Read Aramaic Peshita Judges 16 Bible Online

Judges 16 - Aramaic Peshita bible

Judges 16

¹ܘܐܸܙܲܠ ܫܸܡܫܘܿܢ ܠܥܵܙܲܬ̣: ܘܲܚܙܵܐ ܬܲܡܵܢ ܐܲܢ̄ܬ̇ܬ̣ܵܐ ܙܵܢܝܼܬ̣ܵܐ: ܘܥܲܠ ܠܘܵܬ̣ܵܗ̇ ܠܥܵܙܲܬ̣.

²ܘܐܸܬ̣ܐ̱ܡܲܪ ܕܐܸܬ̣ܵܐ ܫܸܡܫܘܿܢ ܠܗܵܪܟܵܐ: ܘܐܸܬ̣ܟ̇ܡܸܢܘ ܥܠܵܘܗܝ ܟܠܹܗ ܠܸܠܝܵܐ ܒܬܲܪܥܵܐ ܕܲܩܪܝܼܬ̣ܵܐ: ܘܲܗܘ̤ܵܘ ܡܠܲܚܫܝܼܢ ܟܠܹܗ ܠܸܠܝܵܐ: ܘܐܸܡܲܪܘ ܡܵܐ ܕܲܢܗܲܪ ܨܲܦܪܵܐ: ܢܸܩܛܠܝܼܘܗܝ.

³ܘܲܕܼܡܸܟ̣ ܫܸܡܫܘܿܢ ܥܕܲܡܵܐ ܠܦܸܠܓܹ̇ܗ ܕܠܸܠܝܵܐ: ܘܩܵܡ ܒܦܸܠܓܹ̇ܗ ܕܠܸܠܝܵܐ: ܘܐܸܚܲܕܼ ܒܲܬ̣ܪܹܝܢ ܦܪ̈ܘܼܣܬ̇ܕܹܐ ܕܬܲܪܥܵܐ ܕܲܩܪܝܼܬ̣ܵܐ: ܘܫܲܩܠܹܗ ܥܕܲܡܵܐ ܠܡܘܼܟ̣ܠܵܘ̈ܗܝ: ܘܣܵܡ̣ ܥܲܠ ܟܲܬ̣ܦܹܗ: ܘܐܲܣܸܩ ܐܸܢܘܿܢ ܠܛܘܼܪܵܐ ܕܲܩܕܼܵܡ ܚܸܒ̣ܪܘܿܢ.

⁴ܘܒ̣ܵܬܲܪܟܸ̇ܢ ܪܚܸܡ ܐܲܢ̄ܬ̇ܬ̣ܵܐ ܒܲܢܚܸܠ ܣܵܪܘܿܩ: ܘܲܫܡܵܗ̇ ܕܲܠܝܼܠܵܐ.

⁵ܘܲܣܠܸܩܘ ܠܘܵܬ̣ܵܗ̇ ܛܪ̈ܘܿܢܹܐ ܕܲܦܠܸܫܬܵܝܹ̈ܐ: ܘܐܵܡ̇ܪܝܼܢ ܠܵܗ̇: ܫܲܕ̇ܠܝܼܘܗܝ ܘܲܚܙܵܝ ܒܡܵܢܵܐ ܪܲܒ̇ ܚܲܝܠܹܗ: ܘܲܒ̣ܡܵܢܵܐ ܢܸܬ̣̱ܡܨܹܐ ܚܲܝܠܵܐ ܕܢܹܐܣܪܝܼܘܗܝ ܠܲܡܨܲܥܵܪܘܼܬܹܗ: ܘܲܚܢܲܢ ܢܸܬܸ̇ܠ ܠܹܟ̣ܝ ܟܠ ܓܒܲܪ ܐܵܠܹܦ ܘܲܬ̣ܠܵܬ̣ܵܐ ܡܵܐܐ ܕܟܸܣܦܵܐ.

⁶ܘܐܸܡܪܲܬ̤ ܕܲܠܝܼܠܵܐ ܠܫܸܡܫܘܿܢ: ܚܵܘܵܢܝ ܒܡܵܢܵܐ ܪܲܒ̇ ܚܲܝܠܵܟ̣: ܘܲܒ̣ܡܵܢܵܐ ܡܸܬ̣ܐ̱ܣܲܪ ܐܲܢ̄ܬ̇: ܘܐܸܢ ܡܸܬ̣ܒܲܨܲܪ ܐܲܢ̄ܬ̇.

⁷ܐܵܡܲܪ ܠܹܗ ܫܸܡܫܘܿܢ: ܐܸܢ ܢܹܐܣܪܘܿܢܵܢܝ ܒܫܲܒ̣ܥܵܐ ܝܲܬ̣ܪܹ̈ܐ ܪ̈ܲܛܝܼܒܹܐ ܕܠܵܐ ܫܪܸܒ̣ܘ: ܡܸܫܬܲܦܲܠ ܐ̄ܢܵܐ ܘܗܵܘܹ̇ܐ ܐ̄ܢܵܐ ܐܲܝܟ̣ ܚܲܕܼ ܐ̄ܢܵܫ.

⁸ܘܐܲܣܸܩܘ ܠܵܗ̇ ܛܪ̈ܘܼܢܹܐ ܕܲܦܠܸܫܬܵܝܹ̈ܐ ܫܲܒ̣ܥܵܐ ܝܲܬ̣ܪܹ̈ܐ ܪ̈ܲܛܝܼܒܹܐ ܕܠܵܐ ܫܪܲܒ̣ܘ: ܘܐܸܣܲܪܬܹܗ ܒܗܘܿܢ.

⁹ܘܲܟ̣ܡܹܐܢܵܐ ܝܵܬܹܒ̣ ܠܵܗ̇ ܒܬ̣ܵܘܵܢܵܐ: ܘܐܵܡ̇ܪܵܐ ܠܹܗ: ܦܠܸܫܬܵܝܹ̈ܐ ܐܸܬ̣ܵܘ ܥܠܲܝܟ ܫܸܡܫܘܿܢ. ܘܦܲܣܸܩ ܐܸܢܘܿܢ ܠܝܲܬ̣ܪܹ̈ܐ: ܐܲܝܟ̣ ܕܡܸܬ̣ܦܲܣܲܩ ܚܘܼܛܵܐ ܕܟܸܬܵܢܵܐ ܡܵܐ ܕܲܡܪܝܼܚܵܐ ܒܹܗ ܢܘܼܪܵܐ: ܘܠܵܐ ܐܸܬ̇ܬ̇ܙܝܼܥ ܚܲܝܠܹܗ.

¹⁰ܘܐܸܡܪܲܬ̤ ܕܲܠܝܼܠܵܐ ܠܫܸܡܫܘܿܢ: ܗܵܐ ܕܲܓܸ̇ܠܬ̇ ܒܝܼ ܘܐܸܡܲܪܬ̇ ܠܝܼ ܕܲܓ̈ܠܵܬ̣ܵܐ: ܚܵܘܵܢܝ ܒܡܵܢܵܐ ܬܸܬ̣ܐ̱ܣܲܪ.

¹¹ܘܐܸܡܲܪ ܠܵܗ̇: ܐܸܢ ܡܹܐܣܲܪ ܢܹܐܣܪܘܼܢܵܢܝ ܒܫܸܫ̈ܠܵܬ̣ܵܐ ܚܲܕܼ̈ܬ̣ܵܬ̣ܵܐ ܕܠܵܐ ܐܸܬ̣ܥ̱ܒܸܕܼ ܒܗܹܝܢ ܥܒ̣ܵܕܼܵܐ: ܐܸܫܬܲܦܲܠ ܘܐܸܗܘܹܐ ܐܲܝܟ̣ ܚܲܕܼ ܐ̄ܢܵܫ.

¹²ܘܢܸܣܒܲܬ̤ ܕܲܠܝܼܠܵܐ ܫܸܫ̈ܠܵܬ̣ܵܐ ܚܲܕܼ̈ܬ̣ܵܬ̣ܵܐ: ܘܐܸܣܲܪܬܹܗ ܒܗܹܝܢ: ܘܐܵܡ̇ܪܵܐ ܠܹܗ: ܦܠܸܫܬܵܝܹ̈ܐ ܐܸܬ̣ܵܘ ܥܠܲܝܟ ܫܸܡܫܘܿܢ. ܘܲܟ̣ܡܹܐܢܵܐ ܝܵܬܹܒ̣ ܠܵܗ̇ ܒܬ̣ܵܘܵܢܵܐ: ܘܦܲܣܸܩ ܐܸܢܹܝܢ ܡ̣ܢ ܕܪ̈ܵܥܵܘܗܝ ܐܲܝܟ̣ ܚܘܼܛܵܐ.

¹³ܘܐܸܡܪܲܬ̤ ܕܲܠܝܼܠܵܐ ܠܫܸܡܫܘܿܢ: ܗܵܐ ܕܲܓܸ̇ܠܬ̇ ܒܝܼ ܘܐܸܡܲܪܬ̇ ܠܝܼ ܟܲܕܵܒ̣ܵـ̈ـܬ̣ܵܐ: ܚܵܘܢܲܝ ܒܡܵܢܵܐ ܬܸܬ̣̱ܐܣܲܪ ܘܐܸܡܲܪ ܠܵܗ̇: ܐܸܢܗ̤ܘ ܕܡܲܫܬ̇ܝܲܬ̇ܝ ܫܒܲܥ ܥܸܕܼܩܵܘ̈ܗܝ ܕܪܹܫܝ ܒܡܸܫܬ̇ܝܼܬ̣ܵܐ.

¹⁴ܘܐܲܫܬ̇ܝܲܬ̤ ܒܢܵܘܠܵܐ ܘܐܸܡܪܲܬ̤: ܦܠܸܫܬܵܝܹ̈ܐ ܐܸܬ̣ܵܘ ܥܠܲܝܟ ܫܸܡܫܘܿܢ ܘܐܸܬ̇ܬ̇ܥܝܼܪ ܡ̣ܢ ܫܸܢܬܹܗ: ܘܫܩܠܹܗ ܠܢܵܘܠܵܐ ܕܓܲܪ̈ܕ̇ܝܵܝܹܐ ܘܲܠܡܸܫܬ̇ܝܼܬ̣ܵܐ.

¹⁵ܘܐܵܡ̇ܪܵܐ ܠܹܗ: ܐܲܝܟܲܢܵܐ ܐܸܡܲܪܬ̇ ܠܝܼ ܕܲܪܚܸܡ̇ܬܹܟ̣ܝ: ܘܠܸܒܵܟ̣ ܠܵܐ ܗ̄ܘ̣ܵܐ ܠܘܵܬ̣ܝ: ܕܗܵܐ ܬܠܵܬ̣ ܙܲܒ̣ܢ̈ܝܼܢ ܕܲܓܸܠܬ̇ ܒܝܼ: ܘܠܵܐ ܚܵܘܝܼܬܵܢܝ ܒܡܵܢܵܐ ܪܲܒ̇ ܚܲܝܠܵܟ̣.

¹⁶ܘܟܲܕܼ ܐܲܥܝܼܩܲܬ̤ ܠܹܗ ܒܡܸܠܹ̈ܝܗ̇ ܟܠܗܘܿܢ ܝܵܘ̈ܡܵܬ̣ܵܐ ܘܐܲܠܸܨܬܹܗ: ܐܸܬ̇ܬ̇ܥܝܼܩܲܬ̤ ܢܲܦ̮ܫܹܗ ܥܕܲܡܵܐ ܠܡܵܘܬܵܐ.

¹⁷ܘܲܓ̣ܠܵܐ ܠܵܗ̇ ܟܠܹܗ ܠܸܒܹ̇ܗ: ܘܐܸܡܲܪ ܠܵܗ̇: ܡܕܲܟ̇ܝܵܐ ܠܵܐ ܣܠܸܩ ܥܲܠ ܪܹܫܝ: ܡܸܛܠ ܕܲܢܙܝܼܪܵܐ ܐ̄ܢܵܐ ܕܐܲܠܵܗܵܐ ܡ̣ܢ ܟܲܪܣܵܗ̇ ܕܐܹܡܝ: ܐܸܢܗ̤ܘ ܕܓܸܪܥܹ̇ܬ̣. ܦܵܪܹܩ ܠܹܗ ܡܹܢܝ ܚܲܝܠܝ: ܘܡܸܫܬܲܦܲܠ ܐ̄ܢܵܐ ܘܗܵܘܹ̇ܐ ܐ̄ܢܵܐ ܐܲܝܟ̣ ܟܠ ܐ̄ܢܵܫ.

¹⁸ܘܟܲܕܼ ܚܙܵܬ̤ ܕܲܠܝܼܠܵܐ ܕܲܓ̣ܠܵܐ ܠܵܗ̇ ܟܠܹܗ ܠܸܒܹ̇ܗ: ܫܲܕ̇ܪܲܬ̤ ܩܪܵܬ̤ ܠܲܛܪ̈ܘܼܢܹܐ ܕܲܦܠܸܫܬܵܝܹ̈ܐ: ܘܐܵܡ̇ܪܵܐ ܠܗܘܿܢ: ܣܲܩܘ ܡܸܟܹ̇ܝܠ: ܡܸܛܠ ܕܓ̣ܠܵܐ ܠܝܼ ܟܠܹܗ ܠܸܒܹ̇ܗ. ܘܲܣܠܸܩܘ ܠܘܵܬ̣ܵܗ̇ ܛܪ̈ܘܼܢܹܐ ܕܲܦܠܸܫܬܵܝܹ̈ܐ ܘܐܲܣܩܘ ܟܸܣܦܵܐ ܥܲܡܗܘܿܢ.

¹⁹ܘܐܲܕܼܡܸܟ̣ܬܹܗ ܥܲܠ ܒܘܼܪ̈ܟܹ̇ܝܗ̇: ܘܲܩܪܵܬ̤ ܠܓܲܪܵܥܵܐ: ܘܓܸܪܥܲܬ̤ ܫܒܲܥ ܥܸܕܼܩܹ̈ܐ ܕܪܹܫܹܗ: ܘܫܲܪܝܲܬ̣ ܠܲܡܫܲܦܵܠܘܼܬܹܗ: ܘܲܦܪܲܩ ܠܹܗ ܚܲܝܠܹܗ ܡܸܢܹܗ.

²⁰ܘܐܵܡܪܵܐ ܠܹܗ: ܦܠܸܫܬܵܝܹ̈ܐ ܐܸܬ̣ܵܘ ܥܠܲܝܟ ܫܸܡܫܘܿܢ: ܘܐܸܬ̇ܬ̇ܥܝܼܪ ܡ̣ܢ ܫܸܢܬܹܗ ܘܐܸܡܲܪ: ܐܸܦܘܿܩ ܐܲܝܟ̣ ܕܲܒ̣ܟ̣ܠܙܒܲܢ ܘܐܸܫܬܲܢܲܕܼ ܒܗܘܿܢ: ܘܗ̤ܘ ܠܵܐ ܝܼܕܲܥ̣ ܕܡܵܪܝܵܐ ܦܪܲܩ ܠܹܗ ܡܸܢܹܗ.

²¹ܘܐܲܚܕ̇ܘܼܗܝ ܦܠܸܫܬܵܝܹ̈ܐ ܘܥܵܘܲܪܘ ܥܲܝܢܵܘ̈ܗܝ: ܘܐܲܣܪܘܼܗܝ ܒܫܸܫ̈ܠܵܬ̣ܵܐ ܘܐܲܚܬ̣ܘܼܗܝ ܠܥܵܙܲܪ ܘܲܗܘ̤ܵܐ ܛܵܥܹ̇ܝܢ ܒܹܝܬ̣ ܐܲܣܝܼܪܹ̈ܐ.

²²ܘܫܲܪܝܼ ܣܲܥܪܵܐ ܕܪܹܫܹܗ ܠܡܹܐܥܵܐ ܟܲܕܼ ܐܸܬ̣ܓ̇ܪܲܥ.

²³ܘܲܛܪ̈ܘܼܢܹܐ ܕܲܦܠܸܫܬܵܝܹ̈ܐ ܐܸܬ̣ܟܲܢܲܫ̣ܘ ܠܡܸܕܼܒܲܚ ܕܸܒ̣ܚܵܐ ܪܲܒܵܐ ܠܕܵܓ̣ܘܿܢ ܐܲܠܵܗܗܘܿܢ ܒܚܸܕܼܘܼܬ̣ܵܐ: ܘܐܵܡ̇ܪܝܼܢ: ܐܲܫܠܸܡ ܐܲܠܵܗܲܢ ܒܐܝܼܕܲܢ ܠܫܸܡܫܘܿܢ ܒܥܸܠܕ̇ܒ̣ܵܒ̣ܵܢ.

²⁴ܘܟܲܕܼ ܚ̣ܙܵܐܘܼܗܝ ܥܲܡܵܐ ܫܲܒܲܚܘ ܠܐܲܠܵܗܗܘܿܢ: ܡܸܛܠ ܕܐܵܡ̇ܪܝܼܢ: ܕܐܲܫܠܸܡ ܐܲܠܵܗܲܢ ܒܐܝܼܕܲܢ ܠܲܒ̣ܥܸܠܕ̇ܒ̣ܵܒܲܢ: ܘܲܠܡܲܚܪܸܒ̣ ܐܲܪ̈ܥܵܬܲܢ: ܘܲܠܕܲܐܣܓ̇ܝ ܩܛܝܼܠܲܝ̈ܢ.

²⁵ܘܟܲܕܼ ܫ̣ܦܲܪ ܠܸܒ̇ܗܘܿܢ ܐܵܡܪܝܼܢ: ܩܪܵܘ ܠܫܸܡܫܘܿܢ ܡܪܲܩܸܕܼ ܩܕܼܵܡܲܝܢ ܘܲܩܪܵܘ ܠܫܸܡܫܘܿܢ ܡ̣ܢ ܒܹܝܬ̣ ܐܲܣܝܼܪܹ̈ܐ: ܘܲܡܪܲܩܸܕܼ ܗ̄ܘ̣ܵܐ ܩܕܼܵܡܲܝܗܘܿܢ: ܘܐܲܩܝܼܡܘܼܗܝ ܒܲܝܢܵܬ̣ ܥܲܡܘܼ̈ܕܹܐ.

²⁶ܘܐܸܡܲܪ ܫܸܡܫܘܿܢ ܠܛܲܠܝܵܐ ܕܐܲܚܝܼܕܼ ܒܐܝܼܕܹܗ: ܫܒ̣ܘܿܩܲܝܢܝ ܘܐܲܡܝܼܫܲܝܢܝ ܥܲܡܘܼ̈ܕܹܐ ܕܒܲܝܬܵܐ ܣܡܝܼܟ̣ ܥܠܲܝܗܘܿܢ: ܘܐܸܣܬ̇ܡܸܟ ܥܠܲܝܗܘܿܢ.

²⁷ܘܒܲܝܬܵܐ ܡܠܸܐ ܗ̄ܘ̣ܵܐ ܓܲܒ̣ܪܹ̈ܐ ܘܢܸܫܹ̈ܐ: ܘܬܲܡܵܢ ܗ̄ܘ̣ܵܘ ܟܠܗܘܿܢ ܛܪ̈ܘܼܢܹܐ ܕܲܦܠܸܫܬܵܝܹ̈ܐ. ܘܥܲܠ ܐܸܓܵܪܵܐ ܐܝܼܬ̣ ܗ̄ܘ̣ܵܘ ܐܲܝܟ̣ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪܹ̈ܐ ܘܢܸܫܹ̈ܐ: ܘܚܵܙܹܝܢ ܗ̄ܘ̣ܵܘ ܟܲܕܼ ܡܪܲܩܸܕܼ ܫܸܡܫܘܿܢ.

²⁸ܘܲܩܪܵܐ ܫܸܡܫܘܿܢ ܠܡܵܪܝܵܐ: ܘܐܸܡܲܪ: ܒܒ̣ܵܥܘܼ ܡܵܪܝܵܐ ܐܲܠܵܗܵܐ: ܐܸܬ̇ܕܲܟ̣ܪܲܝܢܝ: ܘܚܲܠܲܝܢܝ ܒܲܠܚܘܿܕܼ ܗܵܕܹܐ ܙܒܲܢ̄ܬܵܐ: ܐܲܠܵܗܵܐ: ܕܐܸܬ̣ܢܲܩܲܡ ܢܩܲܡܬ̣ܵܐ ܕܬܲܪܬܹ̇ܝܢ ܥܲܝ̈ܢܲܝ ܡ̣ܢ ܦܠܸܫ̈ܬܵܝܹܐ.

²⁹ܘܐܸܚܲܕܼ ܫܸܡܫܘܿܢ ܬܪܹܝܢ ܥܲܡܘܼ̈ܕܹܐ ܡܸܨܥܵܝܹ̈ܐ ܕܒܲܝܬܵܐ ܣܡܝܼܟ̣ ܥܠܲܝܗܘܿܢ: ܘܐܸܣܬ̇ܡܸܟ ܥܠܲܝܗܘܿܢ: ܚܲܕܼ ܒܝܲܡܝܼܢܹܗ ܘܚܲܕܼ ܒܣܸܡܵܠܹܗ.

³⁰ܘܐܸܡܲܪ ܫܸܡܫܘܿܢ: ܬܡܘܼܬ̣ ܢܲܦ̮ܫܝ ܥܲܡ ܦܠܸܫܬܵܝܹ̈ܐ: ܘܲܢܓܲܕܼ ܒܚܲܝܠܹܗ: ܘܲܢܦܲܠ ܒܲܝܬܵܐ ܥܲܠ ܛܪ̈ܘܼܢܹܐ: ܘܥܲܠ ܟܠܹܗ ܥܲܡܵܐ ܕܒܹܗ. ܘܲܗܘ̤ܵܘ ܡܝܼܬܹ̈ܐ ܕܡܝܼܬ̣ܘ ܒܡܵܘܬܹ̇ܗ ܕܫܸܡܫܘܿܢ: ܣܲܓ̇ܝܼܐܝܼܢ ܡ̣ܢ ܕܡܝܼܬ̣ܘ ܒܚܲܝܵܘ̈ܗܝ.

³¹ܘܲܢܚܸܬ̣ܘ ܟܠܗܘܿܢ ܐܲܚܵܘ̈ܗܝ: ܘܟ̣ܠܹܗ ܒܹܝܬ̣ ܐܲܒ̣ܘܼܗܝ: ܘܲܣܠܩܘ ܘܩܲܒ̣ܪܘܼܗܝ ܒܹܝܬ̣ ܨܸܕܼܥܵܐ: ܘܒܹܝܬ̣ ܐܸܫܬ̇ܘܼܐܹܝܠ ܒܩܲܒ̣ܪܹܗ ܕܲܡܢܘܿܚ ܐܲܒ̣ܘܼܗܝ ܘܗ̤ܘ ܕܵܢ ܠܝܼܣܪܵܝܹܠ ܥܸܣܪܝܼܢ ܫܢ̈ܝܼܢ.