Read Aramaic Peshita 1 Samuel 13 Bible Online

1 Samuel 13 - Aramaic Peshita bible

1 Samuel 13

¹ܘܟܲܕ݂ ܫܲܢ̄ܬܵܐ ܚܕ݂ܵܐ ܘܬܲܪܬܹܝܢ ܐܲܡܠܸܟ݂ ܫܵܐܘܿܠ ܒܡܲܠܟ̇ܘܼܬܹܗ ܥܲܠ ܝܼܣܪܵܝܹܠ.

²ܓܲܒ̇ܝܼ ܠܹܗ ܫܵܐܘܿܠ ܬܠܵܬ̣ܵܐ ܐܲܠܦܝܼ̈ܢ ܓܲܒ̣ܪ̈ܝܼܢ ܡ̣ܢ ܝܼܣܪܵܝܹܠ. ܘܲܗܘ̤ܵܐ ܥܲܡ ܫܵܐܘܿܠ ܬܪܹܝܢ ܐܲܠܦܝܼ̈ܢ ܒܡܲܟ݂ܡܲܣ: ܘܲܒ̣ܛܘܼܪܵܐ ܕܒܹܝܬ̣ ܐܹܝܠ. ܘܐܵܠܹܦ ܗܘ̤ܵܘ ܥܲܡ ܝܘܿܢܵܬܲܢ ܒܪܹܗ ܒܪܵܡܬ̣ܵܐ ܕܒܸܢܝܵܡܹܝܢ: ܘܫܲܪܟܹ̇ܗ ܕܥܲܡܵܐ ܫܪܵܐ ܐܸܢܘܿܢ ܐ̄ܢܵܫ ܠܒܲܝܬܹ̇ܗ.

³ܘܲܡܚܵܐ ܝܘܿܢܵܬ̣ܵܢ ܠܲܩܝܵܡܵܐ ܕܲܦܠܸܫܬܵܝܹ̈ܐ ܒܲܓ̣ܒܲܥ. ܘܲܫܡܲܥܘ ܦܠܸܫܬܵܝ̈ـܹܐ: ܘܫܵܐܘܿܠ ܩܪܵܐ ܒܫܝܼܦܘܿܪܵܐ ܒܟ݂ܠܵܗ̇ ܐܲܪܥܵܐ ܠܡܹܡܲܪ: ܢܸܫ̱ܡܥܘܼܢ ܥܸܒ̣ܪ̈ܵܝܵܐ ܘܟ݂ܠܹܗ ܝܼܣܪܵܝܹܠ.

⁴ܕܲܡܚܵܐ ܫܵܐܘܿܠ ܠܲܩܝܵܡܵܐ ܕܲܦܠܸܫܬܵܝܹ̈ܐ: ܘܲܚܣܲܢ ܝܼܣܪܵܝܹܠ ܠܲܦܠܸܫܬܵܝܹ̈ܐ. ܘܐܸܬ̣ܟܲܢܲܫܘ ܥܲܡܵܐ ܒܵܬܲܪ ܫܵܐܘܿܠ ܠܓܲܠܓܵܠܵܐ.

⁵ܘܲܦܠܸܫ̈ܬܵܝܹܐ ܐܸܬ̣ܟܲܢܲܫܘ ܠܡܸܬ̣ܟܲܬܲܫܘܼ ܥܲܡ ܝܼܣܪܵܝܹܠ: ܬܠܵܬ̣ܵܐ ܐܲܠܦ̈ܝܼܢ ܡܲܪ̈ܟ̇ܒ̣ܵܢ: ܘܸܫܬܵܐ ܐܲܠܦ̈ܝܼܢ ܦܲܪ̈ܫܝܼܢ. ܘܥܲܡܵܐ ܐܲܝܟ݂ ܚܵܠܵܐ ܕܥܲܠ ܣܸܦܬ̣ܝܲܡܵܐ ܣܘܿܓ̣ܵܐܐ ܕܛܵܒ̣: ܘܲܣܠܸܩܘ ܘܲܫܪܵܘ ܒܡܲܟ݂ܡܲܣ ܡ̣ܢ ܡܲܕ݂ܢ̱ܚܵܝܵܗ̇ ܕܒܹܝܬ̣ ܐܹܝܠ.

⁶ܘܲܚܙܵܘ ܓܲܒ̣ܪܹ̈ܐ ܕܝܼܣܪܵܝܹܠ ܘܲܕ݂ܚܸܠܘ: ܘܐܸܬ̣ܛܲܫܝܼܘ ܠܗܘܿܢ ܒܲܡܥܲܪܹ̈ ܘܒܲܚ̈ܠܹܠܹܐ: ܘܒܲܫܩ̈ܝܼܦܹܐ ܘܲܒ̣ܦܲܥܪܹ̈ܐ: ܘܲܒ̣ܓ̣ܘܼ̈ܒܹ̇ܐ.

⁷ܘܥܸܒ̣ܪ̈ܵܝܹܐ ܥܒܲܪܘ ܝܘܿܪܕܢܵܢ ܠܐܲܪܥܵܐ ܕܓ̣ܵܕ݂ ܘܲܕ݂ܓܸܠܥܵܕ݂. ܘܫܵܐܘܿܠ ܥܕܲܟ̇ܝܠ ܒܓ̣ܠܓܵܠܵܐ ܗ̄ܘ̣ܵܐ. ܘܟ݂ܠܹܗ ܥܲܡܵܐ ܥܲܡܹܗ.

⁸ܘܦܵܫ ܫܲܒ̣ܥܵܐ ܝܵܘ̈ܡܝܼܢ ܠܙܲܒ̣ܢܵܐ ܕܲܫܡܘܼܐܹܝܠ. ܘܠܵܐ ܐܸܬ̣ܵܐ ܫܡܘܼܐܹܝܠ ܐܓ̣ܠܓܵܠܵܐ. ܘܐܸܬ̣ܒܲܕܲܪܘ ܥܲܡܵܐ ܡ̣ܢ ܠܘܵܬ̣ ܫܵܐܘܿܠ.

⁹ܘܐܸܡܲܪ ܫܵܐܘܿܠ: ܩܲܪܸܒ̣ܘ ܠܝܼ ܥܠܵܬ̣ܵܐ. ܘܐܲܣܸܩ ܕܸܒ̣ܚܹ̈ܐ ܫܲܠܡܹ̈ܐ ܠܲܥܠܵܬ̣ܵܐ.

¹⁰ܘܟܲܕ݂ ܫܲܠܸܡ ܠܡܲܣܵܩܘܼ ܥܠܵܬ̣ܵܐ: ܐܸܬ̣ܵܐ ܫܡܘܼܐܹܝܠ: ܘܲܢܦܲܩ ܫܵܐܘܿܠ ܠܐܘܼܪܥܹܗ̇ ܠܲܡܒܲܪܵܟ݂ܘܼܬܹܗ.

¹¹ܘܐܸܡܲܪ ܫܡܘܼܐܹܝܠ: ܡܵܢܵܐ ܥܒܲܕܲܬ̇. ܘܐܸܡܲܪ ܫܵܐܘܿܠ: ܚܙܹܝܬ̣ ܕܐܸܬ̣ܒܲܕܲܪ ܠܹܗ ܥܲܡܵܐ ܡܹܢܝ: ܘܐܲܢ̄ܬ̇ ܠܵܐ ܐܸܬܲܝܬ̇ ܠܙܲܒ̣ܢܵܐ ܕܝܵܘ̈ܡܵܬ̣ܵܐ: ܘܲܦܠܸܫ̈ܬܵܝܹܐ ܟܢܝܼܫܝܼܢ ܒܡܲܟ݂ܡܲܣ.

¹²ܘܐܸܡܲܪܹܬ̣: ܕܲܠܡܵܐ ܢܸܚܬ̣ܘܼܢ ܦܠܸܫ̈ܬܵܝܹܐ ܥܠܲܝ ܠܓ̣ܠܓܵܠܵܐ: ܘܐܲܦܲܝ̈ ܡܵܪܝܵܐ ܠܵܐ ܚܙܹܝܬ̣: ܘܐܲܡܪ̱ܚܹܬ̣ ܘܐܲܣܩܹܬ̣ ܥܠܵܬ̣ܵܐ.

¹³ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܐܲܣܟܸ̇ܠܬ̇ ܕܠܵܐ ܢܛܲܪܬ̇ ܦܘܼܩܕܵܢܹܗ ܕܡܵܪܝܵܐ ܕܦܲܩܕ݂ܵܟ݂. ܡܸܛܠ ܕܗܵܫܵܐ ܐܲܬ̣ܩܸܢ ܡܵܪܝܵܐ ܐܲܠܵܗܵܟ݂ ܡܲܠܟ̇ܘܼܬ̣ܵܟ݂ ܥܲܠ ܝܼܣܪܵܝܹܠ: ܘܐܸܡܲܪ ܕܢܲܬ̣ܩܢܵܟ݂ ܥܕܲܡܵܐ ܠܥܵܠܲܡ.

¹⁴ܡܸܟܹܝܠ ܡܲܠܟ̇ܘܼܬ̣ܵܟ݂ ܠܵܐ ܬܩܘܼܡ: ܡܸܛܠ ܕܲܓ̣ܒ̣ܵܐ ܠܹܗ ܡܵܪܝܵܐ ܓܲܒ̣ܪܵܐ ܐܲܝܟ݂ ܠܸܒܹܗ: ܘܦܲܩܕܹܗ ܡܵܪܝܵܐ ܠܲܡܕܲܒܵܪܘܼ ܠܥܲܡܹܗ. ܡܸܛܠ ܕܠܵܐ ܢܛܲܪܬ̇ ܟܠ ܕܦܲܩܕ݂ܵܟ݂ ܡܵܪܝܵܐ ܐܲܠܵܗܵܟ݂.

¹⁵ܘܩܵܡ ܫܡܘܼܐܹܝܠ ܘܲܣܠܸܩ ܡ̣ܢ ܓܲܠܓܵܠܵܐ ܠܪܵܡܬ̣ܵܐ ܕܒܸܢܝܵܡܹܝܢ: ܘܲܡܢܵܐ ܫܵܐܘܿܠ ܠܥܲܡܵܐ ܕܐܸܫܬ̇ܟܲܚ ܥܲܡܹܗ ܐܲܝܟ݂ ܫܸܬ̣ܡܵܐܐ ܓܲܒ̣ܪ̈ܝܼܢ.

¹⁶ܘܫܵܐܘܿܠ ܘܝܘܿܢܵܬ̣ܵܢ ܒܪܹܗ: ܝܵܬ̣ܒ̇ܝܼܢ ܒ̇ܓܸܒܲܥܬ̣ܵܐ ܕܒܸܢܝܵܡܹܝܢ: ܘܲܦܠܸܫ̈ܬܵܝܹܬ ܫܪܹܝܢ ܒܡܲܟ݂ܡܲܣ.

¹⁷ܘܲܢܦܲܩܘ ܡܚܲܒ̈ܠܵܢܹܐ ܡ̣ܢ ܡܲܫܪܝܼܬ̣ܵܐ ܕܲܦܠܸܫ̈ܬܵܝܹܐ ܬܠܵܬ̣ܵܐ ܪܹ̈ܫܝܼܢ: ܪܸܫܵܐ ܚܲܕ݂ ܡܸܢܗܘܿܢ ܐܵܙܹܠ ܠܐܘܼܪܚܵܐ ܕܥܵܦܲܪ ܥܲܠ ܐܲܪܥܵܐ ܕܲܫܓ̣ܘܼܐܹܝܠ.

¹⁸ܘܪܹܫܵܐ ܐ̄ܚܪܹܢܵܐ ܐܵܙܹ̈ܠ ܠܐܘܼܪܚܵܐ ܕܒܹܝܬ̣ ܚܵܘܪܵܢ: ܘܪܹܫܵܐ ܐ̄ܚܪܹܢܵܐ ܦܵܢܹܐ ܠܐܘܼܪܚܵܐ ܕܲܬ̣ܚܘܼܡܵܐ ܕܚܵܐܲܪ ܠܢܲܚܠܵܐ ܕܨܸܒ̣ܥܘܿܢ ܘܲܠܡܲܕ݂ܒ̇ܪܵܐ.

¹⁹ܘܐܘܼܡܵܢܵܐ ܠܵܐ ܐܸܫܟܲܚ ܠܟ݂ܠܵܗ̇ ܐܲܪܥܵܐ ܕܝܼܣܪܵܝܹܠ: ܡܸܛܠ ܕܐܸܡܲܪܘ ܦܠܸܫܬܵܝܹ̈ܐ ܕܠܵܐ ܢܸܥܒ̇ܕ݂ܘܼܢ ܥܸܒ̣ܪ̈ܵܝܹܐ ܣܲܝ̈ܦܹܐ ܘܡܘܿܪ̈ܵܢܝܵܬ̣ܵܐ.

²⁰ܘܲܢܚܬ̣ܘ ܟܠܹܗ ܝܼܣܪܵܝܹܠ ܡ̣ܢ ܠܘܵܬ̣ ܦܠܸܫ̈ܬܵܝܹܐ: ܠܡܸܠܛܲܫ ܐ̄ܢܵܫ ܡܲܓ̇ܠܹܗ: ܘܣܸܟ̇ܬܹܗ: ܘܟ݂ܘܼܠܒܹ̇ܗ: ܘܡܲܣܵܣܹܗ.

²¹ܘܗܵܘܹܐ ܫܘܿܦܝܼܢܵܐ ܕܲܦܬܸܐ ܠܡܲܓ̇ܠܑܵ: ܘܲܠܣܸܟ̇ܬ̣ܵܐ: ܘܠܵܐܒ̣ܘܿܬ̣ܵܐ: ܘܲܠܟ݂ܘܼܠܒܵܐ: ܘܲܠܩܵܝܹܡܬ̣ܵܐ ܕܡܲܣܵܣܵܐ.

²²ܘܲܒ̣ܝܵܘܡܵܐ ܕܲܩܪܵܒ̣ܵܐ ܠܵܐ ܐܸܫܬ̇ܟܲܚ ܣܲܝܦܵܐ ܐܵܘ ܡܘܿܪܵܢܝܼܬ̣ܵܐ: ܒܐܝܼܕ݂ܵܐ ܕܟ݂ܠܹܗ ܥܲܡܵܐ ܕܥܲܡ ܫܵܐܘܿܠ: ܘܥܲܡ ܝܘܿܢܵܬ̣ܵܢ. ܘܐܸܫܬ̇ܟܲܚ ܠܫܵܐܘܿܠ ܘܲܠܝܘܿܢܵܬ̣ܵܢ ܒܪܹܗ.

²³ܘ̤ܲܦܲܩ ܩܝܵܡܵܐ ܕܲܦܠܸܫ̈ܬܵܝܹܐ. ܠܥܸܒ̣ܪܵܐ ܕܡܲܟ݂ܡܲܣ.