Read Aramaic Peshita Judges 21 Bible Online

Judges 21 - Aramaic Peshita bible

Judges 21

¹ܘܓܲܒ̣ܪܵܐ ܕܝܼܣܪܵܝܹܠ ܝܼܡܵܘ ܒܡܲܨܦܝܵܐ: ܘܐܸܡܲܪܘ: ܕܓܲܒ̣ܪܵܐ ܡܸܢܲܢ ܠܵܐ ܢܸܬܸ̇ܠ ܒܲܪܬܹܗ ܠܲܒ̣̈ܢܲܝ ܒܸܢܝܵܡܹܝܢ ܠܐܲܢ̄ܬ̇ܬ̣ܵܐ.

²ܘܐܸܬ̣ܵܘ ܥܕܲܡܵܐ ܠܒܹܝܬ̣ ܐܹܝܠ: ܘܝܼܬܸܒ̣ܘ ܬܲܡܵܢ ܥܕܲܡܵܐ ܠܪܲܡܫܵܐ ܩܕܼܵܡ ܐܲܠܵܗܵܐ: ܘܐܲܪܝܼܡܘ ܩܵܠܗܘܿܢ ܘܲܒ̣ܟ̣ܵܘ ܒܟ̣ܵܬ̣ܵܐ ܪܲܒ̇ܬ̣ܵܐ.

³ܘܐܸܡܲܪܘ: ܠܡܵܢܵܐ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ ܗܘ̤ܵܬ̣ ܗܵܕܹܐ ܒܹܝܬ̣ ܝܼܣܪܵܝܹܠ: ܕܢܸܛܥܹܐ ܝܵܘܡܵܢܵܐ ܡ̣ܢ ܝܼܣܪܵܝܹܠ ܚܲܕܼ ܫܲܒ̣ܛܵܐ.

⁴ܘܡ̣ܢ ܒܵܬܲܪ ܝܵܘܡܵܐ: ܩܲܕܸ̇ܡ̣ܘ ܥܲܡܵܐ: ܘܲܒ̣ܢܵܘ ܬܲܡܵܢ ܡܲܕܼܒ̇ܚܵܐ: ܘܐܲܣܸܩ̣ܘ ܥܠܵـ̈ـܘܵܬ̣ܵܐ ܘܫܲܠܡܹ̈ܐ.

⁵ܘܐܸܡܲܪܘ ܒ̈ܢܲܝ ܝܼܣܪܵܝܹܠ: ܡܲܢܘܼ ܕܠܵܐ ܣܠܸܩ ܒܟܸܢܫܵܐ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ ܩܕܼܵܡ ܡܵܪܝܵܐ: ܡܸܛܠ ܕܡܵܘܡܵܬ̣ܵܐ ܪܲܒ̇ܬ̣ܵܐ ܗܘ̤ܵܬ̣ ܕܡ̇ܢ ܕܠܵܐ ܣܵܠܹܩ ܩܕܼܵܡ ܡܵܪܝܵܐ ܠܡܲܨܦ̄ܝܵܐ ܡܡܵܬ̣ ܢܡܘܼܬ̣.

⁶ܘܐܸܬ̇ܬ̇ܘܝܼܘ ܒ̈ܢܲܝ ܝܼܣܪܵܝܹܠ ܥܲܠ ܒ̈ܢܲܝ ܒܸܢܝܵܡܹܝܢ ܐܲܚܘܼܗܘܿܢ: ܘܐܵܡ̇ܪܝܼܢ: ܝܵܘܡܵܢܵܐ ܥܢܲܕܼ ܫܲܒ̣ܛܵܐ ܚܲܕܼ ܡ̣ܢ ܝܼܣܪܵܝܹܠ.

⁷ܘܐܸܡܲܪ: ܡܵܢܵܐ ܢܸܥܒܸ̇ܕܼ ܠܗܵܢܘܿܢ ܕܐܸܫܬ̇ܒܸܩܘ ܕܠܵܐ ܢܸܫܹ̈ܐ: ܕܲܚܢܲܢ ܝܼܡܲܝܢ ܒܡܵܪܝܵܐ ܕܠܵܐ ܢܸܬܸ̇ܠ ܠܗܘܿܢ ܢܸܫܹ̈ܐ.

⁸ܘܐܵܡ̇ܪܝܼܢ: ܡ̇ܢ ܚܲܕܼ ܡ̣ܢ ܫܲܒ̣̈ܛܹܐ ܕܝܼܣܪܵܝܹܠ ܕܠܵܐ ܣܠܸܩ ܩܕܼܵܡ ܡܵܪܝܵܐ ܠܡܲܨ̄ܦܝܵܐ ܘܠܵܐ ܐܸܬ̣ܵܘ ܓܲܒ̣ܪܹ̈ܐ ܠܡܲܫܪܝܼܬ̣ܵܐ: ܡ̣ܢ ܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕܼ.

⁹ܘܐܸܬ̣ܡ̱ܢܝܼܘ ܬܲܡܵܢ ܥܲܡܵܐ: ܘܠܵܐ ܐܸܫܬ̇ܟܲܚ̣ ܐ̄ܢܵܫ ܬܲܡܵܢ ܡ̣ܢ ܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕܼ.

¹⁰ܘܫܲܕܲܪܘ ܠܬܲܡܵܢ ܥܲܡܵܐ: ܬܪܸܥܣܲܪ ܐܲܠܦ̈ܝܼܢ ܓܲܒ̣ܪ̈ܝܼܢ ܡ̣ܢ ܒ̈ܢܲܝ ܚܲܝܠܵܐ. ܘܦܲܩܸܕܼܘ ܐܸܢܘܿܢ: ܘܐܸܡܲܪܘ ܠܗܘܿܢ: ܙܸܠܘ ܚܪܘܿܒ̣ܘ ܠܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕܼ ܒܦܘܼܡܵܐ ܕܚܲܪܒܵܐ: ܘܢܸܫܹ̈ܐ ܘܲܛܠܵܝܹ̈ܐ.

¹¹ܗܵܟܲܢܵܐ ܥܒܸܕܼܘ ܠܟ̣ܠ ܓܲܒ̣ܪܵܐ. ܘܲܠܟ̣ܠ ܐܲܢ̄ܬ̇ܬ̣ܵܐ ܕܚܲܟ̣ܡܵܗ̇ ܓܒܲܪ ܚܪܘܿܒ̣ܘ.

¹²ܘܐܸܫܟܲܚܘ ܡ̣ܢ ܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕܼ: ܐܲܪܒܲܥܡܵܐܐ ܥܠܲܝ̈ܡܵܬ̣ܵܐ ܒܬ̣̈ܘܼܠܬܵܐ ܕܠܵܐ ܚܟܲܡܘ ܐܸܢܹܝܢ ܓܲܒ̣ܪܹ̈ܐ. ܘܐܲܝܬ̇ܝܼܘ ܐܸܢܹܝܢ ܠܡܲܫܪܝܼܬ̣ܵܐ ܠܫܝܼܠܘܿ ܕܒܲܐܪܥܵܐ ܕܲܟ̣ܢܲܥܢ.

¹³ܘܫܲܕܲܪ ܟܠܹܗ ܥܲܡܵܐ: ܘܐܸܡܲܪܘ ܠܒܸܢܝܵܡܹܝܢ ܕܒܲܫܩܝܼܦܵܐ ܕܪܲܡܘܿܢ: ܘܲܩܪܵܘ ܠܹܗ ܫܠܵܡܵܐ.

¹⁴ܘܐܸܬ̣ܵܐ ܒܸܢܝܵܡܹܝܢ ܒܙܲܒ̣ܢܵܐ ܗܵܘ̇: ܘܝܲܗ̄ܒ̣ܘ ܠܗܘܿܢ ܢܸܫܹ̈ܐ ܕܐܲܚܝܼܘ ܡܟܢ ܢܸܫܹ̈ܐ ܕܝܵܒ̣ܝܼܫ ܕܓܸܠܥܵܕܼ ܘܠܵܐ ܡ̈ܠܲܝ ܠܗܘܿܢ.

¹⁵ܘܥܲܡܵܐ ܐܸܬ̇ܬ̇ܘܝܼ ܥܲܠ ܒܸܢܝܵܡܹܝܢ: ܡܸܛܠ ܕܲܥܒܲܕܼ ܡܵܪܝܵܐ ܬܘܼܪ̱ܥܬ̣ܵܐ ܒܫܲܒ̣̈ܛܹܐ ܕܝܼܣܪܵܝܹܠ.

¹⁶ܘܐܸܡܲܪܘ ܣܵܒܹ̈ܐ ܕܥܲܡܵܐ: ܡܵܢܵܐ ܢܸܥܒܸ̇ܕܼ ܠܐܲܝܠܹܝܢ ܕܐܸܫܬ̇ܒܸܩ̣ܘ ܕܠܵܐ ܢܸܫܹ̈ܐ: ܗܵܠܹܝܢ ܕܐܸܫܬ̇ܚܲܪܘ: ܡܸܛܠ ܕܣܵܦ̣ ܠܗܹܝܢ ܢܸܫܹ̈ܐ ܕܒܸܢܝܵܡܹܝܢ.

¹⁷ܘܐܸܡܲܪܘ ܕܢܸܫܬ̇ܒܸܩ ܫܲܪܟܵܢܵܐ ܕܒܸܢܝܵܡܹܝܢ: ܘܠܵܐ ܢܸܬ̇ܛܥܹܐ ܫܲܒ̣ܛܵܐ ܡ̣ܢ ܝܼܣܪܵܝܹܠ.

¹⁸ܚܢܲܢ ܓܹܝܪ ܠܵܐ ܡܸܫܟ̇ܚܝܼܢ ܚ̄ܢܲܢ ܕܢܸܬܸ̇ܠ ܠܗܘܿܢ ܢܸܫܹ̈ܐ ܡ̣ܢ ܒ̈ܢܵܬܲܢ. ܡܸܛܠ ܕܝܼܡ̣ܵܘ ܒ̈ܢܲܝ ܝܼܣܪܵܝܹܠ: ܘܐܸܡܲܪܘ: ܠܝܼܛ ܗ̄ܘ̣ ܡ̇ܢ ܕܢܸܬܸ̇ܠ ܐܲܢ̄ܬ̇ܬ̣ܵܐ ܠܒܸܢܝܵܡܹܝܢ.

¹⁹ܘܐܸܡܲܪܘ: ܗܵܐ ܚܲܓܵܐ ܕܡܵܪܝܵܐ ܗܵܘܹ̇ܐ ܒܫܝܼܠܘܿ ܡ̣ܢ ܥܸܕܵܢ ܠܥܸܕܵܢ: ܡ̣ܢ ܓܲܪܒ̇ܝܵܐ ܕܒܹܝܬ̣ ܐܹܝܠ: ܡ̣ܢ ܡܲܕܼܢܵܚܲܝ̈ ܫܸܡܫܵܐ ܡ̣ܢ ܫܒ̣ܝܼܠܵܐ ܕܣܵܠܹܩ ܡ̣ܢ ܒܹܝܬ̣ ܐܹܝܠ ܠܲܫܟܹܝܡ: ܡ̣ܢ ܬܲܝ̱ܡܢܵܐ ܕܲܠܒ̣ܘܿܢܵܐ.

²⁰ܘܦܲܩܸܕܼܘ ܠܲܒ̣̈ܢܲܝ ܒܸܢܝܵܡܹܝܢ: ܘܐܸܡܲܪܘ ܠܗܘܿܢ: ܙܸܠܘ ܟܡܲܢܘ ܒܟܲܪ̈ܡܹܐ.

²¹ܘܡܵܐ ܕܲܚܙܲܝܬ̇ܘܿܢ ܕܲܢܦܲܩ̣ ܡ̣ܢ ܒ̈ܢܵܬ̣ ܫܝܼܠܘܿ ܠܡܸܩܲܫ ܒܲܦ̈ܠܲܓܹܐ: ܦܘܿܩܘ ܡ̣ܢ ܟܲܪ̈ܡܹܐ: ܘܲܚܛܘܿܦܘ ܠܟ̣ܘܿܢ ܓܒܲܪ ܐܲܢ̄ܬ̇ܬܹܗ ܡ̣ܢ ܒ̈ܢܵܬ̣ ܫܝܼܠܘܿ: ܘܙܸܠܘ ܠܐܲܪܥܵܐ ܕܒܸܢܝܵܡܹܝܢ.

²²ܘܐܸܢ ܐܸܬ̣ܵܘ ܐܲܒ̣ܵܗܲܝ̈ܗܹܝܢ ܐܵܘ ܐܲܚܲܝ̈ܗܹܝܢ ܠܲܡܕܼܵܢ ܩܕܼܵܡܲܝܢ: ܐܵܡ̇ܪܝܼܢ ܚ̄ܢܲܢ ܠܗܘܿܢ: ܪܲܚܸܡܘ ܥܠܲܝܗܘܿܢ: ܡܸܛܠ ܕܠܵܐ ܕܒܲܪܘ ܓܒܲܪ ܐܲܢ̄ܬ̇ܬܹܗ ܒܲܩܪܵܒ̣ܵܐ. ܠܵܐ ܗ̄ܘ̣ܵܐ ܐܲܢ̄ܬ̇ܘܿܢ ܝܲܗ̄ܒ̣ܬ̇ܘܿܢ ܐܸܢܹܝܢ ܠܗܘܿܢ ܕܬܸܚܛܘܿܢ.

²³ܘܲܥܒܲܕܼܘ ܗܵܟܲܢܵܐ ܒ̈ܢܲܝ ܒܸܢܝܵܡܹܝܢ: ܘܲܢܣܲܒ̣ܘ ܠܗܘܿܢ ܢܸܫܹ̈ܐ ܠܟ̣ܠܗܘܿܢ ܡ̣ܢ ܢܵܩ̈ܫܵܬ̣ ܦ̈ܠܲܓܹ̇ܐ ܕܲܚܛܲܦܘ ܘܲܗ̣ܦܲܟ̣ܘ ܘܐܸܬ̣ܵܘ ܠܝܵܪܬ̇ܘܼܬ̣ܗܘܿܢ: ܘܲܒ̣ܢܵܘ ( ) ܘܝܼܬܸܒ̣ܘ ܒܗܹܝܢ.

²⁴ܘܐܸܙܲܠܘ ܡ̣ܢ ܬܲܡܵܢ ܒ̈ܢܲܝ ܝܼܣܪܵܝܹܠ ܒܙܲܒ̣ܢܵܐ ܗܵܘ̇: ܐ̄ܢܵܫ ܠܫܲܒ̣ܛܹܗ ܘܲܠܫܲܪܒ̇ܬܹܗ: ܘܲܢܦܲܩ̣ܘ ܡ̣ܢ ܬܲܡܵܢ ܐ̄ܢܵܫ ܠܝܵܪܬ̇ܘܼܬܹܗ.

²⁵ܘܲܒ̣ܝܵܘ̈ܡܵܬ̣ܵܐ ܗܵܢܘܿܢ: ܠܲܝܬ̇ ܗ̄ܘ̣ܵܐ ܡܲܠܟܵܐ ܒܹܝܬ̣ ܝܼܣܪܵܝܹܠ ܘܟ̣ܠ ܐ̄ܢܵܫ ܐܲܝܟ̣ ܕܫܲܦܝܼܪ ܒܥܲܝܢܵܘ̈ܗܝ: ܗܵܘ̇ ܗ̄ܘ̣ ܥܵܒܹܕܼ ܗ̄ܘ̣ܵܐ.