Read Aramaic Peshita 1 Samuel 16 Bible Online

1 Samuel 16 - Aramaic Peshita bible

1 Samuel 16

¹ܘܐܸܡܲܪ ܡܵܪܝܵܐ ܠܲܫܡܘܼܐܹܝܠ: ܥܕܲܡܵܐ ܠܐܸܡܲܬ̣ܝ ܡܸܬ̣ܐ̱ܒܸܠ ܐܲܢ̄ܬ̇ ܥܲܠ ܫܵܐܘܿܠ: ܘܐܸܢܵܐ ܐܲܣܠܝܼܬܹ̇ܗ ܕܠܵܐ ܢܲܡܠܸܟ݂ ܥܲܠ ܝܼܣܪܵܝܹܠ. ܡܠܝܼ ܩܲܪܢܵܟ݂ ܡܸܫܚܵܐ: ܘܬ̣ܵܐ ܐܹܫܲܕܪܵܟ݂ ܠܘܵܬ̣ ܐܝܼܫܲܝ ܕܡ̣ܢ ܒܹܝܬ̣ ܠܚܸܡ: ܡܸܛܠ ܕܲܚܙܵܝܬ̣ ܠܝܼ ܒܲܒ̣ܢܵܘ̈ܗܝ ܡܲܠܟܵܐ.

²ܘܐܸܡܲܪ ܫܡܘܼܐܹܝܠ: ܐܲܝܟܲܢܵܐ ܐܹܙܲܠ: ܘܢܸܫܡܲܥ ܫܵܐܘܿܠ ܘܢܸܩܛܠܲܢܝ. ܘܐܸܡܲܪ ܡܵܪܝܵܐ ܠܫܡܘܼܐܹܝܠ: ܥܓܸܠܬܵܐ ܕܬ̣ܵܘܪܹ̈ܐ ܐܲܚܘܿܕ݂ ܒܐܝܼܕ݂ܵܟ݂: ܘܐܸܡܲܪ ܠܲܡܕܲܒܵܚܘ ܠܡܵܪܝܵܐ ܐܸܬ̣ܝܬ̣.

³ܘܲܩܪܝܼ ܠܐܝܼܫܲܝ ܠܕܸܒ̣ܚܵܐ: ܘܐܸܢܵܐ ܐܹܚܵܘܹܝܟ݂ ܡܸܕܸܡ ܕܬܸܥܒܸ̇ܕ݂. ܘܲܡܫܘܿܚ ܠܝܼ ܠܡ̇ܢ ܕܐܹܡܲܪ ܠܵܟ݂.

⁴ܘܲܥܒܲܕ݂ ܫܡܘܼܐܹܝܠ ܐܲܝܟ݂ ܕܦܲܩܕܹܗ ܡܵܪܝܵܐ. ܘܐܸܬ̣ܵܐ ܠܒܹܝܬ̣ ܠܚܸܡ ܕܲܝܗܘܼܕ݂ܵܐ: ܘ̤ܲܦܲܩܘ ܣܵܒܹ̈ܐ ܕܲܩܪܝܼܬ̣ܵܐ ܠܐܘܼܪܥܹܗ.

⁵ܘܐܸܡܲܪ ܫܠܵܡ ܡܹܐܬ̣ܝܵܟ݂. ܘܐܸܡܲܪ ܫܠܵܡ: ܠܲܡܕܲܒܵܚܘܼ ܠܡܵܪܝܵܐ ܐܸܬܹܝ̇ܬ̣: ܐܸܬ̣ܩܲܕܲܫܘ ܘܬ̣ܵܘ ܥܲܡܝ ܠܕܸܒ̣ܚܵܐ. ܘܩܲܕܸܫ ܠܐܝܼܫܲܝ ܘܠܲܒ̣ܢܵܘ̈ܗܝ: ܘܲܩܪܵܐ ܐܸܢܘܿܢ ܠܕܸܒ̣ܚܵܐ.

⁶ܘܟܲܕ݂ ܐܸܬ̣ܵܘ ܚܙܵܐ ܠܐܸܠܝܵܒ̣: ܘܐܸܡܲܪ ܐܲܟ݂ܘܿܬܹܗ ܕܡܵܪܝܵܐ ܡܫܝܼܚܹܗ.

⁷ܘܐܸܡܲܪ ܡܵܪܝܵܐ ܠܲܫܡܘܼܐܹܠ: ܠܵܐ ܬܚܘܼܪ ܒܚܸܙܘܹܗ ܘܲܒ̣ܪܵܘܡܵܐ ܘܩܵܘܡܬܹܗ. ܡܸܛܠ ܕܐܲܣܠܝܼܬܹ̇ܗ. ܠܵܐ ܗܘܹ̇ܝܬ̣ ܓܹܝܪ ܐܲܝܟ݂ ܕܚܵܙܹܐ ܐ̄ܢܵܫܵܐ: ܡܸܛܠ ܕܐ̄ܢܵܫܵܐ ܚܵܙܹܐ ܒܥܲܝ̈ܢܹܐ: ܘܡܵܪܝܵܐ ܚܵܙܹܐ ܒܠܸܒܵܐ.

⁸ܘܲܩܪܵܐ ܐܝܼܫܲܝ ܠܐܲܒ̣ܝܼܢܵܕ݂ܵܒ̣: ܘܐܲܥܒ̇ܪܹܗ ܩܕ݂ܵܡ ܫܡܘܼܐܹܝܠ: ܘܐܸܡܲܪ ܠܵܐ ܨܵܒܹ̇ܐ ܡܵܪܝܵܐ ܒܗܵܢܵܐ.

⁹ܘܐܲܥܒܲܪ ܐܝܼܫܲܝ ܠܫܲܡܵܐ: ܘܐܸܡܲܪ ܐܵܦܠܵܐ ܒܗܵܢܵܐ ܨܵܒܹ̇ܐ ܡܵܪܝܵܐ.

¹⁰ܘܐܲܥܒܲܪ ܐܝܼܫܲܝ ܠܫܲܒ̣ܥܵܐ ܒܢܵܘ̈ܗܝ ܩܕ݂ܵܡ ܫܡܘܼܐܹܝܠ. ܘܐܸܡܲܪ ܫܡܘܼܐܹܝܠ ܠܐܝܼܫܲܝ: ܠܵܐ ܨܵܒܹ̇ܐ ܡܵܪܝܵܐ ܒܗܵܠܹܝܢ.

¹¹ܘܐܸܡܲܪ ܫܡܘܼܐܹܝܠ ܠܐܝܼܫܲܝ ܫܸܠܡܘ ܛܠܵܝܹ̈ܐ: ܘܐܸܡܲܪ ܠܹܗ: ܙܥܘܿܪܵܐ ܐܸܫܬ̇ܚܲܪ: ܘܗܵܐ ܪܵܥܹܐ ܥܵـ̈ܢܵܐ. ܘܐܸܡܲܪ ܫܡܘܼܐܹܝܠ ܠܐܝܼܫܲܝ: ܫܲܕܲܪ ܕܒܲܪܝܗܝ: ܡܸܛܠ ܕܠܵܐ ܐܸܗܦܘܿܟ݂ ܥܕܲܡܵܐ ܕܐܵܬܹܐ ܠܗܵܪܟܵܐ.

¹²ܘܫܲܕܲܪ ܐܲܝܬ̇ܝܹܗ: ܘܗ̤ܘ ܣܡܲܩܪܵܝ: ܘܫܲܦܝܼܪ̈ܵܢ ܥܲܝܢܵܘ̈ܗܝ: ܘܫܲܦܝܼܪ ܚܸܙܘܹܗ. ܘܐܸܡܲܪ ܡܵܪܝܵܐ ܠܲܫܡܘܼܐܹܝܠ: ܩܘܼܡ ܡܫܘܿܚܲܝܗܝ ܡܸܛܠ ܕܗܵܢܵܐ ܗ̄ܘ̣.

¹³ܘܲܢܣܲܒ̣ ܫܡܘܼܐܹܝܠ ܩܲܪܢܵܐ ܕܡܸܫܚܵܐ: ܘܡܲܫܚܹܗ ܒܓ̣ܵܘ ܐܲܚܵܘ̈ܗܝ. ܘܐܲܨܠܚܲܬ̤ ܪܘܼܚܹܗ ܕܡܵܪܝܵܐ ܥܲܠ ܕܵܘܝܼܕ݂ ܡ̣ܢ ܗܵܘ̇ ܝܵܘܡܵܐ. ܘܩܵܡ ܫܡܘܼܐܹܝܠ ܘܐܸܙܲܠ ܠܪܵܡܬ̣ܵܐ ܠܒܲܝܬܹ̇ܗ.

¹⁴ܘܪܘܼܚܹܗ ܕܐܲܠܵܗܵܐ ܥܸܒ̣ܪܲܬ̤ ܡ̣ܢ ܫܵܐܘܿܠ. ܘܲܡܕܲܝܒ̣ܵܐ ܠܹܗ ܪܘܼܚܵܐ ܒܝܼܫܬܵܐ: ܡ̣ܢ ܩܕ݂ܵܡ ܡܵܪܝܵܐ.

¹⁵ܘܐܸܡܲܪܘ ܠܹܗ ܥܲܒ̣ܕܵܘ̈ܗܝ ܠܫܵܐܘܿܠ.

¹⁶ܗܵܐ ܥܲܒ̣ܕܲܝ̈ܟ ܩܕ݂ܵܡܲܝܟ: ܢܸܒ̣ܥܘܿܢ ܓܲܒ̣ܪܵܐ ܕܝܵܕܲܥ ܠܡܸܩܲܫ ܒܟܸܢܵܪܵܐ. ܘܡܵܐ ܕܗܵܘܝܵܐ ܥܠܲܝܟ ܪܘܼܚܵܐ ܒܝܼܫܬܵܐ: ܢܸܩܘܿܫ ܒܐܝܼܕ݂ܵܘ̈ܗܝ ܘܢܲܛܐܸܒ̣ ܠܵܟ݂.

¹⁷ܘܐܸܡܲܪ ܫܵܐܘܿܠ ܠܥܵܒ̣ܕܵܘ̈ܗܝ: ܚܙܵܘ ܠܝܼ ܓܲܒ̣ܪܵܐ ܕܫܲܦܝܼܪ ܢܵܩܹܫ: ܘܐܲܝܬܵܐܘܼܗܝ ܠܘܵܬ̣ܝ.

¹⁸ܘܲܥܢܵܐ ܚܲܕ݂ ܡ̣ܢ ܥܠܲܝܡܹ̈ܐ ܘܐܸܡܲܪ. ܗܵܐ ܚܙܹܝܬ̣ ܒܪܵܐ ܠܐܝܼܫܲܝ ܕܡ̣ܢ ܒܹܝܬ̣ ܠܚܸܡ: ܘܝܵܕܲܥ ܠܡܸܩܲܫ: ܘܓܲܢ̄ܒܵܪ ܚܲܝܠܹܗ: ܘܓܲܒ̣ܪܵܐ ܩܪܲܒ̣ܬ̣ܵܢܵܐ ܗ̄ܘ̣: ܘܡܸܬ̣ܒܲܝܲܢ ܒܡܸܠܬ̣ܵܐ: ܘܚܸܙܘܹܗ ܫܲܦܝܼܪ: ܘܡܵܪܝܵܐ ܥܲܡܹܗ.

¹⁹ܘܫܲܕܲܪ ܫܑܵܘܿܠ ܡܲܠܟܵܐ ܠܘܵܬ̣ ܐܝܼܫܲܝ: ܘܐܸܡܲܪ ܠܹܗ: ܫܲܕܲܪ ܠܝܼ ܠܕ݂ܵܘܝܼܕ݂ ܒܪܵܟ݂: ܚܵܫܲܚ ܠܝܼ.

²⁰ܘܲܕ݂ܒܲܪ ܐܝܼܫܲܝ ܚܡܵܪܵܐ: ܘܐܲܛܥܸܢ ܠܲܚܡܵܐ ܘܙܸܩܵܐ ܕܚܲܡܪܵܐ: ܘܓܲܕ݂ܝܵܐ ܚܲܕ݂ ܕܥܸܙܹ̈ܐ: ܘܫܕܲܪ ܒܐܝܼܕܹܗ ܕܕ݂ܵܘܝܼܕ݂ ܒܪܹܗ ܠܫܵܐܘܿܠ.

²¹ܘܐܸܬ̣ܵܐ ܕܵܘܝܼܕ݂ ܠܘܵܬ̣ ܫܵܐܘܿܠ: ܘܩܵܡ ܩܕ݂ܵܡܵܘܗܝ. ܘܪܲܚܡܹܗ ܛܵܒ̣: ܘܲܗܘ̤ܵܐ ܠܹܗ ܫܵܩܹܠ ܡܵܐܢܹ̈ܐ.

²²ܘܲܫܠܲܚ ܫܵܐܘܿܠ ܠܐܝܼܫܲܝ: ܘܐܸܡܲܪ ܠܹܗ: ܢܩܘܼܡ ܕܵܘܝܼܕ݂ ܩܕ݂ܵܡܲܝ: ܡܸܛܠ ܕܐܸܫܟܲܚ ܪ̈ܲܚܡܹܐ ܒܥܲܝ̈ܢܲܝ.

²³ܘܡܵܐ ܕܗܵܘ̇ܝܵܐ ܪܘܼܚܹܗ ܕܡܵܪܝܵܐ ܒܝܼܬܵܐ ܥܲܠ ܫܵܐܘܿܠ: ܢܵܣܹܒ̣ ܕܵܘܝܼܕ݂ ܘܢܵܩܹܫ ܒܟܸܢܵܪܵܐ: ܘܡܲܪܘܲܚ ܠܫܵܐܘܿܠ: ܘܡܲܛܐܸܒ̣ ܠܹܗ: ܘܥܵܒ̣ܪܵܐ ܡܸܢܹܗ ܪܘܼܚܵܐ ܒܝܼܫܬܵܐ.