Read Aramaic Peshita 1 Samuel 1 Bible Online

1 Samuel 1 - Aramaic Peshita bible

1 Samuel 1

¹ܘܲܗܘ̤ܵܐ ܓܲܒ̣ܪܵܐ ܡ̣ܢ ܪܵܡܬ̣ܵܐ ܕܕ݂ܵܘܩܹ̈ܐ ܡ̣ܢ ܛܘܼܪܵܐ ܕܐܲܦܪܹܝܡ: ܘܲܫܡܹܗ ܗܲܠܩܵܢܵܐ: ܒܲܪ ܝܲܪܚܘܿܡ: ܒܲܪ ܐܹܠܝܼܗܘܿ: ܒܲܪ ܬܲܚܘܿ: ܒܲܪ ܨܘܿܦ ܐܵܦܪܬ̣ܵܝܵܐ.

²ܘܐܝܼܬ̣ ܗ̄ܘܼ̈ܝܼ ܠܹܗ ܬܲܪܬܹ̇ܝܢ ܢܸܫ̈ܝܼܢ: ܫܡܵܗ̇ ܕ݂ܵܚܕ݂ܵܐ ܚܲܢܵܐ: ܘܲܫܡܵܗ̇ ܕܐܲܚܪܹܬ̣ܵܐ ܦܲܢܵܐ. ܘܲܗܘ̤ܵܘ ܒܦܲܢܢܵܐ ܒ̈ܢܲܝܵܐ: ܘܲܠܚܲܢܵܐ ܠܲܝܬ̇ ܠܵܗ̇ ܒ̈ܢܲܝܵܐ.

³ܘܣܵܠܹܩ ܗ̄ܘܼܵܐ ܓܲܒ̣ܪܵܐ ܗܵܘ̇ ܡ̣ܢ ܩܪܝܼܬܹܗ ܡ̣ܢ ܥܸܕܵܢ ܠܥܸܕܵܢ: ܠܡܸܣܓܲܕ݂ ܘܠܲܡܕܲܒܵܚܘܼ ܠܡܵܪܝܵܐ ܨܒ̣ܵܐܘܼܬ̣ ܒܫܝܼܠܘܿ. ܘܬܲܡܵܢ ܐܝܼܬ̣ ܗ̄ܘܼܵܘ ܬܪܹܝܢ ܒܢܵܘ̈ܗܝ ܕܥܹܠܝܼ: ܚܲܦܢܝܼ ܘܦܝܼܢܚܸܣ ܟܵܗ̈ܢܹܐ ܠܡܵܪܝܵܐ.

⁴ܘܲܗܘ̤ܵܐ ܝܵܘܡܵܐ ܘܕܲܒܲܚ ܗܲܠܩܵܢܵܐ: ܘܝܲܗ̄ܒ̣ ܠܦܲܢܢܵܐ ܐܲܢ̄ܬ̇ܬܹܗ: ܘܲܠܟ݂ܠܗܘܿܢ ܒܢܹ̈ܝܗ̇ ܘܲܒ̣̈ܢܵܬܵܗ̇ ܝܲܗ̄ܒ̣ ܡܢ̈ܵܘܵܬ̣ܵܐ.

⁵ܘܲܠܚܲܢܵܐ ܝܲܗ̄ܒ̣ ܡܢܵܬ̣ܵܐ ܚܕ݂ܵܐ ܐܲܥܦܵܐ: ܡܸܛܠ ܕܲܠܚܲܢܵܐ ܪܵܚܹܡ. ܘܡܵܪܝܵܐ ܐܸܚܲܕ݂ ܪܲܚܡܵܗ̇.

⁶ܘܡܲܪܓ̇ܙܵܐ ܗ̄ܘ̣ܵܬ̣ ܠܵܗ̇ ܥܲܪܬ̣ܵܗ̇ ܐܵܦ ܡܲܪܓܵܙܘ ܡܸܛܠ: ܕܬܲܟ݂ܪܸܐ ܠܵܗ̇: ܡܸܛܠ ܕܐܸܚܲܕ݂ ܡܵܪܝܵܐ ܒܐܲܦܲܝ̈ ܡܲܪܒ̇ܥܵܗ̇.

⁷ܘܗܵܟܲܢܵܐ ܥܵܒ̣ܕܵܐ ܗ̄ܘܼܵܬ̣ ܦܲܢܢܵܐ ܟ̇ܠ ܫܢܵܐ ܒܲܫܢܵܐ: ܒܙܲܒ̣ܢܵܐ ܕܣܵܠܩܵܐ ܗ̄ܘ̣ܵܬ̣ ܠܒܲܝܬܹ̇ܗ ܕܡܵܪܝܵܐ: ܗܵܟܲܢܵܐ ܡܲܪܓ̇ܙܵܐ ܗ̄ܘ̣ܵܬ̣ ܠܵܗ̇: ܘܲܒ̣ܟ݂ܵܬ̤ ܚܢܵܐ ܘܠܵܐ ܠܸܥܣܲܬ̤.

⁸ܘܐܸܡܲܪ ܠܵܗ̇ ܗܲܠܩܵܢܵܐ ܒܲܥܠܵܗ̇: ܚܲܢܵܐ ܠܡܵܢܵܐ ܒܵܟ݂ܝܵܐ ܐܲܢ̄ܬ̇ܝ: ܘܐܲܝܟܵܘ ܠܵܐ ܠܵܥܣܲܬ̇ܝ: ܘܲܠܡܵܢܵܐ ܒܝܼܫ ܠܸܒܹ̇ܟ݂ܝ: ܗܵܐ ܐܸܢܵܐ ܛܵܒ̣ ܐ̄ܢܵܐ ܠܹܟ݂ܝ ܡ̣ܢ ܥܸܣܪܵܐ ܒܢ̈ܝܼܢ.

⁹ܘܩܵܡܲܬ̤ ܚܲܢܵܐ ܡ̣ܢ ܒܵܬܲܪ ܕܠܸܥܣܲܬ̤ ܒܫܝܼܠܘܿ: ܘܡ̣ܢ ܒܵܬܲܪ ܕܐܸܫܬ̇ܝܲܬ̤. ܘܥܹܠܝܼ ܟܵܗܢܵܐ ܝܵܬܹܒ̣ ܗ̄ܘ̣ܵܐ ܥܲܠ ܟܘܼܪܣܝܵܐ ܥܲܠ ܐܸܣܟ̇ܘܼܦܬ̣ܵܐ ܕܗܲܝܟ̇ܠܹܗ ܕܡܵܪܝܵܐ.

¹⁰ܘܕ݂ܝܼܠܵܗ̇ ܡܲܪܝܼܪܵܐ ܢܲܦ̮ܫܵܗ̇: ܘܲܡܨܲܠܝܵܐ ܗ̄ܘ̣ܵܬ̣ ܩܕ݂ܵܡ ܡܵܪܝܵܐ: ܘܡܸܒ̣ܟ݂ܵܐ ܒܵܟ݂ܝܵܐ ܗ̄ܘ̣ܵܬ̣.

¹¹ܘܢܸܕ݂ܪܵܐ: ܘܐܸܡܪܲܬ̤: ܡܵܪܝܵܐ ܨܒ̣ܵܐܘܼܬ̣: ܐܸܢ ܡܸܚܙܵܐ ܬܸܚܙܹܐ ܒܫܘܼܥܒܵܕ݂ܵܗ̇ ܕܐܲܡܬ̣ܵܟ݂: ܘܬܸܬ̇ܕܲܟ݂ܪܲܝܢܝ ܘܠܵܐ ܬܸܛܥܸܐ ܠܐܲܡܬ̣ܵܟ݂: ܘܬܸܬܸ̇ܠ ܠܐܲܡܬ̣ܵܟ݂ ܙܲܪܥܵܐ ܕܐ̄ܢܵܫܵܐ: ܐܸܬ̇ܠܝܼܘܗܝ ܠܡܵܪܝܵܐ ܟܠ ܝܵܘ̈ܡܲܝ ܚܲܝܵܘ̈ܗܝ: ܘܲܡܕܲܟ̇ܝܵܐ ܢܸܣܲܩ ܥܲܠ ܪܹܫܹܗ.

¹²ܘܲܗܘ̤ܵܐ ܕܟܲܕ݂ ܐܲܣܓ̇ܝܲܬ̤ ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ: ܘܥܹܠܝܼ ܢܵܛܲܪ ܗ̄ܘ̣ܵܐ ܠܦܘܼܡܵܗ̇.

¹³ܘܚܲܢܵܐ ܒܠܸܒܵܗ̇ ܗ̄ܘ̣ ܡܡܲܠܠܵܐ ܗ̄ܘ̣ܵܬ̣ ܒܲܠܚܘܿܕ݂: ܘܣܸܦ̈ܘܵܬ̣ܵܗ̇ ܗ̄ܘ̣ ܙܵܝ̈ܥܵܢ ܗ̄ܘܲܝ̈: ܘܩܵܠܵܗ̇ ܠܵܐ ܡܸܫܬ̇ܡܲܥ ܗ̄ܘ̣ܵܐ. ܘܚܲܫܒܵܗ̇ ܥܹܠܝܼ ܐܲܝܟ݂ ܪܲܘܝܵܐ.

¹⁴ܘܐܸܡܲܪ ܠܵܗ̇ ܥܹܠܝܼ: ܥܕܲܡܵܐ ܠܐܸܡܲܬ̣ܝ ܡܸܬ̣ܪܵܘܝܵܐ ܐܲܢ̄ܬ̇ܝ: ܐܲܦܝܼܓ̇ܝ ܚܲܡܪܹܟ݂ܝ ܡܸܢـܹܟ݂ܝ.

¹⁵ܥܢܵܬ̤ ܚܲܢܵܐ ܘܐܸܡܪܲܬ̤ ܠܹܗ: ܠܵܐ ܡܵܪܝ: ܐܲܢ̄ܬ̇ܬ̣ܵܐ ܐ̄ܢܵܐ ܥܲܚܩܲܬ̣ ܪܘܼܚܵܐ: ܘܚܲܡܪܵܐ ܘܫܲܟ݂ܪܵܐ ܠܵܐ ܐܸܫܬ̇ܝܼܬ̣: ܘܐܸܫܕܹܬ̣ ܢܲܦ̮ܫܝ ܩܕ݂ܵܡ ܡܵܪܝܵܐ.

¹⁶ܠܵܐ ܬܸܚܫܒ̣ܝܼܗ̇ ܠܐܲܡܬ̣ܵܟ݂ ܩܕ݂ܵܡܲܝܟ ܒܲܪܬ̣ ܚܛܵܗܵܐ: ܡܸܛܠ ܕܡ̣ܢ ܣܘܿܓ̣ܵܐܐ ܗ̄ܘ̣ ܕܥܵܩܲܬ̣ܝ ܘܲܕ݂ܪܘܼܓ̣ܙܝ ܡܲܠܠܹܬ̣ ܥܕܲܡܵܐ ܠܗܵܫܵܐ.

¹⁷ܘܲܥܢܵܐ ܥܿܠܝܼ ܘܐܸܡܲܪ ܠܵܗ̇: ܙܸܠܝ ܒܲܫܠܵܡܵܐ: ܘܐܵܠܵܗܵܐ ܕܝܼܣܪܵܝܹܠ ܢܸܬܸ̇ܠ ܠܹܟ݂ܝ ܫܸܐܠܬܹܟ݂ܝ ܕܲܫܐܸܠܬ̇ܝ ܡܸܢܹܗ.

¹⁸ܘܐܸܡܪܲܬ̤ ܬܸܫܟܲܚ ܐܲܡܬ̣ܵܟ݂ ܪ̈ܲܚܡܹܐ ܒܥܲܝܢܲܝ̈ܟ. ܘܐܸܙܲܠ̄ܬ̤ ܐܲܢ̄ܬ̇ܬ̣ܵܐ ܠܐܘܼܪܚܵܗ̇: ܘܐܲܦܹ̈ܝܗ̇ ܠܵܐ ܙܵܥ ܠܵܗ̇ ܬܘܼܒ̣.

¹⁹ܘܩܲܕܸܡܘܼ ܒܨܲܦܪܵܐ ܘܲܣܓܸܕ݂ܘ ܩܕ݂ܵܡ ܡܵܪܝܵܐ: ܘܲܗܦܲܟ݂ܘ ܘܐܸܙܲܠܘ ܠܒܲܝܬ̇ܗܘܿܢ ܠܪܵܡܬ̣ܵܐ. ܘܲܚܟܲܡ ܗܲܠܩܵܢܵܐ ܠܚܲܢܵܐ ܐܲܢ̄ܬ̇ܬܹܗ: ܘܐܸܬ̇ܕܲܟ݂ܪܵܗ̇ ܡܵܪܝܵܐ.

²⁰ܘܲܗܘ̤ܵܐ ܠܙܲܒ̣ܢܵܐ ܕܝܵܘ̈ܡܵܬ̣ܵܐ: ܘܒܸܛܢܲܬ̤ ܚܲܢܵܐ ܘܝܸܠܕܲܬ̤ ܒܪܵܐ: ܘܲܩܪܵܬ̤ ܫܡܹܗ ܫܡܘܼܐܹܝܠ: ܡܸܛܠ ܕܡ̣ܢ ܡܵܪܝܵܐ ܫܐܸܠܬܹܗ.

²¹ܘܲܣܠܸܩ ܓܲܒ̣ܪܵܐ ܗܲܠܩܵܢܵܐ ܘܟ݂ܠܹܗ ܒܲܝܬܹܗ: ܠܲܡܕܲܒܵܚܘܼ ܠܡܵܪܝܵܐ ܕܸܒ̣ܚܹ̈ܐ ܕܝܵܘ̈ܡܵܬ̣ܵܐ ܕܢܸܕ݂ܪܹܗ.

²²ܘܚܲܢܵܐ ܠܵܐ ܣܸܠܩܲܬ̤: ܡܸܛܠ ܕܐܸܡܪܲܬ̤ ܠܒܲܥܠܵܗ̇: ܥܕܲܡܵܐ ܕܢܸܬ̣ܚ̄ܣܹܠ ܛܲܠܝܵܐ: ܘܐܲܝܬܹܝܘܗܝ ܘܢܸܬ̣ܚ̄ܙܸܐ ܩܕ݂ܵܡ ܡܵܪܝܵܐ: ܘܢܸܬܸܒ̣ ܬܲܡܵܢ ܠܥܵܠܲܡ.

²³ܘܐܸܡܲܪ ܠܵܗ̇ ܗܲܠܩܵܢܵܐ ܒܲܥܠܵܗ̇: ܥܒܸܕ݂ܝ ܐܲܝܟ݂ ܕܫܲܦܝܼܪ ܒܥܲܝܢܲܝ̈ܟ̇ܝ: ܬܸܒ̣ܝ ܥܕܲܡܵܐ ܕܬܸܚܣ̄ܠܝܼܢܹܗ: ܒܪܲܡ ܢܲܫܲܪ ܡܵܪܝܵܐ ܡܸܠܬܹܟ݂ܝ. ܘܝܼܬ̣ܒܲܬ̤ ܐܲܢ̄ܬ̇ܬ̣ܵܐ ܐܲܝܢܩܲܬ̤ ܒܪܵܗ̇ ܥܕܲܡܵܐ ܕܲܚܣܲܠܬܹܗ.

²⁴ܘܐܲܣܸܩܬܹܗ ܥܲܡܵܗ̇ ܟܲܕ݂ ܚܣܲܠܬܹܗ ܒܬ̣ܵܘܪܵܐ ܬܘܼܠܬܵܐ: ܘܣܲܐܬ̣ܵܐ ܚܕ݂ܵܐ ܕܩܲܡܚܵܐ: ܘܲܓ̣ܪܵܒ̣ܵܐ ܚܲܕ݂ ܕܚܲܡܪܵܐ. ܘܐܲܝܬ̇ܝܵܬܹܗ ܠܒܲܝܬܹܗ ܕܡܵܪܝܵܐ ܠܫܝܼܠܘܿ. ܘܛܲܠܝܵܐ ܛܠܸܐ ܗ̄ܘ̣ܵܐ.

²⁵ܘܲܢܟܲܣܘ ܬܵܘܪܵܐ: ܘܐܲܝܬ̇ܝܘܼ ܠܛܲܠܝܵܐ ܠܥܹܠܝܼ.

²⁶ܘܐܸܡܪܲܬ̤ ܚܲܢܵܐ ܠܥܹܠܝܼ: ܒܵܥܝܵܐ ܐ̄ܢܵܐ ܡܸܢܵܟ݂ ܡܵܪܝ: ܚܲܢܵܐ ܗ̄ܝܼ ܢܲܦ̮ܫܵܟ݂ ܡܵܪܝ: ܐܸܢܵܐ ܗ̄ܝ̇ ܐܲܢ̄ܬ̇ܬ̣ܵܐ ܕܩܵܝܡܵܐ ܗ̄ܘܹܝܬ̣ ܥܲܡܵܟ݂ ܗܵܪܟܵܐ: ܠܲܡܨܲܠܵܝܘܼ ܩܕ݂ܵܡ ܡܵܪܝܵܐ ܥܲܠ ܛܲܠܝܵܐ ܗܵܢܵܐ.

²⁷ܘܨܲܠܝܼܬ̣ ܘܝܲܗ̄ܒ̣ ܠܝܼ ܡܵܪܝܵܐ ܫܸܐܠܲܬ̣ܝ ܕܫܸܐܵܠܹܬ̣ ܡܸܢܹܗ.

²⁸ܘܐܵܦ ܬܸܢܵܐ ܐܲܫܐܸܠܬܹܗ ܠܡܵܪܝܵܐ: ܟܠܗܘܿܢ ܝܵܘ̈ܡܵܬ̣ܵܐ ܕܗ̤ܘ ܚܲܝ: ܕܲܫܐܝܼܠ ܠܝܼ ܡ̣ܢ ܡܵܪܝܵܐ. ܘܲܣܓܸܕ݂ܘ ܬܲܡܵܢ ܠܡܵܪܝܵܐ.