Read Aramaic Peshita 1 Samuel 11 Bible Online

1 Samuel 11 - Aramaic Peshita bible

1 Samuel 11

¹ܘܲܣܠܸܩ ܢܵܚܵܫ ܥܲܡܘܿܢܵܝܵܐ: ܘܲܫܪܵܐ ܥܲܠ ܠܟ݂ܝܼܫ ܕܓܸܠܥܵܕ݂. ܘܐܸܡܲܪܘ ܟܠܗܘܿܢ ܐ̄ܢܵܫܵܐ ܕܲܠܟ݂ܝܼܫ ܠܢܵܚܵܫ: ܐܲܩܝܼܡ ܠܲܢ ܩܝܵܡܵܐ ܘܢܸܦ̱ܠܚܵܟ݂.

²ܘܐܸܡܲܪ ܠܗܘܿܢ ܢܵܚܵܫ ܥܲܡܘܿܢܵܝܵܐ: ܒܗܵܕܹܐ ܐܲܩܝܼܡ ܠܟ݂ܘܿܢ ܩܝܵܡܵܐ: ܡܵܐ ܕܥܵܘܲܪܬ̇ܘܿܢ ܟܠ ܥܲܝ̱ܢܟ݂ܘܿܢ ܕܝܲܡܝܼܢܵܐ. ܘܐܸܥܒ̇ܕ݂ܝܼܘܗܝ ܚܸܣܕܵܐ ܥܲܠ ܟܠܹܗ ܝܼܣܪܵܝܹܠ.

³ܘܐܸܡܲܪܘ ܠܹܗ ܣܵܒܹ̈ܐ ܕܲܠܟ݂ܝܼܫ: ܐܲܪܦܵܐ ܠܲܢ ܫܲܒ̣ܥܵܐ ܝܵܘ̈ܡܝܼܢ ܘܲܢܫܲܕܲܪ ܐܝܼܙ̈ܓܲܕܹܐ ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ: ܘܢܸܚܙܸܐ ܐܸܢ ܐܝܼܬ̣ ܠܲܢ ܦܵܪܘܿܩܵܐ. ܘܐܸܢ ܠܵܐ: ܗܵܝܕܹܝܢ ܢܸܦܘܿܩ ܠܘܵܬ̣ܵܟ݂.

⁴ܘܐܸܬ̣ܵܘ ܐܝܼܙ̈ܓܲܕܹܐ ܠܪܵܡܬ̣ܵܐ ܕܫܵܐܘܿܠ: ܘܡܲܠܸܠܘ ܡܸܠܹ̈ܐ ܗܵܠܹܝܢ ܩܕ݂ܵܡ ܥܲܡܵܐ: ܘܐܲܪܝܼܡܘ ܟܠܹܗ ܥܲܡܵܐ ܩܵܠܗܘܿܢ ܘܲܒ̣ܟ݂ܵܘ.

⁵ܘܗܵܐ ܫܵܐܘܿܠ ܐܵܬܹܐ ܒܵܬܲܪ ܬܵܘܪܹ̈ܐ ܡ̣ܢ ܚܲܩܠܵܐ. ܘܐܸܡܲܪ ܫܵܐܘܿܠ: ܡܵܐ ܠܹܗ ܠܥܲܡܵܐ ܕ݂ܒ݂ܵܟܹܝܢ. ܘܐܸܫܬܲܥܘ ܠܹܗ ܡܠܹ̈ܐ ܕܐ̄ܢܵܫܲܝ̈ ܠܟ݂ܝܼܫ.

⁶ܘܐܲܨܠܚܲܬ̤ ܪܘܼܚܹܗ ܕܐܲܠܵܗܵܐ ܥܲܠ ܫܵܐܘܿܠ: ܟܲܕ݂ ܫܡܲܥ ܡܸܠܹ̈ܐ ܗܵܠܹܝܢ: ܘܐܸܬ̣ܚܲܡܲܬ̣ ܪܘܼܓ̣ܙܹܗ ܛܵܒ̣.

⁷ܘܢܲܣܒ̣ܵܗ̇ ܠܦܲܕܵܢܵܐ ܕܬ̣ܵܘܪܹ̈ܐ: ܘܦܲܫܲܚ ܐܸܢܘܿܢ. ܘܫܲܕܲܪ ܒܟ݂ܠܹܗ ܬܚܘܼܡܵܐ ܕܝܼܣܪܵܝܹܠ ܒܝܲܕ݂ ܐܝܼܙܓ̣̈ܕܹܐ ܠܡܹܐܡܲܪ: ܟܠ ܕܠܵܐ ܢܵܦܹܩ ܒܵܬܲܪ ܫܵܐܘܿܠ ܘܒ̣ܵܬܲܪ ܫܡܘܼܐܹܝܠ: ܗܵܟܲܢܵܐ ܢܸܬ̣ܥ̱ܒܸܕ݂ ܠܬ̣ܵܘܪ̈ܵܘܗܝ. ܘܢܸܦܠܲܬ̣ ܕܸܚ̱ܠܬܹܗ ܕܐܲܠܵܗܵܐ ܥܲܠ ܥܲܡܵܐ: ܘܲܢܦܲܩܘ ܟܠܗܘܿܢ ܐܲܝܟ݂ ܓܲܒ̣ܪܵܐ ܚܲܕ݂.

⁸ܘܲܡܢܵܐ ܐܸܢܘܿܢ ܒܒ̣ܵܙܵܩ: ܘܲܗܘ̤ܵܘ ܒ̈ܢܲܝ ܝܼܣܪܵܝܹܠ ܬܠܵܬ̣ܡܵܐܐ ܐܲܠܦ̈ܝܼܢ: ܘܓܲܒ̣ܪܹ̈ܐ ܕܲܝܗܘܼܕ݂ܵܐ ܬܠܵܬ̣ܝܼܢ ܐܲܠܦ̈ܝܼܢ.

⁹ܘܐܸܡܲܪ ܠܐܝܼܙ̈ܓܲܕܹܐ ܕܐܸܬ̣ܵܘ ܡ̣ܢ ܠܟ݂ܝܼܫ ܐܸܡܲܪܘ ܠܓܲܒ̣ܪܹ̈ܐ ܕܲܠܟ݂ܝܼܫ ܘܲܕ݂ܓܸܠܥܵܕ݂: ܡܚܵܪ ܢܸܗܘܸܐ ܠܟ݂ܘܿܢ ܦܘܼܪܩܵܢܵܐ ܡܵܐ ܕܚܲܡ ܫܸܡܫܵܐ. ܘܐܸܬ̣ܵܘ ܐܝܼܙ̈ܓܲܕܹܐ ܘܚܵܘܝܼܘ ܠܐ̄ܢܵܫܲܝ̈ ܠܟ݂ܝܼܫ: ܘܲܚܕ݂ܝܼܘ.

¹⁰ܘܐܸܡܲܪܘ ܐ̄ܢܵܫܲܝ̈ ܠܟ݂ܝܼܫ: ܡܚܵܪ ܢܸܦܘܿܩ ܠܘܵܬ̣ܟ݂ܘܿܢ: ܘܬܸܥܒ̇ܕ݂ܘܼܢ ܠܲܢ ܟܠ ܕܫܲܦܝܼܪ ܒܥܲܝܢܲܝ̈ܟ̇ܘܿܢ.

¹¹ܘܲܗܘ̤ܵܐ ܠܝܵܘܡܵܐ ܕܒܟܵܬ̣ܪܹܗ: ܘܦܲܠܸܓ̣ ܫܵܐܘܿܠ ܠܥܲܡܵܐ ܠܲܬ̣ܠܵܬ̣ܵܐ ܪܹ̈ܫܝܼܢ. ܘܥܲܠܘ ܒܓ̣ܵܘ ܡܲܫܪܝܼܬ̣ܵܐ ܒܡܲܛܲܪܬܐ ܕܨܲܦܪܵܐ: ܘܲܚܪܲܒ̣ܘ ܠܲܒ̣̈ܢܲܝ ܥܲܡܘܿܢ ܥܕܲܡܵܐ ܕܚܲܡ ܝܵܘܡܵܐ. ܘܕܐܸܫܬ̇ܚܲܪܘ ܐܸܬ̣ܒܲܕ݂ܪܘ: ܘܠܵܐ ܐܸܫܬ̇ܟܲܚܘ ܒܗܘܿܢ ܬܪܹܝܢ ܐܲܟ݂ܚ̄ܕ݂ܵܐ.

¹²ܘܐܸܡܲܪܘ ܥܲܡܵܐ ܠܲܫܡܘܼܐܹܝܠ: ܡܲܢܘܼ ܐܸܡܲܪ ܕܫܵܐܘܿܠ ܠܵܐ ܢܲܡܠܸܟ݂ ܥܠܲܝܢ: ܗܲܒ̣ ܠܲܢ ܓܲܒ̣ܪܹ̈ܐ ܢܡܝܼܬ̣ ܐܸܢܘܿܢ.

¹³ܘܐܸܡܲܪ ܫܵܐܘܿܠ: ܠܵܐ ܢܸܬ̣ܩܛܸܠ ܓܒܲܪ ܒܝܵܘܡܵܐ ܗܵܢܵܐ: ܡܸܛܠ ܕܝܵܘܡܵܢܵܐ ܥܒܲܕ݂ ܡܵܪܝܵܐ ܦܘܼܪܩܵܢܵܐ ܠܝܼܣܪܵܝܹܠ.

¹⁴ܘܐܸܡܲܪ ܫܡܘܼܐܹܝܠ ܠܥܲܡܵܐ: ܬܵܘ ܢܹܐܙܲܠ ܠܓܲܠܓܵܠܵܐ: ܘܲܢܚܲܕܸܬ̣ ܬܲܡܵܢ ܡܲܠܟ̇ܘܼܬ̣ܵܐ.

¹⁵ܘܐܸܙܲܠ ܟܠܹܗ ܥܲܡܵܐ ܠܓܲܠܓܵܠܵܐ: ܘܐܲܡܠܟ݂ܘ ܬܲܡܵܢ ܠܫܵܐܘܿܠ ܩܕ݂ܵܡ ܡܵܪܝܵܐ ܒܓܲܠܓܵܠܵܐ: ܘܕܲܒܲܚܘ ܬܲܡܵܢ ܕܸܒ̣ܚܹ̈ܐ ܫܲܠܡܹ̈ܐ ܩܕ݂ܵܡ ܡܵܪܝܵܐ: ܘܲܚܕ݂ܝܘ ܬܲܡܵܢ ܫܵܐܘܿܠ ܘܟ݂ܠܗܘܿܢ ܐ̄ܢܵܫܵܐ ܕܝܼܣܪܵܝܹܠ ܛܵܒ̣.