Read Aramaic Peshita Jude 1 Bible Online

Jude 1 - Aramaic Peshita bible

Jude 1

¹ܝܼܗܘܼܕ݂ܵܐ ܥܲܒ݂ܕܵܐ ܕܝܼܫܘܿܥ ܡܫܝܼܚܵܐ. ܐܲܚܵܐ ܕܹܝܢ ܕܝܲܥܩܘܿܒ݂. ܠܥܲܡ̈ܡܹܐ ܩܪ̈ܲܝܵܐ ܕܒܲܐܠܵܗܵܐ ܐܲܒ݂ܵܐ ܪܚܝܼܡܝܼܢ. ܘܲܒ݂ܝܼܫܘܿܥ ܡܫܝܼܚܵܐ ܢܛܝܼܪܝܼܢ.

²ܪ̈ܲܚܡܹܐ ܘܲܫܠܵܡܵܐ ܘܚܘܼܒܵܐ. ܢܸܣܓܹ݁ܐ ܠܟ݂ܘܿܢ.

³ܚܲܒܝܼܒܲܝ̈. ܟܲܕ݂ ܟܠܵܗܿ ܝܲܨܝܼܦܘܼܬ݂ܵܐ ܥܵܒܹܿܕ݂ ܐ̄ܢܵܐ ܠܡܸܟ݂ܬܲܒ݂ ܠܟ݂ܘܿܢ ܥܲܠ ܚܲܝܹ̈ܐ ܕܝܼܠܲܢ ܕܓ݂ܵܘܵܐ. ܐܵܢܲܢܩܹܐ ܐܝܼܬ݂ ܠܝܼ ܠܡܸܟ݂ܬܲܒ݂ ܠܟ݂ܘܿܢ. ܟܲܕ݂ ܡܦܝܼܣ ܐ̄ܢܵܐ. ܕܐܵܓ݂ܘܿܢܵܐ ܬܸܥܒܕ݂ܘܼܢ ܚܠܵܦ ܗܲܝܡܵܢܘܼܬ݂ܵܐ. ܐܲܝܕ݂ܵܐ ܕܲܚܕ݂ܵܐ ܙܒܲܢ ܐܸܫܬܲܠܡܲܬ݂ ܠܩܲܕܝܼܫܹ̈ܐ.

⁴ܩܢܵܘ ܓܹܝܪ ܐ̄ܢܵܫ̈ܝܼܢ ܡܲܥܠܵܢܘܼܬ݂ܵܐ. ܐܲܝܠܹܝܢ ܕܡܸܢ ܫܘܼܪܵܝܵܐ ܩܲܕܸܡܘ ܐܸܬ݂ܟܬܸܒ݂ܘ ܒܚܘܼܝܵܒ݂ܵܐ ܗܵܢܵܐ. ܐ̄ܢܵܫܵܐ ܪ̈ܲܫܝܼܥܹܐ. ܕܲܠܛܲܝܒܘܼܬܹܗ ܕܐܲܠܵܗܲܢ ܡܲܗܦܟ݂ܝܼܢ ܠܛܲܢܦܘܼܬ݂ܵܐ. ܘܲܒ݂ܗܵܘ ܕܐܝܼܬ݂ܵܘܗܝ ܒܲܠܚܘܿܕ݂ܵܘܗܝ ܡܵܪܵܐ ܐܲܠܵܗܵܐ ܘܡܵܪܲܢ ܝܼܫܘܿܥ ܡܫܝܼܚܵܐ. ܟܵܦܪܝܼܢ.

⁵ܠܡܲܥܗܵܕ݂ܘܼܬ݂ܟ݂ܘܿܢ ܕܹܝܢ ܨܵܒܹܐ ܐ̄ܢܵܐ. ܟܲܕ݂ ܝܵܕ݂ܥܝܼܢ ܐ̄ܢܬܘܿܢ ܟܠܗܹܝܢ. ܕܐܲܠܵܗܵܐ ܟܲܕ݂ ܚܕ݂ܵܐ ܙܒܲܢ ܠܥܲܡܵܐ ܡܸܢ ܡܸܨܪܹܝܢ ܦܪܲܩ. ܗܵܝ ܕܬܲܪܬܿܝܢ ܠܐܲܝܠܹܝܢ ܕܠܵܐ ܗܲܝܡܸܢܘ ܐܵܘܒܸܕ݂.

⁶ܘܲܠܡܲܠܲܐܟܹ̈ܐ ܐܲܝܠܹܝܢ ܕܠܵܐ ܢܛܲܪܘ ܪܹܫܵܢܘܼܬ݂ܗܘܿܢ. ܐܸܠܵܐ ܫܒܲܩܘ ܥܘܼܡܪܵܐ ܕܝܼܠܗܘܿܢ. ܠܕ݂ܝܼܢܵܐ ܕܝܵܘܡܵܐ ܪܲܒܵܐ ܒܐܲܣܘܼܪܹ̈ܐ ܠܵܐ ܝܼܕ݂ܝܼܥܹ̈ܐ ܬܚܹܝܬ݂ ܥܲܡܛܵܢܵܐ. ܢ̣ܛܲܪ.

⁷ܐܲܝܟܲܢܵܐ ܕܲܣܕ݂ܘܿܡ ܘܥܵܡܘܿܪܵܐ ܘܲܡܕ݂ܝܼ̈ܢܵܬ݂ܵܐ ܕܲܚܕ݂ܵܪ̈ܲܝܗܹܝܢ: ܕܒ݂ܵܗܿ ܒܲܕ݂ܡܘܼܬ݂ܵܐ ܕܗܵܠܹܝܢ ܙܲܢܝܼ ܘܐܸܙܲܠ ܒܵܬܲܪ ܒܸܣܪܵܐ ܐ̄ܚܪܹܢܵܐ. ܣܝܼ̈ܡܵܢ ܬܚܹܝܬ݂ ܬܲܚܘܝܼܬ݂ܵܐ ܕܢܘܼܪܵܐ ܕܲܠܥܵܠܲܡ ܟܲܕ݂ ܡܚܲܝ̈ܒ݂ܵܢ ܠܕ݂ܝܼܢܵܐ.

⁸ܒܵܗܿ ܒܲܕ݂ܡܘܼܬ݂ܵܐ ܐܵܦ ܗܵܠܹܝܢ ܕܲܒ݂ܚܸܠܡܵܐ ܡܸܫܬܿܪܲܓ݂ܪܓ݂ܝܼܢ. ܠܒܸܣܪܵܐ ܡܲܢ ܡܛܲܢܦܝܼܢ. ܠܡܵܪܘܼܬ݂ܵܐ ܕܹܝܢ ܛܵܠܡܝܼܢ. ܘܲܠܬܸܫܒܿܘܿܚܬܵܐ ܡܓܲܕܦܝܼܢ.

⁹ܡܝܼܟ݂ܵܐܹܝܠ ܕܹܝܢ ܪܹܫ ܡܲܠܲܐܟܹ̈ܐ: ܗܵܘ ܕܥܲܡ ܐܵܟܹܠܩܲܪܨܵܐ ܟܲܕ݂ ܕܵܐܹܢ ܡܡܲܠܸܠ ܗ̄ܘܵܐ ܡܛܠ ܦܲܓ݂ܪܹܗ ܕܡܘܼܫܹܐ. ܠܵܐ ܐܲܡܪܲܚ ܕܢܲܝܬܹܐ ܥܠܵܘܗܝ ܕܝܼܢܵܐ ܕܓ݂ܘܼܕܵܦܵܐ. ܐܸܠܵܐ ܐܸܡܲܪ. ܕܢܸܓ݂ܥܘܿܪ ܒܵܟ݂ ܡܵܪܝܵܐ.

¹⁰ܗܵܠܹܝܢ ܕܹܝܢ ܒܐܲܝܠܹܝܢ ܕܠܵܐ ܝܵܕ݂ܥܝܼܢ. ܡܓܲܕܦܝܼܢ. ܒܐܲܝܠܹܝܢ ܕܹܝܢ ܕܲܟ݂ܝܵܢܵܐܝܼܬ݂ ܐܲܝܟ݂ ܚܲܝ̈ܘܵܬ݂ܵܐ ܚܲܪ̈ܫܵܬ݂ܵܐ ܡܦܵܣܝܼܢ. ܒܗܹܝܢ ܡܸܬ݂ܚܲܒܠܝܼܢ.

¹¹ܘܵܝ ܠܗܘܿܢ ܕܒ݂ܐܘܼܪܚܹܗ ܕܩܵܐܹܝܢ ܐܸܙܲܠܘ. ܘܒܵܬܲܪ ܛܵܥܝܘܼܬܹܗ ܕܒܸܠܥܲܡ ܒܐܲܓ݂ܪܵܐ ܐܸܫܬܲܪܲܚܘ. ܘܲܒ݂ܥܸܨܝܵܢܘܼܬܹܗ ܕܩܘܼܪܚ ܐܸܒܲܕ݂ܘ.

¹²ܗܵܠܹܝܢ ܐܝܼܬܲܝܗܘܿܢ ܐܲܝܠܹܝܢ ܕܒܲܢ̈ܝܵܚܵܬ݂ܗܘܿܢ ܟܲܕ݂ ܡܟܲܬܿܡܝܼܢ ܡܸܬ݂ܦܲܪܦܥܝܼܢ (ܗܵܠܹܝܢ ܐܸܢܘܿܢ ܫܘܿܥܹ̈ܐ ܕܒܲܢ̈ܝܵܚܵܬ݂ܗܘܿܢ ܡܸܬ݂ܦܲܪܥܝܼܢ) ܟܲܕ݂ ܕܠܵܐ ܕܸܚܠܬ݂ܵܐ ܢܲܦ̮ܫܗܘܿܢ ܪܵܥܹܝܢ. ܥܢܵܢܹ̈ܐ ܕܠܵܐ ܡܸܛܪܵܐ ܕܡܸܢ ܪ̈ܘܼܚܹܐ ܦܵܗ̈ܝܵܢ. ܐܝܼܠܵܢܹ̈ܐ ܕܐܵܘܦܝܼ ܐܸܒܗܘܿܢ. ܕ(ܘ)ܐܝܼܬܲܝܗܘܿܢ ܕܠܵܐ ܦܹܐܪܹ̈ܐ. ܕܡܝܼܬ݂ܘ ܬܸܢܝܵܢܘܬ݂. ܘܲܣܠܸܩܘ ܡܸܢ ܥܸܩܪ̈ܲܝܗܘܿܢ (ܥܸܩܵܪܗܘܿܢ).

¹³ܓܲܠ̈ܠܹܐ ܥܲܙܝܼܙܹ̈ܐ ܕܝܲܡܵܐ. ܕܲܒ݂ܝܲܕ݂ ܪܘܼܥܬܿܗܘܿܢ ܡܚܵܘܹܝܢ ܒܹܗܬܲܬ݂ܗܘܿܢ. ܟܵܘܟ݁ܒܹ̈ܐ ܡܲܛܥܝܵܢܹ̈ܐ (ܛܵܥܲܝ̈ܵܐ). ܠܗܵܠܹܝܢ ܕܥܲܡܛܵܢܵܐ ܕܚܸܫܘܿܟ݂ܵܐ ܠܥܵܠܲܡ ܠܗܘܿܢ ܢܛܝܼܪ.

¹⁴ܐܸܬ݂ܢܲܒܝܼ ܕܹܝܢ ܐܵܦ ܠܗܵܠܹܝܢ. ܗܵܘ ܕܐܝܼܬ݂ܵܘܗܝ ܕܫܲܒ݂ܥܵܐ ܡܸܢ ܐܵܕ݂ܵܡ ܚܢܘܿܟ݂ ܟܲܕ݂ ܐܵܡܲܪ. ܕܗܵܐ ܡܵܪܝܵܐ ܐܵܬܹܐ ܒܪܸ̈ܒܘܵܬ݂ܵܐ ܕܩܲܕܝܼܫܹ̈ܐ.

¹⁵ܕܢܸܥܒܸܕ݂ ܕܝܼܢܵܐ ܥܲܠ ܟܠ. ܘܲܠܡܲܟܵܣܘ ܠܟ݂ܠ ܢܲܦ̮̈ܫܵܬ݂ܵܐ: ܡܛܠ ܟܠܗܘܿܢ ܥܒ݂ܵܕܹ̈ܐ ܐܲܝܠܹܝܢ (ܪ̈ܲܫܝܥܹܐ) ܕܐܲܪܫܲܥܘ. ܘܡܛܠ ܟܠܗܹܝܢ ܡܸܠܹ̈ܐ ܩܲܫ̈ܝܵܬ݂ܵܐ ܐܲܝܠܹܝܢ ܕܡܲܠܸܠܘ. ܚܲܛܵܝܹ̈ܐ ܪ̈ܲܫܝܼܥܹܐ.

¹⁶ܗܵܠܹܝܢ ܐܸܢܘܿܢ ܕܡܲܪܛܢܝܼܢ ܘܥܵܕ݂ܠܝܼܢ ܒܟ݂ܠ ܨܸܒ݂̈ܘܵܢ (ܨܒ݂ܘܼ): ܟܲܕ݂ ܐܲܝܟ݂ ܪ̈ܓ݂ܝܼܓ݂ܵܬ݂ܵܐ ܕܝܼܠܗܘܿܢ ܡܗܲܠܟ݂ܝܼܢ. ܘܦܘܼܡܗܘܿܢ ܡܡܲܠܸܠ ܓܢܝܼ̈ܚܵܬ݂ܵܐ. ܘܲܡܫܲܒܚܝܼܢ ܠܦܲܪ̈ܨܘܿܦܹܐ ܡܛܠ ܝܘܼܬ݂ܪ̈ܵܢܹܐ.

¹⁷ܐܲܢ̄ܬܿܘܿܢ ܕܹܝܢ ܚܲܒܝܼܒܲܝ̈. ܐܸܬܿܕܲܟ݂ܪܘ ܠܡܸܠܹ̈ܐ ܐܲܝܠܹܝܢ ܕܩܲܕܸܡ ܐܸܬ݂ܐܡܲܪ ܡܸܢ ܫܠܝܼܚܵܘ̈ܗܝ ܕܡܵܪܲܢ ܝܼܫܘܿܥ ܡܫܝܼܚܵܐ.

¹⁸ܕܐܵܡܪܝܼܢ ܗܘܵܘ ܠܟ݂ܘܿܢ. ܕܲܒ݂ܚܲܪܬ݂ܵܐ ܕܙܲܒ݂ܢܹ̈ܐ ܢܸܗܘܘܿܢ ܐܲܝܠܹܝܢ ܕܲܡܒܲܙܚܝܼܢ. ܕܐܲܝܟ݂ ܪ̈ܓ݂ܝܼܓ݂ܵܬ݂ܵܐ ܕܝܼܠܗܘܿܢ ܐܵܙܠ݇ܝܼܢ ܒܵܬܲܪ ܪܘܼܫܥܵܐ.

¹⁹ܗܵܠܹܝܢ ܐܝܼܬܲܝܗܘܿܢ ܐܲܝܠܹܝܢ ܕܲܡܦܲܪܫܝܼܢ. ܢܲܦ̮ܫܵܢܵܝܹ̈ܐ ܕܪܘܼܚܵܐ ܠܲܝܬܿ ܠܗܘܿܢ.

²⁰ܐܲܢ̄ܬܿܘܿܢ ܕܹܝܢ ܚܲܒܝܼܒܲܝ̈. ܒܗܲܝܡܵܢܘܼܬ݂ܵܐ ܕܝܼܠܟ݂ܘܿܢ (ܒܗܲܝܡܵܢܘܼܬ݂ܟ݂ܘܿܢ) ܩܲܕܝܼܫܬܵܐ ܐܸܬ݂ܒܲܢܵܘ ܡܸܢ ܕܪܹܫ ܒܪܘܼܚܵܐ ܩܲܕܝܼܫܵܐ. ܟܲܕ݂ ܡܨܲܠܹܝܢ.

²¹ܢܲܦ̮ܫܲܢ ܕܹܝܢ ܒܚܘܼܒܵܐ ܕܐܲܠܵܗܵܐ ܢܸܛܪ ܟܲܕ݂ ܡܣܲܟܝܢ ܚ̄ܢܲܢ ܠܲܚܢܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܠܚܲܝܹ̈ܐ ܕܝܼܠܲܢ ܕܲܠܥܵܠܲܡ. (ܢܲܦ̮ܫܟ݂ܘܿܢ ܒܚܘܼܒܵܐ ܕܐܲܠܵܗܵܐ ܛܲܪܘ ܟܲܕ݂ ܡܣܲܟܹܝܬܘܿܢ ܠܲܚܢܵܢܹܗ ܕܡܵܪܲܢ ܝܼܫܘܿܥ ܡܫܝܼܚܵܐ. ܠܚܲܝܹ̈ܐ ܕܲܠܥܵܠܲܡ)

²²ܘܲܠܡܸܢܗܘܿܢ ܡܲܢ ܡܸܢ ܢܘܼܪܵܐ ܚܛܘܿܦܘ. (ܠܐ݇ܢܵܫܝܼ̈ܢ ܐܲܟܸܣܘ ܕܐܸܬ݁ܬ݁ܕ݁ܝܢܘ)

²³ܟܲܕ݂ ܕܹܝܢ ܡܸܬ݁ܬ݁ܘܹܝܢ ܐܸܬ݂ܪܲܚܲܡܘ ܥܠܲܝܗܘܿܢ ܒܕ݂ܚܠܬ݂ܵܐ. (ܘܐ݇ܢܵܫܝܼ̈ܢ ܡܸܢ ܢܘܼܪܵܐ ܚܛܘܿܦܘ ܘܦܲܨܵܘ. ܐ݇ܢܵܫ̈ܝܼܢ ܪܲܚܸܡܘ ܥܠܲܝܗܘܿܢ ܒܕܸܚܠܬܵܐ) ܟܲܕ݂ ܣܵܢܹܝܢ ܐ̄ܢܬܘܿܢ ܐܵܦ ܠܟ݂ܘܿܬܿܝܼܢܵܐ ܕܡܸܢ ܒܸܣܪܵܐ ܕܲܡܟܲܬܿܡܵܐ (ܡܟܲܬܲܡ).

²⁴ܠܗܵܘ ܕܹܝܢ ܕܡܸܫܟܲܚ ܕܲܢܢܲܛܲܪ(ܟ݂ܘܿܢ) ܠܲܢ ܕܠܵܐ ܫܘܼܪܥܬ݂ܵܐ ܘܲܕ݂ܠܵܐ ܟܘܬ݂ܡܵܐ. ܘܲܢܩܝܼܡ(ܟ݂ܘܿܢ) ܕܠܵܐ ܡܘܼܡܵܐ:

²⁵ܕܒܲܠܚܘܿܕ݂ܘܗܝ ܐܲܠܵܗܵܐ ܦܵܪܘܿܩܲܢ ܒܝܲܕ݂ ܝܼܫܘܿܥ ܡܫܝܼܚܵܐ ܡܵܪܲܢ. ܩܕ݂ܵܡ ܬܸܫܒܘܿܚܬܹ݁ܗ ܒܚܲܕ݂ܘܼܬ݂ܵܐ. ܠܹܗ ܫܘܼܒ݂ܚܵܐ ܘܐܘܼܚܕܵܢܵܐ ܘܐܝܼܩܵܪܵܐ ܘܪܲܒܘܼܬ݂ܵܐ (ܩܕ݂ܵܡ ܟܠܹܗ ܥܵܠܡܵܐ) ܐܵܦ ܗܵܫܵܐ ܘܲܒ݂ܟ݂ܠܗܘܿܢ ܥܵܠܡܹ̈ܐ. ܐܵܡܹܝܢ.