Read Aramaic Peshita 1 Samuel 17 Bible Online

1 Samuel 17 - Aramaic Peshita bible

1 Samuel 17

¹ܘܟܲܢܸܫܘ ܦܠܸܫ̈ܬܵܝܹܐ ܡܲܫ̱ܪ̈ܝܵܬ̣ܗܘܿܢ ܠܲܩܪܵܒ̣ܵܐ: ܘܐܸܬ̣ܟܲܬܲܫܘ ܒܣܵܘܦܵܐ ܕܲܝܗܘܼܕ݂ܵܐ: ܘܲܫܪܵܘ ܒܹܝܬ̣ ܣܵܘܦܵܐ ܠܒܹܝܬ̣ ܥܲܪܩܵܐ ܒܐܲܦܲܪܣܡܝܼܢ.

²ܘܫܵܐܘܿܠ ܘܓܲܒ̣ܪܹ̈ܐ ܕܝܼܣܪܵܝܹܠ ܐܸܬ̣ܟܲܢܲܫܘ: ܘܲܫܪܵܘ ܒܥܘܼܡܩܵܐ ܕܒܸܛ̱ܡܬ̣ܵܐ. ܘܲܣܕܲܪܘ ܩܪܵܒ̣ܵܐ ܠܘܼܩܒܲܠ ܦܠܸܫ̈ܬܵܝܹܐ.

³ܘܲܦܠܸܫ̈ܬܵܝܹܐ ܩܵܝܡܝܼܢ ܛܘܼܪܵܐ ܡܸܟܵܐ: ܘܝܼܣܪܵܝܹܠ ܩܵܝܡܝܼܢ ܛܘܼܪܵܐ ܡܸܟܵܐ: ܘܢܲܚܠܵܐ ܒܲܝܢܵܬ̣ܗܘܿܢ.

⁴ܘܲܢܦܲܩ ܓܲܒ̣ܪܵܐ ܓܲܢ̄ܒܵܪܵܐ ܡ̣ܢ ܡܲܫܪܝܼܬ̣ܵܐ ܕܲܦܠܸܫ̈ܬܵܝܹܐ: ܓܘܼܠܝܵܕ݂ ܫܡܹܗ: ܡ̣ܢ ܓܵܬ̣: ܪܵܘܡܹܗ ܫܸܬ̣ ܐܲܡ̈ܝܼܢ ܘܲܙܪܸܬ̣.

⁵ܘܣܲܢܘܵܪܬܵܐ ܕܲܢܚܵܫܵܐ ܒܪܹܫܹܗ: ܘܫܸܪܝܵܢܵܐ ܕܛܲܣܵܐ ܠܒ̣ܝܼܫ: ܘܡܲܬ̣ܩܵܠܵܐ ܕܫܸܪܝܵܢܹܗ ܚܲܡܫܵܐ ܐܲܠܦ̈ܝܼܢ ܢܲܬ̣̈ܩܵܠܝܼܢ ܕܲܢܚܵܫܵܐ.

⁶ܘܒܲܪ̈ܙܵܢܩܹܐ ܕܲܢܚܵܫܵܐ ܒܪܸ̈ܓ̣ܠܵܘܗܝ: ܘܛܲܪܦܵܢܣܵܐ ܕܲܢܚܵܫܵܐ ܒܹܝܬ̣ ܟܲܬ̣ܦܵܬܹ̈ܗ.

⁷ܘܩܲܝܣܵܐ ܕܢܲܝܙܟܹܗ ܐܲܝܟ݂ ܢܵܘܠܵܐ ܕܓܲܪ̈ܕܝܵܝܹܐ: ܘܲܫܢܵܢܵܐ ܕܢܲܝܙܟܹܗ ܡ̣ܢ ܫܸܬܡܵܐܐ ܡܲܬ̣̈ܩܵܠܝܼܢ ܕܦܲܪܙܠܵܐ: ܘܫܵܩܹܠ ܣܲܟ̇ܪܵܐ ܐܵܙܹܠ ܩܕ݂ܵܡܵܘܗܝ.

⁸ܘܩܵܡ ܘܲܩܪܵܐ ܠܣܸܕ݂ܪܹ̈ܐ ܕܝܼܣܪܵܝܹܠ: ܘܐܸܡܲܪ ܠܗܘܿܢ: ܠܡܵܢܵܐ ܢܵܦܩܝܼܢ ܐ̄ܬ̇ܘܿܢ ܠܡܸܣܕܲܪ ܩܪܵܒ̣ܵܐ: ܗܵܐ ܐܸܢܵܐ ܦܠܸܫܬܵܝܵܐ: ܘܐܲܢ̄ܬ̇ܘܿܢ ܥܲܒ̣ܕܵܘ̈ܗܝ ܕܫܵܐܘܿܠ: ܓܒ̣ܵܘ ܠܟ݂ܘܿܢ ܓܲܒ̣ܪܵܐ ܕܢܸܦܘܿܩ ܥܠܲܝ.

⁹ܐܸܢ ܐܸܫܟܲܚ ܠܡܸܬ̣ܟܲܬܵܫܘܼ ܥܲܡܝ: ܘܢܸܩܛܠܲܢܝ: ܢܸܗܘܸܐ ܠܟ݂ܘܿܢ ܥܲܒ̣̈ܕܹܐ. ܘܐܸܢ ܐܸܢܵܐ ܐܸܙܟܹ̇ܝܘܗܝ ܘܐܸܩܛܠܝܼܘܗܝ: ܬܗܘܘܿܢ ܠܲܢ ܥܲܒ̣̈ܕܹܐ ܘܬܸܦ̱ܠܚܘܼܢܵܢ.

¹⁰ܘܐܸܡܲܪ ܦܠܸܫܬܵܝܵܐ: ܐܸܢܵܐ ܚܲܣܕܹܬ̣ ܠܣܸܕ݂ܪ̈ܵܘܗܝ ܕܝܼܣܪܵܝܹܠ ܝܵܘܡܵܢܵܐ: ܗܲܒ̣ܘ ܠܝܼ ܓܲܒ̣ܪܵܐ ܢܸܬ̣ܟܲܬܲܫ ܐܲܟ݂ܚ̄ܕ݂ܵܐ.

¹¹ܘܲܫܡܲܥ ܫܵܐܘܿܠ ܘܟ݂ܠܹܗ ܝܼܣܪܵܝܹܠ ܡܸܠܵܘ̈ܗܝ ܕܲܦܠܸܫܬܵܝܵܐ. ܘܙܵܥܘ ܘܲܕ݂ܚܸܠܘ ܛܵܒ̣.

¹²ܘܕ݂ܵܘܝܼܕ݂ ܒܲܪ ܓܲܒ̣ܪܵܐ ܗ̄ܘ̣ܵܐ ܐܵܦܪܬ̣ܵܝܵܐ ܡ̣ܢ ܒܹܝܬ̣ ܠܚܸܡ ܕܲܝܗܘܼܕ݂ܵܐ: ܘܲܫܡܹܗ ܐܝܼܫܲܝ: ܘܠܹܗ ܬܡܵܢܝܵܐ ܒܢ̈ܝܼܢ. ܘܓܲܒ̣ܪܵܐ ܒܝܵܘܡܵܘ̈ܗܝ ܕܫܵܐܘܿܠ: ܣܐܸܒ̣ ܘܥܲܠ ܒܲܫ̈ܢܲܝܵܐ.

¹³ܘܐܸܙܲܠܘ ܬܠܵܬ̣ܵܐ ܒܢܵܘ̈ܗܝ ܕܐܝܼܫܲܝ ܪܵܘܪ̈ܒܹܐ ܒܵܬܲܪ ܫܵܐܘܿܠ ܠܲܩܪܵܒ̣ܵܐ: ܘܲܫܡܵܗܲܝ̈ܗܘܿܢ ܐܸܠܝܵܒ̣ ܒܘܼܟ݂ܪܹܗ: ܘܬܸܢܝܵܢܹܗ ܐܲܒ̣ܝܼܢܵܕ݂ܵܒ̣: ܘܲܬ̣ܠܝܼܬ̣ܵܝܵܐ ܫܲܡܵܐ.

¹⁴ܘܕ݂ܵܘܝܼܕ݂ ܗܘ̤ܵܐ ܙܥܘܿܪܵܐ.

¹⁵ܘܗ̤ܘ ܕܵܘܝܼܕ݂ ܗܦܲܟ݂ ܗ̄ܘ̣ܵܐ ܡ̣ܢ ܠܘܵܬ̣ ܫܵܐܘܿܠ: ܘܐܸܙܲܠ ܠܡܸܥܒܲܪ ܥܵܢܹ̈ܐ ܕܐܲܒ̣ܘܼܗܝ ܒܒܹܝܬ̣ ܠܚܸܡ.

¹⁶ܘܲܩܪܸܒ̣ ܦܠܸܫܬܵܝܵܐ ܡܩܲܕܸܡ ܘܲܡܚܲܫܸܟ݂: ܘܩܵܡ ܐܲܪܒܥܝܼܢ ܝܵܘ̈ܡܝܼܢ.

¹⁷ܘܐܸܡܲܪ ܐܝܼܫܲܝ ܠܕ݂ܵܘܝܼܕ݂ ܒܪܹܗ: ܐܵܘܒܸ̇ܠ ܠܐܲܚܲܝ̈ܟ ܣܐܵܐ ܩܲܠ̈ܝܵܬ̣ܵܐ: ܘܲܥܣܲܪ ܕܠܲܚܡܵܐ: ܘܐܲܪܗܸܛ ܠܡܲܫܪܝܼܬ̣ܵܐ ܠܐܲܚܲܝ̈ܟ.

¹⁸ܘܲܥܣܲܪ ܓܘܼܒ̣̈ܢܹܗ ܗܵܠܹܝܢ ܕܚܠܒ̣ܵܐ: ܐܵܘܒܸ̇ܠ ܠܪܲܒ̇ ܐܲܠܦܵܐ. ܘܐܲܚܲܝ̈ܟ ܦܩܘܿܕ݂ ܒܲܫܠܵܡܵܐ: ܘܲܣܒܲܪܬ̣ܗܘܿܢ ܐܲܝܬܵܐ ܠܝܼ.

¹⁹ܘܫܵܐܘܿܠ ܘܟ݂ܠܗܘܿܢ ܓܲܒ̣ܪܹ̈ܐ ܕܝܼܣܪܵܝܹܠ: ܒܥܘܼܡܩܵܐ ܕܒܸܛܡ̱ܬ̣ܵܐ ܡܸܬ̣ܟܲܬ̇ܫܝܼܢ ܥܲܡ ܦܠܸܫ̈ܬܵܝܹܐ.

²⁰ܘܩܲܕܸܡ ܕܵܘܝܼܕ݂ ܒܨܲܦܪܵܐ: ܘܲܫܒܲܩ ܥܵـ̈ܢܵܐ ܥܲܠ ܢܵܛܘܿܪܵܐ: ܘܲܫܩܲܠ ܘܐܸܙܲܠ ܐܲܝܟ݂ ܕܦܲܩܕܹܗ ܐܝܼܫܲܝ. ܘܐܸܬ̣ܵܐ ܠܡܲܫܪܝܼܬ̣ܵܐ ܠܢܲܚܠܵܐ ܕܢܵܦܹܩ ܠܣܸܕ݂ܪܵܐ: ܘܝܲܒܸ̇ܒ̣ܘ ܠܲܩܪܵܒ̣ܵܐ.

²¹ܘܐܸܣܬ̇ܕ݂ܪܘ ܝܼܣܪܵܝܹܠ ܘܲܦܠܸܫ̈ܬܵܝܹܐ ܣܸܕܪܵܐ ܠܘܼܩܒܲܠ ܣܸܕܪܵܐ.

²²ܘܐܲܢܝܼܚ ܕܵܘܝܼܕ݂ ܡܵܐܢܹ̈ܐ ܡܸܢܹܗ ܥܲܠ ܓܹܢ̄ܒ̣ ܡܵܐܢܹ̈ܐ: ܘܲܪܗܸܛ ܠܣܸܕܪܵܐ: ܘܲܫܐܸܠ ܒܲܫܠܵܡܵܐ ܕܐܲܚܵܘ̈ܗܝ.

²³ܘܥܲܕ݂ ܗ̤ܘ ܡܡܲܠܸܠ ܥܲܡܗܘܿܢ: ܘܗܵܐ ܓܲܒ̣ܪܵܐ ܓܲܢ̄ܒܵܪܵܐ ܣܠܸܩ: ܓܘܼܠܝܵܕ݂ ܦܠܸܫܬܵܝܵܐ ܫܡܹܗ ܡ̣ܢ ܓܵܬ̣: ܡ̣ܢ ܣܸܕܪܵܐ ܕܲܦܠܸܫ̈ܬܵܝܹܐ: ܘܐܸܡܲܪ ܡܸܠܹ̈ܐ ܗܵܠܹܝܢ: ܘܲܫܡܲܥ ܕܵܘܝܼܕ݂.

²⁴ܘܟ݂ܠܗܘܿܢ ܓܲܒ̣ܪܹ̈ܐ ܕܝܼܣܪܵܝܹܠ: ܟܲܕ݂ ܚܙܵܐܘܼܗܝ ܠܓܲܢ̄ܒܵܪܵܐ: ܕܚܸܠܘ ܘܲܥܪܲܩܘ ܡ̣ܢ ܩܕ݂ܵܡܵܘܗܝ.

²⁵ܘܐܸܡܲܪ ܓܲܒ̣ܪܹ̈ܐ ܕܝܼܣܪܵܝܹܠ: ܚܙܲܝܬ̇ܘܿܢ ܓܲܒ̣ܪܵܐ ܗܵܢܵܐ ܕܠܲܡܚܲܣܵܕ݂ܘܼܬܹܗ ܠܝܼܣܪܵܝܹܠ ܣܠܸܩ. ܓܲܒ̣ܪܵܐ ܕܢܸܩܛܠܝܼܘܗܝ: ܢܲܥܬ̇ܪܝܼܘܗܝ ܡܲܠܟܵܐ ܥܘܼܬ̣ܪܵܐ ܪܲܒܵܐ: ܘܒܲܪܬܹܗ ܢܸܬ̇ܠ ܠܹܗ: ܘܲܠܒܹܝܬ̣ ܐܲܒ̣ܘܼܗܝ ܢܸܥܒ̇ܕ݂ ܡܚܲܪܪܵܐ ܒܝܼܣܪܵܝܹܠ.

²⁶ܘܐܸܡܲܪ ܕܵܘܝܼܕ݂ ܠܓܲܒ̣ܪܹ̈ܐ ܕܩܵܝܡܝܼܢ ܠܘܵܬܹܗ: ܡܵܢܵܐ ܢܸܬ̣ܥ̱ܒܸܕ݂ ܠܓܲܒ̣ܪܵܐ ܕܢܸܩܛܠܝܼܘܗܝ ܠܲܦܠܸܫܬܵܝܵܐ ܗܵܢܵܐ ܥܘܼܪܠܵܐ: ܘܢܲܥܒܲܪ ܚܸܣܕܵܐ ܡ̣ܢ ܝܼܣܪܵܝܹܠ: ܡܸܛܠ ܕܡܵܢܵܐ ܗ̄ܘ̣ ܦܠܸܫܬܵܝܵܐ ܗܵܢܵܐ ܥܘܼܪܠܵܐ: ܕܲܡܚܲܣܸܕ݂ ܠܣܸܕ݂ܪ̈ܵܘܗܝ ܕܐܲܠܵܗܵܐ ܚܲܝܵܐ.

²⁷ܘܐܸܡܲܪ ܠܹܗ ܥܲܡܵܐ ܐܲܝܟ݂ ܡܸܠܬ̣ܵܐ ܗܵܕܹܐ: ܕܗܵܟܲܢܵܐ ܢܸܬ̣ܥ̱ܒܸܕ݂ ܠܓܲܒ̣ܪܵܐ ܕܢܸܩܛܠܝܼܘܗܝ.

²⁸ܘܲܫܡܲܥ ܐܸܠܝܵܒ̣ ܐܲܚܘܼܗܝ ܩܲܫܝܼܫܵܐ ܟܲܕ݂ ܐܵܡܲܪ ܠܗܘܿܢ ܠܓܲܒ̣ܪܹ̈ܐ: ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܐܸܠܝܵܒ̣ ܥܲܠ ܕܵܘܝܼܕ݂: ܘܐܸܡܲܪ ܠܹܗ: ܡܵܢܵܐ ܢܸܚܬ̇ܬ̇: ܘܥܲܠ ܡ̇ܢ ܫܒܲܩܬ̇ ܥܵـ̈ܢܵܐ ܗܵܠܹܝܢ ܩܲܠܝܼܠ ܕܲܒ̣ܡܲܕ݂ܒ̇ܪܵܐ. ܐܸܢܵܐ ܝܵܕ݂ܥ ܐ̄ܢܵܐ ܡܲܪܵܚܘܿܬ̣ܵܟ݂ ܘܒ̣ܝܼܫܘܼܬ̣ ܠܸܒܵܟ݂: ܕܲܠܡܸܚܙܵܐ ܗ̄ܘ̣ ܩܪܵܒ̣ܵܐ ܢܸܚܬ̇ܬ̇.

²⁹ܘܐܸܡܲܪ ܕܵܘܝܼܕ݂ ܡܵܢܵܐ ܥܸܒ̣ܕܹܬ̣: ܗܵܫܵܐ ܗܵܐ ܡܸܠܬ̣ܵܐ ܗ̄ܝ̣.

³⁰ܘܐܸܬ̣ܦܢܝܼ ܡ̣ܢ ܠܘܵܬ̣ ܠܓܲܒܵܐ ܐ̄ܚܪܹܢܵܐ: ܘܐܸܡܲܪ ܐܲܝܟ݂ ܡܸܠܬ̣ܵܐ ܗܵܕܹܐ: ܘܐܲܬ̣ܝܼܒ̣ܘܼܗܝ ܥܲܡܵܐ ܦܸܬ̣ܓ̣ܵܡܵܐ ܐܲܝܟ݂ ܦܸܬ̣ܓ̣ܵܡܵܐ ܩܲܕ݂ܡܵܝܵܐ.

³¹ܘܐܸܫܬ̇ܡܲܥ ܡܸܠܹ̈ܐ ܕܡܲܠܸܠ ܕܵܘܝܼܕ݂ ܩܕ݂ܵܡ ܫܵܐܘܿܠ: ܘܕܲܒ̣ܪܹܗ.

³²ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܠܵܐ ܢܸܦܸܠ ܠܸܒܹ̇ܗ ܕܐܵܕ݂ܵܡ ܥܠܵܘܗܝ: ܥܲܒ̣ܕܵܟ݂ ܐܵܙܹܠ ܘܡܸܬ̣ܟܲܬܲܫ ܥܲܡ ܦܠܸܫܬܵܝܵܐ ܗܵܢܵܐ.

³³ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܠܵܐ ܡܸܫܟܲܚ ܐܲܢ̄ܬ̇ ܠܡܹܐܙܲܠ ܥܲܠ ܦܠܸܫܬܵܝܵܐ ܗܵܢܵܐ ܠܡܸܬ̣ܟܲܬܵܫܘܼ ܥܲܡܹܗ: ܡܸܛܠ ܕܛܲܠܝܵܐ ܐܲܢ̄ܬ̇: ܘܗ̤ܘ ܓܲܒ̣ܪܵܐ ܗ̄ܘ̣ ܩܪܲܒ̣ܬܵܢܵܐ ܡ̣ܢ ܛܲܠܝܘܼܬܹܗ.

³⁴ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܪܵܥܹܐ ܗ̄ܘ̣ܵܐ ܥܲܒ̣ܕܵܟ݂ ܠܐܵܒ̣ܝ ܥܵـ̈ܢܵܐ: ܘܐܸܬ̣ܵܐ ܐܲܪܝܵܐ ܘܕܹܒ̣ܵܐ: ܘܲܫܩܲܠܘ ܐܸܡܪܵܐ ܡ̣ܢ ܓܵܙܵܪܵܐ.

³⁵ܘܢܸܦܩܹܬ̣ ܒܵܬ̣ܪܹܗ ܘܲܡܚܹܝܬܹܗ: ܘܐܲܥܕܲܝܼܬܹܗ ܡ̣ܢ ܦܘܼܡܹܗ. ܘܐܸܬ̣ܡܲܪܡܲܪ ܥܠܲܝ: ܘܐܸܚܲܕܬܹ̇ܗ ܒܕܲܩܢܹܗ ܘܲܡܚܹܝܬܹܗ: ܘܲܩܠܹܝܬܹܗ.

³⁶ܘܐܵܦ ܐܲܪܝܵܐ ܘܐܵܦ ܕܸܐܒ̣ܵܐ ܩܛܲܠ ܥܲܒ̣ܕܵܟ݂: ܢܸܗܘܸܐ ܦܠܸܫܬܵܝܵܐ ܗܵܢܵܐ ܥܘܼܪܠܵܐ ܐܲܝܟ݂ ܚܲܕ݂ ܡܸܢܗܘܿܢ. ܡܸܛܠ ܕܚܲܣܸܕ݂ ܠܣܸܕ݂ܪ̈ܵܘܗܝ ܕܐܲܠܵܗܵܐ ܚܲܝܵܐ.

³⁷ܘܐܸܡܲܪ ܕܵܘܝܼܕ݂: ܡܵܪܝܵܐ ܕܦܲܨܣܲܢܝ ܡ̣ܢ ܐܝܼܕ݂ܵܐ ܕܐܲܪܝܵܐ ܘܡ̣ܢ ܐܝܼܕ݂ܵܐ ܕܕܹܐܒ̣ܵܐ: ܗ̤ܘ ܢܦܲܨܹܝܢܝ ܡ̣ܢ ܐܝܼܕ݂ܵܘ̈ܗܝ ܕܲܦܠܸܫܬܵܝܵܐ ܗܵܢܵܐ ܥܘܼܪܠܵܐ. ܘܐܸܡܲܪ ܫܵܐܘܿܠ ܠܕܵܘܝܼܕ݂. ܙܸܠ ܘܡܵܪܝܵܐ ܢܸܗܘܸܐ ܥܲܡܵܟ݂.

³⁸ܘܐܲܠܒܸ̇ܫ ܫܵܐܘܿܠ ܠܕ݂ܵܘܝܼܕ݂ ܡܵܐܢܵܘ̈ܗܝ: ܘܣܵܡ ܣܲܢܘܵܪܬܵܐ ܕܲܢܚܵܫܵܐ ܒܪܹܫܹܗ: ܘܐܲܠܒ̇ܫܹܗ ܫܸܪܝܵܢܵܐ.

³⁹ܘܐܸܣܲܪ ܕܵܘܝܼܕ݂ ܣܲܝܦܹܗ ܠܥܸܠ ܡ̣ܢ ܡܵܐܢܵܘ̈ܗܝ. ܘܠܵܐ ܨܒ̣ܵܐ ܠܡܹܐܙܲܠ ܡܸܛܠ ܕܠܑܵ ܢܲܣܝܼ ܐܸܢܘܿܢ: ܘܐܲܥܒܲܪ ܐܸܢܘܿܢ ܕܵܘܝܼܕ݂ ܡܸܢܹܗ.

⁴⁰ܘܲܢܣܲܒ̣ ܚܘܼܛܪܹܗ ܒܐܝܼܕܹܗ. ܘܲܓ̣ܒ̣ܵܐ ܠܹܗ ܚܲܡܫܵܐ ܫܥܵܥ̈ܝܼܢ ܕܟܹܐܦܵܐ ܡ̣ܢ ܚܵܠܵܐ: ܘܣܵܡ ܐܸܢܘܿܢ ܒܡܵܐܢܵܐ ܕܝܼܠܹܗ ܕܪ̈ܵܥܵܘܵܬ̣ܵܐ: ܒܬܲܪܡܵܠܹܗ: ܘܩܸܠܥܹܗ ܒܐܝܼܕܹܗ. ܘܲܩܪܒ̣ ܠܘܵܬ̣ ܦܠܸܫܬܵܝܵܐ.

⁴¹ܘܗܵܐ ܦܠܸܫܬܵܝܵܐ ܐܸܬ̣ܵܐ ܘܲܩܪܸܒ̣ ܠܘܵܬ̣ ܕܵܘܝܼܕ݂. ܘܓܲܒ̣ܪܵܐ ܫܵܩܹܠ ܣܲܟ̇ܪܵܐ ܩܕ݂ܵܡܵܘܗܝ.

⁴²ܘܐܵܕ݂ܝܼܩ ܦܠܸܫܬܵܝܵܐ ܘܲܚܙܵܐ ܠܕ݂ܵܘܝܼܕ݂ ܘܒܲܣܲܪ ܥܠܵܘܗܝ: ܡܸܛܠ ܕܛܲܠܝܵܐ ܗ̄ܘ̣ܵܐ ܘܲܣܡܲܩܪܵܝ: ܘܫܲܦܝܼܪ ܚܹܙܘܵܐ.

⁴³ܘܐܸܡܲܪ ܦܠܸܫܬܵܝܵܐ ܠܕ݂ܵܘܝܼܕ݂: ܟܲܠܒܵܐ ܐ̄ܢܵܐ ܕܐܵܬܹܐ ܐܲܢ̄ܬ̇ ܥܠܲܝ ܒܚܘܼܛܪܵܐ: ܘܨܲܚܝܼ ܦܠܸܫܬܵܝܵܐ ܠܕ݂ܵܘܝܼܕ݂ ܒܐܲܠܵܗܵܘ̈ܗܝ.

⁴⁴ܘܐܸܡܲܪ ܦܠܸܫܬܵܝܵܐ ܠܕ݂ܵܘܝܼܕ݂: ܬܵܐ ܠܘܵܬ̣ܝ: ܘܐܸܬ̇ܠܝܼܘܗܝ ܒܸܣܪܵܟ݂ ܠܥܵܘܦܵܐ ܕܲܫܡܲܝܵܐ: ܘܲܠܚܲܝ̄ܘܬ̣ܵܐ ܕܕܲܒ̣ܪܵܐ.

⁴⁵ܘܐܸܡܲܪ ܕܵܘܝܼܕ݂ ܠܲܦܠܸܫܬܵܝܵܐ: ܐܲܢ̄ܬܹܐ ܐܲܢ̄ܬ̇ ܥܠܲܝ ܒܣܲܝܦܵܐ ܕܲܒ̣ܢܲܝܙܟ݂ܵܐ: ܘܲܒ̣ܣܲܟ̇ܪܵܐ: ܘܐܸܢܵܐ ܐܵܬܹܐ ܐ̄ܢܵܐ ܥܠܲܝܟ ܒܲܫܡܹܗ ܕܡܵܪܝܵܐ ܐܲܠܵܗܵܐ ܨܒ̣ܵܐܘܼܬ̣. ܕܣܸܕܪܹ̈ܐ ܕܝܼܣܪܵܝܹܠ ܚܲܣܸܕܬ̇.

⁴⁶ܝܵܘܡܵܢܵܐ ܢܲܫ̱ܠܡܵܟ݂ ܡܵܪܝܵܐ ܒܐܝܼܕܲܝ̈: ܘܐܸܩܛܠܵܟ݂ ܘܐܸܣܲܒ̣ ܪܹܫܵܟ݂ ܡܸܢܵܟ݂: ܘܐܸܬܸܠ ܫܠܲـ̈ܕܹܐ ܕܡܲܫ̱ܪ̈ܝܵܬ̣ܵܐ ܕܲܦܠܸܫ̈ܬܵܝܹܐ ܝܵܘܡܵܢܵܐ: ܠܚܲܝ̄ܘܬ̣ܵܐ ܕܕܲܒ̣ܪܵܐ: ܘܲܠܥܵܘܦܵܐ ܕܲܫܡܲܝܵܐ.

⁴⁷ܘܢܸܕܲܥܘܼܢ ܟܠܵܗ̇ ܐܲܪܥܵܐ: ܕܐܝܼܬ̣ ܐܲܠܵܗܵܐ ܒܝܼܣܪܵܝܹܠ. ܘܢܸܕܲܥܘܼܢ ܟܠܹܗ ܟܸܢܫܵܐ ܗܵܢܵܐ: ܕܠܵܐ ܗ̄ܘ̣ܵܐ ܒܣܲܝܦܵܐ ܘܲܒ̣ܢܲܝܙܟ݂ܵܐ ܦܵܪܹܩ ܡܵܪܝܵܐ: ܡܸܛܠ ܕܲܕ݂ܡܵܪܝܵܐ ܗ̄ܘ̣ ܩܪܵܒ̣ܵܐ: ܘܢܲܫܠܸܡܟ݂ܘܿܢ ܒܐܝܼܕܲܝ̈ܢ.

⁴⁸ܘܗܵܐ ܦܠܸܫܬܵܝܵܐ ܐܸܬ̣ܵܐ ܘܲܩܪܸܒ̣ ܠܐܘܼܥܹܗ ܕܕ݂ܵܘܝܼܕ݂. ܘܐܸܣܬܲܪܗܲܒ̣ ܕܵܘܝܼܕ݂: ܘܲܪܗܸܛ ܠܣܸܕ݂ܪܵܐ ܠܐܘܼܪܥܹܗ ܕܲܦܠܸܫܬܵܝܵܐ.

⁴⁹ܘܐܵܘܫܸܛ ܕܵܘܝܼܕ݂ ܐܝܼܕܹܗ ܠܡܵܐܢܹܗ: ܘܲܢܣܲܒ̣ ܡ̣ܢ ܬܲܡܵܢ ܟܹܐܦܵܐ: ܘܐܲܟ݂ܪܸܟ݂ ܘܲܡܚܵܝܗܝ ܠܲܦܠܫܬܵܝܵܐ ܒܹܝܬ̣ ܥܲܝܢܵܘ̈ܗܝ: ܘܛܸܒ̣ܥܲܬ̤ ܟܹܐܦܵܐ ܒܹܝܬ̣ ܥܲܝܢܵܘ̈ܗܝ: ܘܲܢܦܲܠ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ.

⁵⁰ܘܲܥܫܸܢ ܕܵܘܝܼܕ݂ ܡ̣ܢ ܦܠܸܫܬܵܝܵܐ ܒܩܸܠܥܵܐ ܘܲܒ̣ܟܹܐܦܵܐ: ܘܲܡܚܵܝܗܝ ܠܲܦܠܸܫܬܵܝܵܐ ܘܩܲܛܠܹܗ. ܘܣܲܝܦܵܐ ܠܲܝܬ̇ ܒܐܝܼܕܹܗ ܕܕ݂ܵܘܝܼܕ݂.

⁵¹ܘܲܪܗܸܛ ܕܵܘܝܼܕ݂ ܘܩܵܡ ܥܲܠ ܦܠܸܫܬܵܝܵܐ: ܘܲܢܣܲܒ̣ ܣܲܝܦܹܗ ܘܫܲܡܛܹܗ ܡ̣ܢ ܚܸܠܬܹܗ: ܘܩܲܛܠܹܗ: ܘܲܦܣܲܩ ܪܹܫܹܗ. ܘܲܚܙܵܘ ܦܠܸܫ̈ܬܵܝܹܐ ܕܡܝܼܬ̣ ܓܲܢ̄ܒܵܪܗܘܿܢ ܘܲܥܪܲܩܘ.

⁵²ܘܩܵܡܘ ܐ̄ܢܵܫܵܐ ܕܝܼܣܪܵܝܹܠ: ܘܕܲܝܗܘܼܕ݂ܵܐ: ܘܐܸܬ̣ܠܲܒܲܒ̣ܘ ܘܲܪܕܲܦܘ ܠܲܦܠܸܫ̈ܬܵܝܹܐ: ܥܕܲܡܵܐ ܠܡܲܥܠܵܢܵܐ ܕܢܲܚܠܵܐ: ܘܲܥܕܲܡܵܐ ܠܢܲܚܠܵܐ ܕܥܸܩܪܘܿܢ. ܘܲܢܦܲܠܘ ܩܛܝܼ̈ܠܹܐ ܕܲܦܠܸܫ̈ܬܵܝܹܐ ܒܐܘܼܪܚܵܐ ܕܲܫܪܝܼܢ: ܘܲܥܕܲܡܵܐ ܠܓ̣ܵܬ̣: ܘܲܥܕܲܡܵܐ ܠܥܸܩܪܘܿܢ.

⁵³ܘܲܗܦܲܟ݂ܘ ܒ̈ܢܲܝ ܝܼܣܪܵܝܹܠ ܕܪܵܕ݂ܦܝܼܢ ܗ̄ܘ̣ܵܘ ܒܵܬܲܪ ܦܠܸܫ̈ܬܵܝܹܐ: ܘܒܲܙܘ ܡܲܫܪ̈ܝܵܬ̣ܗܘܿܢ.

⁵⁴ܘܲܢܣܲܒ̣ ܕܵܘܝܼܕ݂ ܪܹܫܹܗ ܕܲܦܠܸܫܬܵܝܵܐ ܘܐܲܝـܬ̇ܝܹܗ ܠܐܘܿܪܸܫܠܸܡ: ܘܡܵܐܢܵܘ̈ܗܝ ܣܵܡ ܒܡܲܫܟ̇ܢܹܗ.

⁵⁵ܘܟܲܕ݂ ܚܙܵܝܗܝ ܫܵܐܘܿܠ ܠܕ݂ܵܘܝܼܕ݂ ܕܲܢܦܲܩ ܠܐܘܼܪܥܹܗ ܕܲܦܠܸܫܬܵܝܵܐ: ܐܸܡܲܪ ܠܐܲܒ̣ܢܝܼܪ ܪܲܒ ܚܲܝܠܹܗ: ܒܲܪ ܡܲܢܘܼ ܛܲܠܝܵܐ ܗܵܢܵܐ.

⁵⁶ܘܐܸܡܲܪ ܐܲܒ̣ܢܝܼܪ: ܚܲܝܵܐ ܗ̄ܝ̣ ܢܲܦ̮ܫܵܟ݂ ܡܲܠܟܵܐ ܕܠܵܐ ܝܵܕܲܥ ܐ̄ܢܵܐ. ܘܐܸܡܲܪ ܡܲܠܟܵܐ: ܫܲܐܸܠ ܐܲܢ̄ܬ̇ ܒܲܪ ܡܲܢܘܼ ܥܠܲܝܡܵܐ ܗܵܢܵܐ.

⁵⁷ܘܟܲܕ݂ ܗܦܲܟ݂ ܕܵܘܝܼܕ݂ ܟܲܕ݂ ܩܲܛܠܹܗ ܠܲܦܠܸܫܬܵܝܵܐ: ܕܲܒ̣ܪܹܗ ܐܲܒ̣ܢܝܼܪ: ܘܐܲܥܠܹܗ ܩܕ݂ܵܡ ܫܵܐܘܿܠ: ܘܪܸܫܹܗ ܕܲܦܠܸܫܬܵܝܵܐ ܒܐܝܼܕܹܗ.

⁵⁸ܘܐܸܡܲܪ ܠܹܗ ܫܵܐܘܿܠ: ܒܲܪ ܡ̇ܢ ܐܲܢ̄ܬ̇ ܛܲܠܝܵܐ. ܘܐܸܡܲܪ ܠܹܗ ܕܵܘܝܼܕ݂: ܒܲܪ ܥܲܒ̣ܕܵܟ݂ ܐܝܼܫܲܝ ܕܡ̣ܢ ܒܹܝܬ̣ ܠܚܸܡ.