Read Aramaic Peshita 2 John 1 Bible Online

2 John 1 - Aramaic Peshita bible

2 John 1

¹ܩܲܫܝܼܫܵܐ ܠܲܓ݂ܒ݂ܝܼܬ݂ܵܐ ܩܘܼܪܝܼܵܐ ܘܠܲܒ݂ܢܹܝ̈ܗܿ: ܐܲܝܠܹܝܢ ܕܐܸܢܵܐ ܡܲܚܸܒ݂ ܐܢܵܐ ܒܲܫܪܵܪܵܐ. ܠܵܐ ܗܘܵܐ ܕܹܝܢ ܐܸܢܵܐ ܒܲܠܚܘܿܕ݂ܝ. ܐܸܠܵܐ ܟܠܗܘܿܢ ܐܲܝܠܹܝܢ ܕܝܲܕ݂ܥܘܼܗܝ (ܕܝܵܕܥܝܼܢ) ܠܲܫܪܵܪܵܐ.

²ܡܛܠ ܫܪܵܪܵܐ ܐܲܝܢܵܐ ܕܲܡܩܵܘܹܐ ܒܲܢ ܘܥܲܡܲܢ ܐܝܼܬ݂ܵܘܗܝ ܠܥܵܠܲܡ.

³ܬܸܗܘܹܐ ܥܲܡܲܢ ܛܲܝܒܘܼܬ݂ܵܐ ܘܪ̈ܲܚܡܹܐ ܘܲܫܠܵܡܵܐ ܡܸܢ ܐܲܠܵܗܵܐ ܐܲܒ݂ܵܐ. ܘܡܸܢ ܡܵܪܲܢ ܝܼܫܘܿܥ ܡܫܝܼܚܵܐ ܒܪܹܗ ܕܐܲܒ݂ܵܐ ܒܲܫܪܵܪܵܐ ܘܲܒ݂ܚܘܼܒܵܐ.

⁴ܚܕ݂ܝܼܬ݂ ܣܲܓܝܼ. ܕܐܸܫܟܚܹܬ݂ ܡܸܢ ܒܢܲܝ̈ܟ݁ܝ ܕܲܡܗܲܠܟ݂ܝܼܢ ܒܲܫܪܵܪܵܐ. ܐܲܝܟܲܢܵܐ ܕܦܘܼܩܕܵܢܵܐ ܢܣܲܒ݂ܢܲܢ ܡܸܢ ܐܲܒ݂ܵܐ.

⁵ܘܗܵܫܵܐ ܡܦܝܼܣ ܐ̄ܢܵܐ ܠܹܟ݂ܝ ܩܘܼܪܝܼܵܐ. ܠܵܐ ܗܘܵܐ ܐܲܝܟ݂ ܦܘܼܩܕܵܢܵܐ ܚܲܕ݂ܬ݂ܵܐ ܟܵܬܹܒ݂ ܐܢܵܐ ܠܹܟ݂ܝ. ܐܸܠܵܐ ܗܵܘ ܕܐܝܼܬ݂ ܗܘܵܐ ܠܲܢ ܡܸܢ ܫܘܼܪܵܝܵܐ. ܕܢܲܚܸܒ݂ ܚܲܕ݂ ܠܚܲܕ݂.

⁶ܘܗܵܢܵܐ ܐܝܼܬ݂ܵܘܗܝ ܚܘܼܒܵܐ. ܕܲܢܗܲܠܸܟ݂ ܐܲܝܟ݂ ܦܘܼܩܕܵܢܵܘ̈ܗܝ. ܗܵܢܵܐ ܦܘܼܩܕܵܢܵܐ ܐܝܼܬ݂ܵܘܗܝ ܐܲܝܟ݂ ܡܵܐ ܕܲܫܡܲܥܬܿܘܿܢ ܡܸܢ ܫܘܼܪܵܝܵܐ. ܕܒܹܗ ܗܘܲܝܬܿܘܿܢ ܡܗܲܠܟ݂ܝܼܢ.

⁷ܡܛܠ ܕܣܲܓܝܼ̈ܐܹܐ ܡܲܛܥܝܵܢܹ̈ܐ ܢܦܲܩܘ ܒܹܗ ܒܥܵܠܡܵܐ. ܐܲܝܠܹܝܢ ܕܠܵܐ ܡܵܘܕܹܝܢ ܕܝܼܫܘܿܥ ܡܫܝܼܚܵܐ ܐܸܬ݂ܵܐ ܒܲܒ݂ܣܲܪ. ܗܵܢܵܐ ܐܝܼܬ݂ܵܘܗܝ ܡܲܛܥܝܵܢܵܐ ܘܐܲܢܛܝܼܟ݁ܪܝܼܣܛܘܿܣ.

⁸ܐܸܙܕܲܗܪܘ ܒܢܲܦ̮ܫܟ݂ܘܿܢ. ܕܠܵܐ ܬܵܘܒܿܕ݂ܘܼܢ ܡܸܕܸܡ ܕܲܦܠܲܚ̣ܬܿܘܢ. ܐܸܠܵܐ ܐܲܓ݂ܪܵܐ ܡܫܲܠܡܵܢܵܐ ܬܸܬ݂ܦܲܪܥܘܼܢ.

⁹ܟܠ ܐܲܝܢܵܐ ܕܥܵܒܲܪ ܘܠܵܐ ܡܩܵܘܹܐ ܒܝܘܼܠܦܵܢܹܗ ܕܲܡܫܝܼܚܵܐ. ܐܲܠܵܗܵܐ ܠܲܝܬܿ ܒܹܗ. ܘܗܵܘ ܕܲܡܩܵܘܹܐ ܒܝܘܼܠܦܵܢܹܗ. ܗܵܢܵܐ ܘܠܲܐܒ݂ܵܐ ܘܠܲܒ݂ܪܵܐ ܐܝܼܬ݂ ܠܹܗ.

¹⁰ܐܸܢ ܐܢܵܫ ܐܵܬܹܐ ܠܘܵܬ݂ܟ݂ܘܿܢ. ܘܗܵܢܵܐ ܝܘܼܠܦܵܢܵܐ ܠܵܐ ܡܲܝܬܹܐ. ܠܵܐ ܬܿܩܲܒܠܘܼܢܵܝܗܝ ܒܒܲܝܬܵܐ. ܘܲܚܕ݂ܝܼ ܠܵܟ݂ (ܘܲܫܠܵܡܵܐ) ܠܵܐ ܬܹܐܡܪܘܼܢ ܠܹܗ.

¹¹ܗܵܘ ܓܹܝܪ ܕܐܵܡܲܪ ܠܹܗ ܚܕ݂ܝܼ ܠܵܟ݂(ܫܠܵܡܵܐ). ܡܫܵܘܬܲܦ ܗ̄ܘܼ ܠܲܥܒ݂ܵܕ݂ܵܘܗܝ ܒܝܼܫܹ̈ܐ (ܡܸܫܬܵܘܬܲܦ ܒܲܥܒ݂ܵܕ݂ܵܘܗܝ ܒܝܼܫܹ̈ܐ).

¹²ܟܲܕ݂ ܣܲܓܝܼ̈ܐܵܬ݂ܵܐ ܐܝܼܬ݂ ܗܘܵܐ ܠܝܼ ܠܡܸܟ݂ܬܲܒ݂ ܠܟ݂ܘܿܢ. ܠܵܐ ܒܥܹܝܬ݂ ܕܲܒ݂ܝܲܕ݂ ܩܲܪܛܲܝܣܵܐ ܘܲܕ݂ܝܘܿܬ݂ܵܐ. ܐܸܠܵܐ ܡܣܲܒܲܪ ܐ݇ܢܵܐ ܕܐܹܬܹܐ ܠܘܵܬ݂ܟ݂ܘܿܢ. ܘܦܘܼܡܵܐ ܠܘܵܬ݂ ܦܘܼܡܵܐ ܢܡܲܠܸܠ. ܕܚܲܕ݂ܘܼܬ݂ܵܐ ܕܝܼܠܲܢ ܬܸܗܘܹܐ ܡܫܲܡܠܝܵܐ.

¹³ܫܵܐܠܝܼܢ ܫܠܵܡܹܟ݂ܝ. ܒ̈ܢܲܝܵܐ ܕܚܵܬܹܟ݂ܝ ܓܒ݂ܝܼܬ݂ܵܐ. ܐܵܡܹܝܢ.