Read Aramaic Peshita Judges 14 Bible Online

Judges 14 - Aramaic Peshita bible

Judges 14

¹ܘܲܢܚܸܬ̣ ܫܸܡܫܘܿܢ ܠܬܲܡܢܲܬ̣: ܘܲܚܙ̣ܵܐ ܐܲܢ̄ܬ̇ܬ̣ܵܐ ܒܬܲܡܢܲܬ̣: ܡ̣ܢ ܒ̈ܢܵܬ̣ ܦܠܸܫܬܵܝܹ̈ܐ.

²ܘܲܣܠܸܩ ܘܚܵܘܝܼ ܠܐܲܒ̣ܘܼܗܝ ܘܠܐܸܡܹܗ: ܘܐܸܡܲܪ ܠܗܘܿܢ: ܐܲܢ̄ܬ̇ܬ̣ܵܐ ܚܙܹܝܬ̣ ܒܬܲܡܢܲܬ̣ ܡ̣ܢ ܒ̈ܢܵܬ̣ ܦܠܸܫܬܵܝܹ̈ܐ: ܗܵܫܵܐ ܣܲܒ̣ܘܼܗ̇ ܠܝܼ ܐܲܢ̄ܬ̇ܬ̣ܵܐ.

³ܘܐܸܡܲܪܘ ܠܹܗ ܐܲܒ̣ܘܼܗܝ ܘܐܸܡܹܗ: ܠܲܝܬ̇ ܗܵܪܟܵܐ ܒܒܹܝܬ̣ ܐܲܒ̣ܘܼܟ̣ ܘܲܒ̣ܟ̣ܠܹܗ ܥܲܡܵܟ̣ ܐܲܢ̄ܬ̇ܬ̣ܵܐ ܕܐܵܙܹ̇ܠ ܐܲܢ̄ܬ̇ ܠܡܸܣܲܒ̣ ܐܲܢ̄ܬ̇ܬ̣ܵܐ ܡ̣ܢ ܦܠܸܫܬܵܝܹ̈ܐ ܥܘܼܪ̈ܠܹܐ. ܘܐܸܡܲܪ ܫܸܡܫܘܿܢ ܠܐܲܒ̣ܘܼܗܝ: ܠܗܵܝ̇ ܣܲܒ̣ܘ ܠܝܼ ܡܸܛܠ ܕܗ̤ܝ ܫܸܦܪܲܬ̤ ܒܥܲܝ̈ܢܲܝ.

⁴ܘܐܲܒ̣ܘܼܗܝ ܘܐܸܡܹܗ ܠܵܐ ܝܵܕܼܥܝܼܢ ܗ̄ܘ̣ܵܘ ܕܡ̣ܢ ܡܵܪܝܵܐ ܗ̄ܝ̣: ܕܢܸܬ̣ܒܲܥ ܥܝܵܪܬܵܐ ܡ̣ܢ ܦܠܸܫܬܵܝܹ̈ܐ. ܘܲܒ̣ܙܲܒ̣ܢܵܐ ܗܵܘ̇ ܦܠܸܫܬܵܝܹ̈ܐ ܫܲܠܝܼܛܝܼܢ ܗ̄ܘ̣ܵܘ ܥܲܠ ܝܼܣܪܵܝܹܠ.

⁵ܘܲܢܚܸܬ̣ ܫܸܡܫܘܿܢ ܘܐܲܒ̣ܘܼܗܝ ܘܐܸܡܹܗ ܠܬܲܡܢܲܬ̤: ܘܡܲܛܝܼܘ ܥܕܲܡܵܐ ܠܟܲܪ̈ܡܹܐ ܕܬܲܡܢܲܬ̣: ܘܗܵܐ ܓܘܼܪܝܵܐ ܕܐܲܪܝܵܐ ܢܵܗܹܡ ܠܩܘܼܒ̣ܠܹܗ.

⁶ܘܐܲܨܠܚܲܬ̤ ܥܠܵܘܗܝ ܪܘܼܚܹܗ ܕܡܵܪܝܵܐ: ܘܦܲܫܚܹܗ ܐܲܝܟ̣ ܕܲܡܦܲܫܚܝܼܢ ܠܓܲܕܼܝܵܐ: ܘܠܵܐ ܐܝܼܬ̣ ܗ̄ܘ̣ܵܐ ܡܸܕܸ̇ܡ ܒܐܝܼܕܹܗ: ܘܠܵܐ ܚܵܘܝܼ ܗ̄ܘ̣ܵܐ ܠܐܲܒ̣ܘܼܗܝ ܘܠܐܸܡܹܗ ܡܸܕܸ̇ܡ ܕܲܥܒܲܕܼ.

⁷ܘܲܢܚܸܬ̣ܘ ܘܡܲܠܸܠ̣ܘ ܥܲܡ ܐܲܢ̄ܬ̇ܬ̣ܵܐ: ܘܫܸܦܪܲܬ̤ ܒܥܲܝܢܵܘ̈ܗܝ ܕܫܸܡܥܘܿܢ.

⁸ܘܲܗܦܲܟ̣ ܡ̣ܢ ܒܵܬܲܪ ܝܵܘ̈ܡܵܬ̣ܵܐ ܠܡܸܣܒ̣ܵܗ̇: ܘܲܣܛܵܐ ܠܡܸܚܙܵܐ ܬܲܓܪܘܼܡܬܵܐ ܕܐܲܪܝܵܐ: ܘܗܵܐ ܫܸܠܚܵܐ ܕܕܸܒ̇ܘܿܪ̈ܝܵܬ̣ܵܐ ܒܓ̣ܘܼܫܡܹܗ ܕܐܲܪܝܵܐ ܗܵܘ̇: ܘܪܵܕܹܐ ܗ̄ܘ̣ܵܐ ܕܸܒ̣ܫܵܐ ܥܲܠ ܐܝܼܕܼܵܘ̈ܗܝ ܘܲܡܗܲܠܸܟ.

⁹ܘܐܸܙܲܠ ܠܘܵܬ̣ ܐܲܒ̣ܘܼܗܝ ܘܲܠܘܵܬ̣ ܐܸܡܹܗ: ܘܝܲܗ̄ܒ̣ ܠܗܘܿܢ ܘܐܸܟܲܠܘ: ܘܠܵܐ ܚܵܘܝܼ ܐܸܢܘܿܢ ܡܢ ܓܘܼܫܡܹܗ ܕܐܲܪܝܵܐ ܪܵܕܼܵܐ ܕܸܒ̣ܫܵܐ.

¹⁰ܘܲܢܚܸܬ̣ ܐܲܒ̣ܘܼܗܝ ܠܘܵܬ̣ ܐܲܢ̄ܬ̇ܬ̣ܵܐ: ܘܲܥܒܲܕܼ ܬܲܡܵܢ ܫܸܡܫܘܿܢ ܡܸܫܬ̇ܘܼܬ̣ܵܐ ܫܲܒ̣ܥܵܐ ܝܵܘ̈ܡܝܼܢ: ܡܸܛܠ ܕܗܵܟܲܢܵܐ ܥܵܒ̣ܕ̇ܝܼܢ ܗ̄ܘ̣ܵܘ ܓܲܕܘܼ̈ܕܹܐ ܡܸܫܬ̇ܘܼܬ̣ܵܐ.

¹¹ܘܟܲܕܼ ܚܙܵܐܘܼܗܝ ܐܸܬ̣ܵܘ ܬܠܵܬ̣ܝܼܢ ܓܲܒ̣ܪ̈ܝܼܢ: ܘܲܗܘ̤ܵܘ ܠܹܗ ܫܵܘܫܒ̣ܝܼܢܹ̈ܐ.

¹²ܘܐܸܡܲܪ ܠܗܘܿܢ ܫܸܡܫܘܿܢ: ܐܵܚܹ̇ܕܼ ܐ̄ܢܵܐ ܠܟܘܿܢ ܐܘܼܚ̄ܕ̇ܬ̣ܵܐ. ܐܸܢ ܬܸܦܫ̄ܪܘܼܢܵܗ̇ ܠܝܼ ܫܲܒ̣ܥܵܐ ܝܵܘ̈ܡܲܝ ܡܸܫܬ̇ܘܼܬ̣ܵܐ ܘܬܸܕ̇ܥܘܼܢܵܝܗ̇: ܐܸܬܸ̇ܠ ܠܟ̣ܘܿܢ ܬܠܵܬ̣ܝܼܢ ܐܲܦܩܲܪ̈ܣܝܼܢ: ܘܲܬ̣ܠܵܬ̣ܝܼܢ ܙܵܘ̈ܓ̇ܝܼܢ ܕܲܠܒ̣ܘܼܫܹ̈ܐ.

¹³ܘܐܸܢ ܠܵܐ ܐܸܫܟܲܚܬ̇ܘܿܢ ܕܬܸܦܫ̄ܪܘܼܢܵܗ̇ ܠܝܼ: ܝܵܗ̇ܒ̇ܝܼ ܐ̄ܢܬ̇ܘܿܢ ܠܝܼ ܬܠܵܬ̣ܝܼܢ ܐܵܦܩܲܪ̈ܣܝܼܢ: ܘܲܬ̣ܠܵܬ̣ܝܼܢ ܙܵܘ̈ܓ̇ܝܼܢ ܕܲܠܒ̣ܘܼܫܹ̈ܐ. ܐܵܡ̇ܪܝܼܢ ܠܹܗ: ܐܵܚܘܿܕܼ ܐܘܼܚ̄ܕ̇ܬ̣ܵܟ̣: ܘܢܸܫ̱ܡܥܝܼܗ̇.

¹⁴ܐܵܡܲܪ ܠܗܘܿܢ: ܡ̣ܢ ܐܵܟ̣ܠܵܐ ܢܦܲܩ ܐܘܼܟ̣ܠܵܐ: ܘܡ̣ܢ ܡܲܪܝܼܪܵܐ ܢܦܲܩ̣ ܚܲܠܝܵܐ. ܘܠܵܐ ܐܸܫܟܲܚܘ ܠܡܸܦܫܪܵܗ̇ ܐܘܼܚ̄ܕ̇ܬܵܐ ܬܠܵܬ̣ܵܐ ܝܵܘ̈ܡܝܼܢ.

¹⁵ܘܲܒ̣ܝܵܘܡܵܐ ܪܒ̣ܝܼܥܵܝܵܐ ܐܵܡܪܝܼܢ ܠܐܲܢ̄ܬ̇ܬܹܗ ܕܫܸܡܫܘܿܢ: ܫܲܕ̇ܠܝܼܘܗܝ ܠܒܲܥܠܹܟ̣ܝ ܕܢܵܘܕ̇ܥܲܢ ܐܘܼܚ̄ܕ̇ܬܹܗ: ܕܠܵܐ ܢܵܘܩܕܹܟ̣ܝ ܠܹܟ̣ܝ ܘܲܠܒܹܝܬ̣ ܐܲܒ̣ܘܼܟ̣ܝ ܒܢܘܼܪܵܐ: ܘܢܹܐܪܲܬ̣ ܝܘܼܪܬܵܢܹܗ.

¹⁶ܘܲܒ̣ܟ̣ܬ̣ ܐܲܢ̄ܬ̇ܬܹܗ ܕܫܸܡܫܘܿܢ ܘܐܵܡ̇ܪܵܐ ܠܹܗ: ܫܲܪܝܼܪܵܐܝܼܬ̣ ܣܢܲܝܬܵܢܝ ܘܠܵܐ ܪܚܸܡܬܵܢܝ. ܕܐܘܼܚ̄ܕ̇ܬܵܐ ܕܐܸܚܲܕ̇ܬ̇ ܠܲܒ̣̈ܢܲܝ ܥܲܡܝ: ܠܝܼ ܠܵܐ ܐܸܡܲܪܬܵܗ̇: ܘܐܸܡܲܪ ܠܵܗ̇: ܠܐܵܒ̣ܝ ܘܠܐܸܡܝ ܠܵܐ ܐܸܡ̇ܪܹܬ̣: ܠܹܟ̣ܝ ܐܹܡܲܪ.

¹⁷ܘܲܗܘ̤ܵܬ̣ ܒܵܟ̣ܝܵܐ ܗܵܢܘܿܢ ܫܲܒ̣ܥܵܐ ܝܵܘ̈ܡܝܼܢ ܕܡܸܫܬ̇ܘܼܬ̣ܵܐ. ܘܲܠܝܵܘܡܵܐ ܕܫܲܒ̣ܥܵܐ: ܐܸܡܲܪ ܠܵܗ̇ ܡܸܛܠ ܕܐܲܥܝܼܩܲܬ̤ ܠܹܗ: ܘܲܓ̣ܠܵܬ̣ܵܗ̇ ܐܘܼܚ̄ܕ̇ܬܵܐ ܠܲܒ̣̈ܢܲܝ ܥܲܡܵܗ̇.

¹⁸ܘܐܵܡ̇ܪܝܼܢ ܐ̄ܢܵܫܲܝ̈ ܩܪܝܼܬ̣ܵܐ ܒܝܵܘܡܵܐ ܕܫܲܒ̣ܥܵܐ: ܥܲܕܼܠܵܐ ܬܘܼܩܵܢܵܐ: ܡܵܢܵܘ ܕܲܚܠܸܐ ܡ̣ܢ ܕܸܒ̣ܫܵܐ: ܐܵܘ ܡܲܢܘܼ ܕܬܲܩܝܼܦ ܡ̣ܢ ܐܲܪܝܵܐ. ܐܵܡܲܪ ܠܗܘܿܢ ܫܸܡܫܘܿܢ: ܐܸܠܘܼ ܠܵܐ ܫܲܕܸ̇ܠܬ̇ܘܿܢ ܥܓܠܬ̇ܝ: ܠܵܐ ܦܫܲܪܬ̇ܘܿܢ ܐܘܼܚܕܲܬ̣ܝ.

¹⁹ܘܐܲܨܠܚܲܬ̤ ܥܠܵܘܗܝ ܪܘܼܚܹܗ ܕܡܵܪܝܵܐ ܘܲܢܚܸܬ̣ ܠܐܲܫܩܵܠܘܿܢ: ܘܐܸܚܲܕܼ ܡܸܢܗܘܿܢ ܬܠܵܬ̣ܝܼܢ ܓܲܒ̣ܪ̈ܝܼܢ ܘܩܲܛܸܠ ܐܸܢܘܿܢ: ܘܲܢܣܲܒ̣ ܠܒ̣ܘܼܫܲܝ̈ܗܘܿܢ: ܘܝܲܗ̄ܒ̣ܘ ܠܗܵܢܘܿܢ ܕܲܦܫܲܪܘ ܐܘܼܚ̄ܕ̇ܬܹܗ. ܘܐܸܬ̣ܚܲܡܲܬ̣ ܪܘܼܓ̣ܙܹܗ ܘܲܣܠܸܩ ܠܒܹܝܬ̣ ܐܲܒ̣ܘܼܗܝ.

²⁰ܘܲܗܘ̤ܵܬ̣ ܐܲܢ̄ܬ̇ܬܹܗ ܕܫܸܡܫܘܿܢ ܕܪܵܚܹ̇ܡ ܗ̄ܘ̣ܵܐ ܠܵܗ̇: ܠܫܵܘܫܒ̣ܝܼܢܹܗ.