Read Aramaic Peshita Judges 18 Bible Online

Judges 18 - Aramaic Peshita bible

Judges 18

¹ܒܝܵܘ̈ܡܵܬ̣ܵܐ ܗܵܢܘܿܢ: ܠܲܝܬ̇ ܗ̄ܘ̣ܵܐ ܡܲܠܟܵܐ ܒܹܝܬ̣ ܝܼܣܪܵܝܹܠ. ܘܲܒ̣ܝܵܘ̈ܡܵܬ̣ܵܐ ܗܵܢܘܿܢ: ܫܲܒ̣ܛܵܐ ܕܕܼܵܢ ܒܵܥܹ̇ܐ ܗ̄ܘ̣ܵܐ ܠܹܗ ܦܵܠܓ̇ܘܼܬ̣ܐ ܠܡܸܬܲܒ̣: ܡܸܛܠ ܕܠܵܐ ܐܸܬ̣ܦܲܠܓܲܬ̣ ܗ̄ܘ̣ܵܬ̣ ܥܕܲܡܵܐ ܠܝܵܘܡܵܐ ܗܵܘ̇ ܝܵܪܬ̇ܘܼܬ̣ܵܐ ܒܲܝܢܵܬ̣ ܫܲܒ̣̈ܛܹܐ ܕܝܼܣܪܵܝܹܠ.

²ܘܫܲܕܲܪܘ ܒ̈ܢܲܝ ܕܵܢ ܡ̣ܢ ܫܲܪܒ̇ܬ̣ܗܘܿܢ ܚܲܡܫܵܐ ܓܲܒ̣ܪ̈ܝܼܢ: ܡ̣ܢ ܨܹܕܼܥܵܐ ܘܡ̣ܢ ܐܸܫܬ̇ܘܼܐܹܝܠ: ܠܡܸܓܲܫ ܐܲܪܥܵܐ ܘܲܠܡܸܒ̣ܕ̇ܩܵܗ̇. ܘܐܵܡ̇ܪܝܼܢ ܠܗܘܿܢ: ܙܸܠܘ ܒܘܼܕܼܩܘܼܗ̇ ܠܐܲܪܥܵܐ. ܘܐܸܬ̣ܵܘ ܠܛܘܼܪܵܐ ܕܐܲܦܪܹܝܡ ܥܕܲܡܵܐ ܠܒܹܝܬ̣ ܡܝܼܟ̣ܵܐ: ܘܒ̣ܵܬ̣ܘ ܬܲܡܵܢ.

³ܗܸܢܘܿܢ ܥܲܡ ܒܹܝܬ̣ ܡܝܼܟ̣ܵܐ: ܘܐܸܫܬܵܘܕܲܥܘ ܠܩܵܠܹܗ ܕܲܥܠܲܝܡܵܐ ܠܹܘܝܼ: ܘܲܣܛܵܘ ܠܘܵܬܹܗ ܠܬܲܡܵܢ: ܘܐܸܡܲܪܘ ܠܹܗ: ܡܵܢܵܐ ܐܸܬܲܝܬ̇ ܠܗܵܪܟܵܐ: ܘܡܵܢܵܐ ܥܵܒܹܕܼ ܐܲܢ̄ܬ̇ ܗܵܪܟܵܐ.

⁴ܐܵܡܲܪ ܠܗܘܿܢ: ܗܵܟܲܢܵܐ ܘܗܵܟܲܢܵܐ ܥܒܲܕܼ ܠܝܼ ܡܝܼܟ̣ܵܐ: ܘܐܲܓܪܲܢܝ: ܘܲܗܘܹ̇ܝܬ̣ ܠܹܗ ܟܘܼܡܪܵܐ.

⁵ܐܵܡ̇ܪܝܼܢ ܠܹܗ ܫܐܲܠ ܠܲܢ ܒܐܲܠܵܗܵܐ: ܘܢܸܕܲܥ ܐܸܢ ܡܲܟ̣ܫܪܵܐ ܐܘܼܪܚܵܐ ܕܐܵܙ̇ܠ̄ܝܼܢ ܚ̄ܢܲܢ ܥܠܹܝܗ̇.

⁶ܐܵܡܲܪ ܠܗܘܿܢ ܟܘܼܡܪܵܐ: ܙܸܠܘ ܒܲܫܠܵܡܵܐ: ܘܡܵܪܝܵܐ ܢܲܬ̣ܩܸܢ ܐܘܼܪܚܟ̣ܘܿܢ ܕܬܹܐܙܠ̄ܘܿܢ ܥܠܹܝܗ̇.

⁷ܘܐܸܙܲܠ̣ܘ ܚܲܡܫܵܐ ܓܲܒ̣ܪ̈ܝܼܢ ܠܠܝܼܫ: ܘܲܚܙܵܘ ܠܥܲܡܵܐ ܕܝܵܬܹܒ̣ ܒܓ̣ܵܘܵܗ̇: ܕܝܵܬ̣ܒ̇ܝܼܢ ܒܫܸܠܝܵܐ ܐܲܝܟ̣ ܢܵܡܘܿܣܵܐ ܕܨܲܝ̈ܕ̇ܢܵܝܹܐ: ܫܠܹܝܢ ܘܲܒ̣ܗܝܼܠܝܼܢ: ܘܠܲܝܬ̇ ܕܡܲܗܲܪ ܒܐܲܪܥܵܐ: ܐܵܦܠܵܐ ܕܐܵܠܹܨ ܘܲܡܥܝܼܩ: ܘܪܲܚܝܼܩܝܼܢ ܐܸܢܘܿܢ ܡ̣ܢ ܨܲܝ̈ܕ̇ܢܵܝܹܐ: ܘܡܸܠܬ̣ܵܐ ܠܲܝܬ̇ ܠܗܘܿܢ ܥܲܡ ܒܲܪܢܵܫ.

⁸ܘܐܸܬ̣ܵܘ ܠܘܵܬ̣ ܐܲܚܲܝ̈ܗܘܿܢ ܠܨܕܼܥܵܐ ܘܐܸܫܬ̇ܘܼܐܹܝܠ: ܘܐܵܡ̇ܪܝܼܢ ܠܗܘܿܢ ܐܲܚܲܝ̈ܗܘܿܢ: ܐܲܝܡܸܟܵܐ ܐܸܬܲܝܬ̇ܘܿܢ.

⁹ܘܐܵܡܪܝܼܢ ܡ̣ܢ ܠܝܼܫ: ܩܘܼܡܘ ܗܵܫܵܐ ܢܸܣܲܩ ܥܠܲܝܗܘܿܢ: ܡܸܛܠ ܕܲܚܙܲܝܢܵܗ̇ ܠܐܲܪܥܵܐ: ܕܛܵܒ̣ܵܐ ܗ̄ܝ̣ ܛܵܒ̣ ܘܐܲܢ̄ܬ̇ܘܿܢ ܠܵܐ ܬܸܫܬ̇ܩܘܼܢ: ܐܵܦ ܠܵܐ ܬܸܬ̣ܚܲܒ̣ܢܘܿܢ ܠܡܹܐܙܲܠ ܘܲܠܡܸܥܲܠ ܠܡܸܐܪܲܬ̣ ܐܲܪܥܵܐ.

¹⁰ܒܡܲܥܠܵܢܲܝ̈ܟ̇ܘܿܢ ܥܵܐܠܝܼܢ ܐ̄ܢܬ̇ܘܿܢ ܥܲܠ ܥܲܡܵܐ ܟܲܗܝܼܢܵܐ: ܘܐܲܪܥܵܐ ܪܘܵܚܬܵܐ ܕܐܝܼ̈ܕܲܝܵܐ ܡܸܛܠ ܕܐܲܫ̱ܠܡܵܗ̇ ܐܲܠܵܗܵܐ ܒܐܝܼܕܲܝ̈ܟ̇ܘܿܢ: ܕܠܵܐ ܬܸܚܣܪܘܿܢ ܡܸܕܸ̇ܡ ܒܐܲܪܥܵܐ.

¹¹ܘܲܫܩܲܠܘ ܡ̣ܢ ܬܲܡܵܢ ܡ̣ܢ ܫܲܪܒ̇ܬ̣ܵܐ ܕܕܼܵܢ: ܡ̣ܢ ܨܹܕܼܥܵܐ ܘܡ̣ܢ ܐܸܫܬ̇ܘܼܐܹܝܠ: ܫܸܬ̣ܡܵܐܐ ܓܲܒ̣ܪ̈ܝܼܢ ܕܲܡܙܲܝܢܝܼܢ ܒܡܵܐܢܲܝ̈ ܩܪܵܒ̣ܵܐ.

¹²ܘܲܣܠܩܘ ܘܲܫܪܵܘ ܒܩܘܼܪܝܲܬ̣ ܢܲܥܪܝܼܢ ܕܲܝܗܘܼܕܼܵܐ: ܡܸܛܠ ܗܵܢܵܐ ܩ̣ܪܵܐܘܼܗܝ ܠܐܲܬ̣ܪܵܐ ܗܵܘ̇: ܡܲܫܪܝܼܬ̣ܵܐ ܕܕܼܵܢ ܥܕܲܡܵܐ ܠܝܵܘܡܵܢܵܐ: ܗܵܐ ܒܸܣܬܲܪ ܩܘܼܪܝܲܬ̣ ܢܲܥܪܝܼܢ.

¹³ܘܲܥܒܲܪܘ ܡ̣ܢ ܬܲܡܵܢ ܠܛܘܼܪܵܐ ܕܐܲܦܪܹܝܡ: ܘܐܸܙܲܠ̣ܘ ܥܕܲܡܵܐ ܠܒܹܝܬ̣ ܡܝܼܟ̣ܵܐ.

¹⁴ܘܲܥܢܵܘ ܚܲܡܫܵܐ ܓܲܒ̣ܪ̈ܝܼܢ ܕܐܸܙܲܠ̣ܘ ܠܡܸܓܫ ܐܲܪܥܵܐ ܕܠܝܼܫ: ܘܐܸܡܲܪܘ ܠܐܲܚܲܝ̈ܗܘܿܢ: ܝܵܕܼܥܝܼܢ ܐ̄ܢܬ̇ܘܿܢ ܕܐܝܼܬ̣ ܒܪ̈ܵܡܵܬ̣ܵܐ ܗܵܠܹܝܢ ܦܸܕ̇ܬ̣ܵܐ ܘܲܦܪܝܼܣܵܐ: ܘܨܲܠܡܵܐ ܓܠܝܼܦܵܐ ܘܲܢܣܝܼܟ̣ܵܐ ܘܗܵܫܵܐ ܕܲܥܘ ܡܵܢܵܐ ܥܵܒ̣ܕ̇ܝܼܢ ܐ̄ܢܬ̇ܘܿܢ.

¹⁵ܘܲܣܛܵܘ: ܘܥܲܠܘ ܠܒܹܝܬ̣ ܥܠܲܝܡܵܐ ܠܹܘܝܼ: ܠܒܹܝܬ̣ ܡܝܼܟ̣ܵܐ: ܘܲܫܐܸܠ̣ܘ ܒܲܫܠܵܡܹܗ.

¹⁶ܘܫܸܬ̣ܡܵܐܐ ܓܲܒ̣ܪ̈ܝܼܢ ܕܲܡܙܲܝܢܝܼܢ ܒܡܵܐܢܲܝ ܩܪܵܒ̣ܵܐ: ܩܵܝܡܝܼܢ ܒܡܲܥܠܵܢܵܐ ܕܬܲܪܥܵܐ ܡ̣ܢ ܒ̈ܢܲܝ ܕܵܢ.

¹⁷ܘܲܣܠܸܩܘ ܚܲܡܫܵܐ ܓܲܒ̣ܪ̈ܝܼܢ ܕܐܸܙܲܠܘ ܠܡܸܓܲܫ ܐܲܪܥܵܐ: ܘܥܲܠܘ ܠܬܲܡܵܢ ܘܲܢܣܲܒ̣ܘ ܨܲܠܡܵܐ: ܘܦܸܕ̇ܬ̣ܵܐ: ܘܲܦܪܝܼܣܵܐ: ܘܲܚܫܲܠܬ̣ܵܐ: ܘܟ̣ܘܼܡܪܵܐ ܟܲܕܼ ܩܵܐܹ̇ܡ ܒܡܲܥܠܵܢܵܐ ܕܬܲܪܥܵܐ.

¹⁸ܘܫܸܬ̣ܡܵܐܐ ܓܲܒ̣ܪ̈ܝܼܢ ܗܵܢܘܿܢ ܕܲܡܙܲܝܢܝܼܢ ܒܡܵܐܢܲܝ̈ ܩܪܵܒ̣ܵܐ: ܥܲܠܘ ܠܒܹܝܬ̣ ܡܝܼܟ̣ܵܐ ܘܲܢܣܲܒ̣ܘ ܨܲܠܡܵܐ: ܘܦܸܪܬܵܐ: ܘܲܦܪܝܼܣܵܐ: ܘܲܚܫܲܠܬ̣ܵܐ. ܐܵܡܲܪ ܠܗܘܿܢ ܟܘܼܡܪܵܐ ܡܵܢܵܐ ܥܵܒ̣ܕ̇ܝܼܢ ܐ̄ܢܬ̇ܘܿܢ.

¹⁹ܐܵܡ̇ܪܝܼܢ ܠܹܗ ܫܬ̣ܘܿܩ: ܣܝܼܡ ܐܝܼܕܼܵܟ̣ ܥܲܠ ܦܘܼܡܵܟ̣: ܘܬ̣ܵܐ ܥܲܡܲܢ. ܘܲܗ̤ܘܝܼ ܠܲܢ ܐܲܒ̣ܵܐ ܘܟ̣ܘܼܡܪܵܐ. ܐܲܝܢܵܐ ܛܵܒ̣ ܠܵܟ̣: ܕܬܸܗܘܹܐ ܟܘܼܡܪܵܐ ܠܒܹܝܬ̣ ܓܲܒ̣ܪܵܐ ܚܲܕܼ: ܐܵܘ ܕܬܸܗܘܹܐ ܟܘܼܡܪܵܐ ܠܛܘܿܗܡܵܐ ܘܲܠܫܲܪܒ̇ܬ̣ܵܐ ܕܝܼܣܪܵܝܹܠ.

²⁰ܘܲܫܦܲܪ ܠܸܒܹ̇ܗ ܕܟ̣ܘܼܡܪܵܐ: ܘܲܢܣܲܒ̣ ܨܲܠܡܵܐ: ܘܦܸܕ̇ܬ̣ܵܐ: ܘܲܦܪܝܼܣܵܐ: ܘܐܸܙܲܠ ܥܲܡ ܥܲܡܵܐ.

²¹ܘܐܸܬ̣ܦܢܝܼܘ ܘܲܥܒܲܪܘ ܘܐܸܙܲܠܘ: ܘܲܢܩܵـ̈ـܘܵܬ̣ܵܐ: ܘܩܸܢܝܵܢܵܐ: ܘܲܒ̣ܥܝܼܪܵܐ ܩܕܼܵܡܲܝܗܘܿܢ.

²²ܗܸܢܘܿܢ ܐܲܪܚܸܩܘ ܡ̣ܢ ܒܹܝܬ̣ ܡܝܼܟ̣ܵܐ: ܘܓܲܒ̣ܪܵܐ ܕܐܝܼܬ̣ ܒܒܲܝܬܵܐ ܥܲܠ ܓܹܢ̄ܒ̣ ܒܹܝܬ̣ ܡܝܼܟ̣ܵܐ: ܩ̣ܥܵܐ ܘܲܪܕܲܦ̣ ܒܵܬܲܪ ܒ̈ܢܲܝ ܕܵܢ.

²³ܘܲܩܪܵܐ ܠܲܒ̣̈ܢܲܝ ܕܵܢ: ܘܐܸܬ̣ܦܢܝܼܘ ܘܐܸܡܲܪܘ ܠܡܝܼܟ̣ܵܐ: ܡܵܐ ܠܵܟ̣ ܕܩܵܥܹ̇ܐ ܐܲܢ̄ܬ̇.

²⁴ܐܵܡܲܪ ܠܗܘܿܢ: ܐܲܠܵܗܹ̈ܐ ܕܥܸܒ̣ܕܹ̇ܬ̣ ܢܣܲܒ̣ܬ̇ܘܿܢ: ܘܐܵܦ ܠܟ̣ܘܼܡܪܵܐ ܕܒܲܪܬ̇ܘܿܢ ܘܐܸܙܲܠܬ̇ܘܿܢ ܘܡܵܢܵܐ ܐܝܼܬ̣ ܠܝܼ ܬܘܼܒ̣: ܕܐܵܡ̇ܪܝܼܢ ܐ̄ܢܬ̇ܘܿܢ ܠܝܼ ܡܵܐ ܠܵܟ̣.

²⁵ܘܐܸܡܲܪܘ ܠܹܗ ܒ̈ܢܲܝ ܕܵܢ: ܠܵܐ ܬܲܫܡܲܥ ܩܵܠܵܟ̣ ܠܘܬܲܢ: ܕܲܠܡܵܐ ܢܸܦ̮ܓܥܘܼܢ ܒܵܟ̣ ܐ̄ܢܵܫܵܐ ܡܲܪ̈ܝܼܪܲܝ ܢܲܦ̮ܫܵܐ: ܘܬ̣ܵܘܒܸ̇ܕܼ ܢܲܦ̮ܫܵܟ̣ ܘܢܲܦ̮ܫܵܐ ܕܲܒ̣ܢܲܝ̈ܟ.

²⁶ܘܐܸܙܲܠܘ ܒ̈ܢܲܝ ܕܵܢ ܠܐܘܼܪܚܗܘܿܢ ܘܟܲܕܼ ܚܙܵܐ ܡܝܼܟ̣ܵܐ ܕܥܲܫܝܼܢܝܼܢ ܐܸܢܘܿܢ ܡܸܢܹܗ: ܐܸܬ̣ܦܢܝܼ ܘܐܸܬ̣ܵܐ ܠܒܲܝܬܹ̇ܗ.

²⁷ܘܗܸܢܘܿܢ ܢܣܲܒ̣ܘ ܠܡܸܕܸ̇ܡ ܕܲܥܒܲܕܼ ܡܝܼܟ̣ܵܐ. ܘܲܕܼܒܲܪܘ ܠܟ̣ܘܼܡܪܵܐ ܕܐܝܼܬ̣ ܗ̄ܘ̣ܵܐ ܠܹܗ: ܘܥܲܠ̣ܘ ܠܠܝܼܫ ܥܲܠ ܥܲܡܵܐ ܟܲܗܝܼܢܵܐ ܘܫܲܠܝܵܐ: ܘܲܡ̣ܚܵܘ ܐܸܢܘܿܢ ܒܦܘܼܡܵܐ ܕܚܲܪܒܵܐ: ܘܠܲܩܪܝܼܬ̣ܵܐ ܐܵܘܩܸܕܼܘ ܒܢܘܼܪܵܐ.

²⁸ܘܠܲܝܬ̇ ܡ̇ܢ ܕܲܡܦܲܨܹܐ: ܡܸܛܠ ܕܪ̈ܲܚܝܼܩܵܐ ܗ̄ܘ̣ܵܬ̣ ܡ̣ܢ ܨܲܝܕܵܢ: ܘܡܸܠܬ̣ܵܐ ܠܲܝܬ̇ ܗ̄ܘ̣ܵܐ ܠܗܘܿܢ ܥܲܡ ܒܲܪܢܵܫ. ܘܗ̤ܝ ܒܥܘܼܡܩܵܐ ܗ̄ܘ̣ܵܬ̣ ܕܒܹܝܬ̣ ܪܚܘܿܒ̣: ܘܲܒ̣ܢܵܐܘܼܗ̇ ܠܲܩܪܝܼܬ̣ܵܐ: ܘܝܼܬܸܒ̣ܘ ܒܵܗ̇.

²⁹ܘܲܩܪܵܘ ܫܡܵܗ̇ ܕܲܩܪܝܼܬ̣ܵܐ ܕܵܢ: ܥܲܠ ܫܸܡ ܕܵܢ ܐܲܒ̣ܘܼܗܘܿܢ: ܕܐܸܬ̣̱ܝܼܠܸܕܼ ܠܝܼܣܪܵܝܹܠ. ܒܪܲܡ ܠܘܿܙ ܫܡܵܗ̇ ܗ̄ܘ̣ܵܐ ܠܲܩܪܝܼܬ̣ܵܐ ܡ̣ܢ ܩܕܼܝܼܡ.

³⁰ܘܐܲܩܝܼܡܘ ܠܗܘܿܢ ܒ̈ܢܲܝ ܕܵܢ ܨܲܠܡܵܐ ܝܘܿܢܵܬ̣ܵܢ ܒܲܪ ܓܸܪܫܘܿܢ: ܒܲܪ ܡܢܲܫܹܐ: ܗ̤ܘ ܘܲܒ̣ܢܵܘ̈ܗܝ ܗܘ̤ܵܘ ܟܘܼܡܪܹ̈ܐ ܠܫܲܒ̣ܛܵܐ ܕܕܼܵܢ: ܥܕܲܡܵܐ ܠܝܵܘܡܵܐ ܕܐܸܫܬܲܒ̣ܝܲܬ̤ ܐܲܪܥܵܐ.

³¹ܘܣܵܡܘܼܗܝ ܠܗܘܿܢ ܨܲܠܡܵܐ ܕܡܝܼܟ̣ܵܐ ܕܲܥܒܲܕܼ: ܟܠܗܘܿܢ ܝܵܘ̈ܡܵܬ̣ܵܐ ܕܲܗܘ̤ܵܐ ܒܲܝܬܹ̇ܗ ܕܐܲܠܵܗܵܐ ܒܫܝܼܠܘܿ.