Read Aramaic Peshita Judges 9 Bible Online

Judges 9 - Aramaic Peshita bible

Judges 9

¹ܘܐܸܙܲܠ ܐܲܒ̣ܝܼܡܲܠܟ ܒܲܪ ܢܕܼܘܼܒ̣ܥܹܝܠ ܠܲܫܟܹܝܡ ܠܘܵܬ̣ ܐܲܚܹ̈ܐ ܕܐܸܡܹܗ: ܘܐܸܡܲܪ ܠܗܘܿܢ: ܘܲܠܟ̣ܠܵܗ̇ ܫܲܪܒ̇ܬ̣ܵܐ ܕܒܹܝܬ̣ ܐܲܒ̣ܘܼܗ̇ ܕܐܸܡܹܗ.

²ܐܸܡܲܪܘ ܩܕܼܵܡ ܟܠܗܘܿܢ ܡܵܪ̈ܝܗ̇ ܕܲܫܟܹܝܡ: ܡܵܢܵܐ ܦܲܩܵܚ ܠܟ̣ܘܿܢ: ܕܢܸܫܬܲܠܛܘܿܢ ܒܟ̣ܘܿܢ ܫܲܒ̣ܥܝܼܢ ܓܲܒ̣ܪ̈ܝܼܢ ܒܢܵܘ̈ܗܝ ܕܲܢܕܼܘܼܒ̣ܥܹܝܠ: ܐܵܘ ܕܢܸܫܬܲܠܲܛ ܒܟ̣ܘܿܢ ܚܲܕܼ ܓܒܲܪ: ܘܐܸܬ̇ܕܲܟ̣̄ܪܘ ܕܓܲܪܡ̱ܟ̣ܘܿܢ ܐ̄ܢܵܐ ܘܒܸܣ̱ܪܟ̣ܘܿܢ.

³ܘܐܸܡܲܪܘ ܐܲܚܹ̈ܐ ܕܐܸܡܹܗ ܩܕܼܵܡ ܟܠܗܘܿܢ ܡܵܪܹ̈ܝܗ̇ ܕܲܫܟܹܝܡ ܥܠܵܘܗܝ ܟܠܗܹܝܢ ܡܸܠܹ̈ܐ ܗܵܠܹܝܢ: ܘܐܸܨܛܒ̣ܝܼ ܠܸܒ̇ܗܘܿܢ ܒܵܬܲܪ ܐܲܒ̣ܝܼܡܲܠܟ: ܘܐܵܡܪܝܼܢ ܐܲܚܘܼܢ ܗ̄ܘ̣.

⁴ܘܝܲܗ̄ܒ̣ܘ ܠܹܗ ܫܲܒ̣ܥܝܼܢ ܕܟܸܣܦܵܐ ܡ̣ܢ ܒܹܝܬ̣ ܒܥܸܠ ܩܝܵܡܵܐ: ܘܐܸܓܲܪ ܒܗܘܿܢ ܐܲܒ̣ܝܼܡܲܠܟ ܐ̄ܢܵܫܵܐ ܣܪ̈ܝܼܩܹܐ: ܘܦܲܚ̈ܙܹܐ: ܘܐܸܙܲܠ̣ܘ ܒܵܬ̣ܪܹܗ.

⁵ܘܥܲܠ ܠܒܹܝܬ̣ ܐܲܒ̣ܘܼܗܝ ܠܥܘܼܦܪܵܐ: ܘܩܲܛܸܠ ܠܐܲܚܵܘ̈ܗܝ ܒܢܵܘ̈ܗܝ ܕܲܢܕܼܘܼܒ̣ܥܹܝܠ ܫܲܒ̣ܥܝܼܢ ܓܲܒ̣ܪ̈ܝܼܢ ܥܲܠ ܟܹܐܦܵܐ ܚܕܼܵܐ: ܘܐܸܫܬܲܚܲܪܘ ܝܘܿܬ̣ܵܡ ܒܲܪ ܢܕܼܘܼܒ̣ܥܹܝܠ ܙܥܘܿܪܵܐ ܡܸܛܠ ܕܐܸܬ̇ܛܲܫܝܼ.

⁶ܘܐܸܬ̣ܟܲܢܲܫܘ ܟܠܗܘܿܢ ܡܵܪܹ̈ܝܗ̇ ܕܲܫܟܹܝܡ ܘܟ̣ܠܹܗ ܥܲܡܵܐ ܕܒܹܝܬ̣ ܡܵܠܘܿ: ܘܐܸܙܲܠ ܘܐܲܩܝܼܡܘ ܠܐܲܒ̣ܝܼܡܲܠܟ ܕܢܸܗܘܹܐ ܥܠܲܝܗܘܿܢ ܡܲܠܟܵܐ: ܥܲܠ ܓܹܢ̄ܒ̣ ܒܲܠܘܼܛܵܐ ܕܡܲܨܦܝܵܐ ܕܐܝܼܬ̣ ܒܲܫܟܹܝܡ.

⁷ܘܚܵܘܝܼܘ ܠܝܘܿܬ̣ܵܡ: ܘܲܣܠܸܩ ܘܩܵܡ̣ ܒܪܹܫ ܛܘܼܪܵܐ ܕܓܲܪܙܝܼܡ: ܘܐܲܪܝܼܡ ܩܵܠܹܗ: ܘܐܸܡܲܪ: ܫܘܼܡܥܘܼܢܝ ܡܵܪܹ̈ܝܗ̇ ܕܲܫܟܹܝܡ: ܕܢܸܫܡܲܥܟ̣ܘܿܢ ܐܲܠܵܗܵܐ.

⁸ܡܑܹܙܲܠ ܐܝܼܠܵܢܹ̈ܐ ܕܢܸܡܫ̄ܚܘܼܢ ܥܠܲܝܗܘܿܢ ܡܲܠܟܵܐ: ܐܵܡ̇ܪܝܼܢ ܠܙܲܝܬܵܐ ܐܲܡܠܸܟ̣ ܥܠܲܝܢ.

⁹ܐܵܡܲܪ ܠܗܘܿܢ ܙܲܝܬܵܐ: ܠܵܐ ܫܵܒܹܩ ܐ̄ܢܵܐ ܕܘܼܗܵܢܝ: ܕܒ̣ܝ ܡܸܬ̣ܝܲܩܪܝܼܢ ܐܲܠܵܗܹ̈ܐ ܘܐ̄ܢܵܫܵܐ: ܘܐܵܙܹ̇ܠ ܐ̄ܢܵܐ ܠܲܡܢܵܕܼ ܐܝܼܠܵܢܹ̈ܐ.

¹⁰ܐܵܡ̇ܪܝܼܢ ܐܝܼܠܵܢܹ̈ܐ ܠܬܹܬܵܐ: ܬܵܝ ܐܲܢ̄ܬܝ ܐܲܡܠܸܟ̣ܝ ܥܠܲܝܢ.

¹¹ܐܵܡܪܵܐ ܠܗܘܿܢ ܬܹܬܵܐ: ܠܵܐ ܫܵܒ̣ܩܵܐ ܐ̄ܢܵܐ ܚܲܠܝܘܼܬ̣ܝ: ܘܐܸܒ̇ܝ ܛܵܒ̣ܵܐ: ܘܐܵܙܵܠ̄ܐ ܐ̄ܢܵܐ ܠܲܡܢܵܕܼ ܥܲܠ ܐܝܼܠܵܢܹ̈ܐ.

¹²ܐܵܡ̇ܪܝܼܢ ܐܝܼܠܵܢܹ̈ܐ ܠܲܓܦܸܬܵܐ: ܬܵܝ ܐܲܢ̄ܬܝ ܐܲܡܠܸܟ̣ܝ ܥܠܲܝܢ.

¹³ܐܵܡܪܵܐ ܠܗܘܿܢ ܓܦܸܬܵܐ: ܠܵܐ ܫܵܒ̣ܩܵܐ ܐ̄ܢܵܐ ܐܲܕܼܫܝ ܕܲܡܚܲܕܼܵܐ ܠܸܒܵܐ ܕܐܲܠܵܗܹ̈ܐ ܘܲܕܼܐ̄ܢܵܫܵܐ: ܘܐܵܙܠ̄ܐ ܐ̄ܢܵܐ ܠܲܡܢܵܕܼ ܥܲܠ ܐܝܼܠܵܢܹ̈ܐ.

¹⁴ܐܵܡܪܝܼܢ ܐܝܼܠܵܢܹ̈ܐ ܟܠܗܘܿܢ ܠܗܲܛܛܵܐ: ܐܲܢ̄ܬ̇ ܐܲܡܠܸܟ̣ ܥܠܲܝܢ.

¹⁵ܐܵܡܲܪ ܗܲܛܛܵܐ ܠܐܝܼܠܵܢܹ̈ܐ: ܐܸܢ ܒܲܫܪܵܪܵܐ ܡܵܫܚܝܼܢ ܐ̄ܢܬ̇ܘܿܢ ܠܝܼ ܕܐܲܡܠܸܟ̣ ܥܠܲܝܟ̇ܘܿܢ: ܬܵܘ ܐܸܣܬܲܬܲܪܘ ܒܛܸܠܵܠܝ. ܘܐܸܢ ܠܵܐ: ܬܸܦܘܿܩ ܢܘܼܪܵܐ ܡ̣ܢ ܗܲܛܛܵܐ: ܘܬܹܐܟ̣ܘܿܠ ܠܐܲܪ̈ܙܹܐ ܕܲܒ̣ܠܸܒ̣ܢܵܢ.

¹⁶ܘܗܵܫܵܐ ܐܸܢ ܒܩܘܼܫܬܵܐ ܘܒܲܫܪܵܪܵܐ ܥܒܲܕ̇ܬ̇ܘܿܢ: ܕܐܲܡܠܟ̣ܬ̇ܘܿܢ ܠܐܲܒ̣ܝܼܡܲܠܟ: ܘܐܸܢ ܛܵܒ̣ܬ̣ܵܐ ܥܒܸ̇ܕ̇ܬ̇ܘܿܢ ܥܲܡ ܢܕܼܘܼܒ̣ܥܹܝܠ ܘܥܲܡ ܒܲܝܬܹ̇ܗ: ܐܵܘ ܐܲܝܟ̣ ܥܲܡܠܵܐ ܕܐܝܼܕܼܵܘ̈ܗܝ ܦܪܲܥܬ̇ܘܿܢܵܝܗܝ.

¹⁷ܕܐܸܬ̣ܟܲܬܲܫ ܐܵܒ̣ܝ ܥܲܠ ܐܲܦܲܝ̈ܟ̇ܘܿܢ: ܘܲܫܕܼܵܐ ܢܲܦ̮ܫܹܗ ܡ̣ܢ ܩܒ̣ܘܿܠ: ܘܦܲܨܝܼܟ̣ܘܿܢ ܡ̣ܢ ܐܝܼܕܼܵܐ ܕܡܸܕܝܲܢ.

¹⁸ܘܐܲܢ̄ܬ̇ܘܿܢ ܩܵܡܬ̇ܘܿܢ ܥܲܠ ܒܹܝܬ̣ ܐܵܒ̣ܝ ܝܵܘܡܵܢܵܐ: ܘܩܲܛܠܬ̇ܘܿܢ ܠܲܒ̣ܢܵܘ̈ܗܝ ܫܲܒ̣ܥܝܼܢ ܓܲܒ̣ܪ̈ܝܼܢ ܥܲܠ ܟܹܐܦܵܐ ܚܕܼܵܐ: ܘܐܲܡܠܸܟ̣ܬ̇ܘܿܢ ܠܐܒ̣ܝܼܡܲܠܟ ܒܲܪ ܐܲܡܬܹܗ ܥܲܠ ܡܪܹ̈ܝܗ̇ ܕܲܫܟ̣ܝܼܡ: ܡܸܛܠ ܕܐܲܚܘܼܟ̣ܘܿܢ ܗ̄ܘ̣.

¹⁹ܘܐܸܢ ܒܩܘܼܫܬܵܐ ܘܒܲܫܪܵܪܵܐ ܥܒܲܕ̇ܬ̇ܘܿܢ ܥܲܡ ܢܕܼܘܼܒ̣ܥܹܝܠ ܘܥܲܡ ܒܲܝܬܹ̇ܗ ܝܵܘܡܵܢܵܐ: ܚܕܼܵܘ ܒܐܲܒ̣ܝܼܡܲܠܟ: ܘܐܵܦ ܗ̤ܘ ܢܸܚܕܸ̇ܐ ܒܟ̣ܘܿܢ.

²⁰ܘܐܸܢ ܠܵܐ: ܬܸܦܘܿܩ ܢܘܼܪܵܐ ܡ̣ܢ ܐܲܒ̣ܝܼܡܲܠܟ: ܘܬܹܐܟ̣ܘܿܠ ܠܡܵܪܹ̈ܝܗ̇ ܕܲܫܟܹܝܡ ܘܲܠܡܵܪܹ̈ܝܗ̇ ܕܡܲܠܘܿ. ܘܬܸܦܘܿܩ ܢܘܼܪܵܐ ܡ̣ܢ ܡܵܪܹ̈ܝܗ̇ ܕܲܫܟܹܝܡ: ܘܡܵܪܹ̈ܝܗ̇ ܕܡܲܠܘܿ: ܘܬܹܐܟ̣ܠܝܼܘܗܝ ܠܐܲܒ̣ܝܼܡܲܠܟ.

²¹ܘܲܥܪܲܩ ܝܘܿܬ̣ܵܡ ܘܐܸܬ̣ܦܲܠܲܛ: ܘܐܸܙܲܠ ܠܕܼܵܒ̣ܝܼܪ ܘܝܼܬܸܒ̣ ܬܲܡܵܢ: ܐܲܝܟܵܐ ܕܝܵܬܹܒ̣ ܗ̄ܘ̣ܵܐ ܐܲܒ̣ܝܼܡܲܠܟ ܡ̣ܢ ܩܕܼܝܼܡ.

²²ܘܐܸܫܬܲܠܲܛ ܐܲܒ̣ܝܼܡܲܠܟ ܥܲܠ ܝܼܣܪܵܝܹܠ ܬܠܵܬ̣ ܫܢ̈ܝܼܢ.

²³ܘܫܲܕܲܪ ܐܲܠܵܗܵܐ ܪܘܼܚܵܐ ܒܝܼܫܬܵܐ ܥܲܠ ܐܲܒ̣ܝܼܡܲܠܟ: ܘܥܲܠ ܡܵܪܹ̈ܝܗ̇ ܕܲܫܟܹܝܡ: ܘܕܲܓܸ̇ܠܘ ܡܵܪܹ̈ܝܗ̇ ܕܲܫܟܹܝܡ ܒܐܲܒ̣ܝܼܡܲܠܟ.

²⁴ܡܸܛܠ ܕܢܹܐܬܹܐ ܥܵܘܼܠܵܐ ܕܫܲܒ̣ܥܝܼܢ ܒܢܵܘ̈ܗܝ ܕܲܢܕܼܘܼܒ̣ܥܹܝܠ: ܘܕܸܡܗܘܿܢ ܠܲܡܣܵܡ ܥܲܠ ܐܲܒ̣ܝܼܡܲܠܟ ܐܲܚܘܼܗܘܿܢ ܕܩܲܛܸܠ ܐܸܢܘܿܢ: ܘܥܲܠ ܡܵܪܹ̈ܝܗ̇ ܕܲܫܟܹܝܡ ܕܚܲܝܸܠܘ ܐܝܼܕܼܵܘ̈ܗܝ ܕܲܢܩܲܛܸܠ ܠܐܲܚܵܘ̈ܗܝ.

²⁵ܘܐܲܟ̣ܡܸܢܘ ܠܹܗ ܟܡܹܐܢܹ̈ܐ ܥܲܠ ܪܹܫ ܛܘܼܪܵܐ: ܘܲܚܛܲܦܘ ܟܠ ܕܥܵܒܲܪ ܥܠܲܝܗܘܿܢ ܒܐܘܼܪܚܵܐ: ܘܐܸܬ̣ܚܵܘܝܼ ܠܐܲܒ̣ܝܼܡܲܠܟ.

²⁶ܘܐܸܬ̣ܵܐ ܓܵܥܵܠ ܒܲܪ ܥܵܦܵܪ: ܗ̤ܘ ܘܐܲܚܵܘ̈ܗܝ: ܘܲܥܒܲܪܘ ܒܲܫܟܹܝܡ: ܘܐܸܬ̇ܬ̇ܟܸܠܘ ܥܠܵܘܗܝ ܡܵܪܹ̈ܝܗ̇ ܕܲܫܟܹܝܡ.

²⁷ܘܲܢܦܲܩܘ ܠܕܲܒ̣ܪܵܐ: ܘܲܩܛܲܦܘ ܟܲܪ̈ܡܲܝܗܘܿܢ ܘܲܥܨܲܪܘ: ܘܲܥܒܲܕܼܘ ܚܠܘܿܠܵܐ: ܘܥܲܠ̣ܘ ܠܒܹܝܬ̣ ܐܲܠܵܗܲܝ̈ܗܘܿܢ: ܘܲܠܥܣܘ: ܘܐܸܣܬ̇ܝܼܘ: ܘܨܲܚܝܼܘ ܠܐܲܒ̣ܝܼܡܲܠܟ.

²⁸ܘܐܵܡܲܪ ܓܵܥܵܠ ܒܲܪ ܥܵܦܵܪ: ܡܲܢܘܼ ܐܲܒ̣ܝܼܡܲܠܟ ܘܡܲܢܘܼ ܫܟܹܝܡ ܕܢܸܦ̱ܠܚܝܼܘܗܝ: ܠܵܐ ܗ̄ܘ̣ܵܐ ܒܲܪ ܢܕܼܘܼܒ̣ܥܹܝܠ. ܘܙܵܒ̣ܵܠ ܕܫܲܢܝܼ ܦܘܼܩܕܵܢܹܗ: ܦܠܲܚ̣ ܠܐ̄ܢܵܫܲܝ̈ ܚܡܘܿܪ ܐܲܒ̣ܘܼܗܝ ܕܲܫܟܹܝܡ: ܡܸܛܠ ܡܵܢܵܐ ܢܸܦ̱ܠܚܝܼܘܗܝ ܚܢܲܢ.

²⁹ܡ̇ܢ ܕܹܝܢ ܐܲܫ̱ܠܡܹܗ ܠܥܲܡܵܐ ܗܵܢܵܐ ܒܐܝܼܕܲܝ̈: ܘܐܲܥܒܲܪܬܹ̇ܗ ܠܐܲܒ̣ܝܼܡܲܠܟ. ܘܐܸܡܲܪ ܠܐܲܒ̣ܝܼܡܲܠܟ: ܐܲܣܓܵܐ ܚܲܝܠܵܟ̣: ܘܦܘܿܩ.

³⁰ܘܲܫܡܲܥ ܙܵܒ̣ܵܠ ܫܲܠܝܼܛܵܐ ܕܲܩܪܝܼܬ̣ܵܐ ܡܸܠܵܘ̈ܗܝ ܕܓ̣ܵܥܵܠ ܒܲܪ ܥܵܦܵܪ: ܘܐܸܬ̣ܚܲܡܲܬ̣ ܪܘܼܓ̣ܙܹܗ.

³¹ܘܫܲܕܲܪ ܐܝܼܙ̈ܓܲܕܹܐ ܠܘܵܬ̣ ܐܲܒ̣ܝܼܡܲܠܟ ܒܢܸܟ̣ܠܵܐ: ܘܐܸܡܲܪ: ܗܵܐ ܓܵܥܵܠ ܒܲܪ ܥܵܦܪ ܗ̤ܘ ܘܐܲܚܵܘ̈ܗܝ ܐܸܬ̣ܵܘ ܠܲܫܟܹܝܡ: ܘܗܵܐ ܚܕܼܝܼܪܝܼܢ ܠܲܩܪܝܼܬ̣ܵܐ ܥܠܲܝܟ.

³²ܗܵܫܵܐ ܩܘܼܡ ܒܠܸܠܝܵܐ ܐܲܢ̄ܬ̇ ܘܥܲܡܵܐ ܕܥܲܡܵܟ̣: ܘܐܸܬ̣ܟܲܡ̄ܢ ܒܕܲܒ̣ܪܵܐ.

³³ܘܲܒ̣ܨܲܦܪܵܐ ܡܵܐ ܕܕܸܢܚܲܬ̤ ܫܸܡܫܵܐ: ܩܘܼܡ ܘܗܲܠܸܟ̣ ܥܲܠ ܩܪܝܼܬ̣ܵܐ: ܘܗܵܐ ܗ̤ܘ ܘܥܲܡܵܐ ܕܥܲܡܹܗ ܢܵܦܩܝܼܢ ܠܘܵܬ̣ܵܟ̣: ܥܒܸܕܼ ܠܗܘܿܢ ܐܲܟ̣ܡܵܐ ܕܣܵܦܩܵܐ ܒܐܝܼܕܲܝ̈ܟ.

³⁴ܘܩܵܡ ܐܲܒ̣ܝܼܡܲܠܟ ܘܥܲܡܵܐ ܟܠܹܗ ܕܥܲܡܹܗ ܒܠܸܠܝܵܐ: ܘܐܸܬ̣ܟ̇ܡܸܢܘ ܥܲܠ ܫܟܹܝܡ ܐܲܪܒ̇ܥܵܐ ܪܹ̈ܫܝܼܢ.

³⁵ܘܲܢܦܲܩ ܓܵܥܵܠ ܒܲܪ ܥܵܦܵܪ: ܘܩܵܡ ܒܡܲܥܠܵܢܵܐ ܕܬܲܪܥܵܐ ܕܲܩܪܝܼܬ̣ܵܐ: ܘܩܵܡ̣ ܐܲܒ̣ܝܼܡܲܠܟ ܘܥܲܡܵܐ ܕܥܲܡܹܗ ܡ̣ܢ ܟܡܹܐܢܵܐ.

³⁶ܘܲܚܙܵܐ ܓܵܥܵܠ ܠܥܲܡܵܐ ܘܐܸܡܲܪ ܠܙܵܒ̣ܵܠ: ܗܵܐ ܥܲܡܵܐ ܢܵܚܬ̇ܝܼܢ ܡ̣ܢ ܪܹ̈ܫܲܝ ܛܘܼܪܹ̈ܐ. ܘܐܸܡܲܪ ܠܹܗ ܙܵܒ̣ܵܠ: ܛܸܠܵܠܵܐ ܗ̄ܘ̣ ܕܛܘܼܪܹ̈ܐ ܚܵܙܹ̇ܐ ܐܲܢ̄ܬ̇ ܐܲܝܟ̣ ܐ̄ܢܵܫܵܐ.

³⁷ܘܐܵܘܣܸܦ ܓܵܥܵܠ ܘܐܸܡܲܪ ܠܙܵܒ̣ܵܠ: ܗܵܐ ܥܲܡܵܐ ܢܵܚܬ̇ܝܼܢ ܡ̣ܢ ܬܘܼܩ̄ܢܵܗ̇ ܕܐܲܪܥܵܐ: ܘܪܹܫܵܐ ܚܲܕܼ ܐܵܬܹܐ ܡ̣ܢ ܐܘܼܪܚܵܐ ܕܒܹܝܬ̣ ܒܲܠܘܼܛܵܐ ܕܲܡܥܘܿܢܝܼܢ.

³⁸ܐܵܡܲܪ ܠܹܗ ܙܵܒ̣ܵܠ: ܐܲܝܟܵܘ ܦܘܼܡܵܟ̣ ܗܵܘ̇ ܕܐܵܡܲܪ ܗ̄ܘ̣ܵܐ: ܕܡܲܢܘܼ ܐܲܒ̣ܝܼܡܲܠܟ ܕܢܸܦ̱ܠܚܝܼܘܗܝ: ܠܵܐ ܗ̄ܘ̣ܵܐ ܗܵܢܵܐ ܥܲܡܵܐ ܕܐܲܣܠܝܼܬ̇: ܦܘܿܩ ܗܵܫܵܐ ܘܐܸܬ̣ܟܲܬܲܫ ܥܲܡܹܗ.

³⁹ܘܲܢܦܲܩ ܓܵܥܵܠ ܩܕܼܵܡ ܡܵܪܹ̈ܝܗ̇ ܕܲܫܟܹܝܡ: ܘܐܸܬ̣ܟܲܬܲܫ ܥܲܡ ܐܲܒ̣ܝܼܡܲܠܟ.

⁴⁰ܘܪܲܕܼܦܹܗ ܐܲܒ̣ܝܼܡܲܠܟ ܘܲܥܪܲܩ ܡ̣ܢ ܩܕܼܵܡܵܘܗܝ: ܘܲܢܦܲܠ̣ܘ ܩܛܝܼ̈ܠܹܐ ܣܲܓ̇ܝܼ̈ܐܹܐ: ܥܕܲܡܵܐ ܠܡܲܥܠܵܢܵܐ ܕܬܲܪܥܵܐ.

⁴¹ܘܝܼܬܸܒ̣ ܐܲܒ̣ܝܼܡܲܠܟ ܒܐܲܕܼܘܿܡܵܐ: ܘܲܛܪܲܕܼ ܙܵܒ̣ܵܠ ܠܓܵܥܵܠ ܘܠܲܐܚܵܘ̈ܗܝ ܕܠܵܐ ܢܸܬ̇ܒ̣ܘܼܢ ܒܲܫܟܹܝܡ.

⁴²ܘܲܗܘ̤ܵܐ ܡ̣ܢ ܒܵܬܲܪ ܝܵܘܡܵܐ: ܘܲܢܦܲܩ̣ܘ ܥܲܡܵܐ ܠܕܲܒ̣ܪܵܐ: ܘܚܵܘܝܼܘ ܠܐܲܒ̣ܝܼܡܲܠܟ.

⁴³ܘܲܕܼܒܲܪ ܠܥܲܡܵܐ: ܘܦܲܠܸܓ̣ ܐܸܢܘܿܢ ܠܲܬ̣ܠܵܬ̣ܵܐ ܪܹ̈ܫܝܼܢ: ܘܐܸܬ̣ܟ̇ܡܸܢ ܒܕܲܒ̣ܪܵܐ: ܘܲܚܙܵܐ ܘܗܵܐ ܥܲܡܵܐ ܢܵܦܹ̇ܩ ܡ̣ܢ ܩܪܝܼܬ̣ܵܐ: ܘܩܵܡ ܥܠܲܝܗܘܿܢ: ܘܩܲܛܸܠ ܐܸܢܘܿܢ.

⁴⁴ܘܐܲܒ̣ܝܼܡܲܠܟ ܘܪܹ̈ܫܹܐ ܕܥܲܡܹܗ: ܗܲܠܸܟ̣ܘ ܘܩܵܡ̣ܘ ܒܡܲܥܠܵܢܵܐ ܕܬܲܪܥܵܐ ܕܲܩܪܝܼܬ̣ܵܐ: ܘܲܬ̣ܪܹܝܢ ܪܹ̈ܫܝܼܢ ܗܲܠܸܟ̣ܘ ܥܲܠ ܟܠ ܕܲܒ̣ܡܲܕܼܒ̇ܪܵܐ ܘܩܲܛܸܠܘ ܐܸܢܘܿܢ.

⁴⁵ܘܐܲܒ̣ܝܼܡܲܠܟ ܐܸܬ̣ܟܲܬܲܫ ܒܲܩܪܝܼܬ̣ܵܐ ܟܠܹܗ ܝܵܘܡܵܐ ܗܵܘ̇: ܘܟܲܒ̣ܫܵܗ̇ ܠܲܩܪܝܼܬ̣ܵܐ ܘܲܠܟ̣ܠܹܗ ܥܲܡܵܐ ܕܐܝܼܬ̣ ܒܵܗ̇ ܩܲܛܸܠ: ܘܥܲܩܪܵܗ̇ ܠܲܩܪܝܼܬ̣ܵܐ ܘܙܲܪܥܵܗ̇ ܡܲܠܘܼܚܵܐ.

⁴⁶ܘܲܫܡܲܥܘ ܟܠܗܘܿܢ ܡܵܪܹ̈ܝܗ̇ ܕܡܲܓܕܲܠ ܫܟܹܝܡ: ܘܐܸܬ̣ܵܘ ܠܡܸܦܣܲܩ ܒܒܹܝܬ̣ ܐܹܝܠ ܩܝܵܡܵܐ.

⁴⁷ܘܚܵܘܝܼܘ ܠܐܲܒ̣ܝܼܡܲܠܟ ܕܐܸܬ̣ܟܲܢܲܫܘ ܟܠܗܘܿܢ ܡܵܪܹ̈ܝܗ̇ ܕܡܲܓܕܲܠ ܫܟܹܝܡ.

⁴⁸ܘܲܣܠܸܩ ܐܲܒ̣ܝܼܡܲܠܟ ܠܛܘܼܪܵܐ ܕܨܲܠܡܘܿܢ: ܘܟ̣ܠܹܗ ܥܲܡܵܐ ܕܥܲܡܹܗ: ܘܲܢܣܲܒ̣ ܐܲܒ̣ܝܼܡܲܠܟ ܢܵܪܓܵܐ ܒܐܝܼܕܹܗ: ܘܲܦܣܲܩ ܣܵܘܟ̇ܬ̣ܵܐ ܕܩܲܝܣܹ̈ܐ: ܘܫܲܩܠܵܗ̇ ܘܣܵܡܵܗ̇ ܥܲܠ ܟܲܬ̣ܦܹܗ: ܘܐܸܡܲܪ ܠܥܲܡܵܐ ܕܥܲܡܹܗ: ܡܵܐ ܕܲܚܙܲܝܬ̇ܘܿܢ ܕܥܸܒ̣ܕܹܬ̣: ܥܒܸܕܼܘ ܐܵܦ ܐܲܢ̄ܬ̇ܘܿܢ ܒܲܥܓܲܠ ܐܲܟ̣ܘܵܬ̣ܝ.

⁴⁹ܘܲܦܣܲܩܘ ܓܒܲܪ ܣܵܘܟ̇ܬܹܗ: ܘܐܸܙܲܠ ܒܵܬܲܪ ܐܲܒ̣ܝܼܡܲܠܟ: ܘܣܵܡ ܟܵܫܝܼܬ̣ܵܐ ܘܐܵܘܩܕܼܵܗ̇ ܠܲܩܪܝܼܬ̣ܵܐ ܒܢܘܼܪܵܐ: ܘܡܝܼܬ̣ܘ ܟܠܗܘܿܢ ܐ̄ܢܵܫܵܐ ܕܐܝܼܬ̣ ܒܡܲܓܕܲܠ ܫܟܹܝܡ ܒܢܘܼܪܵܐ: ܐܲܝܟ ܐܵܠܹܦ: ܒܹܝܬ̣ ܓܲܒ̣ܪܹ̈ܐ ܠܢܸܫܹ̈ܐ.

⁵⁰ܘܐܸܙܲܠ ܐܲܒ̣ܝܼܡܲܠܟ ܠܬ̣ܵܒ̣ܵܨ: ܘܲܫܪܵܐ ܒܬ̣ܵܒ̣ܵܨ ܘܐܲܚܕܵܗ̇.

⁵¹ܘܡܲܓܕ̇ܠܵܐ ܥܲܫܝܼܢܵܐ ܗܘ̤ܵܐ ܒܓ̣ܵܘܵܗ̇ ܕܲܩܪܝܼܬ̣ܵܐ: ܘܲܥܪܲܩ̣ܘ ܠܬܲܡܵܢ ܟܠܗܘܿܢ ܓܲܒ̣ܪܹ̈ܐ ܘܢܸܫܹ̈ܐ: ܘܟ̣ܠܗܘܿܢ ܡܵܪܹ̈ܝܗ̇ ܕܲܩܪܝܼܬ̣ܵܐ: ܘܐܸܚܲܕܼܘ ܒܐܲܦܲܝ̈ܗܘܿܢ: ܘܲܣܠܲܩܘ ܠܐܸܓܵܪܵܐ ܕܡܲܓ̣ܕ̇ܠܵܐ.

⁵²ܘܡܲܛܝܼ ܐܲܒ̣ܝܼܡܲܠܟ ܥܕܲܡܵܐ ܠܡܲܓܕ̇ܠܵܐ ܘܡܸܬ̣ܟܲܬܲܫ ܒܹܗ: ܘܲܩܪܲܒ̣ ܥܕܲܡܵܐ ܠܬܲܪܥܵܐ ܕܡܲܓܕ̇ܠܵܐ ܕܢܵܘܩܕܼܝܼܘܗܝ ܒܢܘܼܪܵܐ.

⁵³ܘܲܫܕܼܵܬ̤ ܐܲܢ̄ܬ̇ܬ̣ܵܐ ܚܕܼܵܐ ܬܸܒ̣ܪܵܐ ܕܪܲܟ̣ܫܵܐ ܕܪܲܚܝܵܐ ܥܲܠ ܪܹܫܹܗ ܕܐܲܒ̣ܝܼܡܲܠܟ: ܘܲܬ̣ܒܲܪܬܹܗ ܠܪܹܫܹܗ.

⁵⁴ܘܲܩܪܵܐ ܡܣܲܪܗ̱ܒ̣ܵܐܝܼܬ̣ ܠܛܵܠܝܵܐ ܫܵܩܹܠ ܡܵܐܢܵܘ̈ܗܝ: ܘܐܸܡܲܪ ܠܹܗ: ܫܡܘܿܛ ܣܲܝܦܵܟ ܘܲܩܛܘܿܠܲܝܢܝ ܒܹܗ: ܕܠܵܐ ܢܹܐܡܪܘܿܢ ܥܠܲܝ ܕܐܲܢ̄ܬ̇ܬ̣ܵܐ ܩܛܲܠܬܹܗ. ܘܕܲܩܪܹܗ ܥܠܲܝܡܵܐ ܘܡܝܼܬ̣.

⁵⁵ܘܲܚܙܵܘ ܒ̈ܢܲܝ ܝܼܣܪܵܝܹܠ ܕܡܝܼܬ̣ ܠܹܗ ܐܲܒ̣ܝܼܡܲܠܟ: ܘܐܸܙܲܠܘ ܐ̄ܢܵܫ ܠܐܲܬ̣ܪܹܗ.

⁵⁶ܘܦܲܪܥܹܗ ܐܲܠܵܗܵܐ ܒܝܼܫܬܵܐ ܠܐܲܒ̣ܡܲܠܟ ܕܲܥܒܲܕܼ ܠܐܲܒ̣ܘܼܗܝ: ܘܩܲܛܸܠ ܠܫܲܒ̣ܥܝܼܢ ܐܲܚܵܘ̈ܗܝ.

⁵⁷ܘܟ̣ܠܵܗ̇ ܒܝܼܫܬܵܐ ܕܲܥܒܲܕܼܘ ܐ̄ܢܵܫܲܝ̈ ܫܟܹܝܡ: ܐܲܗܦܸܟ ܐܲܠܵܗܵܐ ܒܪܹܫܗܘܿܢ: ܘܐܸܬ̣ܵܬ̤ ܥܠܲܝܗܘܿܢ ܟܠܵܗ̇ ܠܵܘܛܬܹܗ ܕܝܘܿܬ̣ܵܡ ܒܲܪ ܢܕܼܘܼܒ̣ܥܹܝܠ.