.

²⁴ܘܝܸܠܕܲܬ̤ ܐܲܢ̄ܬ̇ܬ̣̱ܵܐ ܒܪܵܐ: ܘܲܩܪܵܬ̤ ܫܡܹܗ ܫܸܡܫܘܿܢ: ܘܲܪܒ̣ܵܐ ܛܲܠܝܵܐ. ܘܒܲܪܟܹܗ ܡܵܪܝܵܐ.

²⁵ܘܫܲܪܝܲܬ̤ ܪܘܼܚܹܗ ܕܡܵܪܝܵܐ ܠܲܡܗܲܠܵܟ̣ܘܼܬܹܗ ܒܡܲܫܪܝܼܬ̣ܵܐ ܕܕܼܵܢ: ܒܹܝܬ̣ ܨܸܕܼܥܵܐ ܘܒܹܝܬ̣ ܐܸܫܬ̇ܘܼܐܹܝܠ.