Read Aramaic Peshita Judges 19 Bible Online

Judges 19 - Aramaic Peshita bible

Judges 19

¹ܘܲܗܘ̤ܵܐ ܒܝܵܘ̈ܡܵܬ̣ܵܐ ܗܵܢܘܿܢ: ܘܡܲܠܟܵܐ ܠܲܝܬ̇ ܗ̄ܘ̣ܵܐ ܒܝܼܣܪܵܝܹܠ. ܘܲܗܘ̤ܵܐ ܓܲܒ̣ܪܵܐ ܠܹܘܝܼ ܥܵܡܲܪ ܗ̄ܘ̣ܵܐ ܒܲܫܦܘܿܠܵܐ ܕܛܘܼܪܵܐ: ܘܲܢܣܲܒ̣ ܠܹܗ ܐܲܢ̄ܬ̇ܬ̣ܵܐ ܕܪܘܼܟ̣ܬ̣ܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ.

²ܘܙܲܢܝܲܬ̣ ܥܠܵܘܗܝ ܕܪܘܼܟ̣ܬܹ̇ܗ: ܘܩܵܡܲܬ̤ ܘܐܸܙܲܠ̄ܬ̇ ܡ̣ܢ ܠܘܵܬܹܗ ܠܒܹܝܬ̣ ܐܲܒ̣ܘܼܗ̇ ܠܒܹܝܬ̣ ܠܚܸܡ ܕܲܝܗܘܼܕܼܵܐ: ܘܲܗܘ̤ܵܬ̣ ܬܲܡܵܢ ܝܵܘ̈ܡܵܬ̣ܵܐ ܝܲܪ̈ܚܹܐ ܐܲܪܒ̇ܥܵܐ.

³ܘܩܵܡ ܒܲܥܠܵܗ̇ ܘܐܸܙܲܠ ܒܵܬ̣ܪܵܗ̇: ܕܢܸܡܠܹܐ ܒܠܸܒܵܗ̇ ܘܢܲܝܬܹ̇ܝܗ̇: ܘܲܥܠܲܝܡܹܗ ܘܲܬ̣ܪܹܝܢ ܚܡܵܪ̈ܝܼܢ ܥܲܡܹܗ. ܘܐܲܥܸܠܬܹܗ ܠܒܹܝܬ̣ ܐܲܒ̣ܘܼܗ̇: ܘܲܚܙܵܝܗܝ ܐܲܒ̣ܘܼܗܝ ܕܲܥܠܲܝܡܬ̣ܵܐ ܘܲܚܕܼܝܼ ܠܩܘܼܒ̣ܠܹܗ.

⁴ܘܐܲܚܕܹ̇ܗ ܚܡܘܼܗܝ ܐܲܒ̣ܘܼܗ̇ ܕܲܥܠܲܝܡܬ̣ܵܐ: ܘܝܼܬܸܒ̣ ܠܘܵܬܹܗ ܬܠܵܬ̣ܵܐ ܝܵܘ̈ܡܝܼܢ: ܘܲܠܥܸܣܘ ܘܐܸܫܬ̇ܝܼܘ ܘܒ̣ܵܬ̣ܘ ܬܲܡܵܢ.

⁵ܘܲܒ̣ܝܵܘܡܵܐ ܕܐܲܪܒ̇ܥܵܐ: ܩܲܕܸ̇ܡ ܒܨܲܦܪܵܐ ܠܡܹܐܙܲܠ: ܘܐܸܡܲܪ ܐܲܒ̣ܘܼܗ̇ ܕܲܥܠܲܝܡܬ̣ܵܐ ܠܚܲܬ̣ܢܹܗ. ܣܡܘܿܟ̣ ܠܸܒܵܟ̣ ܒܲܩܨܵܝܵܐ ܕܠܲܚܡܵܐ: ܘܗܵܝܕܹ̇ܝܢ ܬܩܘܼܡ ܘܬܹܐܙܲܠ.

⁶ܘܝܼܬܸܒ̣ܘ ܘܲܠܥܸܣܘ ܬܪ̈ܲܝܗܘܿܢ ܐܲܟ̣ܚ̄ܕܼܵܐ ܘܐܸܫܬ̇ܝܼܘ. ܘܐܸܡܲܪ ܐܲܒ̣ܘܼܗܝ ܕܲܥܠܲܝܡܬ̣ܵܐ: ܠܚܲܬ̣ܢܹܗ: ܐܸܢ ܨܵܒܹ̇ܐ ܐܲܢ̄ܬ̇: ܒܘܼܬ̣ ܘܢܸܛܐܲܒ̣ ܠܵܟ̣.

⁷ܘܩܵܡ ܓܲܒ̣ܪܵܐ ܠܡܹܐܙܲܠ: ܘܐܲܠܨܹܗ ܚܡܘܼܗܝ: ܘܒ̣ܵܬ̣ ܠܹܗ ܬܲܡܵܢ.

⁸ܘܩܲܕܸ̇ܡ ܒܨܲܦܪܵܐ ܒܝܵܘܡܵܐ ܕܚܲܡܫܵܐ ܠܡܹܐܙܲܠ: ܘܐܸܡܲܪ ܠܹܗ ܐܲܒ̣ܘܼܗ̇ ܕܲܥܠܲܝܡܬ̣ܵܐ: ܣܡܘܿܟ̣ ܠܸܒܵܟ̣: ܘܐܸܬ̣ܟܲܪ̄ܟ̣ ܥܲܕܼ ܨܵܠܹ̇ܐ ܝܵܘܡܵܐ: ܘܲܠܥܸܣܘ ܬܪ̈ܲܝܗܘܿܢ ܘܐܸܫܬ̇ܝܼܘ.

⁹ܘܩܵܡ̣ ܓܲܒ̣ܪܵܐ ܠܡܹܐܙܲܠ: ܗ̤ܘ ܘܲܕܼܪܘܼܟ̣ܬܹ̇ܗ ܘܲܥܠܲܝܡܹܗ: ܘܐܸܡܲܪ ܠܹܗ ܚܡܘܼܗܝ ܐܲܒ̣ܘܼܗ̇ ܕܲܥܠܲܝܡܬ̣ܵܐ: ܗܵܐ ܦ̣ܢܵܐ ܝܵܘܡܵܐ: ܒܘܼܬ̣ ܗܵܪܟܵܐ ܘܢܸܛܐܲܒ̣ ܠܵܟ̣: ܘܩܲܕܸ̇ܡܘ ܡܚܵܪ ܘܙܸܠܘ ܠܡܲܫܟܲܢܟ̣ܘܿܢ.

¹⁰ܘܠܵܐ ܨܒ̣ܵܐ ܓܲܒ̣ܪܵܐ ܠܲܡܒ̣ܵܬ̣: ܘܩܵܡ ܘܐܸܙܲܠ ܘܡܲܛܝܼ ܠܘܼܩܒܲܠ ܝܵܒ̣ܘܿܣ ܕܗ̤ܝ ܗ̄ܝ̣ ܐܘܿܪܸܫܠܸܡ: ܘܥܲܡܹܗ ܬܪܹܝܢ ܚܡܵܪ̈ܝܼܢ ܟܲܕܼ ܛܥܝܼܢܝܼܢ: ܘܲܕܼܪܘܼܟ̣ܬܹ̇ܗ ܥܲܡܹܗ.

¹¹ܗܸܢܘܿܢ ܥܲܠ ܓܹܢ̄ܒ̣ ܝܵܒ̣ܘܿܣ: ܘܝܵܘܡܵܐ ܪܟ̣ܢ ܠܹܗ ܛܵܒ̣. ܘܐܸܡܲܪ ܥܠܲܝܡܵܐ ܠܡܵܪܹܗ: ܬܵܐ ܢܸܣܛܹܐ ܠܲܩܪܝܼܬ̣ܵܐ ܗܵܕܹܐ ܝܵܒ̣ܘܿܣ: ܘܲܢܒ̣ܘܼܬ̣ ܒܵܗ̇.

¹²ܐܵܡܲܪ ܠܹܗ ܡܵܪܹܗ: ܠܵܐ ܢܸܣܛܹܐ ܠܲܩܪܝܼܬ̣ܵܐ ܢܘܼܟ̣ܪܵܝܬܵܐ ܕܠܵܐ ܗ̄ܘ̣ܵܬ̣ ܡ̣ܢ ܕܒܹܝܬ̣ ܝܼܣܪܵܝܹܠ: ܐܸܠܵܐ ܢܸܥܒܲܪ ܥܕܲܡܵܐ ܠܲܓܒܲܥ.

¹³ܘܐܸܡܲܪ ܠܹܗ ܡܵܪܹܗ: ܬܵܐ ܢܸܬ̣ܩܲܪܲܒ̣ ܠܚܲܕܼ ܡ̣ܢ ܐܲܬ̣ܪ̈ܵܘܵܬ̣ܵܐ: ܘܲܢܒܘܼܬ̣ ܒܲܓܒܲܥ ܐܵܘ ܒܪܵܡܬ̣ܵܐ.

¹⁴ܘܲܥ̣ܒܲܪܘ ܘܐܸܙܲܠ̣ܘ: ܘܥܸܪܒܲܬ̤ ܠܗܘܿܢ ܫܸܡܫܵܐ ܥܲܠ ܓܹܢ̄ܒ̣ ܓܒܲܥ ܕܒܸܢܝܵܡܹܝܢ.

¹⁵ܘܲܣܛܵܘ ܠܬܲܡܵܢ ܠܲܡܒ̣ܵܬ̣. ܘܥܲܠ̣ܘ ܠܲܓܒܲܥ ܘܝܼܬܸܒ̣ܘ ܒܫܘܼܩܵܐ ܕܲܩܪܝܼܬ̣ܵܐ: ܘܠܲܝܬ̇ ܐ̄ܢܵܫ ܕܡܲܥܸܠ ܠܗܘܿܢ ܠܒܲܝܬܵܐ ܠܲܡܒ̣ܵܬ̣.

¹⁶ܘܗܵܐ ܓܲܒ̣ܪܵܐ ܣܵܒ̣ܵܐ ܐܵܬܹ̇ܐ ܡ̣ܢ ܥܒ̣ܵܕܹܗ ܡ̣ܢ ܚܲܩܠܵܐ ܒܪܲܡܫܵܐ: ܘܓܲܒ̣ܪܵܐ ܡܢ ܛܘܼܪܵܐ ܗ̄ܘ̣ܵܐ ܕܐܲܦܪܹܝܡ: ܘܥܵܡܲܪ ܗ̄ܘ̣ܵܐ ܒܲܓ̣ܒܲܥ ܕܒܸܢܝܵܡܹܝܢ. ܘܐ̄ܢܵܫܵܘ̈ܗܝ ܕܐܲܬ̣ܪܵܐ ܒ̈ܢܲܝ ܒܸܢܝܵܡܹܝܢ: ܒܝܼܫܝܼܢ ܗ̄ܘ̣ܵܘ ܥܒ̣ܵܕܲܝ̈ܗܘܿܢ ܛܵܒ̣.

¹⁷ܘܐܲܪܝܼܡ ܥܲܝܢܵܘ̈ܗܝ ܓܲܒ̣ܪܵܐ ܣܵܒ̣ܵܐ: ܘܲܚܙܵܐ ܐܲܪܚܵܐ ܒܫܘܼܩܵܐ ܕܲܩܪܝܼܬ̣ܵܐ: ܘܐܸܡܲܪ ܠܹܗ ܓܲܒ̣ܪܵܐ ܣܵܒ̣ܵܐ: ܠܐܲܝܟܵܐ ܐܵܙܹ̇ܠ ܐܲܢ̄ܬ̇: ܘܡ̣ܢ ܐܲܝܡܸܟܵܐ ܐܵܬܹ̇ܐ ܐܲܢ̄ܬ̇.

¹⁸ܐܵܡܲܪ ܠܹܗ: ܡܸܥܒܲܪ ܥܵܒ̣ܪܝܼܢ ܚ̄ܢܲܢ ܡ̣ܢ ܒܹܝܬ̣ ܠܚܸܡ ܕܲܝܗܘܼܕܼܵܐ: ܥܕܲܡܵܐ ܠܲܫܦܘܿܠܲܝ̈ ܛܘܼܪܵܐ. ܘܡ̣ܢ ܬܲܡܵܢ ܐ̄ܢܵܐ. ܘܐܸܙܹܠ̄ܬ̇ ܥܕܲܡܵܐ ܠܒܹܝܬ̣ ܠܚܸܡ ܕܲܝܗܘܼܕܼܵܐ. ܘܲܠܒܲܝܬܹ̇ܗ ܕܡܵܪܝܵܐ ܐܵܙܹ̇ܠ ܐ̄ܢܵܐ: ܘܠܲܝܬ̇ ܐ̄ܢܵܫ ܕܡܲܥܸܠ ܠܲܢ ܠܒܲܝܬܵܐ.

¹⁹ܐܵܦ ܬܸܒ̣ܢܵܐ ܐܵܦ ܟܸܣܬ̣ܵܐ ܐܝܼܬ̣ ܠܚܸܡܪ̈ܲܢ: ܘܐܵܦ ܠܲܚܡܵܐ ܘܚܲܡܪܵܐ ܐܝܼܬ̣ ܠܝܼ ܘܠܲܐܡܬ̣ܵܟ̣ ܘܠܲܥܠܲܝܡܵܐ ܥܲܒ̣ܕܵܟ̣: ܘܡܸܕܸ̇ܡ ܠܵܐ ܚܲܣܝܼܪ.

²⁰ܐܵܡܲܪ ܠܹܗ ܓܲܒ̣ܪܵܐ ܣܵܒ̣ܵܐ ܫܠܵܡ ܠܵܟ̣: ܟܠܡܸܕܸ̇ܡ ܕܚܲܣܝܼܪ ܠܵܟ̣ ܐܸܢܵܐ ܐܸܬܸ̇ܠ: ܒܲܠܚܘܿܕܼ ܒܫܘܼܩܵܐ ܠܵܐ ܬܒ̣ܘܼܬ̣.

²¹ܘܐܲܥܠܹܗ ܠܒܲܝܬܹ̇ܗ ܘܐܲܪܡܝܼ ܠܚܸܡܪܹ̈ܗ: ܘܐܲܫܝܼܓܘ ܪܸ̈ܓ̣ܠܝܗܘܿܢ: ܘܲܠܥܸܣܘ ܘܐܸܫܬ̇ܝܼܘ.

²²ܘܗܸܢܘܿܢ ܫܦܲܪ ܠܸܒ̇ܗܘܿܢ: ܘܗܵܐ ܐ̄ܢܵܫܲܝ̈ ܩܪܝܼܬ̣ܵܐ ܓܲܒ̣ܪܹ̈ܐ ܥܵܘܵܠܹ̈ܐ ܐܸܬ̣ܟܲܪܟ̇ܘܼܗܝ ܠܒܲܝܬܵܐ: ܘܥܲܠ ܬܲܪܥܵܐ ܡܸܬ̣ܟܲܬ̇ܫܝܼܢ: ܘܐܵܡ̇ܪܝܼܢ ܠܓܲܒ̣ܪܵܐ ܣܵܒ̣ܵܐ ܡܵܪܹܗ ܕܒܲܝܬܵܐ: ܐܲܦܸܩ ܠܓܲܒ̣ܪܵܐ ܕܥܲܠ ܠܒܲܝܬܵܟ̣ ܕܢܸܕ̇ܥܝܼܘܗܝ.

²³ܘܲܢܦܲܩ ܠܘܵܬ̣ܗܘܿܢ ܓܲܒ̣ܪܵܐ ܣܵܒ̣ܵܐ ܡܵܪܹܗ ܕܒܲܝܬܵܐ: ܘܐܸܡܲܪ ܠܗܘܿܢ: ܠܵܐ ܐܲܚܲܝ̈ ܠܵܐ ܬܲܒ̣ܐ̱ܫܘܼܢ ܗܵܟܲܢܵܐ: ܡܸܛܠ ܕܥܲܠ̣ ܓܲܒ̣ܪܵܐ ܗܵܢܵܐ ܠܒܲܝܬ̇ܝ ܠܵܐ ܬܸܥܒ̇ܕܼܘܼܢ ܨܲܥܪܵܐ ܗܵܢܵܐ.

²⁴ܗܵܐ ܒܪܲܬܝ ܒܬ̣ܘܼܠܬܵܐ: ܘܲܕܼܪܘܼܟ̣ܬܹ̇ܗ: ܐܲܦܸܩ̣ ܐܸܢܹܝܢ ܠܟ̣ܘܿܢ: ܘܨܲܥܲܪܘ ܐܸܢܹܝܢ: ܘܲܥܒܸܕܼܘ ܠܗܹܝܢ ܡܸܕܸ̇ܡ ܕܫܲܦܝܼܪ ܒܥܲܝܢܲܝ̈ܟ̇ܘܿܢ: ܘܲܠܓܲܒ̣ܪܵܐ ܗܵܢܵܐ ܠܵܐ ܬܸܥܒ̇ܕܼܘܼܢ ܨܲܥܪܵܐ ܗܵܢܵܐ.

²⁵ܘܠܵܐ ܨܒ̣ܵܘ ܓܲܒ̣ܪܹ̈ܐ ܗܵܢܘܿܢ ܠܡܸܫ̱ܡܥܹܗ. ܘܐܸܚܲܕܼ ܓܲܒ̣ܪܵܐ ܕܪܘܼܟ̣ܬܹ̇ܗ. ܘܐܲܦܩܵܗ̇ ܠܗܘܿܢ ܠܒܲܪ: ܘܚܲܟ̣ܡܘܼܗ̇: ܘܐܸܫܬܲܢܲܕܼܘ ܒܵܗ̇ ܟܠܹܗ ܠܸܠܝܵܐ ܥܕܲܡܵܐ ܠܨܲܦܪܵܐ: ܘܫܲܒ̣ܩܘܼܗ̇ ܟܲܕܼ ܣܠܸܩ ܨܲܦܪܵܐ.

²⁶ܘܐܸܬ̣ܵܬ̤ ܐܲܢ̄ܬ̇ܬ̣ܵܐ ܠܥܸܕܵܢ ܨܲܦܪܵܐ: ܘܢܸܦܠܲܬ̤ ܒܬܲܪܥܵܐ ܕܓܲܒ̣ܪܵܐ ܐܲܝܟܵܐ ܕܡܵܪܵܗ̇ ܬܲܡܵܢ: ܥܕܲܡܵܐ ܕܢܸܓܗܲܬ̤.

²⁷ܘܩܵܡ̣ ܡܵܪܵܗ̇ ܒܨܲܦܪܵܐ: ܘܲܦܬܲܚ̣ ܬܲܪܥܵܐ ܕܒܲܝܬܵܐ. ܘܲܢܦܲܩ̣ ܕܢܑܹܙܲܠ ܠܐܘܼܪܚܹܗ: ܘܲܚܙܵܐ ܕܪܘܼܟ̣ܬܹ̇ܗ ܪܲܡܝܵܐ ܥܲܠ ܬܲܪܥܵܐ ܕܒܲܝܬܵܐ: ܘܐܝܼܕܼܵܗ̇ ܥܲܠ ܬܲܪܥܵܐ.

²⁸ܐܵܡܲܪ ܠܵܗ̇ ܩܘܼܡܝ ܢܹܐܙܲܠ: ܘܠܵܐ ܥܵܢ̇ܝܵܐ ܗ̄ܘ̣ܵܬ̣ ܠܹܗ. ܘܫܲܩܠܵܗ̇ ܥܲܠ ܚܡܵܪܹܗ: ܘܩܵܡ̣ ܓܲܒ̣ܪܵܐ ܘܐܸܙܲܠ̣ ܠܐܲܬ̣ܪܹܗ.

²⁹ܘܥܲܠ ܠܒܲܝܬܹ̇ܗ: ܘܲܢܣܲܒ̣ ܣܲܟ̇ܝܼܢܵܐ: ܘܦܲܫܚܵܗ̇ ܠܲܕܼܪܘܼܟ̣ܬܹ̇ܗ ܠܬܲܪܬܲܥܸܣܪܹ̈ܐ ܡ̈ܢܵܘܵܢ: ܘܲܫܕܼܵܗ̇ ܒܟ̣ܠܗܘܿܢ ܬܚ̈ܘܼܡܹܐ ܕܝܼܣܪܵܝܹܠ.

³⁰ܘܟ̣ܠܡ̇ܢ ܕܲܚܙܵܗ̇: ܐܸܡܲܪ: ܠܵܐ ܗܘ̤ܵܬ̣ ܘܠܵܐ ܐܸܬ̣ܚܲܙܝܲܬ̤ ܐܲܝܟ̣ ܗܵܕܹܐ: ܡ̣ܢ ܝܵܘܡܵܐ ܕܲܣܠܸܩ̣ܘ ܒ̈ܢܲܝ ܝܼܣܪܵܝܹܠ ܡ̣ܢ ܐܲܪܥܵܐ ܕܡܸܨܪܹܝܢ ܘܲܥܕܲܡܵܐ ܠܝܵܘܡܵܢܵܐ: ܘܐܸܬ̣ܪܲܥܝܼܘ ܥܠܹܝܗ̇: ܘܐܸܬ̣ܡܲܠܲܟ̣ܘ ܘܡܲܠܸܠ̣ܘ.