Read Aramaic Peshita Ruth 2 Bible Online

Ruth 2 - Aramaic Peshita bible

Ruth 2

¹ܘܲܠܢܲܥܡܝܼ ܐܝܼܬ̣ ܗ̄ܘܼܵܐ ܓܲܒ̣ܪܵܐ ܚܲܕܼ ܡܵܘܕܼܥܬ̣ܵܐ: ܡ̣ܢ ܫܲܪܒ̇ܬܹܗ ܕܐܹܠܝܼܡܲܠܟ ܒܲܥܠܵܗ̇: ܓܲܒ̣ܪܵܐ ܝܼܕܼܝܼܥܵܐ: ܘܲܫܡܹܗ ܒܵܥܵܙ.

²ܘܐܸܡܲܪܲܬ̤ ܪܥܘܿܬ̣ ܡܘܼܐܒ̣ܵܝܬܵܐ ܠܢܲܥܡܝܼ ܚܡܵܬ̣ܵܗ̇ ܐܹܙܲܠ ܠܚܲܩܠܵܐ: ܘܐܸܠܩܘܿܛ ܠܩܵܛܵܐ ܒܵܬܲܪ ܦܵܥ̈ܠܹܐ ܡ̣ܢ ܕܐܸܫܟܲܚ ܪ̈ܲܚܡܹܐ ܒܥܲܝܬܵܘ̈ܗܝ. ܘܐܸܡܪܲܬ̤ ܠܵܗ̇ ܚܡܵܬ̣ܵܗ̇ ܙܸܠܝ ܒܪܲܬ̣ܝ.

³ܘܐܸܙܲܠ̄ܬ̤ ܪܥܘܿܬ̣ ܠܡܸܠܩܲܛ ܠܩܵܛܵܐ ܒܬܲܪ ܚܵܨܘܿܕܹ̈ܐ: ܘܐܸܣܬܲܩܒ̇ܠܲܬ̤ ܒܦܵܠܓ̇ܘܼܬ̣ܵܐ ܕܚܲܩܠܹܗ ܕܒ̣ܵܥܵܙ ܒܲܪ ܫܲܪܒ̇ܬܹܗ ܕܐܹܠܝܼܡܲܠܟ.

⁴ܘܗܵܐ ܒܵܥܵܙ ܐܵܬܹܐ ܡ̣ܢ ܒܹܝܬ̣ ܠܚܸܡ: ܘܐܸܡܲܪ ܠܚܵܨܘܿܕܹ̈ܐ ܫܠܵܡܵܐ ܥܲܡܟ̣ܘܿܢ: ܘܐܵܡܪܝܼܢ ܠܹܗ ܡܵܪܝܵܐ ܢܒܲܪܟ̣ܵܟ.

⁵ܘܐܸܡܲܪ ܒܵܥܵܙ ܠܛܲܠܝܵܐ ܕܩܵܐܹܡ ܥܲܠ ܦܵܥ̈ܠܹܐ: ܡܵܐ ܛܸܒܵܗ̇ ܕܲܥܠܲܝܡܬ̣ܵܐ ܗܵܕܹܐ.

⁶ܘܲܥܢܵܐ ܛܲܠܝܵܐ ܘܐܸܡܲܪ ܠܹܗ: ܐܲܢ̄ܬ̇ܬ̣ܵܐ ܗ̄ܝ̣ ܡܘܼܐܵܒ̣ܵܝܬܵܐ: ܗܵܝ̇ ܕܐܸܬ̣ܵܬ̤ ܥܲܡ ܢܲܥܡܝܼ ܡ̣ܢ ܐܲܪܥܵܐ ܕܡܘܼܐܵܒ̣.

⁷ܘܐܵܡܪܵܐ ܐܸܠܩܘܿܛ ܠܩܵܛܵܐ ܒܵܬܲܪ ܦܵܥ̈ܠܹܐ. ܘܠܸܩܛܲܬ̤ ܡ̣ܢ ܨܲܦܪܵܐ ܘܲܥܕܲܡܵܐ ܠܲܢܝܵܚܬܵܐ.

⁸ܘܐܸܡܲܪ ܒܵܥܵܙ ܠܲܪܥܘܿܬ̣: ܒܪܲܬ̣ܝ: ܠܵܐ ܫܡܝܼܥ ܠܹܟ̣ܝ ܒܡܲܬ̣ܵܠܵܐ: ܕܲܒ̣ܚܲܩܠܵܐ ܕܠܵܐ ܕܝܼܠܵܟ ܠܵܐ ܬܸܠܩܘܿܛ: ܡܸܛܠ ܗܵܢܵܐ ܩܵܘܿܝ ܘܒ̣ܘܼܬ̣ܝ ܬܢܵܢ ܥܲܡ ܛܲܠܝܵܬ̣̈ܝ.

⁹ܘܲܗ̤ܘܲܝܬ̇ܝ ܚܵܙܝܵܐ ܐܲܝܟܵܐ ܚܵܨܕܝܼܢ: ܘܲܗ̤ܘܲܝܬ̇ܝ ܐܵܙܵܠ̄ܐ ܒܵܬܲܪܗܘܿܢ: ܗܵܐ ܦܩܕܹܬ̣ ܠܲܛܠܵܝܹ̈ܐ ܕܐ̄ܢܵܫ ܠܵܐ ܢܲܗܪܹܟ̣ܝ. ܘܐܸܢ ܨܵܗ̇ܝܵܐ ܐܲܢ̄ܬ̇ܝ: ܙܸܠܝ ܘܐܸܫܬܵܝ ܡ̣ܢ ܡܵܐܢܹ̈ܐ ܕܡܵܠܹܝܢ ܛܠܵܝܹ̈ܐ.

¹⁰ܘܢܸܦܠܲܬ̤ ܥܲܠ ܐܲܦܹܝ̈ܗ̇ ܐܲܪܥܵܐ ܘܣܸܓ̣ܕܲܬ̣ ܠܹܗ: ܘܐܸܡܪܲܬ̤: ܡܸܛܠ ܕܐܸܫܟ̇ܚܹܬ̣ ܪ̈ܲܚܡܹܐ ܒܥܲܝܢܲܝ̈ܟ ܠܡܸܕܲܥܲܢܝ ܕܐܲܟ̣ܣܢܵܝܬܵܐ ܐ̄ܢܵܐ.

¹¹ܐܵܡܲܪ ܠܵܗ̇ ܒܵܥܵܙ: ܡܸܬ̣ܐܡܵܪܘܼ ܐܸܬ̣ܐܡܲܪ ܠܝܼ ܡܸܕܸܡ ܕܲܥܒܲܕܬ̇ܝ ܥܲܡ ܚܡܵܬܹܟ̣ܝ ܡ̣ܢ ܒܵܬܲܪ ܕܡܝܼܬ̣ ܒܲܥܠܹܟ̣ܝ: ܕܲܫܒܲܩܬ̇ܝ ܐܲܒ̣ܘܼܟ̣ܝ ܘܐܸܡܹܟ̣ܝ ܘܫܲܒ̇ܬܹܟ̣ܝ: ܘܐܸܬܲܝܬ̇ܝ ܠܥܲܡܵܐ ܕܠܵܐ ܝܵܕܼܥܵܐ ܗ̄ܘܲܝܬ̇ܝ ܡ̣ܢ ܐܸܬ̣ܡܵܠܝ ܘܡ̣ܢ ܡܢܵܬ̣ܡܵܠܝ.

¹²ܢܸܦ̱ܪܥܹܟ̣ܝ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܘܢܸܬܸ̇ܠ ܐܲܓ̣ܪܹܟ̣ܝ ܗܵܘ̇ ܕܐ̤ܬܲܝܬ̇ܝ ܠܡܸܣܬܲܬܵܪܘܼ ܬܚܹܝܬ̣ ܟܸܢܦܵܘ̈ܗܝ.

¹³ܘܐܸܡܪܲܬ̤ ܠܹܗ: ܡܸܛܠ ܕܐܸܫܟ̇ܚܹܬ̣ ܪ̈ܲܚܡܹܐ ܒܥܲܝܢܲܝ̈ܟ ܡܵܪܝ: ܘܒܲܝܲܐܬܵܢܝ ܘܲܡܠܲܝܬ̇ ܒܠܸܒܵܗ̇ ܕܐܲܡܬ̣ܵܟ: ܘܐܸܢܵܐ ܐܸܗܘܸܐ ܐܲܝܟ ܚܕܼܵܐ ܡ̣ܢ ܐܲܡ̈ܗܵܬ̣ܵܟ.

¹⁴ܘܐܸܡܲܪ ܠܵܗ̇ ܒܵܥܵܙ ܒܥܸܕܵܢܵܐ ܘܫܵܪܘܼܬ̣ܵܐ: ܩܪܘܿܒ̣ܝ ܘܐܲܟ̣ܘܿܠܝ ܡ̣ܢ ܠܲܚܡܵܐ: ܘܐܵܘܬ̇ܒ̣ܵܗ̇ ܥܲܠ ܓܹܢ̄ܒ̣ ܚܵܨܘܿܕܹ̈ܐ: ܘܝܲܗ̄ܒ̣ ܠܵܗ̇ ܫܲܚܬ̇ܝܼܬ̣ܵܐ: ܘܲܨܒܲܥ ܠܲܚܡܵܐ ܒܚܲܠܒ̣ܵܐ: ܘܐܲܪܡܝܼ ܦܸܬܹ̈ܐ ܕܲܦܪ̈ܝܼܟ̣ܵܬ̣ܵܐ. ܘܝܲܗ̣̄ܒ̣ ܠܵܗ̇: ܘܐܸܟ̣ܠܲܬ̤ ܘܣܸܒ̣ܥܲܬ̤ ܘܐܵܘܬ̇ܪܲܬ̤.

¹⁵ܘܩܵܡܲܬ̤ ܠܡܸܠܩܲܛ: ܘܦܲܩܸܕܼ ܒܵܥܵܙ ܠܥܲܒ̣ܕܵܘ̈ܗܝ: ܘܐܸܡܲܪ: ܬܸܠܩܘܿܛ ܡ̣ܢ ܒܲܝܢܵܬ̣ ܟܲܦܹ̈ܐ ܘܠܵܐ ܬܲܗܪܘܼܢܵܗ̇.

¹⁶ܘܚܲܠܨܘ ܠܵܗ̇ ܐܵܦ ܡ̣ܢ ܒܲܝܢܵܬ̣ ܟܲܦܹ̈ܐ. ܘܫܘܼܒ̣ܩܘܼܗ̇ ܠܵܩܵܛܵܐ: ܘܠܵܐ ܬܲܗܪܘܼܢܵܗ̇.

¹⁷ܘܲܗܘ̤ܵܬ̣ ܠܵܩܵܛܵܐ ܒܚܲܩܠܵܐ ܥܕܲܡܵܐ ܠܪܲܡܫܵܐ: ܘܚܲܒ̇ܛܲܬ̤ ܐܸܢܹܝܢ: ܐܸܫܟ̇ܚܲܬ̤ ܒܗܹܝܢ ܐܲܝܟ ܡܠܸܐ ܟܲܝܠܵܐ ܕܲܣܥܵܪܹ̈ܐ.

¹⁸ܘܫܸܩܠܲܬ̤ ܐܸܢܹܝܢ ܘܥܸܠܲܬ̤ ܠܲܡܕܼܝܼܢ̄ܬܵܐ: ܘܚܵܘܝܲܬ̤ ܠܲܚܡܵܬ̣ܵܗ̇ ܠܩܵܛܵܐ ܕܠܸܩܛܲܬ̤: ܘܝܸܗ̄ܒܲܬ̤ ܠܵܐ ܡ̣ܢ ܗܵܘ̇ ܡܵܐ ܕܠܸܥܣܲܬ̤ ܘܐܵܘܬ̇ܪܲܬ̤.

¹⁹ܘܐܸܡܪܲܬ̤ ܠܵܗ̇ ܚܡܵܬ̣ܵܗ̇: ܐܲܝܟܵܐ ܠܵܩܛܵܐ ܗ̣̄ܘܲܝܬ̇ܝ ܝܵܘܡܵܢܵܐ: ܘܐܲܬܲܪ ܕܲܗ̤ܘܲܝܬ̇ܝ ܢܸܗܘܸܐ ܒܪܝܼܟ: ܘܗܵܘ̇ ܡ̇ܢ ܕܐܸܫܟܲܚܬ̇ܝ ܪ̈ܲܚܡܹܐ ܒܥܲܝܢܵܘ̈ܗܝ. ܘܐܸܫܬܲܥܝܲܬ̤ ܠܲܚܡܵܬ̣ܵܗ̇ ܐܲܝܟܵܐ ܗܘ̤ܵܬ̣: ܘܐܵܡܪܵܐ ܠܵܗ̇: ܒܵܥܵܙ ܫܡܹܗ ܠܓܲܒ̣ܪܵܐ ܕܠܵܩܛܵܐ ܗ̄ܘܹܝܬ̣ ܒܚܲܩܠܹܗ ܝܵܘܡܵܢܵܐ.

²⁰ܘܐܸܡܪܲܬ̤ ܢܲܥܡܝܼ ܠܟܲܠܬ̣ܵܗ̇: ܒܪܝܼܟ ܗ̄ܘ̣ ܡܵܪܝܵܐ ܕܠܵܐ ܐܲܥܒܲܪ ܚܸܣܕܹܗ ܡ̣ܢ ܚܲܝܹ̈ܐ ܘܡ̣ܢ ܡܝܼܬܹ̈ܐ. ܘܐܸܡܪܲܬ̤ ܠܵܗ̇ ܢܲܥܡܝܼ: ܩܲܪܝܼܒܲܢ ܗ̄ܘ̣ ܓܲܒ̣ܪܵܐ: ܘܡ̣ܢ ܬܵܒ̣ܥܝ̈ ܥܝܵܪܬܲܢ ܗ̄ܘ̣.

²¹ܘܐܸܡܪܲܬ̤ ܪܥܘܿܬ̣ ܠܲܚܡܵܬ̣ܵܗ̇: ܘܐܸܡܲܪ ܠܝܼ ܬܘܼܒ̣: ܕܲܕܼܒܲܩܝ ܠܥܲܒ̣̈ܕܲܝ ܥܕܲܡܵܐ ܕܢܸܓ̣ܡܲܪ ܚܨܵܕܼܵܐ ܟܠܹܗ.

²²ܘܐܸܡܪܲܬ̤ ܢܲܥܡܝܼ ܠܲܪܥܘܿܬ̣ ܟܲܠܬ̣ܵܗ̇: ܛܘܼܒܲܝܟ̇ܝ ܒܪܲܬ̣ܝ ܕܲܕܼܒܸܩܬ̇ܝ ܠܲܥܠܲܝ̈ܡܵܬܹܗ: ܘܠܵܐ ܐ̄ܢܵܫ ܐܲܗܪܹܟ̣ܝ ܒܚܲܩܠܵܐ ܕܠܵܐ ܝܼܕܲܥܬ̇ܝ.

²³ܐܸܠܵܐ ܢܩܸܦܬ̇ܝ ܠܐܲܡ̈ܗܵܬܹܗ ܕܒ̣ܵܥܵܙ ܠܡܸܠܩܲܛ: ܥܕܲܡܵܐ ܕܢܸܫܠܲܡ ܚܨܵܕܼܵܐ ܕܲܣܥܵܪܹ̈ܐ ܕܘܲܕܼܚܸܛܹ̈ܐ.