Read Aramaic Peshita 3 John 1 Bible Online

3 John 1 - Aramaic Peshita bible

3 John 1

¹ܩܲܫܝܼܫܵܐ ܠܓ݂ܵܐܝܼܘܿܣ ܚܲܒܝܼܒ݂ ܠܗܵܘ ܕܐܸܢܵܐ ܡܲܚܸܒ݂ ܐ݇ܢܵܐ ܒܲܫܪܵܪܵܐ.

²ܚܲܒܝܼܒܲܢ. ܒܟ݂ܠܡܸܕܸܡ ܡܨܲܠܹܐ ܐ݇ܢܵܐ ܥܠܲܝܟ. ܕܬܸܨܠܲܚ ܘܬܸܗܘܹܐ ܚܠܝܼܡ. ܐܲܝܟ݂ ܡܵܐ ܕܡܲܨܠܚܵܐ ܢܲܦ̮ܫܵܟ݂.

³ܚܕ݂ܝܼܬ݂ ܓܹܝܪ ܣܲܓܝܼ. ܕܐܵܬܹܝܢ ܐܲܚܹ̈ܐ ܘܣܵܗܕܝܼܢ ܥܲܠ ܫܪܵܪܵܟ݂. ܐܲܝܟ݂ ܡܵܐ ܕܐܲܢ݇ܬ݁ ܒܲܫܪܵܪܵܐ ܡܗܲܠܸܟ݂ ܐܲܢ݇ܬܿ.

⁴ܕܪܲܒܵܐ ܡܸܢ ܗܵܕܹܐ ܚܲܕ݂ܘܼܬ݂ܵܐ ܠܲܝܬܿ ܠܝܼ. ܕܐܸܫܡܲܥ ܕܲܒ݂̈ܢܲܝܵܐ ܕܝܼܠܝ ܒܲܫܪܵܪܵܐ ܡܗܲܠܟ݂ܝܼܢ.

⁵ܚܲܒܝܼܒܲܢ. ܒܗܲܝܡܵܢܘܼܬ݂ܵܐ ܥܵܒܹܿܕ݂ ܐܲܢ݇ܬ݁ ܗܵܘ ܡܵܐ ܕܣܵܥܲܪ ܐܲܢ݇ܬ݁ ܠܘܵܬ݂ ܐܲܚܹ̈ܐ: ܘܝܲܬܝܼܪܵܐܝܼܬ݂ ܕܐܝܼܬܲܝܗܘܿܢ ܐܲܟ݂ܣܢܵܝܹ̈ܐ:

⁶ܐܲܝܠܹܝܢ ܕܐܲܣܗܸܕ݂ܘ ܥܲܠ ܚܘܼܒܵܟ݂ ܩܕ݂ܵܡ ܟܠܵܗܿ ܥܹܕܬܵܐ. ܠܗܵܢܘܿܢ ܫܲܦܝܼܪ ܥܵܒܹܿܕ݂ ܐܲܢ݇ܬܿ. ܕܲܡܙܵܘܕ݂ ܐܲܢ݇ܬ݁ ܠܗܘܿܢ. ܐܲܝܟ݂ ܡܵܐ ܕܲܦܐܹܐ ܠܐܲܠܵܗܵܐ.

⁷ܚܠܵܦ ܓܹܝܪ ܫܡܹܗ ܢܦܲܩܘ. ܟܲܕ݂ ܡܸܕܸܡ ܠܵܐ ܢܣܲܒ݂ܘ ܡܸܢ ܥܲܡ̈ܡܹܐ.

⁸ܚܢܲܢ ܗܵܟܹܝܠ ܚܲܝܵܒ݂ܝܼܢ ܚ̄ܢܲܢ ܠܲܡܩܲܒܵܠܘܼ ܠܕ݂ܲܐܝܟ݂ ܗܵܠܹܝܢ. ܕܲܡܥܲܕܪ̈ܵܢܹܐ ܢܸܗܘܹܐ ܠܲܫܪܵܪܵܐ.

⁹ܒܵܥܹܐ ܗ̄ܘܹܝܬ݂ ܐܸܟ݂ܬ݁ܘܿܒ݂ ܠܥܹܕܬܵܐ. ܐܸܠܵܐ ܗܵܘ ܕܪܵܚܹܿܡ ܕܢܸܗܘܹܐ ܩܲܕ݂ܡܵܝܵܐ ܕܝܼܠܗܘܿܢ ܕܝܼܘܿܛܪܵܦܝܼܣ. ܠܵܐ ܡܩܲܒܸܠ ܠܲܢ.

¹⁰ܡܛܠ ܗܵܢܵܐ ܐܸܢ ܗܘܼ ܕܐܵܬܹܐ. ܐܲܥܗܸܕ݂ ܥܒ݂ܵܕ݂ܵܘ̈ܗܝ (ܗܵܢܘܿܢ) ܕܥܵܒܹܕ݂. ܕܲܒ݂ܡܸܠܐ ܒ̈ܝܼܫܵܬ݂ܵܐ ܣܵܬܲܪ (ܒܵܕܹܐ) ܠܲܢ. ܘܟܲܕ݂ ܠܵܐ ܣܦܲܩ ܠܹܗ ܗܵܠܹܝܢ. ܠܵܐ ܗܘܼ (ܗܘ̤ ܠܵܐ) ܡܩܲܒܸܠ ܠܐܲܚܹ̈ܐ. ܘܠܲܐܝܠܹܝܢ ܕܲܡܩܲܒܠܝܼܢ (ܕܨܵܒܹܝܢ ܕܲܢܩܲܒܠܘܼܢ) ܟܵܠܹܐ ܘܡܲܦܸܩ (ܐܵܦ) ܡܸܢ ܥܹܕܬܵܐ.

¹¹ܚܲܒܝܼܒܲܢ. ܠܵܐ ܬܸܬܿܕܲܡܹܐ ܒܒ݂ܝܼܫܬܵܐ ܐܸܠܵܐ ܒܛܵܒ݂ܬ݂ܵܐ. ܗܵܘ ܕܥܵܒܹܿܕ݂ ܛܵܒ݂ܬ݂ܵܐ. ܡܸܢ ܐܲܠܵܗܵܐ ܐܝܼܬ݂ܵܘܗܝ. ܗܵܘ ܕܥܵܒܹܿܕ݂ ܒܝܼܫܬܵܐ. ܠܵܐ ܚܙܵܝܗܝ ܠܐܲܠܵܗܵܐ.

¹²ܥܲܠ ܕܝܼܡܲܛܪܝܼܘܿܣ ܐܝܼܬ݂ ܗ̄ܘܼ ܣܵܗܕܘܼܬ݂ܵܐ ܡܸܢ ܟܠܢܵܫ ܘܡܸܢܹܗ ܕܥܹܕܬܵܐ. ܘܡܸܢܹܗ ܕܲܫܪܵܪܵܐ. ܐܵܦ ܚܢܲܢ ܕܹܝܢ ܣܵܗܕܝܼܢ ܚ̄ܢܲܢ. ܘܝܵܕ݂ܲܥ ܐܲܢ݇ܬ݁ ܕܣܵܗܕܘܼܬ݂ܵܐ ܕܝܼܠܲܢ (ܘܝܵܕ݂ܥܝܼܬܘܿܢ ܕܣܵܗܕܘܼܬܲܢ) ܫܲܪܝܼܪܵܐ ܗܝ.

¹³ܣܲܓܝܼ̈ܐܵܬ݂ܵܐ ܐܝܼܬ݂ ܗ̄ܘܵܐ ܠܝܼ ܠܡܸܟ݂ܬܲܒ݂ ܠܵܟ݂. ܐܸܠܵܐ ܠܵܐ ܒܵܥܹܐ ܐ̄ܢܵܐ ܕܲܒ݂ܝܲܕ݂ ܕܝܘܿܬ݂ܵܐ ܘܩܲܢܝܵܐ ܐܸܟ݂ܬܘܿܒ݂ ܠܵܟ݂.

¹⁴ܡܣܲܒܲܪ ܐܢܵܐ ܕܹܝܢ. ܕܒܲܥܓܲܠ ܐܸܚܙܹܝܟ݂. ܘܦܘܼܡܵܐ ܠܘܵܬ݂ ܦܘܼܡܵܐ ܢܡܲܠܸܠ.

¹⁵ܫܠܵܡܵܐ ܢܸܗܘܹܐ ܥܲܡܵܟ݂. ܫܵܐܠܝܼܢ ܫܠܵܡܵܟ݂ ܪ̈ܵܚܡܹܐ. ܫܐܲܠ ܫܠܵܡܵܐ ܕܪ̈ܵܚܡܹܐ ܕܟ݂ܠܢܵܫ ܒܲܫܡܹܗ.