Read Aramaic Peshita Judges 8 Bible Online

Judges 8 - Aramaic Peshita bible

Judges 8

¹ܘܐܵܡ̇ܪܝܼܢ ܠܹܗ ܕܒܹܝܬ̣ ܐܲܦܪܹܝܡ: ܠܡܵܢܵܐ ܥܒܲܕ̇ܬ̇ ܗܵܟܲܢܵܐ: ܠܵܐ ܩܪܲܝܬܵܢ ܟܲܕܼ ܐܵܙܹ̇ܠ ܐܲܢ̄ܬ̇ ܠܡܸܬ̣ܟܲܬܵܫܘܼ ܥܲܡ ܡܸܕܝܲܢ: ܘܢܵܨܹܝܢ ܗ̄ܘ̣ܵܘ ܥܲܡܹܗ ܩܲܫܝܵܐܝܼܬ̣.

²ܐܵܡܲܪ ܠܗܘܿܢ: ܡܵܢܵܐ ܥܸܒ̣ܕܹܬ̣ ܗܵܫܵܐ ܐܲܟ̣ܘܵܬ̣ܟ̣ܘܿܢ: ܠܵܐ ܗ̄ܘ̣ܵܐ ܛܵܒ̣ ܒܘܼܥܵܪܹܗ ܕܐܲܦܪܹܝܡ ܡ̣ܢ ܩܛܵܦܹ݂ܗ ܕܐܝܼܙܲܪܥܹܝܠ.

³ܘܒ̣ܐܝܼܙܲܪܥܹܝܠ ܒܐܝܼܕܲܝ̈ܟ̇ܘܿܢ ܐܲܫܠܸܡ ܐܲܠܵܗܵܐ ܠܲܬ̣ܪܹܝܢ ܪܵܘ̱ܪ̈ܒ̣ܵܢܹܐ ܕܡܸܕܼܝܲܢ: ܠܥܘܿܪܝܼܒ̣: ܘܲܠܙܝܼܒ̣ ܘܡܵܢܵܐ ܐܸܫܟ̇ܚܹܬ̣ ܕܐܸܥܒܸ̇ܕܼ ܐܲܟ̣ܘܵܬ̣ܟ̣ܘܿܢ ܗܵܝܕܹ̇ܝܢ ܦܸܪܩܲܬ̤ ܚܸܡܬ̣ܗܘܿܢ ܡܸܢܹܗ: ܟܲܕܼ ܐܸܡܲܪ ܦܸܬ̣ܓ̣ܵܡܵܐ ܗܵܢܵܐ.

⁴ܘܐܸܬ̣ܵܐ ܓܸܕܼܥܘܿܢ ܠܝܘܿܪܕ̇ܢܵܢ: ܘܲܥܒܲܪ ܗ̤ܘ ܘܲܬ̣ܠܵܬ̣ܡܵܐܐ ܓܲܒ̣ܪ̈ܝܼܢ ܕܥܲܡܹܗ: ܪܵܗ̇ܛܝܼܢ ܘܥܲܝܝܼܦܝܼܢ.

⁵ܘܐܸܡܲܪ ܠ̄ܢܵܫܲܝ̈ ܣܵܟ̣ܘܼܬ̣: ܗܲܒ̣ܘ ܓܪܝܼܨܬܵܐ ܓܪܝܼܨܬܵܐ ܕܠܲܚܡܵܐ ܠܥܲܡܵܐ ܕܥܲܡܝ: ܡܸܛܠ ܕܥܲܝܝܼܦܝܼܢ ܐܸܢܘܿܢ: ܘܐܸܢܵܐ ܗܵܐ ܪܵܕܹܦ ܐ̄ܢܵܐ ܒܵܬܲܪ ܙܵܒ̣ܝܝ ܘܨܲܠܡܢܲܥ ܡܲܠ̈ܟܹ̇ܐ ܕܡܸܕܝܲܢ.

⁶ܐܵܡ̇ܪܝܼܢ ܠܹܗ ܪܵܘ̱ܪ̈ܒ̣ܵܢܹܐ ܕܣܵܟ̣ܘܼܬ̣: ܗܵܐ ܐܝܼܕܹܗ ܕܙܵܒ̣ܵܚ ܘܲܕܼܨܲܠܡܢܲܥ ܗܵܫܵܐ ܒܐܝܼܕܲܝ̈ܟ: ܕܢܸܬܸ̇ܠ ܠܚܲܝܠܵܟ̣ ܠܲܚܡܵܐ.

⁷ܘܐܸܡܲܪ ܠܗܘܿܢ ܓܸܕܼܥܘܿܢ: ܡܸܛܠ ܗܵܢܵܐ ܡܵܐ ܕܐܲܫܠܸܡ ܡܵܪܝܵܐ ܠܙܵܒ̣ܵܝܝ ܘܲܠܨܲܠܡܢܲܥ ܒܐܝܼܕܲܝ̈: ܐܹܕ̇ܘܼܫ ܒܸܣ̱ܪܟ̣ܘܿܢ ܥܲܠ ܟܘܼ̈ܒܹ̇ܐ ܕܲܒ̣ܡܲܕܼܒ̇ܪܵܐ ܘܥܲܠ ܩܘܼܪ̈ܛܒܹܐ.

⁸ܘܲܣܠܸܩ ܡ̣ܢ ܬܲܡܵܢ ܠܲܦܢܘܼܐܹܝܠ: ܘܐܲܝܟ̣ ܕܲܥܢܵܐܘܼܗܝ ܐ̄ܢܵܫܲܝ̈ ܣܵܟ̣ܘܼܬ̣: ܗܵܟܲܢܵܐ ܥܢܵܐܘܼܗܝ ܐܵܦ ܐ̄ܢܵܫܲܝ̈ ܦܢܘܼܐܹܝܠ.

⁹ܘܐܸܡܲܪ ܐܵܦ ܠܐ̄ܢܵܫܲܝ̈ ܦܢܘܼܐܹܝܠ: ܡܵܐ ܕܐܸܬܹܝܬ̣ ܒܲܫܠܵܡܵܐ: ܐܸܥܩ̄ܪܝܼܘܗܝ ܠܡܲܓܕܠܵܐ ܗܵܢܵܐ.

¹⁰ܘܙܵܒ̣ܵܝܝ ܘܨܲܠܡܢܲܥ ܫܪܹܝܢ ܒܩܲܪܩܒ̣: ܗܸܢܘܿܢ ܘܡܲܫ̱ܪ̈ܝܵܬ̣ܗܘܿܢ ܥܲܡܗܘܿܢ ܐܲܝܟ̣ ܚܲܡܸܫܬܲܥܣܲܪ ܐܲܠܦ̈ܝܼܢ: ܟܠ ܕܐܸܫܬ̇ܚܲܪܘ ܘܡ̣ܢ ܟܠܗܹܝܢ ܡܲܫ̱ܪ̈ܝܵܬ̣ܵܐ ܕܲܒ̣̈ܢܲܝ ܡܲܕܼܢ̱ܚܵܐ: ܘܕܲܢܦܲܠ̣ܘ ܡܵܐܐ ܘܥܸܣܪܝܼܢ ܐܲܠܦ̈ܝܼܢ ܓܲܒ̣ܪ̈ܝܼܢ ܫܵܡܛܲܝ̈ ܣܲܝܦܵܐ.

¹¹ܘܲܣܠܸܩ ܓܹܕܼܥܘܿܢ ܒܐܘܼܪܚܵܐ ܕܫܵܪ̈ܝܲܝ ܡܲܫܟ̇ܢܵܐ: ܡ̣ܢ ܡܲܕܼܢ̱ܚܵܐ ܕܢܵܟ̣ܵܝܝ ܘܲܕܼܝܲܒ̣ܓ̇ܗܵܐ: ܘܲܡ̣ܚܵܐ ܠܡܲܫܪܝܼܬ̣ܵܐ: ܘܡܲܫܪܝܼܬ̣ܵܐ ܗܘ̤ܵܬ̣ ܒܫܸܠܝܵܐ.

¹²ܘܲܥܪܲܩ̣ܘ ܙܵܒ̣ܵܝܝ ܘܨܲܠܡܢܲܥ: ܘܲܪܕܲܦ̣ ܒܵܬܲܪܗܘܿܢ: ܘܐܸܚܲܕܼ ܠܲܬ̣ܪܹܝܢ ܡܲܠ̈ܟܹ̇ܐ ܕܡܸܕܼܝܲܢ: ܘܲܠܟ̣ܠܵܗ̇ ܡܲܫܪܝܼܬ̣ܵܐ ܐܲܙܝܼܥ.

¹³ܘܲܗܦܲܟ̣ ܓܸܕܼܥܘܿܢ ܒܲܪ ܝܘܿܐܵܫ ܡ̣ܢ ܩܪܵܒ̣ܵܐ: ܡ̣ܢ ܡܲܣܩܵܢܵܐ ܕܲܚܕܸܣ.

¹⁴ܘܐܸܚܲܕܼ ܥܠܲܝܡܵܐ ܚܲܕܼ ܡ̣ܢ ܐ̄ܢܵܫܹ̈ܝܗ̇ ܕܣܵܟ̣ܘܼܬ̣ ܘܫܲܐܠܹܗ: ܘܐܲܟ̣ܬܸ̇ܒ̣ ܠܹܗ ܪܵܘ̱ܪ̈ܒ̣ܵܢܹ̇ܝܗ̇ ܕܣܵܟ̣ܘܼܬ̣ ܘܩܲܫܝܼܫܹ̈ܝܗ̇: ܫܲܒ̣ܥܝܼܢ ܓܲܒ̣ܪ̈ܝܼܢ.

¹⁵ܘܐܸܬ̣ܵܐ ܠܘܵܬ̣ ܐ̄ܢܵܫܲܝ̈ ܣܵܟ̣ܘܼܬ̣ ܘܐܸܡܲܪ ܠܗܘܿܢ: ܗܵܐ ܙܵܒ̣ܵܝܝ ܘܨܲܠܡܢܲܥ ܕܚܲܣܸܕ̇ܬ̇ܘܿܢܵܢܝ ܘܐܸܡܲܪܬ̇ܘܿܢ ܠܝܼ ܕܙܵܒ̣ܵܝܝ ܘܨܲܠܡܢܲܥ ܦܟ̣ܝܼܪܝܼܢ ܒܐܝܼܕܲܝ̈ܟ: ܕܢܸܬܸ̇ܠ ܠܥܲܒ̣ܕܲܝ̈ܟ ܠܲܚܡܵܐ ܕܥܲܝܝܼܦܝܼܢ.

¹⁶ܘܓܲܪ ܠܣܵܒܹ̈ܐ ܕܲܩܪܝܼܬ̣ܵܐ ܥܲܠ ܟܘܼ̈ܒܹ̇ܐ ܕܲܒ̣ܡܲܕܼܒ̇ܪܵܐ: ܘܥܲܠ ܩܘܼܪ̈ܛܵܒܹܐ: ܘܐܸܫܬܲܢܲܕܼ ܒܗܘܿܢ ܒܐ̄ܢܵܫܲܝ̈ ܣܵܟ̣ܘܼܬ̣.

¹⁷ܘܡܲܓܕ̇ܠܵܐ ܕܲܦܢܘܼܐܹܝܠ ܥܩܲܪ: ܘܩܲܛܸܠ ܠܐ̄ܢܵܫܲܝ̈ ܩܪܝܼܬ̣ܵܐ.

¹⁸ܘܐܸܡܲܪ ܠܙܵܒ̣ܵܚ ܘܲܠܨܲܠܡܢܲܥ: ܐܲܝܟܲܢܵܐ ܐܸܢܘܿܢ ܐ̄ܢܵܫܵܐ ܕܩܲܛܠܬ̇ܘܿܢ ܒܬ̣ܵܒ̣ܘܿܪ ܐܵܡܪܝܼܢ ܠܹܗ: ܐܲܟ̣ܘܵܬ̣ܵܟ̣ ܐܝܼܬܲܝܗܘܿܢ ܗ̄ܘ̣ܵܘ ܐܲܝܟ̣ ܚܸܙܘܵܐ ܕܲܒ̣̈ܢܲܝ ܡܲܠ̈ܟܹ̇ܐ.

¹⁹ܘܐܸܡܲܪ: ܐܲܚܲܝ̈ ܐܸܢܘܿܢ ܒ̈ܢܲܝ ܐܹܡܝ. ܚܲܝ ܗ̄ܘ̣ ܡܵܪܝܵܐ ܐܲܠܵܗܵܐ: ܕܐܸܠܘܼ ܐܲܚܝܼܬ̇ܘܿܢ ܐܸܢܘܿܢ: ܠܵܐ ܩܲܛܸܠܬ̇ܟ̣ܘܿܢ.

²⁰ܘܐܸܡܲܪ ܠܝܵܬ̣ܵܪ ܒܘܼܟ̣ܪܹܗ: ܩܘܼܡ ܩܛܘܿܠ ܐܸܢܘܿܢ. ܘܠܵܐ ܫ̣ܡܲܥ ܛܲܠܝܵܐ ܣܲܝܦܹܗ ܡܸܛܠ ܕܲܕܼܚܸܠ ܕܲܥܕܲܟܹ̇ܝܠ ܛܲܠܝܵܐ ܗ̄ܘ̣ܵܐ.

²¹ܘܐܸܡܲܪܘ ܙܵܒ̣ܵܝܝ ܘܨܲܠܡܢܲܥ: ܩܘܼܡ ܐܲܢ̄ܬ̇ ܘܲܦܠܲܥ ܒܲܢ: ܘܐܲܝܟ̣ ܓܲܒ̣ܪܵܐ ܓܲܢ̄ܒܵܪܘܼܬܹܗ. ܘܩܵܡ ܓܸܕܼܥܘܿܢ ܘܩܲܛܸܠ ܠܙܵܒ̣ܵܚ ܘܲܠܨܲܠܡܢܲܥ: ܘܲܢܣܲܒ̣ ܣܲܗܪ̈ܵܢܹܐ ܕܐܝܼܬ̣ ܗ̄ܘ̣ܵܘ ܒܨܵܘܪܹ̈ܐ ܕܓܲܡܠܲܝ̈ܗܘܿܢ.

²²ܘܐܵܡ̇ܪܝܼܢ ܒ̈ܢܲܝ ܝܼܣܪܵܝܹܠ ܠܓܸܕܼܥܘܿܢ. ܐܸܫܬܲܠܲܛ ܒܲܢ ܐܵܦ ܐܲܢ̄ܬ̇ ܐܵܦ ܒܪܵܟ̣: ܐܵܦ ܒܲܪ ܒܪܵܟ̣: ܕܲܦܪܲܩܬܵܢ ܡ̣ܢ ܐܝܼܕܼܵܐ ܕܡܸܕܼܝܼܢ.

²³ܐܵܡܲܪ ܠܗܘܿܢ ܓܸܕܼܥܘܿܢ: ܠܵܐ ܐܸܢܵܐ ܡܸܫܬܲܠܲܛ ܐ̄ܢܵܐ ܒܟ̣ܘܿܢ: ܘܠܵܐ ܒܹܪܝ ܡܸܫܬ̇ܠܲܛ ܒܟ̣ܘܿܢ: ܡܵܪܝܵܐ ܢܸܫܬܲܠܲܛ ܒܟ̣ܘܿܢ.

²⁴ܘܐܸܡܲܪ ܠܗܘܿܢ ܓܸܕܼܥܘܿܢ: ܐܸܢܵܐ ܫܸܐܠ̱ܬ̣ܵܐ ܚܕܼܵܐ ܫܵܐܹ̇ܠ ܐ̄ܢܵܐ ܡܸܢܟ̣ܘܿܢ: ܗܲܒ̣ܘ ܠܝܼ ܐ̄ܢܵܫ ܚܲܕܼ ܚܲܕܼ ܩܕܼܵܫܵܐ ܡ̣ܢ ܒܸܙܬܹܗ: ܡܸܛܠ ܕܲܩܕܼܵܫܹ̈ܐ ܕܕܲܗܒ̣ܵܐ ܐܝܼܬ̣ ܗ̄ܘ̣ܵܘ ܠܗܘܿܢ: ܡܸܛܠ ܕܥܲܪ̈ܒ̣ܵܝܹܐ ܗ̄ܘ̣ܵܘ.

²⁵ܐܵܡ̇ܪܝܼܢ ܠܹܗ ܝܲܗ̄ܒ̇ܝܼܢ ܚ̄ܢܲܢ ܠܵܟ̣. ܘܲܦܪܲܣܘ ܡܲܪܛܘܼܛܵܐ: ܘܐܲܪܡܝܼܘ ܬܲܡܵܢ ܐ̄ܢܵܫ ܚܲܕܼ ܚܲܕܼ ܩܕܼܵܫܵܐ ܡ̣ܢ ܒܸܙܬܹܗ.

²⁶ܘܲܗܘ̤ܵܐ ܡܲܬ̣ܩܵܠܵܐ ܕܲܩܕܼܵܫܹ̈ܐ ܕܕܲܗܒ̣ܵܐ ܕܲܫܐܸܠ ܐܵܠܹܦ ܘܲܫܒܲܥܡܵܐܐ ܕܕܲܗܒ̣ܵܐ: ܣܛܲܪ ܡ̣ܢ ܣܵܗܪ̈ܵܢܹܐ: ܘܥܸܩܹ̈ܐ: ܘܲܠܒ̣ܘܼܫܹ̈ܐ ܕܐܲܪܓ̇ܘܵܢܵܐ: ܕܐܝܼܬ̣ ܗ̄ܘ̣ܵܘ ܥܲܠ ܡܲܠ̈ܟܹ̇ܐ ܕܡܸܕܼܝܲܢ: ܘܲܣܛܲܪ ܡ̣ܢ ܥܸܩܹ̈ܐ ܕܐܝܼܬ̣ ܗ̄ܘ̣ܵܘ ܒܨܵܘܪܹ̈ܐ ܕܓܲܡܠܲܝ̈ܗܘܿܢ.

²⁷ܘܲܢܣܲܒ̣ ܡܸܢܗܘܿܢ ܓܸܕܼܥܘܿܢ ܘܲܥܒܲܕܼ ܥܘܼܦܪܵܐ: ܘܐܲܩܝܼܡܹܗ ܒܲܩܪܝܼܬܹܗ ܒܥܘܼܦܪܵܐ: ܘܲܛܥܵܘ ܠܗܘܿܢ ܒ̈ܢܲܝ ܝܼܣܪܵܝܹܠ ܒܵܬ̣ܪܹܗ ܬܲܡܵܢ: ܘܲܗܘ̤ܵܐ ܠܓܸܕܼܥܘܿܢ ܘܲܠܒܲܝܬܹ̇ܗ ܠܬ̣ܘܼܩ̱ܠܬ̣ܵܐ.

²⁸ܘܐܸܬ̇ܬܲܒܲܪܘ ܡܸܕܼܝܵܢܵܝܹ̈ܐ ܩܕܼܵܡ ܒ̈ܢܲܝ ܝܼܣܪܵܝܹܠ: ܘܬ̣ܘܼܒ̣ ܠܵܐ ܐܵܘܣܸܦܘ ܕܲܢܪܝܼܡܘܿܢ ܪܹܫܗܘܿܢ ܘܫܸܠܝܲܬ̤ ܐܲܪܥܵܐ ܐܲܪܒ̇ܥܝܼܢ ܫܢ̈ܝܼܢ ܒܝܵܘܡܵܘ̈ܗܝ ܕܓܸܕܼܥܘܿܢ.

²⁹ܘܐܸܙܲܠ ܢܕܼܘܼܒ̣ܥܹܝܠ ܒܲܪ ܝܘܿܐܵܫ ܘܝܸܬܸܒ̣ ܒܒܲܝܬܹ̇ܗ.

³⁰ܘܠܹܗ ܠܓܕܼܥܘܿܢ ܐܝܼܬ̣ ܗ̄ܘ̣ܵܘ ܫܲܒ̣ܥܝܼܢ ܒܢ̈ܝܼܢ ܕܲܢܦܲܩ̣ܘ ܡ̣ܢ ܚܨܗ: ܡܸܛܠ ܕܢܸܫܹ̈ܐ ܣܲܓ̇ܝܼܵܐ̈ܬ̣ܵܐ ܐܝܼܬ̣ ܗ̄ܘܲܝ̈ ܠܹܗ.

³¹ܘܲܕܼܪܘܼܟ̣ܬܹ̇ܗ ܕܒܲܫܟܹܝܡ ܝܸܠܕܲܬ̤ ܠܹܗ ܒܪܵܐ: ܘܫܲܡܝܼ ܫܡܹܗ ܐܲܒ̣ܝܼܡܲܠܟ.

³²ܘܡܝܼܬ̣ ܓܸܕܼܥܘܿܢ ܒܲܪ ܝܘܿܐܵܫ ܒܣܲܝܒ̇ܘܼܬ̣ܵܐ ܛܵܒ̣ܬ̣ܵܐ: ܘܐܸܬ̣ܩܒܲܪ ܒܲܩܪܝܼܬ̣ܵܐ ܕܝܘܿܐܵܫ ܐܲܒ̣ܘܼܗܝ: ܒܥܘܼܦܪܵܐ ܕܐܲܒ̣ܘܼܗܝ ܕܥܲܙܪܝܼ.

³³ܘܟܲܕܼ ܡܝܼܬ̣ ܓܸܕܼܥܘܿܢ: ܗ̣ܦܲܟ̣ܘ ܒ̈ܢܲܝ ܝܼܣܪܵܝܹܠ: ܘܲܛܥܵܘ ܒܵܬܲܪ ܒܲܥܠܵܐ: ܘܲܥܒܲܕܼܘ ܠܗܘܿܢ ܒܥܸܠ ܩܝܵܡܵܐ ܐܲܠܵܗܵܐ.

³⁴ܘܠܵܐ ܐܸܬ̇ܕܲܟܲܪܘ ܒ̈ܢܲܝ ܝܼܣܪܵܝܹܠ ܠܡܵܪܝܵܐ ܐܵܠܵܗܗܘܿܢ: ܕܲܡܦܲܨܹܐ ܠܗܘܿܢ ܡ̣ܢ ܟܠܗܘܿܢ ܒܥܸܠܕ̇ܒ̣ܵܝܲܝ̈ܗܘܿܢ ܕܒܲܚܕܼܵܪ̈ܲܝܗܘܿܢ.

³⁵ܘܠܵܐ ܥܒܲܪܘ ܛܲܝܒ̇ܘܼܬ̣ܵܐ ܥܲܡ ܒܲܝܬܹ̇ܗ ܕܲܢܕܼܘܼܒ̣ܥܹܝܠ: ܕܗ̤ܘܝܘܼ ܓܸܕܼܥܘܿܢ: ܐܲܝܟ̣ ܟܠܵܗ̇ ܛܲܝܒ̇ܘܼܬ̣ܵܐ ܕܲܥܒܲܕܼ ܥܲܡ ܝܼܣܪܵܝܹܠ.