Read Aramaic Peshita Judges 7 Bible Online

Judges 7 - Aramaic Peshita bible

Judges 7

¹ܘܩܲܕܸ̇ܡ ܢܕܼܘܼܒ̣ܥܹܝܠ ܕܗ̤ܘ ܓܸܕܼܥܘܿܢ ܘܟ̣ܠܹܗ ܥܲܡܵܐ ܕܥܲܡܹܗ: ܘܫܪܵܘ ܥܲܠ ܥܹܝܢ ܚܵܕܼܵܪ. ܘܡܲܫܪܝܼܬ̣ܵܐ ܕܡܸܕܼܝܲܢ ܗܘ̤ܵܬ̣ ܠܵܗ̇ ܡ̣ܢ ܓܲܪܒ̇ܝܵܐ ܕܓܸܒ̣ܥܲܬ̣ ܪܵܡܬ̣ܵܐ ܒܥܘܼܡܩܵܐ.

²ܘܐܸܡܲܪ ܡܵܪܝܵܐ ܠܓܸܕܼܥܘܿܢ ܣܲܓ̇ܝܼ ܗ̄ܘ̣ ܗܵܢܵܐ ܥܲܡܵܐ ܕܥܲܡܵܟ̣: ܕܐܲܫܠܸܡ ܐܸܢܘܿܢ ܠܡܸܕܼܝܵܢܵܝܹ̈ܐ ܒܐܝܼܕܲܝ̈ܟ̇ܘܿܢ: ܕܠܵܐ ܢܸܫܬܲܒ̣ܗܲܪ ܝܼܣܪܵܝܹܠ ܘܢܹܐܡܲܪ ܐܝܼܕܼܝ ܗ̄ܘ̣ ܙܲܟ̇ܝܵܬܲܢܝ.

³ܗܵܫܵܐ ܩܪܝܼ ܒܐܸܕܼܢܲܝ̈ ܥܲܡܵܐ ܘܐܸܡܲܪ: ܡܢ ܕܕܲܚܝܼܠ ܘܪܲܬܝܼܬ̣ ܢܦܘܼܫ ܠܹܗ: ܘܢܸܗܦܘܿܟ̣ ܡܢ ܛܘܼܪܵܐ ܕܓܸܠܥܵܕܼ. ܘܲܗܦܲܟ̣ܘ ܡ̣ܢ ܥܲܡܵܐ ܥܸܣܪܝܼܢ ܘܲܬ̣ܪܹܝܢ ܐܲܠܦ̈ܝܼܢ: ܘܥܸܣܪܵܐ ܐܲܠܦ̈ܝܼܢ ܐܸܫܬ̇ܚܲܪܘ.

⁴ܘܐܸܡܲܪ ܡܵܪܝܵܐ ܠܓܸܕܼܥܘܿܢ: ܬܘܼܒ̣ ܣܲܓ̇ܝܼ ܗ̄ܘ̣ ܥܲܡܵܐ ܗܵܢܵܐ. ܐܲܚܸܬ̣ ܐܸܢܘܿܢ ܠܡܲـ̈ـܝܵܐ: ܘܐܸܒ̣ܩܸܐ ܐܸܢܘܿܢ ܠܵܟ̣ ܬܲܡܵܢ ܘܲܠܡ̇ܢ ܕܐܹܡܲܪ ܠܵܟ̣ ܕܗܵܘ̇ ܢܹܐܙܲܠ ܥܲܡܵܟ̣: ܗܵܘ̇ ܢܹܐܙܲܠ ܥܲܡܵܟ̣. ܘܲܠܡ̇ܢ ܕܐܹܡܲܪ ܠܵܟ ܕܗܵܘ̇ ܠܵܐ ܢܹܐܙܲܠ ܥܲܡܵܟ̣: ܗܵܘ̇ ܠܵܐ ܢܹܐܙܲܠ ܥܲܡܵܟ̣.

⁵ܘܐܲܚܬܹܗ ܠܥܲܡܵܐ ܠܡܲـ̈ـܝܵܐ ܘܐܸܡܲܪ ܡܵܪܝܵܐ ܠܓܸܕܼܥܘܿܢ: ܟܠ ܕܠܵܐܲܥ ܡܲـ̈ـܝܵܐ ܒܠܸܫܵܢܹܗ ܐܲܝܟ̣ ܕܠܵܐܲܠ ܟܲܠܒܵܐ: ܐܲܩܝܼܡܲܝܗܝ ܐܲܟ̣ܚ̄ܕܼܵܐ. ܘܟ̣ܠ ܕܒ̣ܵܪܹܟ̣ ܥܲܠ ܒܘܼܪ̈ܟܵܘܗܝ ܠܡܸܫܬܵܐ: ܐܲܩܝܼܡܲܝܗܝ ܐܲܟ̣ܚ̄ܕܼܵܐ.

⁶ܘܲܗܘ̤ܵܐ ܡܸܢܝܵܢܵܐ ܕܐܲܝܠܹܝܢ ܕܠܵܥܝܼܢ ܒܐܝܼܕܲܝ̈ܗܘܿܢ ܠܦܘܼܡܗܘܿܢ ܬܠܵܬ̣ܡܵܐܐ ܓܲܒ̣ܪ̈ܝܼܢ. ܘܟ̣ܠܹܗ ܫܲܪܟܹ̇ܗ ܕܥܲܡܵܐ ܒܪܲܟ̣ܘ ܥܲܠ ܒܘܼܪ̈ܟܲܝܗܘܿܢ ܠܡܸܫܬܵܐ ܡܲـ̈ـܝܵܐ.

⁷ܘܐܸܡܲܪ ܡܵܪܝܵܐ ܠܓܸܕܼܥܘܿܢ: ܒܗܵܠܹܝܢ ܬܠܵܬ̣ܡܵܐܐ ܓܲܒ̣ܪ̈ܝܼܢ ܕܠܵܥܝܼܢ ܡܲـ̈ـܝܵܐ ܒܐܝܼܕܲܝ̈ܗܘܿܢ ܠܦܘܼܡܗܘܿܢ ܐܸܦܪܘܿܩܟ̣ܘܿܢ: ܘܐܲܫܠܸܡ ܠܡܸܕܼܝܵܢܵܝܹ̈ܐ ܒܐܝܼܕܲܝ̈ܟ̇ܘܿܢ: ܘܟ̣ܠܹܗ ܥܲܡܵܐ ܢܹܐܙܠ̄ܘܿܢ ܐ̄ܢܵܫ ܠܐܲܬ̣ܪܹܗ.

⁸ܘܲܢܣܲܒ̣ܘ ܙܘܵܕܲܝ̈ܗܘܿܢ ܟܠܹܗ ܥܲܡܵܐ ܒܐܝܼܕܲܝ̈ܗܘܿܢ: ܘܩܲܪ̈ܢܵܬ̣ܗܘܿܢ: ܘܲܠܟ̣ܠܗܘܿܢ ܒ̈ܢܲܝ ܝܼܣܪܵܝܹܠ ܫܪܵܐ ܐܸܢܘܿܢ ܐ̄ܢܵܫ ܠܝܼܵܬ̇ܘܼܬܹܗ: ܘܲܠܡܲܫܟ̇ܢܹܗ: ܘܒܲܬ̣ܠܵܬ̣ܡܵܐܐ ܓܲܒ̣ܪ̈ܝܼܢ ܐܸܬ̣ܚܲܝܲܠ: ܘܡܲܫܪܝܼܬ̣ܵܐ ܕܡܸܕܼܝܲܢ ܗܘ̤ܵܬ̣ ܠܵܗ̇ ܠܬܲܚܬ̇ ܒܥܘܼܡܩܵܐ.

⁹ܘܲܗܘ̤ܵܐ ܒܠܸܠܝܵܐ ܗܵܘ̇: ܘܐܸܡܲܪ ܠܹܗ ܡܵܪܝܵܐ: ܩܘܼܡ ܚܘܿܬ̣ ܠܡܲܫܪܝܼܬ̣ܵܐ: ܡܸܛܠ ܕܐܲܫܠܸܡ̇ܬܵܗ̇ ܒܐܝܼܕܲܝ̈ܟ.

¹⁰ܘܐܸܢ ܕܵܚܹ̇ܠ ܐܲܢ̄ܬ̇ ܠܡܸܚܲܬ̣: ܚܘܿܬ̣ ܐܲܢ̄ܬ̇ ܘܦܹܐܪܵܐ ܥܠܲܝܡܵܟ̣ ܠܡܲܫܪܝܼܬ̣ܵܐ.

¹¹ܘܬܸܫܡܲܥ ܡܸܕܸ̇ܡ ܕܲܡܡܲܠܠܝܼܢ: ܘܗܵܝܕܹ̇ܝܢ ܢܸܬ̣ܚܲܝ̈ܠܵܢ ܐܝܼܕܲܝ̈ܟ. ܘܲܢܚܸܬ̣ ܠܡܲܫܪܝܼܬ̣ܵܐ ܗ̤ܘ ܘܦܹܐܪܵܐ ܥܠܲܝܡܹܝܗ̇: ܥܲܠ ܪܹܫ ܚܲܡܫܝܼܢ ܕܲܒ̣ܡܲܫܪܝܼܬ̣ܵܐ.

¹²ܘܡܸܕܼܝܲܢ ܘܲܥܡܵܠܹܝܩ ܘܟ̣ܠܗܘܿܢ ܒ̈ܢܲܝ ܪܩܸܡ: ܢܦܲܠܘ ܒܥܘܼܡܩܵܐ ܐܲܝܟ̣ ܩܲܡܨܵܐ ܣܲܓ̇ܝܼܵܐܐ: ܘܲܠܗܘܿܢ ܘܲܠܓܲܡܠܲܝ̈ܗܘܿܢ ܠܲܝܬ̇ ܡܸܢܝܵܢ: ܐܲܝܟ̣ ܚܵܠܵܐ ܕܥܲܠ ܣܸܦܬܹܗ ܕܝܲܡܵܐ ܣܘܿܓ̣ܵܐܐ.

¹³ܘܐܸܬ̣ܵܐ ܓܸܕܼܥܘܿܢ: ܘܲܚܙܵܐ ܓܲܒ̣ܪܵܐ ܕܡܸܫܬܲܥܹܐ ܠܚܲܒ̣ܪܹܗ ܚܸܠܡܵܐ: ܘܐܸܡܲܪ ܠܹܗ: ܚܙܹܝܬ̇ ܒܚܸܠܡ̄ܝ: ܟܘܼܟܵܐ ܕܠܲܚܡܵܐ ܕܲܣܥܵܪܹ̈ܐ ܡܸܬ̣ܗܲܦܲܟ̣ ܒܡܲܫܪܝܼܬ̣ܵܐ ܕܡܸܕܼܝܲܢ: ܘܡܲܛܝܼ ܥܕܲܡܵܐ ܠܡܲܫܟ̇ܢܵܐ: ܘܗܲܦܟܹ̇ܗ ܠܥܸܠ ܘܲܢ̣ܦܲܠ ܡܲܫܟ̇ܢܵܐ.

¹⁴ܥ̣ܢܵܐ ܚܲܒ̣ܪܹܗ ܘܐܸܡܲܪ ܠܹܗ: ܠܵܐ ܐܝܼܬܹܝܗ̇ ܗܵܕܹܐ: ܐܸܠܵܐ ܐܸܢ ܚܲܪܒܹ̇ܗ ܕܓܸܕܼܥܘܿܢ ܒܲܪ ܝܘܿܐܵܫ ܓܲܢ̄ܒܵܪܵܐ ܕܝܼܣܪܵܝܹܠ: ܕܐܲܫܠܸܡ ܐܲܠܵܗܵܐ ܒܐܝܼܕܹܗ ܠܡܲܫܪܝܼܬ̣ܵܐ ܕܡܸܕܼܝܲܢ.

¹⁵ܘܟܲܕܼ ܫ̣ܡܲܥ ܓܸܕܼܥܘܿܢ ܬܲܫܥܝܼܬܹܗ ܕܚܸܠܡܵܐ ܘܲܦܫܵܪܹܗ: ܣܓܸܕܼ ܘܲܗܦܲܟ̣ ܠܡܲܫܪܝܼܬ̣ܵܐ ܕܝܼܣܪܵܝܹܠ: ܘܐܸܡܲܪ ܩܘܼܡܘ: ܡܸܛܠ ܕܐܲܫܠܸܡ ܡܵܪܝܵܐ ܒܐܝܼܕܲܝ̈ܟ̇ܘܿܢ ܠܡܲܫܪܝܼܬ̣ܵܐ ܕܡܸܕܼܝܲܢ.

¹⁶ܘܦܲܠܸܓ̣ ܬܠܵܬ̣ܡܵܐܐ ܓܲܒ̣ܪ̈ܝܼܢ: ܠܲܬ̣ܠܵܬ̣ܵܐ ܪܹ̈ܫܝܼܢ: ܘܐܵܘܚܸܕܼ ܩܲܪ̈ܢܵܬ̣ܵܐ ܒܐܝܼܕܲܝ̈ܗܘܿܢ ܕܟ̣ܠܗܘܿܢ: ܘܩܘܼ̈ܠܹܐ ܣܪ̈ܝܼܩܵܬ̣ܵܐ ܘܠܲܡܦܹ̈ܝܕܹܐ ܒܓ̣ܵܘ ܩܘܼ̈ܠܹܐ.

¹⁷ܘܐܸܡܲܪ ܠܗܘܿܢ: ܠܝܼ ܚܙܵܘ ܘܗܵܟܲܢܵܐ ܥܒܸܕܼܘ: ܗܵܐ ܥܵܐܹ̇ܠ ܐ̄ܢܵܐ ܒܓ̣ܵܘ ܡܲܫܪܝܼܬ̣ܵܐ ܐܲܝܟܲܢܵܐ ܕܥܵܒܹܕܼ ܐ̄ܢܵܐ ܗܵܟܲܢܵܐ ܥܒܸܕܼܘ.

¹⁸ܘܩܵܪܹܐ ܐ̄ܢܵܐ ܒܫܝܼܦܘܿܪܵܐ: ܐܸܢܵܐ ܘܟ̣ܠܹܗ ܥܲܡܵܐ ܕܥܲܡܝ: ܘܲܩܪܵܘ ܐܵܦ ܐܲܢ̄ܬ̇ܘܿܢ ܒܫܝܼܦܘܿܪܹ̈ܐ ܒܲܚܕܼܵܪ̈ܲܝ ܟܠܵܗ̇ ܡܲܫܪܝܼܬ̣ܵܐ: ܘܐܸܡܲܪܘ: ܚܲܪܒܵܐ ܠܡܵܪܝܵܐ ܘܲܠܓܸܕܼܥܘܿܢ.

¹⁹ܘܥܲܠ ܓܸܕܼܥܘܿܢ: ܘܲܡܵܐܐ ܓܲܒ̣ܪ̈ܝܼܢ ܕܥܲܡܹܗ: ܒܪܹܫ ܡܲܫܪܝܼܬ̣ܵܐ ܒܡܲܛܲܪܬܵܐ ܡܸܨܥܵܝܬܵܐ: ܘܲܡܩܵܡܘܼ ܐܲܩܝܼܡ ܠܢܵܛܘܿܪܹ̈ܐ.

²⁰ܘܲܩܪܵܘ ܬܠܵܬ̣ܡܵܐܐ ܪܹ̈ܫܝܼܢ ܒܩܲܪ̈ܢܵܬ̣ܵܐ: ܘܬܲܒܲܪܘ ܩܘܼ̈ܠܹܐ: ܘܐܸܚܲܕܼܘ ܒܣܸܡܵܠܲܝ̈ܗܘܿܢ ܠܲܡܦܹܝ̈ܕܹܐ ܘܲܒ̣ܝܲܡܝܼܢܲܝ̈ܗܘܿܢ ܩܲܪ̈ܢܵܬ̣ܵܐ ܕܢܸܩܪܘܿܢ: ܘܲܩ̣ܪܵܘ ܚܲܪܒܵܐ ܠܡܵܪܝܵܐ ܘܲܠܓܸܕܼܥܘܿܢ.

²¹ܘܩܵܡ̣ܘ ܐ̄ܢܵܫ ܒܕܼܘܼܟ̇ܬܹܗ ܚܕܼܵܪ̈ܲܝ ܡܲܫܪܝܼܬ̣ܵܐ: ܘܪܸܗܛܲܬ̤ ܟܠܵܗ̇ ܡܲܫܪܝܼܬ̣ܵܐ ܘܝܲܒܸ̇ܒ̣ܘ ܘܲܥܪܲܩ̣ܘ.

²²ܘܲܩܪ̈ܲܝ ܬܠܵܬ̣ܡܵܐܐ ܩܲܪ̈ܢܵܢ: ܘܣܵܡ̣ ܡܵܪܝܵܐ ܚܲܪܒܹ̇ܗ ܕܓܲܒ̣ܪܵܐ ܒܚܲܒ̣ܪܹܗ ܒܟ̣ܠܵܗ̇ ܡܲܫܪܝܼܬ̣ܵܐ: ܘܥܸܪܩܲܬ̣ܟܠܵܗ̇ ܡܲܫܪܝܼܬ̣ܵܐ: ܥܕܲܡܵܐ ܠܒܹܝܬ̣ ܫܲܒ̣̈ܛܹܐ ܘܲܠܨܸܕܼܪܲܬ̤: ܘܲܥܕܲܡܵܐ ܠܣܸܦܬ̣ܵܐ ܕܐܵܒܸܠ ܡܚܘܿܠܵܐ ܕܥܲܠ ܝܲܛܒܲܬ̣.

²³ܘܲܩܥܵܘ ܒ̈ܢܲܝ ܝܼܣܪܵܝܹܠ ܡ̣ܢ ܢܲܦ̮ܬܵܠܝܼ: ܘܡ̣ܢ ܐܵܫܹܝܪ: ܘܡ̣ܢ ܟܠܹܗ ܡܢܲܫܹܐ: ܘܲܪܕܲܦܘ ܒܵܬܲܪ ܡܸܕܼܝܲܢ.

²⁴ܘܐܝܼܙ̈ܓܲܕܹܐ ܫܲܕܲܪ ܓܸܕܼܥܘܿܢ ܒܟ̣ܠܹܗ ܛܘܼܪܵܐ ܕܐܲܦܪܹܝܡ: ܘܐܸܡܲܪܘ ܚܘܿܬ̣ܘ ܠܐܘܼܪܥܵܐ ܕܡܸܕܼܝܲܢ: ܘܐܲܚܘܿܕܼܘ ܡܲـ̈ـܝܵܐ: ܥܕܲܡܵܐ ܠܒܹܝܬ̣ ܒܹܪܵܐ ܕܥܲܠ ܓܹܢ̄ܒ̣ ܝܘܿܪܕ̇ܢܵܢ: ܘܲܩܥܵܘ ܟܠܗܘܿܢ ܕܒܹܝܬ̣ ܐܲܦܪܹܝܡ: ܘܐܸܚܲܕܼܘ ܡܲـ̈ـܝܵܐ ܥܕܲܡܵܐ ܠܒܹܝܬ̣ ܒܹܪܵܐ ܕܝܘܿܪܕ̇ܢܵܢ.

²⁵ܘܐܸܚܲܕܼܘ ܠܲܬ̣ܪܹܝܢ ܪܵܘ̱ܪ̈ܒ̣ܵܢܹܐ ܕܡܸܕܼܝܲܢ ܠܥܘܿܪܝܼܒ̣: ܘܲܠܙܝܼܒ̣ ܘܩܲܛܠܘܼܗܝ ܠܥܘܿܪܝܼܒ̣ ܒܨܘܿܪ: ܘܲܠܙܝܼܒ̣ ܩܛܲܠ̣ܘ ܒܒܹܝܬ̣ ܩܲܒ̣ܪܲܒ̣. ܘܲܪܕܲܦܘ ܠܡܸܕܼܝܲܢ: ܘܲܠܪܹ̈ܫܲܝܗܘܿܢ ܕܥܘܿܪܝܼܒ̣: ܘܲܕܼܙܝܼܒ̣: ܐܲܝܬ̇ܝܼܘ ܠܓܸܕܼܥܘܿܢ ܠܥܸܒ̣ܪܵܐ ܕܝܘܿܪܕ̇ܢܵܢ.