Read Aramaic Peshita 1 Samuel 15 Bible Online

1 Samuel 15 - Aramaic Peshita bible

1 Samuel 15

¹ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܠܝܼ ܫܲܕܲܪ ܡܵܪܝܵܐ ܠܡܸܡ̄ܫܚܵܟ݂: ܕܬܲܡܠܸܟ݂ ܥܲܠ ܝܼܣܪܵܝܹܠ ܥܲܡܹܗ. ܗܵܫܵܐ ܫܡܲܥ ܠܩܵܠ ܦܸܬ̣ܓ̣ܵܡܵܘ̈ܗܝ ܕܡܵܪܝܵܐ.

²ܗܵܟܲܢܵܐ ܐܵܡܲܪ ܡܵܪܝܵܐ ܨܒ̣ܵܐܘܼܬ̣: ܕܟ݂ܝܼܪ ܬ̄ܢܵܐ ܟܠܡܸܕܸܡ ܕܲܥܒܲܕ݂ ܥܡܵܠܹܝܩ ܠܝܼܣܪܵܝܹܠ ܒܐܘܼܪܚܵܐ: ܟܲܕ݂ ܣܵܠܩܝܼܢ ܗ̄ܘ̣ܵܘ ܡ̣ܢ ܡܸܨܪܹܝܢ.

³ܗܵܫܵܐ ܙܸܠ ܚܪܘܿܒ̣ ܠܲܥܡܵܠܹܝܩ: ܘܐܵܘܒܸܕ݂ ܠܟ݂ܠ ܕܐܝܼܬ̣ ܠܗܘܿܢ: ܘܠܵܐ ܬܚܘܼܣ ܥܠܝܗܘܿܢ: ܘܩܲܛܸܠ ܡ̣ܢ ܓܲܒ̣ܪܹ̈ܐ ܘܲܥܕܲܡܵܐ ܠܢܸܫܹ̈ܐ: ܘܡ̣ܢ ܥܠܲܝܡܹ̈ܐ ܘܲܥܕܲܡܵܐ ܠܝܲܠܘܼܕܹ̈ܐ: ܘܡ̣ܢ ܘܬܵܘܪܹ̈ܐ ܘܲܥܕܲܡܵܐ ܠܐܸܡܪܹ̈ܐ: ܘܡ̣ܢ ܓܲܡ̈ܠܹܐ ܘܲܥܕܲܡܵܐ ܠܚܸܡܪܵܐ.

⁴ܘܐܲܫܡܲܥ ܫܵܐܘܿܠ ܠܟ݂ܠܹܗ ܥܲܡܵܐ ܠܲܩܪܵܒ̣ܵܐ: ܘܲܡܢܵܐ ܐܸܢܘܿܢ ܒܲܛ̈ܠܵܝܹܐ: ܡܲܐܬܹܝܢ ܐܲܠܦ̈ܝܼܢ ܪܸ̈ܓ̣ܵܠܵܝܝܼܢ: ܘܥܸܣܪܵܐ ܐܲܠܦ̈ܝܼܢ ܥܲܡ ܓܲܒ̣ܪܹ̈ܐ ܕܲܝܗܘܼܕ݂ܵܐ.

⁵ܘܐܸܬ̣ܵܐ ܫܵܐܘܿܠ ܥܕܲܡܵܐ ܠܲܩܪܝܼܬ̣ܵܐ ܕܲܥܵܠܹܝܩ: ܘܕ݂ܵܢ ܒܢܲܚܠܵܐ.

⁶ܘܐܸܡܲܪ ܫܵܐܘܿܠ ܠܩ̈ܝܼܢܵܝܹܐ: ܣܛܵܘ ܘܙܸܠܘ ܘܚܘܿܬ̣ܘ ܡ̣ܢ ܓܵܘ ܥܡܵܠ̈ܩܵܝܹܐ: ܕܠܵܐ ܐܵܘܒܸܕ݂ܟ݂ܘܿܢ ܥܲܡܗܘܿܢ. ܘܐܲܢ̄ܬ̇ܘܿܢ ܥܒܲܕܬ̇ܘܿܢ ܛܲܝܒ̇ܘܼܬ̣ܵܐ ܥܲܡ ܟܠܗܘܿܢ ܕܒܹܝܬ̣ ܝܼܣܪܵܝܹܠ: ܟܲܕ݂ ܣܵܠܩܝܼܢ ܗ̄ܘܼܵܘ ܡ̣ܢ ܡܸܨܪܹܝܢ: ܘܲܣܛܵܐ ܩ̈ܝܼܢܵܝܹܐ ܡ̣ܢ ܓܵܘ ܥܡܵܠ̈ܩܵܝܹܐ.

⁷ܘܲܡܚܵܐ ܫܵܐܘܿܠ ܠܲܥܡܵܠܹܝܩ: ܡ̣ܢ ܚܘܝܼܠܵܐ ܕܲܒ̣ܡܲܥܠܵܢܵܐ ܕܫܘܿܕ݂ ܕܲܩܕ݂ܵܡ ܡܸܨܪܹܝܢ.

⁸ܘܐܸܚܲܕ݂ ܠܐܵܓ̣ܵܓ̣ ܡܲܠܟܵܐ ܕܲܥܡܵܠܹܝܩ ܟܲܕ݂ ܚܲܝ: ܘܲܠܟ݂ܠܹܗ ܥܲܡܵܐ ܐܵܘܒܸܕ݂ ܒܦܘܼܡܵܐ ܕܚܲܪܒܵܐ.

⁹ܘܚܲܣ ܫܵܐܘܿܠ ܘܥܲܡܵܐ ܥܲܠ ܐܵܓ̣ܵܓ̣ ܡܲܠܟܵܐ: ܘܥܲܠ ܫܘܼܦܪܵܐ ܕܥܵـ̈ܢܵܐ: ܘܲܕܬ̣ܵܘܪܹ̈ܐ: ܘܲܕ݂ܫܲܡܝܼܢܹ̈ܐ: ܘܕܲܡܦܲܛܡܹ̈ܐ: ܘܥܲܠ ܟܠܵܗ̇ ܛܵܒ̣ܬ̣ܵܐ: ܘܠܵܐ ܨܒ̣ܵܘ ܕܢܸܚ̱ܪܒ̣ܘܼܢ ܐܸܢܘܿܢ. ܘܟ݂ܠܵܗ̇ ܥܒܲܝܼܕܬܵܐ ܕܫܝܼܛܵܐ ܘܡܲܣܠܝܵܐ ܒܥܲܝܢܲܝ̈ܗܘܿܢ: ܠܵܗ̇ ܐܵܘܒܸܕ݂ܘ.

¹⁰ܘܲܗܘ̤ܵܐ ܦܸܬ̣ܓ̣ܵܡܹܗ ܕܡܵܪܝܵܐ ܥܲܠ ܫܡܘܼܐܹܝܠ ܠܡܹܡܲܪ.

¹¹ܐܸܬ̇ܬ̇ܘ̇ܝܼܬ̣ ܕܐܲܡ̱ܠܟܹ̇ܬ̣ ܠܫܵܐܘܿܠ ܡܲܠܟܵܐ: ܕܲܗܦܲܟ݂ ܡ̣ܢ ܒܵܬܲܪܝ: ܘܡܸܠ̈ܝ ܠܵܐ ܐܲܩܝܼܡ. ܘܐܸܬ̣ܒ̇ܐܸܫ ܠܲܫܡܘܼܐܹܝܠ: ܘܨܲܠܝܼ ܩܕ݂ܵܡ ܡܵܪܝܵܐ ܟܠܹܗ ܠܸܠܝܵܐ.

¹²ܘܩܲܕܸܡ ܫܡܘܼܐܹܝܠ ܒܨܲܦܪܵܐ ܠܐܘܼܪܥܹܗ ܕܫܵܐܘܿܠ: ܘܐܸܬ̣ܚܵܘܝܼ ܠܲܫܡܘܼܐܹܝܠ ܕܐܸܬ̣ܵܐ ܫܵܐܘܿܠ ܠܟܲܪܡܠܵܐ: ܘܗܵܐ ܡܲܬ̣ܩܸܢ ܠܹܗ ܐܲܬ̣ܪܵܐ: ܘܐܸܬ̣ܦܢܝܼ ܘܲܥܒܲܪ ܘܲܢܚܸܬ̣ ܠܓ̇ܠܓܵܠܵܐ.

¹³ܘܐܸܬ̣ܵܐ ܫܡܘܼܐܹܝܠ ܠܘܵܬ̣ ܫܵܐܘܿܠ: ܘܐܸܡܲܪ ܠܹܗ ܫܵܐܘܿܠ: ܒܪܝܼܟ݂ ܗ̄ܘ̣ ܡܵܪܝܵܐ ܕܐܲܩܝܼܡ ܦܸܬ̣ܓ̣ܵܡܹܗ.

¹⁴ܘܐܸܡܲܪ ܫܡܘܼܐܹܝܠ: ܡܵܢܵܘ ܩܵܠܵܐ ܗܵܢܵܐ ܕܥܵـ̈ܢܵܐ ܒܐܸܕ݂ܢܲܝ̈: ܘܩܵܠܵܐ ܕܬ̣ܵܘܪܹ̈ܐ ܕܫܵܡܲܥ ܐ̄ܢܵܐ.

¹⁵ܘܐܸܡܲܪ ܫܵܐܘܿܠ: ܡ̣ܢ ܥܡܵܠܹܝܩ ܐܲܝܬ̇ܝܼܘ ܐܸܢܘܿܢ. ܡܸܛܠ ܕܚܵܣ ܥܲܡܵܐ ܥܲܠ ܫܘܼܦܪܵܐ ܕܥܵـ̈ܢܵܐ: ܘܲܕ݂ܬ̣ܵܘܪܹ̈ܐ: ܘܐܲܝܬ̇ܝܼܘ ܕܲܢܕܲܒ̇ܚܘܼܢ ܠܡܵܪܝܵܐ ܐܲܠܵܗܵܟ݂. ܘܫܲܪܟܵܐ ܚܪܲܒ̣̄ܢ.

¹⁶ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܫܬ̣ܘܿܩ ܘܐܹܚܵܘܹܝܟ݂ ܡܸܕܸܡ ܕܐܸܡܲܪ ܠܝܼ ܡܵܪܝܵܐ ܒܠܸܠܝܵܐ ܘܐܸܡܲܪ ܠܹܗ ܐܸܡܲܪ.

¹⁷ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܗܵܐ ܐܸܢ ܙܥܘܿܪ ܐܲܢ̄ܬ̇ ܒܥܲܝܢܲܝ̈ܟ: ܪܹܫ ܫܲܒ̣ܛܹ̈ܐ ܐܲܢ̄ܬ̇ ܕܝܼܣܪܵܝܹܠ: ܘܡܲܫܚܵܟ݂ ܡܵܪܝܵܐ ܕܬܲܡܠܸܟ݂ ܥܲܠ ܝܼܣܪܵܝܹܠ.

¹⁸ܘܫܲܕܲܪܵܟ݂ ܡܵܪܝܵܐ ܒܬܘܼܪܚܵܐ ܘܐܸܡܲܪ: ܙܸܠ ܚܪܘܿܒ̣ ܠܚܲܛܵܝܵܐ ܥܡܵܠܹܝܩ: ܘܐܸܬ̣ܟܲܬ̇ܫ ܥܲܡܗܘܿܢ ܥܕܲܡܵܐ ܕܲܬ̣ܓܲܡܲܪ ܐܸܢܘܿܢ.

¹⁹ܐܲܝܟܵܘ ܠܵܐ ܫܡܲܥܬ̇ ܒܩܵܠܹܗ ܕܡܵܪܝܵܐ: ܐܸܠܵܐ ܐܸܬ̣ܦܢܝܼܬ̣ ܥܲܠ ܒܸܙܬ̣ܵܐ: ܘܲܥܒܲܕܬ̇ ܕܒ̣ܝܼܫ ܩܕ݂ܵܡ ܡܵܪܝܵܐ.

²⁰ܘܐܸܡܲܪ ܫܵܐܘܿܠ ܠܲܫܡܘܼܐܹܝܠ: ܫܸܡ̇ܥܹܬ̣ ܒܩܵܠܹܗ ܕܡܵܪܝܵܐ ܘܐܸܙܹܠ̄ܬ̣ ܒܐܘܼܪܚܵܐ ܕܫܲܕܪܲܢܝ: ܘܐܲܝ̇ܬ̇ܝܼܬ̣ ܠܐܵܓ̣ܵܓ̣ ܡܲܠܟܵܐ ܕܲܥܡܵܠܹܝܩ: ܘܲܥܕܵܠܩܵܝܹ̈ܐ ܐܵܘܒ̇ܕܹܬ̣.

²¹ܘܲܕ݂ܒ̇ܪܘ ܥܲܡܵܐ ܡ̣ܢ ܒܸܙܬ̣ܵܐ ܥܵܢܹ̈ܐ ܘܬ̣ܵܘܪܹ̈ܐ ܪܹܫܝܼܬ̣ܵܐ ܕܚܸܪܡܵܐ: ܕܲܢܕܲܒ̇ܚܘܼܢ ܠܡܵܪܝܵܐ ܐܲܠܵܗܵܟ݂ ܒܓ̣ܠܓܵܠܵܐ.

²²ܘܐܸܡܲܪ ܫܡܘܼܐܹܝܠ: ܠܵܐ ܨܵܒܹܐ ܡܵܪܝܵܐ ܒܲܥܵܠ̈ܘܵܬ̣ܵܐ ܘܲܒ̣ܕܸܒ̣ܚܹ̈ܐ ܐܲܝܟ݂ ܡ̣ܢ ܕܫܵܡܲܥ ܒܩܵܠܹܗ. ܗܵܐ ܫܸܡܥܵܐ ܡ̣ܢ ܕܸܒ̣ܚܹ̈ܐ ܛܵܒ̣: ܘܠܲܡܨܵܬ̣ ܡ̣ܢ ܬܲܪܒܵܐ ܕܕܸܟ݂ܪܹ̈ܐ.

²³ܡܸܛܠ ܕ݂ܚܛܝܼܬܹܗ ܕܩܸܨܡܵܐ ܡܡܲܪ̱ܡܪܵܢܘܼܬ̣ܵܐ: ܘܩܸܨܡܵܐ ܥܵܘܠܵܐ ܡܲܥܫܢܵܐ. ܥܲܠ ܕܐܲܣܠܝܼܬ̇ ܠܡܸܠܬܹܗ ܕܡܵܪܝܵܐ: ܢܲܣܠܹܝܟ݂ ܡ̣ܢ ܡܲܠܟ̇ܘܼܬ̣ܵܐ.

²⁴ܘܐܸܡܲܪ ܫܵܐܘܿܠ ܠܲܫܡܘܼܐܹܝܠ: ܚܛܹܝܬ̣ ܥܲܠ ܕܥܸܒ̣ܪܹܬ̣ ܥܲܠ ܡܸܠܬ̣ ܦܘܼܡܹܗ ܕܡܵܪܝܵܐ: ܘܥܲܠ ܡܸܠܲܝ̈ܟ: ܡܸܛܠ ܕܕܸܚܠܹܬ̣ ܡ̣ܢ ܥܲܡܵܐ ܘܫܸܡ̇ܥܹܬ̣ ܒܩܵܠܗܘܿܢ.

²⁵ܗܵܫܵܐ ܫܒ̣ܘܿܩ ܠܲܚܛܝܼܬ̣ܝ: ܘܲܗܦܘܿܟ݂ ܥܲܡܝ: ܘܐܸܣܓ̇ܘܿܕ݂ ܠܡܵܪܝܑܵ.

²⁶ܘܐܸܡܲܪ ܫܡܘܼܐܹܝܠ ܠܫܵܐܘܿܠ: ܠܵܐ ܐܸܗܦܘܿܟ݂ ܥܲܡܵܟ݂. ܥܲܠ ܕܐܲܣܠܝܼܬ̇ ܡܸܠܬܹܗ ܕܡܵܪܝܵܐ: ܐܲܣ̱ܠܝܵܟ݂ ܡܵܪܝܵܐ ܕܠܵܐ ܬܸܗܘܸܐ ܡܲܠܟܵܐ ܥܲܠ ܝܼܣܪܵܝܹܠ.

²⁷ܘܐܸܬ̣ܦܢܝܼ ܫܡܘܼܐܹܝܠ ܠܡܹܐܙܲܠ: ܘܐܸܚܲܕ݂ ܫܵܐܘܿܠ ܒܟܸܢܦܵܐ ܕܲܦܪܝܼܣܹܗ ܘܲܨܪܵܝܗܝ.

²⁸ܘܐܸܡܲܪ ܠܹܗ ܫܡܘܼܐܹܝܠ. ܨܪܵܗ̇ ܡܵܪܝܵܐ ܡܲܠܟ̇ܘܼܬ̣ܵܐ ܕܝܼܣܪܵܝܹܠ ܡܸܢܵܟ݂ ܝܵܘܡܵܢܵܐ: ܘܝܲܗ̄ܒܵܗ̇ ܠܚܲܒ̣ܪܵܟ݂ ܕܛܵܒ̣ ܡܸܢܵܟ݂.

²⁹ܘܐܵܦ ܢܲܨܝܼܚܹܗ ܕܝܼܣܪܵܝܹܠ: ܠܵܐ ܡܕܲܓܸܠ ܘܐܵܦܠܵܐ ܡܸܬ̣ܡ̱ܠܸܟ݂: ܡܸܛܠ ܕܠܵܐ ܗ̄ܘ̣ܵܐ ܒܲܪܢܵܫܵܐ ܕܢܸܬ̣ܡ̱ܠܸܟ݂.

³⁰ܘܐܸܡܲܪ ܫܵܐܘܿܠ: ܚܛܹ̈ܝܬ̣: ܗܵܫܵܐ ܝܲܩܲܪܲܝܢܝ ܩܕ݂ܵܡ ܣܵܒܹ̈ܐ ܕܥܲܡܝܼ: ܘܲܩܕ݂ܵܡ ܝܼܣܪܵܝܹܠ: ܘܲܗܦܘܿܟ݂ ܥܲܡܝ: ܘܐܸܣܓ̇ܘܿܕ݂ ܠܡܵܪܝܵܐ ܐܲܠܵܗܵܟ݂.

³¹ܘܲܗܦܲܟ݂ ܫܡܘܼܐܹܝܠ ܒܵܬܲܪ ܫܵܐܘܿܠ: ܘܲܣܓܸܕ݂ ܫܵܐܘܿܠ ܠܡܵܪܝܵܐ.

³²ܘܐܸܡܲܪ ܫܡܘܼܐܹܝܠ ܩܲܪܸܒܲܝܗܝ ܠܝܼ ܠܐܵܓ̣ܵܓ̣ ܡܲܠܟܵܐ ܕܲܥܡܵܠܹܝܩ: ܘܐܸܡܲܪ ܐܵܓ̣ܵܓ̣ ܫܲܪܝܼܪܵܐܝܼܬ̣ ܡܲܪܝܼܪ ܡܵܘܬܵܐ.

³³ܘܐܸܡܲܪ ܫܡܘܼܐܹܝܠ: ܐܲܝܟܲܢܵܐ ܕܓܲܙܝܲܬ̤ ܢܸܫܹ̈ܐ ܚܲܪܒܵܟ݂: ܗܵܟܲܢܵܐ ܬܸܬ̣ܓܲܙܸܐ ܐܸܡܵܟ݂ ܡ̣ܢ ܢܸܫܹ̈ܐ. ܘܦܲܫܲܚ ܫܡܘܼܐܹܝܠ ܠܐܵܓ̣ܵܓ̣ ܡܲܠܟܵܐ ܩܕ݂ܵܡ ܡܵܪܝܵܐ ܒܓܲܠܓܵܠܵܐ. ܘܐܸܙܲܠ ܫܡܘܼܐܹܝܠ ܠܪܵܡܬ̣ܵܐ.

³⁴ܘܫܵܐܘܿܠ ܣܠܸܩ ܠܒܲܝܬܹ̇ܗ ܠܪܵܡܬ̣ܵܐ ܕܫܵܐܘܿܠ. ܘܠܵܐ ܐܵܘܣܸܦ ܬܘܼܒ̣ ܫܡܘܼܐܹܝܠ: ܠܡܸܚܙܹܝܗ ܠܫܵܐܘܿܠ ܥܕܲܡܵܐ ܠܝܵܘܡܵܐ ܕܡܝܼܬ̣: ܡܸܛܠ ܕܐܸܬ̣ܐ̱ܒܸܠ ܫܡܘܼܐܹܝܠ ܥܲܠ ܫܵܐܘܿܠ.

³⁵ܘܡܵܪܝܵܐ ܐܸܬ̇ܬ̇ܘܝܼ ܥܲܠ ܕܐܲܡܠܸܟ݂ ܠܫܵܐܘܿܠ ܥܲܠ ܝܼܣܪܵܝܹܠ.