Read Aramaic Peshita 1 Samuel 19 Bible Online

1 Samuel 19 - Aramaic Peshita bible

1 Samuel 19

¹ܘܐܸܡܲܪ ܫܵܐܘܿܠ ܠܝܘܿܢܵܬ̣ܵܢ ܒܪܹܗ ܘܲܠܟ݂ܠܗܘܿܢ ܥܲܒ̣ܕܵܘ̈ܗܝ ܠܡܸܩܛܠܹܗ ܠܕ݂ܵܘܝܼܕ݂: ܘܝܘܿܢܵܬ̣ܵܢ ܒܲܪ ܫܵܐܘܿܠ ܨܵܒܹܐ ܗ̄ܘ̣ܵܐ ܒܕ݂ܵܘܝܼܕ݂ ܛܵܒ̣.

²ܘܚܵܘܝܼ ܝܘܿܢܵܬ̣ܵܢ ܠܕ݂ܵܘܝܼܕ݂: ܘܐܸܡܲܪ ܠܹܗ: ܒܵܥܹܐ ܫܵܐܘܿܠ ܐܵܒ̣ܝ ܠܡܸܩܛܠܵܟ݂: ܐܸܙܕܲܗ̄ܪ ܘܬܸܒ̣ ܒܛܘܼܫܝܵܐ: ܘܐܸܬ̇ܛܲܫܵܐ.

³ܘܐܸܢܵܐ ܗܵܐ ܢܵܦܸܩ ܐ̄ܢܵܐ ܘܩܵܐܹܡ ܐ̄ܢܵܐ ܥܲܠ ܓܹܢ̄ܒ̣ ܐܵܒ̣ܝ ܒܚܲܩܠܵܐ: ܕܐܲܢ̄ܬ̇ ܒܵܗ̇: ܘܐܸܢܵܐ ܐܹܡܲܪ ܥܠܲܝܟ ܠܐܵܒ̣ܝ: ܘܐܸܚܙܸܐ ܡܵܢܵܘ ܒܪܸܥܝܵܢܹܗ: ܘܐܹܚܵܘܹܝܟ݂.

⁴ܘܐܸܡܲܪ ܝܘܿܢܵܬ̣ܵܢ ܥܲܠ ܕܵܘܝܼܕ݂ ܛܵܒ̣ܬ̣ܵܐ ܠܫܑܵܘܿܠ ܐܲܒ̣ܘܼܗܝ: ܘܐܸܡܲܪ ܠܹܗ: ܠܵܐ ܢܸܚܛܸܐ ܡܲܠܟܵܐ ܒܥܲܒ̣ܕܹܗ ܕܵܘܝܼܕ݂: ܡܸܛܠ ܕܠܵܐ ܚܛܵܐ ܠܵܟ݂: ܘܐܵܦ ܥܒ̣ܵܕ݂ܵܘ̈ܗܝ ܣܵܦܩܝܼܢ ܠܵܟ݂.

⁵ܕܣܵܡ ܢܲܦ̮ܫܹܗ ܒܐܝܼܕܲܝ̈ܟ: ܘܲܩܛܲܠ ܠܲܦܠܸܫܬܵܝܵܐ: ܘܲܥܒܲܕ݂ ܡܵܪܝܵܐ ܦܘܼܪܩܵܢܵܐ ܪܲܒܵܐ ܠܟ݂ܠܹܗ ܝܼܣܪܵܝܹܠ ܒܐܝܼܕܹܗ: ܘܲܚܙܲܝܬ̇ ܘܲܚܕ݂ܝܼܬ̇. ܘܗܵܫܵܐ ܠܡܵܢܵܐ ܚܵܛܹܐ ܐܲܢ̄ܬ̇ ܒܲܕ݂ܡܵܐ ܙܲܟܵܝܵܐ: ܘܩܵܛܹܠ ܐܲܢ̄ܬ̇ ܠܹܗ ܠܕ݂ܵܘܝܼܕ݂ ܡܲܓܵܢ.

⁶ܘܲܫܡܲܥ ܫܵܐܘܿܠ ܒܩܵܠܹܗ ܕܝܘܿܢܵܬ̣ܵܢ ܒܪܹܗ: ܘܝܼܡܵܐ ܫܵܐܘܿܠ ܘܐܸܡܲܪ: ܚܲܝ ܗ̄ܘ̣ ܡܵܪܝܵܐ ܐܸܢ ܢܡܘܡܼܬ̣.

⁷ܘܲܩܪܵܐ ܝܘܿܢܵܬ̣ܵܢ ܠܕ݂ܵܘܝܼܕ݂: ܘܚܵܘܝܹܗ ܟܠܗܹܝܢ ܡܸܠܹ̈ܐ ܗܵܠܹܝܢ. ܘܐܥܠܹܗ ܠܘܵܬ̣ ܫܵܐܘܿܠ: ܘܲܗܘ̤ܵܐ ܠܘܵܬܹܗ ܐܲܝܟ݂ ܕܐܸܬ̣ܡܵܠܝ ܘܐܲܝܟ݂ ܕܲܡܢܵܬ̣ܡܵܠܝ.

⁸ܘܐܵܘܣܸܦ ܩܪܵܒ̣ܵܐ ܠܡܸܗܘܵܐ: ܘܲܢܦܲܩ ܕܵܘܝܼܕ݂ ܘܐܸܬ̣ܟܲܬܲܫ ܥܲܡ ܦܠܸܫ̈ܬܵܝܹܐ: ܘܲܡܚܵܐ ܒܗܘܿܢ ܡܚܘܿܬ̣ܵܐ ܪܲܒ̇ܬ̣ܵܐ: ܘܲܥܪܲܩܘ ܡ̣ܢ ܩܕ݂ܵܡܵܘܗܝ.

⁹ܘܲܗܘ̤ܵܐ ܪܘܼܚܹܗ ܕܡܵܪܝܵܐ ܒܝܼܫܬܵܐ ܥܲܠ ܫܵܐܘܿܠ: ܘܗ̤ܘ ܝܵܬܹܒ̣ ܒܒܲܝܬܹܗ: ܘܡܘܿܪܵܢܝܼܬܹܗ ܒܐܝܼܕܹܗ: ܘܕ݂ܵܘܝܼܕ݂ ܢܵܩܹܫ ܩܕ݂ܵܡܵܘܗܝ.

¹⁰ܘܲܒ̣ܥܵܐ ܫܵܐܘܿܠ ܠܡܸܡ̱ܚܝܵܗ̇ ܠܡܘܿܪܵܢܝܼܬ̣ܵܐ ܒܕ݂ܵܘܝܼܕ݂ ܘܒܸܐܣܬ̣ܵܐ: ܘܲܥܪܲܩ ܠܹܗ ܡ̣ܢ ܩܕ݂ܵܡ ܫܵܐܘܿܠ: ܘܲܡܚܵܗ̇ ܠܡܘܿܪܵܢܝܼܬ̣ܵܐ ܒܐܸܣܬ̣ܵܐ: ܕܵܘܝܼܕ݂ ܥܪܲܩ ܘܐܸܫܬܵܘܙܲܒ̣ ܒܠܸܠܝܵܐ ܗܵܘ.

¹¹ܘܫܲܕܲܪ ܫܵܐܘܿܠ ܐܝܼܙܓ̈ܕܹܐ ܠܒܲܝܬܹܗ ܕܕ݂ܵܘܝܼܕ݂: ܠܡܸܛܪܹܗ ܘܲܠܡܸܛܠܹܗ ܒܨܲܦܪܵܐ: ܘܚܵܘܝܲܬ̤ ܠܕ݂ܵܘܝܼܕ݂ ܡܲܠܟܸ̇ܠ ܐܲܢ̄ܬ̇ܬܹܗ: ܘܐܸܡܪܲܬ̤ ܠܹܗ: ܕܐܸܢ ܡܦܲܨܸܐ ܐܲܢ̄ܬ̇ ܢܲܦ̮ܫܵܟ݂: ܡܚܵܪ ܡܵܐܹܬ̣ ܐܲܢ̄ܬ̇.

¹²ܘܐܲܚܸܬ̣ܬܹܗ ܡܲܠܟܸ̇ܠ ܠܕ݂ܵܘܝܼܕ݂ ܡ̣ܢ ܟܵܘܬ̣ܵܐ: ܘܲܥܪܲܩ ܘܐܸܙܲܠ ܘܐܸܬ̣ܦܲܨܝܼ.

¹³ܘܢܸܣܒܲܬ̤ ܡܲܠܟܸ̇ܠ ܨܲܠܡܵܐ ܘܐܲܪܡܝܲܬ̤ ܒܥܲܪܣܵܐ: ܘܡܸܫܟܵܐ ܕܥܸܙܹ̈ܐ ܣܵܡܲܬ̤ ܐܸܣܵܕ݂ܵܘ̈ܗܝ: ܘܟܲܣܝܲـܬ̤ ܒܡܲܪܛܘܼܛܵܐ.

¹⁴ܘܫܲܕܲܪ ܫܵܐܘܿܠ ܐܝܼܙܓܲـ̈ܕܹܐ ܠܡܸܕ݂ܒ̇ܪܹܗ ܠܕ݂ܵܘܝܼܕ݂: ܘܐܸܡܪܲܬ̤ ܟܪܝܼܗ ܗ̄ܘ̣.

¹⁵ܘܫܲܕܲܪ ܫܵܐܘܿܠ ܐܝܼܙܓܲـ̈ܕܹܐ ܠܡܸܚܙܝܹܗ ܠܕ݂ܵܘܝܼܕ݂: ܘܐܸܡܲܪ ܐܲܣܩܘܼܗܝ ܠܘܵܬ̣ ܒܥܲܪܣܵܐ ܠܡܸܩܛܠܹܗ.

¹⁶ܘܐܸܬ̣ܵܘ ܐܝܼܙܓܲـ̈ܕܹܐ ܘܗܵܐ ܨܲܠܡܵܐ ܒܥܲܪܣܵܐ: ܘܡܸܫܟܵܐ ܕܥܸܙܹ̈ܐ ܐܸܣܵܕ݂ܵܘ̈ܗܝ.

¹⁷ܘܚܵܘܝܼܘ ܠܫܵܐܘܿܠ: ܘܐܸܡܲܪ ܫܵܐܘܿܠ ܠܡܲܟܸ̇ܠ. ܠܡܵܢܵܐ ܗܵܟܲܢܵܐ ܢܟܲܠܬ̇ܝܼܢܝ: ܘܫܕܲܪܬ̇ܝ ܒܥܸܠܕܒ̣ܵܒ̣ܝ ܘܐܸܬ̣ܦܲܠܲܛ. ܘܐܸܡܪܲܬ̤ ܡܲܠܟܸ̇ܠ ܠܫܵܐܘܿܠ: ܗ̤ܘ ܐܸܡܲܪ ܠܝܼ ܫܲܕܪܝܼܢܝ ܕܠܵܐ ܐܸܩܛܠܹܟ݂ܝ.

¹⁸ܘܕ݂ܵܘܝܼܕ݂ ܥܪܲܩ ܘܐܸܬ̣ܦܲܠܲܛ: ܘܐܸܬ̣ܵܐ ܠܘܵܬ̣ ܫܡܘܼܐܹܝܠ ܠܪܵܡܬ̣ܵܐ: ܘܚܵܘܝܹܗ ܟܠ ܕܲܥܒܲܕ݂ ܠܹܗ ܫܵܐܘܿܠ: ܘܐܸܙܲܠ ܗ̤ܘ ܘܲܫܡܘܼܐܹܝܠ: ܘܝܼܬ̤ܒ̣ܘ ܒܝܘܿܢܲܬ̣ ܕܲܒ̣ܪܵܡܬ̣ܵܐ.

¹⁹ܘܚܵܘܝܼܘ ܠܫܵܐܘܿܠ: ܘܐܸܡܪܘ ܠܹܗ: ܗܵܐ ܕܵܘܝܼܕ݂ ܒܝܘܿܢܵܬ̣ ܕܲܒ̣ܪܵܡܬ̣ܵܐ.

²⁰ܘܫܲܕܲܪ ܫܵܐܘܿܠ ܐܝܼܙܓܲـ̈ܕܹܐ ܠܡܸܕ݂ܒ̇ܪܹܗ ܠܕ݂ܵܘܝܼܕ݂. ܘܲܚܙܵܘ ܕܲܢܒ̣ܝܹ̈ܐ ܕܡܸܬ̣ܢܲܒܹ̇ܝܢ: ܘܲܫܡܘܼܐܹܝܠ ܩܵܐܹܡ ܥܠܲܝܗܘܿܢ: ܘܲܗܘ̤ܵܬ̣ ܥܲܠ ܐܝܼܙܓܲܕܵܘ̈ܗܝ ܕܫܵܐܘܿܠ ܪܘܼܚܹܗ ܕܐܲܠܵܗܵܐ: ܘܐܸܬ̣ܢܲܒ̇ܝܼܘ ܐܵܦ ܗܸܢܘܿܢ.

²¹ܘܚܵܘܝܼܘ ܠܫܵܐܘܿܠ. ܘܫܲܕܲܪ ܬܘܼܒ̣ ܐܝܼܙܓܲـ̈ܕܹܐ ܐ̄ܚܪ̈ܵܢܹܐ: ܘܐܸܬ̣ܢܲܒ̇ܝܼܘ ܐܵܦ ܗܸܢܘܿܢ. ܘܐܵܦ ܫܵܐܘܿܠ ܘܫܲܕܲܪ ܐܝܼܙܓـ̈ܕܹܐ ܬܠܝܼܬ̣ܵܝܹ̈ܐ: ܘܐܸܬ̣ܢܲܒ̇ܝܼܘ ܐܵܦ ܗܸܢܘܿܢ.

²²ܘܐܸܙܲܠ ܐܵܦ ܗ̤ܘ ܠܪܵܘܬ̣ܵܐ: ܘܡܲܛܝܼ ܠܓ̣ܘܼܒܵܐ ܪܲܒܵܐ ܕܲܒ̣ܣܵܘܦܵܐ: ܘܫܵܐܘܿܠ ܐܸܡܲܪ: ܐܲܝܟܵܘ ܫܡܘܼܐܹܝܠ ܘܕ݂ܵܘܝܼܕ݂. ܘܐܸܡܲܪܘ ܠܹܗ: ܗܵܐ ܒܝܘܿܢܲܬ̣ ܕܲܒ̣ܪܵܡܬ̣ܵܐ.

²³ܘܐܸܙܲܠ ܠܬܲܡܵܐ ܠܝܘܿܢܲܬ̣ ܕܲܒ̣ܪܵܡܬ̣ܵܐ: ܘܲܗܘ̤ܵܬ̣ ܐܵܦ ܥܠܵܘܗܝ ܪܘܼܚܹܗ ܕܐܲܠܵܗܵܐ: ܘܐܵܙܹܠ ܡܹܐܙܲܠ. ܘܡܸܬ̣ܢܲܒܸ̇ܐ: ܥܕܲܡܵܐ ܕܲܡܛܵܐ ܠܝܘܿܢܲܬ̣ ܕܲܒ̣ܪܵܡܬ̣ܵܐ.

²⁴ܘܲܫܠܲܚ ܐܵܦ ܗ̤ܘ ܡܵܐܢܵܘ̈ܗܝ: ܘܐܸܬ̣ܢܲܒ̇ܝܼ ܩܕ݂ܵܡ ܫܡܘܼܐܹܝܠ: ܘܲܢܦܲܠ ܥܲܪܛܸܠ ܟܠܹܗ ܐܝܼܡܵܡܵܐ ܗܵܘ̇ ܘܟ݂ܠܹܗ ܠܸܠܝܵܐ: ܡܸܛܠ ܗܵܢܵܐ ܐܵܘܪܝܼܢ ܕܗܵܐ ܐܵܦ ܫܵܐܘܿܠ ܒܲܢܒ̣ܝܹ̈ܐ.