Read Aramaic Peshita 1 Samuel 12 Bible Online

1 Samuel 12 - Aramaic Peshita bible

1 Samuel 12

¹ܘܐܸܡܲܪ ܫܡܘܼܐܹܝܠ ܠܟ݂ܠܹܗ ܝܼܣܪܵܝܹܠ: ܗܵܐ ܫܸܡ̇ܥܹܬ̣ ܒܩܵܠܟ݂ܘܿܢ ܟܠ ܕܐܸܡܲܪܬ̇ܘܿܢ ܠܝܼ: ܘܐܲܡ̱ܠܟܹ̇ܬ̣ ܥܠܲܝܟ̇ܘܿܢ ܡܲܠܟܵܐ.

²ܘܗܵܫܵܐ ܗܵܐ ܡܲܠܟܵܐ ܩܕ݂ܵܡܲܝܟ̇ܘܿܢ. ܘܐܸܢܵܐ ܣܸܐܒܹ̇ܬ̣ ܘܩܸܫܹܬ̣: ܘܲܒ̣̈ܢܲܝ ܗܵܐ. ܥܲܡܟ݂ܘܿܢ. ܘܐܸܢܵܐ ܗܲܠܟܹ̇ܬ̣ ܩܕ݂ܵܡܲܝܟ̇ܘܿܢ: ܡ̣ܢ ܛܲܠܝܘܼܬ̣ܝ ܘܲܥܕܲܡܵܐ ܠܝܵܘܡܵܢܵܐ.

³ܗܵܐ ܩܵܐܹܡ ܐ̄ܢܵܐ ܩܕ݂ܵܡܲܝܟ̇ܘܿܢ. ܣܲܗܸܕܘ ܒܝܼ ܩܕ݂ܵܡ ܡܵܪܝܵܐ ܘܲܩܕ݂ܵܡ ܡܫܝܼܚܹܗ: ܬܵܘܪܵܐ ܕܡ̇ܢ ܕܸܒ̣ܪܹܬ̣: ܘܲܚܡܵܪܵܐ ܕܡ̇ܢ ܕܸܒܪܹܬ̣: ܐܵܘ ܠܡ̇ܢ ܛܸܠܡܹܬ̣: ܐܵܘ ܠܡ̇ܢ ܐܲܠܨܹܬ̣: ܐܵܘ ܡ̣ܢ ܐܝܼܕ݂ܵܐ ܕܡ̇ܢ ܢܸܣܒܹ̇ܬ̣ ܫܘܼܚܕܵܐ ܘܐܲܨܕܹܬ̣ ܥܲܝ̈ܢܲܝ ܒܹܗ: ܘܐܸܡܲܪܘ ܠܝܼ ܘܐܸܢܵܐ ܐܸܦܪܘܿܥܟ݂ܘܿܢ.

⁴ܐܵܡܪܝܼܢ ܠܹܗ: ܠܵܐ ܛܠܲܡܬܵܢ: ܘܠܵܐ ܐܲܠܲܨܬܵܢ: ܘܠܵܐ ܡ̣ܢ ܐ̄ܢܵܫ ܡܸܢܲܢ ܡܸܕܸܡ.

⁵ܐܵܡܲܪ ܠܗܘܿܢ ܣܵܗܸܕ݂ ܒܟ݂ܘܿܢ ܐܲܠܵܗܵܐ: ܘܣܵܗܸܕ݂ ܒܟ݂ܘܿܢ ܡܫܝܼܚܹܗ ܝܵܘܡܵܢܵܐ: ܕܠܵܐ ܐܸܫܟܲܚܬ̇ܘܿܢ ܒܐܝܼ̈ܕܲܝ ܡܸܕܸܡ. ܘܐܵܡܪܝܼܢ ܣܵܗܹܕ݂.

⁶ܘܐܸܡܲܪ ܫܡܘܼܐܹܝܠ ܠܥܲܡܵܐ: ܡܵܪܝܵܐ ܗ̄ܘ̣ ܒܲܠܚܘܿܕ݂ ܐܲܠܵܗܵܐ: ܕܲܥܒܲܕ݂ ܠܡܘܼܫܹܐ ܘܠܐܲܗܪܘܿܢ: ܘܐܲܣܸܩ ܠܐܲܒ̣ܵـ̈ܗܵܬ̣ܲܢ ܡ̣ܢ ܐܲܪܥܵܐ ܕܡܸܨܪܹܝܢ.

⁷ܩܘܼܡܘ ܗܵܫܵܐ ܘܐܹܕܘܼܢܟ݂ܘܿܢ ܩܕ݂ܵܡ ܡܵܪܝܵܐ: ܒܟ݂ܠܵܗ̇ ܙܲܕܝܼܩܘܼܬܹܗ ܕܲܥܒܲܕ݂ ܥܲܡܟ݂ܘܿܢ ܘܥܲܡ ܐܲܒ̣ܵܗܲܝ̈ܟ̇ܘܿܢ.

⁸ܟܲܕ݂ ܥܲܠ ܝܲܥܩܘܿܒ̣ ܠܡܸܨܪܹܝܢ: ܘܨܲܠܝܼܘ ܐܲܒ̣ܵܗܲܝ̈ܟ̇ܘܿܢ ܩܕ݂ܵܡ ܡܵܪܝܵܐ. ܘܫܲܕܲܪ ܡܵܪܝܵܐ ܠܡܘܼܫܹܐ ܘܠܲܐܗܪܘܿܢ: ܘܐܲܣܸܩ ܠܐܲܒ̣ܗܲܝ̈ܟ̇ܘܿܢ ܡ̣ܢ ܐܲܪܥܑܵܐ ܕܡܸܨܪܹܝܢ: ܘܐܵܘܬܸܒ̣ ܐܸܢܘܿܢ ܒܐܲܬ̣ܪܵܐ ܗܵܢܵܐ.

⁹ܘܲܛܥܵܘ ܠܡܵܪܝܵܐ ܐܲܠܵܗܗܘܿܢ. ܘܐܲܫܠܸܡ ܐܸܢܘܿܢ ܒܐܝܼܕ݂ܵܐ ܕܣܝܼܣܪܵܐ ܪܲܒ ܚܲܝܠܵܐ ܕܚܵܨܘܿܪ: ܘܒ̣ܐܝܼܕ݂ܵܐ ܕܲܦܠܸܫ̈ܬܵܝܹܐ: ܘܒ̣ܐܝܼܕ݂ܵܐ ܕܡܲܠܟܵܐ ܕܡܘܼܐܵܒ̣. ܘܐܸܬ̣ܟܲܬ̇ܫܘ ܥܲܡܗܘܿܢ.

¹⁰ܘܨܲܠܝܼܘ ܩܕ݂ܵܡ ܡܵܪܝܵܐ: ܘܐܸܡܲܪܘ: ܚܸܛܲܝܢ ܥܲܠ ܕܲܫܒܲܩ̄ܢ ܠܡܵܪܝܵܐ ܐܲܠܵܗܲܢ: ܘܲܦܠܲܚ̄ܢ ܠܒܲܥܠܵܐ ܘܲܠܓܸܢ̈ܝܵܬ̣ܵܐ: ܗܵܫܵܐ ܦܲܨܵܢ ܡ̣ܢ ܐܝܼܕ݂ܵܐ ܕܲܒ̣ܥܸܠܕܒ̣ܵܒܲܝ̈ܢ: ܘܢܸܦ̱ܠܚܵܟ݂.

¹¹ܘܫܲܕܲܪ ܡܵܪܝܵܐ ܠܲܕ݂ܒ̣ܘܿܪܵܐ: ܘܲܠܒ̣ܵܪܵܩ: ܘܲܠܓܕ݂ܥܘܿܢ ܘܲܠܢܲܦ̮ܬܲܚ: ܘܲܠܫܡܫܘܿܢ: ܘܦܲܨܝܼܟ݂ܘܿܢ ܡ̣ܢ ܐܝܼܕ݂ܵܐ ܕܲܒ̣ܥܸܠܕܒ̣ܵܒܲܝ̈ܟ̇ܘܿܢ ܕܡ̣ܢ ܚܕ݂ܵܪܲܝܟ̇ܘܿܢ: ܘܝܼܬܸܒ̣ܬ̇ܘܿܢ ܒܫܸܠܝܵܐ.

¹²ܘܲܚܙܲܝܬ̇ܘܿܢ ܠܢܵܚܵܫ ܡܲܠܟܵܐ ܕܲܒ̣̈ܢܲܝ ܥܲܡܘܿܢ: ܕܐܸܬ̣ܵܐ ܥܠܲܝܟ̇ܘܿܢ: ܘܐܸܡܲܪܬ̇ܘܿܢ ܠܵܐ ܗܵܟܲܢܵܐ: ܐܸܠܵܐ ܡܲܠܟܵܐ ܥܠܲܝܢ: ܘܡܵܪܝܵܐ ܐܲܠܵܗܟ݂ܘܿܢ ܡܲܠܟ̇ܟ݂ܘܿܢ.

¹³ܘܗܵܫܵܐ ܗܵܐ ܡܲܠܟܵܐ ܕܲܓ̣ܒܲܝܬ̇ܘܿܢ ܘܲܫܐܸܠܸܬ̇ܘܿܢ: ܗܵܐ ܝܲܗ̄ܒ̣ ܠܟ݂ܘܿܢ ܡܵܪܝܵܐ ܡܲܠܟܵܐ.

¹⁴ܘܐܸܢ ܬܸܕ݂ܚ̄ܠܘܼܢ ܡ̣ܢ ܡܵܪܝܵܐ ܘܐܸܦ̱ܠܚܘܼܢܹܗ: ܘܬܸܫ̱ܡܥܘܿܢ ܒܩܵܠܹܗ ܘܠܵܐ ܬܡܲܪ̱ܡܪܘܼܢܹܗ: ܬܸܗܘܘܿܢ ܐܵܦ ܐܲܢ̄ܬ̇ܘܿܢ ܐܵܦ ܡܲܠܟ̇ܟ݂ܘܿܢ ܕܐܲܡܠܸܟ݂ ܥܠܲܝܟ̇ܘܿܢ: ܒܵܬܲܪ ܡܵܪܝܑܵ ܐܲܠܵܗܟ݂ܘܿܢ.

¹⁵ܘܐܸܢ ܠܵܐ ܬܸܫܡܥܘܼܢ ܒܩܵܠܹܗ ܕܡܵܪܝܵܐ ܐܲܠܵܗܟ݂ܘܿܢ: ܘܬ̣ܡܲܪ̱ܡܪܘܼܢܹܗ: ܬܸܗܘܸܐ ܐܝܼܕܹܗ ܕܡܵܪܝܵܐ ܒܟ݂ܘܿܢ ܐܲܝܟ݂ ܕܲܗܘ̤ܵܬ̣ ܒܐܲܒ̣ܵܗܲܝ̈ܟ̇ܘܿܢ.

¹⁶ܘܗܵܫܵܐ ܐܸܬ̇ܛܲܝܲܒ̣ܘ ܘܲܚܙܵܘ ܦܸܬ̣ܓ̣ܵܡܵܐ ܗܵܢܵܐ ܪܲܒܵܐ ܕܥܵܒܹܕ݂ ܡܵܪܝܵܐ ܥܠܲܝܟ̇ܘܿܢ.

¹⁷ܗܵܐ ܚܨܵܕ݂ܵܐ ܗ̄ܙ̣ ܕܚܸܛܹ̈ܐ ܝܵܘܡܵܢܵܐ: ܐܸܩܪܸܐ ܠܡܵܪܝܵܐ ܘܢܸܬܸ̇ܠ ܩܵܠܵܐ ܘܡܸܛܪܵܐ. ܘܕܲܥܘ ܘܲܚܙܵܘ ܕܒ̣ܝܼܫܬ̇ܟ݂ܘܿܢ ܪܲܒܵܐ ܗ̄ܝܼ: ܕܲܫܐܸܠܬ̇ܘܿܢ ܠܟ݂ܘܿܢ ܡܲܠܟܵܐ.

¹⁸ܗܵܝܕܹܝܢ ܩܪܵܐ ܫܡܘܼܐܹܝܠ ܠܡܵܪܝܑܵ: ܘܝܲܗ̄ܒ̣ ܡܵܪܝܵܐ ܩܵܠܵܐ ܘܡܸܛܪܵܐ ܒܐܲܬ̣ܪܵܐ ܗܵܘ̇. ܘܲܕ݂ܚܸܠܘ ܟܠܹܗ ܥܲܡܵܐ ܛܵܒ̣ ܡ̣ܢ ܡܵܪܝܵܐ ܘܡ̣ܢ ܫܡܘܼܐܹܝܠ.

¹⁹ܘܐܸܡܲܪܘ ܟܠܹܗ ܥܲܡܵܐ ܠܲܫܡܘܼܐܹܝܠ: ܨܲܠܵܐ ܥܲܠ ܥܲܒ̣̈ܕܲܝܟ ܩܕ݂ܵܡ ܡܵܪܝܵܐ ܐܲܠܵܗܵܟ݂ ܘܠܵܐ ܢܡܘܼܬ̣: ܡܸܛܠ ܕܐܵܘܣܸܦ̄ܢ ܥܲܠ ܟܠܗܘܿܢ ܚܛܵܗܲܝ̈ܢ ܒܝܼܫܬܵܐ ܪܲܒ̇ܬ̣ܵܐ: ܕܲܫܐܸܠ̄ܢ ܠܲܢ ܡܲܠܟܵܐ.

²⁰ܘܐܸܡܲܪ ܫܡܘܼܐܹܝܠ ܠܥܲܡܵܐ ܠܵܐ ܬܸܕ݂ܚ̄ܠܘܼܢ: ܐܲܢ̄ܬ̇ܘܿܢ ܥܒܲܕܬ̇ܘܿܢ ܗܵܕܹܐ ܟܠܵܗ̇ ܒܝܼܫܬܵܐ. ܒܪܲܡ ܠܵܐ ܬܸܣܛܘܿܢ ܡ̣ܢ ܒܵܬ̣ܪܹܗ ܕܡܵܪܝܵܐ: ܐܸܠܵܐ ܦܘܼܠܚܘܼܗܝ ܠܡܵܪܝܵܐ ܒܟ݂ܠܹܗ ܠܸܒܟ݂ܘܿܢ.

²¹ܘܠܵܐ ܬܸܣܛܘܿܢ ܒܵܬܲܪ ܣܪ̈ܝܼܩܵܬ̣ܵܐ: ܕܠܵܐ ܬܡܘܼܬ̣ܘܼܢ. ܘܠܵܐ ܡܦܲܨ̈ܝܵܢ ܠܟ݂ܘܿܢ ܡܸܛܠ ܕܲܣܪ̈ܝܼܩܵܬ̣ܵܐ ܐܸܢܹܝܢ.

²²ܡܸܛܠ ܕܠܵܐ ܫܵܒܹܩ ܡܵܪܝܵܐ ܠܥܲܡܹܗ ܡܸܛܠ ܫܡܹܗ ܪܲܒܵܐ: ܡܸܛܠ ܕܐܸܬ̇ܛܦܝܼܣ ܠܡܸܥܒܲܕ݂ܟ݂ܘܿܢ ܠܹܗ ܥܲܡܵܐ.

²³ܘܐܸܢܵܐ ܚܵܣ ܠܝܼ ܕܐܸܚܛܹܐ ܠܡܵܪܝܵܐ ܘܠܵܐ ܐܲܨܲܠܸܐ ܥܠܲܝܗܘܿܢ: ܘܐܲܠܸܦܟ݂ܘܿܢ ܐܘܼܪܚܵܐ ܛܵܒ̣ܬ̣ܵܐ ܘܲܬ̣ܪܝܼܨܬܵܐ.

²⁴ܐܸܠܵܐ ܕܚܲܠܘ ܠܡܵܪܝܵܐ: ܘܦܘܼܠܚܘܼܗܝ ܒܩܘܼܫܬܵܐ ܒܟ݂ܠܹܗ ܠܸܒ̇ܟ݂ܘܿܢ ܘܲܒ̣ܟ݂ܠܵܗ̇ ܢܲܦ̮ܫܟ݂ܘܿܢ: ܘܲܚܙܵܘ ܕܡܵܘܪܸܒ̣ ܥܲܡܟ݂ܘܿܢ.

²⁵ܘܐܸܢ ܡܲܒ̣ܐܵܫܘ ܬܲܒ̣ܐ̱ܫܘܼܢ: ܐܵܦ ܐܲܢ̄ܬ̇ܘܿܢ ܐܵܦ ܡܲܠܟ̇ܟ݂ܘܿܢ ܬܡܘܼܬ̣ܘܼܢ.