Read Aramaic Peshita 1 Samuel 2 Bible Online

1 Samuel 2 - Aramaic Peshita bible

1 Samuel 2

¹ܘܨܲܠܝܲܬ̤ ܚܲܢܵܐ ܘܐܸܡܪܲܬ̤: ܥܫܸܢ ܠܹܒ̇ܝ ܒܡܵܪܝܵܐ: ܘܐܸܬ̇ܬ̇ܪܝܼܡܲܬ̤ ܩܲܪܢܝ: ܘܐܸܬ̣ܦܬܲܚ ܦܘܼܡܝ ܥܲܠ ܒܥܸܠܕܒ̣ܵܒܲܝ̈: ܡܸܛܠ ܕܚܲܕܝܼܬܵܢܝ ܒܦܘܼܪܩܵܢܵܟ݂.

²ܠܲܝܬ̇ ܕܩܕ̇ܝܼܫ ܐܲܝܟ݂ ܡܵܪܝܵܐ: ܡܸܛܠ ܕܠܲܝܬ̇ ܠܒܲܪ ܡܸܢܵܟ݂: ܘܠܲܝܬ̇ ܕܬܲܩܝܼܦ ܐܲܝܟ݂ ܐܲܠܵܗܲܢ.

³ܠܵܐ ܬܲܣܓ̇ܘܿܢ ܠܲܡܡܲܠܵܠܘܼ ܪܵܘܪ̈ܒ̣ܵܬ̣ܵܐ: ܘܠܵܐ ܢܸܦܘܿܩ ܛܠܘܼܡܝܵܐ ܡ̣ܢ ܦܘܼܡܟ݂ܘܿܢ. ܡܸܛܠ ܕܕ݂ܝܼܕܲܥܬ̣ܵܐ ܗ̄ܘ̣ ܡܵܪܝܵܐ: ܘܠܵܐ ܬܲܩ̈ܢܵܢ ܨܸܢ̈ܥܵܬ̣ܵ ܩܕ݂ܵܡܵܘܗܝ.

⁴ܩܸܫ̈ܬܵܬ̣ܵܐ ܕܓܲܢ̄ܒܵܪܹ̈ܐ ܢܸܬ̇ܬܲܒ̇ܪܵܢ: ܘܲܟ݂ܪ̈ܝܼܗܹܐ ܐܸܬ̣ܥܲܫܲܢܘ ܒܚܲܝܠܵܐ.

⁵ܘܣܒ̣̈ܥܹܐ ܒܠܲܚܡܵܐ ܐܸܬ̣̱ܐܓܲܪܘ: ܘܟܲܦܢܹ̈ܐ ܐܵܘܬܲܪܘ. ܥܩܲܪܬ̣ܵܐ ܝܸܠܕܲܬ̣ ܘܣܸܒ̣ܥܲܬ̤: ܘܣܲܓܝܲܐܬ̣ ܒ̈ܢܲܝܵܐ ܨܸܕ݂ܝܲܬ̤.

⁶ܡܵܪܝܵܐ ܗ̄ܘ̣ ܡܡܝܼܬ̣ ܘܡܲܚܸܐ: ܘܡܲܚܸܬ̣ ܠܲܫܝܘܿܠ ܘܡܲܣܸܩ.

⁷ܡܵܪܝܵܐ ܗ̄ܘ̣ ܡܡܲܣܟܸ̇ܢ ܘܡܲܥܬܲܪ: ܘܲܡܫܲܦܸܠ ܘܐܵܦ ܡܪܝܼܡ.

⁸ܡܪܝܼܡ ܡ̣ܢ ܥܲܦܪܵܐ ܠܡܸܣܟܹ̇ܢܵܐ: ܘܡ̣ܢ ܩܸܩ̱ܠܬܵܐ ܡܩܝܼܡ ܠܒ̣ܵܝܫܵܐ: ܠܡܵܘܬܵܒ̣ܘܼܬܹܗ ܥܲܡ ܤܵܘ̱ܪ̈ܒ̣ܵܢܹܐ: ܘܟ݂ܘܼܪܣܝܵܐ ܕܐܝܼܩܵܪܵܐ ܢܵܘܪܸܬ̣ ܐܸܢܘܿܢ. ܛܲܠܸܠ ܡܵܪܝܵܐ ܥܘܼܡ̈ܩܹܝܗ̇ ܕܐܲܪܥܵܐ: ܘܣܵܡ ܥܠܲܝܗܘܿܢ ܬܹܒܹܝܠ.

⁹ܪܸ̈ܓ̃ܠܹܐ ܕܚܲܣܝܵܘ̈ܗܝ ܢܢܲܛܪ: ܘܪ̈ܲܫܝܼܥܹܐ ܒܚܸܫܘܿܟ݂ܵܐ ܢܸܫܬܲܬ̇ܩܘܼܢ: ܡܸܛܠ ܕܠܵܐ ܗ̄ܘ̣ܵܐ ܒܚܲܝܠܹܗ ܡܸܬ̣ܓܲܢ̄ܒܲܪ ܓܲܢ̄ܒܵܪܵܐ.

¹⁰ܡܵܪܝܵܐ ܢܸܬܒܲܪ ܡܡܲܪܡܪ̈ܵܢܵܘܗܝ: ܘܲܥܠܲܝܗܘܿܢ ܒܲܫܡܲܝܵܐ ܢܸܪܥܲܡ. ܡܵܪܝܵܐ ܢܕ݂ܘܼܢ ܥܸܒ̣ܪܹ̈ܝܗ̇ ܕܐܲܪܥܵܐ: ܘܢܸܬܸܠ ܥܘܼܫܢܵܐ ܠܡܲܠܟܹ̇ܗ: ܘܲܢܪܝܼܡ ܩܲܪܢܵܐ ܕܲܡܫܝܼܚܹܗ.

¹¹ܘܐܸܙܲܠ ܗܲܠܩܵܢܵܐ ܠܪܵܡܬ̣ܵܐ ܠܒܲܝܬܹ̇ܗ: ܗ̤ܘ ܘܚܲܢܵܐ ܐܲܢ̄ܬ̇ܬܹܗ. ܘܛܲܠܝܵܐ ܫܡܘܼܐܹܝܠ ܡܫܲܡܸܫ ܗ̄ܘ̣ܵܐ ܩܕ݂ܵܡ ܡܵܪܝܵܐ ܩܕ݂ܵܡ ܥܹܠܝܼ ܟܵܗܢܵܐ.

¹²ܘܲܒ̣̈ܢܲܝ ܥܹܠܝܼ ܒ̈ܢܲܝ ܚܛܵܐ: ܠܵܐ ܝܵܕ݂ܥܝܼܢ ܗ̄ܘ̣ܵܐ ܠܡܵܪܝܵܐ.

¹³ܘܲܥܒܲܕ݂ܘ ܠܗܘܿܢ ܡܲܫ̱ܠܝܵܐ ܕܲܬ̣ܵܠܬ̣ ܫܸܢ̈ܝܵܢ. ܘܙܸܕ݂ܩܵܐ ܕܟ݂ܵܗ̈ܢܹܐ ܢܵܣܒ̇ܝܼܢ ܡ̣ܢ ܥܲܡܵܐ: ܘܡ̣ܢ ܟܠ ܓܒܲܪ ܕܕ݂ܵܒܲܚ ܕܸܒ̣ܚܬ̣ܵܐ. ܘܐܵܬܹܐ ܗ̄ܘ̣ܵܐ ܛܲܠܝܵܐ ܕܟ݂ܵܗܢܵܐ ܡܵܐ ܕܡܸܬ̣ܒܲܫܲܠ ܒܸܣܪܵܐ: ܘܡܲܫܠܝܵܐ ܕܲܬ̣ܠܵܬ̣ ܫܸܢ̈ܢܵܢ ܒܐܝܼܕܹܗ.

¹⁴ܘܡܵܘܫܸܛ ܗ̄ܘ̣ܵܐ ܠܩܲܕ݂ܣܵܐ: ܐܵܘ ܠܐܝܼܪܵܐ: ܐܵܘ ܠܩܲܪܕ݂ܵܠܵܐ: ܐܵܘ ܠܩܸܕ݂ܪܵܐ. ܘܟ݂ܠ ܕܡܲܣܸܩ ܡܲܫܠܝܵܐ: ܢܵܣܹܒ̣ ܠܹܗ ܟܵܗܢܵܐ. ܗܵܟܲܢܵܐ ܥܵܒ̣ܕܝܼܢ ܗ̄ܘ̣ܵܘ ܠܟ݂ܠܹܗ ܝܼܣܪܵܝܹܠ: ܕܐܵܬܹܝܢ ܗ̄ܘ̣ܘ ܠܬܲܡܵܢ ܠܫܝܼܠܘܿ.

¹⁵ܘܐܵܦ ܥܲܕ݂ܠܵܐ ܢܲܣܩܘܼܢ ܕܸܒ̣ܚܲܝ̈ ܕܸܒ̣ܚܬ̣ܵܐ: ܐܵܬܹܐ ܗ̄ܘ̣ܵܐ ܛܲܠܝܵܐ ܕܟ݂ܵܗܢܵܐ: ܘܐܵܡܲܪ ܠܓܲܒ̣ܪܵܐ ܕܕ݂ܵܒܲܚ: ܗܲܒ̣ ܒܸܣܪܵܐ ܠܲܡܛܵܘܵܝܘܼ ܠܟ݂ܵܗܢܵܐ. ܠܵܐ ܢܵܣܹܒ̣ ܐ̄ܢܵܐ ܡܸܢܵܟ݂ ܒܸܣܪܵܐ ܡܒܲܫܠܵܐ: ܬܸܠܵܐ ܚܲܝܵܐ.

¹⁶ܐܵܡܲܪ ܠܹܗ ܓܲܒ̣ܪܵܐ: ܡܲܣܵܩܘܼ ܢܲܣܩܘܼܢ ܝܵܘܡܵܢܵܐ: ܘܣܲܒ̣ ܠܵܟ݂ ܡܵܐ ܕܪܵܓܵܐ ܢܲܦ̮ܫܵܟ݂. ܘܐܵܡܲܪ ܠܹܗ: ܗܵܫܵܐ ܗ̄ܘ̣ ܝܵܗܹ̇ܒ̣ ܐܲܢ̄ܬ̇ܘ ܘܐܸܢ ܠܵܐ: ܢܵܣܹܒ̣ ܐ̄ܢܵܐ ܒܲܩܛܝܼܪܵܐ.

¹⁷ܘܲܗܘ̤ܵܬ̣ ܚܛܝܼܬ̣ܵܐ ܕܲܛ̈ܠܵܝܹܐ ܪܲܒܵܐ ܛܵܒ̣ ܩܕ݂ܵܡ ܡܵܪܝܵܐ: ܕܐܲܪܓܸܙܘ ܓܲܒ̣ܪܹ̈ܐ ܩܕ݂ܵܡ ܡܵܪܝܵܐ.

¹⁸ܘܲܫܡܘܼܐܹܝܠ ܛܲܠܝܵܐ ܡܫܲܡܸܫ ܗ̄ܘ̣ܵܐ ܩܕ݂ܵܡ ܡܵܪܝܵܐ: ܘܲܠܒ̣ܝܼܫ ܗ̄ܘ̣ܵܐ ܦܸܕܬ̣ܵܐ ܕܒ̣ܘܼܨܵܐ.

¹⁹ܘܲܦܪܝܼܣܵܐ ܙܥܘܿܪܵܐ ܥܸܒ̣ܕܲܬ̤ ܠܹܗ ܐܸܡܹܗ: ܘܐܲܣܩܲܬ̤ ܠܹܗ ܡ̣ܢ ܥܸܕܵܢ ܠܥܸܕܵܢ: ܟܲܕ݂ ܣܸܠܩܲܬ̤ ܥܲܡ ܒܲܥܠܵܗ̇ ܠܲܡܕܲܒܵܚܘܼ ܕܸܒ̣ܚܹ̈ܐ ܕܢܕ݂ܪܵܗ̇.

²⁰ܘܒܲܪܲܟ ܥܹܠܝܼ ܠܗܲܠܩܵܢܵܐ ܘܠܲܐܢ̄ܬ̇ܬܹܗ: ܘܐܸܡܲܪ: ܢܸܬܸ̇ܠ ܠܵܟ݂ ܡܵܪܝܵܐ ܙܲܪܥܵܐ ܡ̣ܢ ܐܲܢ̄ܬ̇ܬ̣ܵܐ ܗܵܕܹܐ: ܚܠܵܦ ܫܸܐܠܬ̣ܵܐ ܕܲܫܐܸܠܬ̇ ܠܡܵܪܝܵܐ. ܘܐܸܙܲܠܘ ܠܐܲܬ̣ܪܗܘܿܢ.

²¹ܘܡܵܪܝܵܐ ܦܩܲܕ݂ ܠܚܲܢܵܐ: ܘܒܸܛܢܲܬ̤ ܘܝܼܠܕܲܬ̤ ܬܠܵܬ̣ܵܐ ܒܢ̈ܝܼܢ ܘܬܲܪܬܹܝܢ ܒ̈ܢܵܢ. ܘܲܪܒ̣ܵܐ ܛܲܠܝܵܐ ܫܡܘܼܐܹܝܠ ܩܕ݂ܵܡ ܡܵܪܝܵܐ.

²²ܘܥܹܠܝܼ ܣܐܸܒ̣ ܛܵܒ̣. ܘܲܫܡܲܥ ܟܠ ܕܥܵܒ̣ܕܲܝ̣ܢ ܒܢܵܘ̈ܗܝ ܠܟ݂ܠܹܗ ܝܼܣܪܵܝܹܠ: ܘܕ݂ܡܨܲܥܪܝܼܢ ܢܸܫܹ̈ܐ ܕܲܡܨܲܠ̈ܝܵܢ ܒܡܲܫܟܲܢ ܙܲܒ̣ܢܵܐ.

²³ܘܐܸܡܲܪ ܠܗܘܿܢ: ܠܡܵܢܵܐ ܥܵܒ̣ܕܲܝܼܢ ܐ̄ܢܬ̇ܘܿܢ ܐܲܝܟ݂ ܡܸܠܹ̈ܐ ܗܵܠܹܝܢ: ܕܫܵܡܲܥ ܐ̄ܢܵܐ ܛܲܒ̇ܟ݂ܘܿܢ ܒܝܼܫܵܐ ܡ̣ܢ ܟܠܹܗ ܥܲܡܵܐ ܗܵܢܵܐ.

²⁴ܠܵܐ ܒ̈ܢܲܝ: ܡܸܛܠ ܕܠܵܐ ܗ̄ܘ݂ܵܐ ܫܲܦܝܼܪ ܫܸܡܥܵܐ ܗܵܢܵܐ: ܕܫܵܡܲܥ ܐ̄ܢܵܐ ܕܲܡܒܲܛܠܝܼܢ ܐ̄ܢܬ̇ܘܿܢ ܠܥܲܡܹܗ ܕܡܵܪܝܵܐ.

²⁵ܐܸܢ ܢܸܚܛܸܐ ܓܲܒ̣ܪܵܐ ܒܓܲܒ̣ܪܵܐ: ܢܸܒ̣ܥܸܐ ܡ̣ܢ ܩܕ݂ܵܡ ܡܵܪܝܵܐ. ܘܐܸܢ ܒܡܵܪܝܵܐ ܢܸܚܛܸܐ ܓܲܒ̣ܪܵܐ: ܡ̣ܢ ܡ̇ܢ ܢܸܒ̣ܥܸܐ. ܘܠܵܐ ܫܡܲܥܘ ܠܩܵܠܵܐ ܕܐܲܒ̣ܘܼܗܘܿܢ: ܡܸܛܠ ܕܲܨܒ̣ܵܐ ܡܵܪܝܵܐ ܕܲܢܡܝܼܬ̣ ܐܸܢܘܿܢ.

²⁶ܘܛܲܠܝܵܐ ܫܡܘܼܐܹܝܠ ܐܵܙܹܠ ܘܝܵܪܹܒ̣ ܛܵܒ̣: ܘܛܵܐܹܒ̣ ܩܕ݂ܵܡ ܡܵܪܝܵܐ: ܘܐܵܦ ܩܕ݂ܵܡ ܒܢܲܝ̈ܢܵܫܵܐ.

²⁷ܘܐܸܬ̣ܵܐ ܓܲܒ̣ܪܵܐ ܕܡܵܪܝܵܐ ܠܘܵܬ̣ ܥܹܠܝܼ: ܘܐܸܡܲܪ ܠܹܗ: ܗܵܟܲܢܵܐ ܐܵܡܲܪ ܡܵܪܝܵܐ: ܡܸܬ̣ܓ̇ܠܵܝܘܼ ܐܸܬ̣ܓ̇ܠܝܼܬ̣ ܥܲܠ ܒܹܝܬ̣ ܐܲܒ̣ܘܼܟ݂: ܟܲܕ݂ ܗܘ̤ܵܐ ܒܡܸܨܪܹܝܢ ܕܒܹܝܬ̣ ܦܸܪܥܘܿܢ.

²⁸ܘܲܓ̣ܒܹܝܬܹܗ ܠܝܼ ܡ̣ܢ ܟܠܗܘܿܢ ܫܲܒ̣̈ܛܹܐ ܕܝܼܣܪܵܝܹܠ ܠܟ݂ܵܗܢܵܐ: ܕܢܸܣܲܩ ܥܲܠ ܡܲܕ݂ܒܲܚ: ܘܲܢܣܝܼܡ ܒܸܣܪܵܐ ܩܕ݂ܵܡܲܝ: ܘܢܸܫܩܘܿܠ ܦܸܕܬ̣ܵܐ. ܘܝܸܗ̄ܒܹܬ̇ ܠܒܹܝܬ̣ ܐܲܒ̣ܘܼܟ݂: ܟܠܗܘܿܢ ܩܘܼܪ̈ܒܵܢܹܐ ܕܲܒ̣̈ܢܲܝ ܝܼܣܪܵܝܹܠ.

²⁹ܠܡܵܢܵܐ ܐܲܥܠܝܼܬ̇ܘܿܢ ܒܕܸܒ̣̈ܚܲܝ ܘܲܒ̣ܩܘܼܪ̈ܒܵܢܲܝ ܕܦܲܩܕܹܬ̣ ܡ̣ܢ ܡܲܕ݂ܒ̇ܪܵܐ: ܘܝܲܩܲܪܬ̇ ܒܢܲܝ̈ܟ ܡܹܢܝ: ܕܬܸܓ̣ܒ̇ܘܿܢ ܡ̣ܢ ܪܹܫ ܟܠܗܘܿܢ ܩܘܼܪ̈ܒܵܢܹܐ: ܕܲܒ̣̈ܢܲܝ ܝܼܣܪܵܝܹܠ ܥܲܡܝ.

³⁰ܡܸܛܠ ܗܵܢܵܐ ܗܵܟܲܢܵܐ ܐܵܡܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܡܹܐܡܲܪ ܐܸܡܪܹܬ̣: ܕܒܲܝܬܵܟ݂ ܘܒܹܝܬ̣ ܐܲܒ̣ܘܼܟ݂ ܢܫܲܡܫܘܼܢ ܩܕ݂ܵܡܝ ܥܕܲܡܵܐ ܠܥܵܠܲܡ. ܘܗܵܫܵܐ ܐܵܡܲܪ ܡܵܪܝܵܐ ܚܵܣ ܠܝܼ: ܡܸܛܠ ܕܲܡܝܲܩܪ̈ܵܢܲܝ ܐܹܝܲܩܲܪ: ܘܫܵܝܘܿܛܲܝ̈ ܢܸܨܛܲܥܪܘܼܢ.

³¹ܗܵܐ ܝܵܘ̈ܡܵܬ̣ܵܐ ܐܵܬܹܝܢ: ܐܵܡܲܪ ܡܵܪܝܵܐ: ܘܐܸܓ̣ܕܘܿܢ ܕܪܵܥܵܟ݂ ܘܲܕ݂ܪܵܥܹܗ ܕܐܲܒ̣ܘܼܟ݂. ܘܠܵܐ ܢܸܗܘܸܐ ܣܵܒ̣ܵܐ ܒܒܲܝܬܵܟ݂.

³²ܘܕ݂ܵܐܚܸܕ݂ ܬܲܩܕܵܐ ܒܡܲܥܡܪܵܟ݂: ܘܟ݂ܠ ܕܡܲܛܸܐܒ̣ ܒܝܼܣܪܵܝܹܠܘ ܘܠܵܐ ܢܸܗܘܸܐ ܣܵܒ̣ܵܐ ܒܒܲܝܬܵܟ݂ ܟܠܗܘܿܢ ܝܵܘ̈ܡܵܬ̣ܵܐ.

³³ܘܓܲܒ̣ܪܵܐ ܠܵܐ ܐܲܥܢܸܕ݂ ܠܵܟ݂ ܡ̣ܢ ܡܲܕ݂ܒܲܚܝ: ܠܡܲܚܫܵܟ݂ܘܼ ܥܲܝܢܲܝ̈ܟ: ܘܠܲܡܕܲܝܵܒ̣ܘܼ ܢܲܦ̮ܫܵܟ݂. ܘܟ݂ܠܵܗ̇ ܡܲܪܒ̇ܝܼܬ̣ܵܐ ܕܒܲܝܬܵܟ݂ ܢܡܘܼܬ̣ܘܼܢ ܓܲܒ̣ܪܹ̈ܐ.

³⁴ܘܗܵܕܹܐ ܠܵܟ݂ ܐܵܬ̤ܵܐ ܕܐܵܬ̣ܝܵܐ ܥܲܠ ܬܪܹܝܢ ܒܢܲܝ̈ܟ: ܥܲܠ ܚܵܦܢܝܼ ܘܥܲܠ ܦܝܼܢܚܸܣ: ܒܝܵܘܡܵܐ ܚܲܕ݂ ܢܡܘܼܬ̣ܘܼܢ ܬܪ̈ܲܝܗܘܿܢ.

³⁵ܘܠܲܩܝܼܡ ܠܝܼ ܟܵܗܢܵܐ ܕܲܡܗܲܝܡܲܢ ܐܲܝܟ݂ ܠܹܒ̇ܝ: ܘܐܲܝܟ݂ ܕܲܒ̣ܠܹܒ̇ܝ ܘܲܒ̣ܢܲܦ̮ܫܝ ܢܸܥܒܸ̇ܕ݂: ܘܐܸܒ̣ܢܸܐ ܠܹܗ ܒܲܝܬܵܐ ܡܗܲܝ̱ܡܢܵܐ: ܘܲܢܗܲܠܸܟ݂ ܩܕ݂ܵܡܲܝ ܡܫܝܼܚܝ ܟܠܗܘܿܢ ܝܵܘ̈ܡܵܬ̣ܵܐ.

³⁶ܘܢܸܗܘܸܐ ܟܠ ܕܡܸܫܬ̇ܚܲܪ ܒܒܲܝܬܵܟ݂: ܬܹܐܬܸܐ ܠܡܸܣܓܲܕ݂ ܠܹܗ: ܠܐܲܓ̣ܝܼܪܬܵܐ ܕܟܸܣܦܵܐ: ܘܠܲܓ̣ܪܝܼܨܬܵܐ ܕܠܲܚܡܵܐ: ܘܢܹܐܡܲܪ ܫܲܕܲܪܲܝܢܝ ܠܘܵܬ̣ ܚܲܕ݂ ܡ̣ܢ ܟܵܗ̈ܢܹܐ ܕܐܸܠܥܲܣ ܥܘܼܡܨܵܐ ܕܠܲܚܡܵܐ.