Read Aramaic Peshita 1 Samuel 20 Bible Online

1 Samuel 20 - Aramaic Peshita bible

1 Samuel 20

¹ܘܲܥܪܲܩ ܕܵܘܝܼܕ݂ ܡ̣ܢ ܝܘܿܢܵܬ̣ ܕܲܒ̣ܪܵܡܬ̣ܵܐ: ܘܐܸܬ̣ܵܐ ܘܐܸܡܲܪ ܩܕ݂ܵܡ ܝܘܿܢܵܬܲܢ: ܡܵܢܵܐ ܥܸܒ̣ܕܹܬ̣: ܘܡܵܢܲܐܗ̄ܝܼ ܣܲܟ݂ܠܘܼܬ̣ܝ: ܘܡܵܢܵܐ ܗ̄ܘ̣ ܣܘܼܪܚܵܡܢܝ: ܩܕ݂ܵܡ ܐܲܒ̣ܘܼܟ݂ ܕܒܟܵܥܹܐ ܢܲܦ̮ܫܝ.

²ܘܐܸܡܲܪ ܠܹܗ ܝܘܿܢܵܬ̣ܵܢ: ܚܵܣ ܠܵܟ݂: ܠܵܐ ܬܡܘܼܬ̣: ܗܵܐ ܠܵܐ ܥܵܒܹܕ݂ ܐܵܒ̣ܝ ܡܸܠܬ̣ܵܐ ܪܲܒ̇ܬ̣ܵܐ ܘܡܸܠܬ̣ܵܐ ܙܥܘܿܪܬܵܐ ܕܠܵܐ ܓܵܠܹܐ ܠܝܼ: ܘܡܸܛܠ ܡܵܢܵܐ ܛܲܫܝܼ ܐܵܒ̣ܝ ܡܸܠܬ̣ܵܐ ܗܵܕܹܐ: ܠܝܬ̇ ܗܵܕܹܐ.

³ܘܝܼܡܵܐ ܠܹܗ ܕܵܘܝܼܕ݂: ܘܐܸܡܲܪ: ܡܸܛܠ ܕܝܼܕܲܥ ܐܲܒ̣ܘܼܟ݂ ܕܐܸܫܟ̇ܚܹܬ̣ ܪܲܚܡܹܐ ܒܥܲܝ̈ܢܲܝܟ: ܐܸܡܲܪ ܕܠܵܐ ܢܸܕܲܥ ܝܘܿܢܵܬ̣ܵܢ ܒܗܵܕܹܐ ܕܠܵܐ ܬܸܟ݂ܪܸܐ ܠܹܗ. ܒܪܲܡ ܚܲܝ ܗ̄ܘ̣ ܡܵܪܝܵܐ ܘܚܲܝܵܐ ܗ̄ܝ̣ ܢܲܦ̮ܫܵܟ݂: ܐܸܢܵܐ ܐܸܢ ܦܣܵܥܬ̣ܵܐ ܚܕ݂ܵܐ ܗܘ̤ܵܬ̣ ܒܲܝܢܲܝ ܠܡܵܘܬܵܐ.

⁴ܘܐܸܡܲܪ ܝܘܿܢܵܬ̣ܵܢ ܠܕ݂ܵܘܝܼܕ݂: ܡܵܐ ܕܐܵܡܪܵܐ ܢܲܦ̮ܫܵܟ݂ ܐܸܥܒܸ̇ܕ݂ ܠܵܟ݂.

⁵ܘܐܸܡܲܪ ܕܵܘܝܼܕ݂ ܠܝܘܿܢܵܬ̣ܵܢ: ܗܵܐ ܪܹܫ ܝܲܪܚܵܐ ܗ̄ܘ̣ ܡܚܵܪ: ܘܐܸܢܵܐ ܡܸܣܬ̇ܡܵܟ݂ܘܼ ܡܸܣܬ̇ܡܸܟ݂ ܐ̄ܢܵܐ ܩܕ݂ܵܡ ܐܲܒ̣ܘܼܟ݂ ܠܡܸܠܥܲܣ: ܘܲܬ̣ܫܲܕܪܲܢܝ ܠܡܸܛܫܵܐ ܒܚܲܩܠܵܐ: ܥܕܲܡܵܐ ܠܪܲܡܫܵܐ ܬܠܝܼܬ̣ܵܝܵܐ.

⁶ܐܸܢ ܡܸܦܩܕܲܢܝ ܐܲܒ̣ܘܼܟ݂: ܐܸܡܲܪ ܠܹܗ: ܡܸܫܬ̇ܐܵܠܘ ܐܸܫܬ̇ܐܸܠ ܡܹܢܝ ܕܵܘܝܼܕ݂: ܕܢܹܐܙܲܠ ܠܒܹܝܬ̣ ܠܚܸܡ ܩܪܝܼܬܹܗ: ܡܸܛܠ ܕܕܸܒ̣ܚܹ̈ܐ ܕܝܵܘ̈ܡܵܬ̣ܵܐ ܬܲܡܵܢ ܠܟ݂ܠܵܗ̇ ܫܲܪܒ̇ܬ̣ܵܐ.

⁷ܐܸܢ ܗܵܟܲܢܵܐ ܢܹܐܡܲܪ: ܛܵܒ̣ ܫܲܦܝܼܪ: ܫܠܵܡܵܐ ܗ̄ܘ̣ ܠܥܲܒ̣ܕܵܟ݂. ܘܐܸܢ ܡܸܬ̣ܒ̇ܐܵܫܘܼ ܢܸܬ̣ܒܐܸܫ ܠܹܗ: ܕܲܥ ܕܓܸܪܡܲܬ̤ ܒܝܼܫܬܵܐ ܡ̣ܢ ܠܘܵܬܹܗ.

⁸ܘܲܥܒܸܕ݂ ܛܲܝܒ̇ܘܼܬ̣ܵܐ ܗܵܕܹܐ ܥܲܡ ܥܲܒ̣ܕܵܟ݂: ܡܸܛܠ ܕܒܲܩܝܵܡܹܗ ܕܡܵܪܝܵܐ ܐܲܥܸܠܬ̇ ܠܥܲܒ̣ܕܵܟ݂ ܥܲܡܵܟ݂. ܘܐܸܢ ܐܝܼܬ̣ ܠܝܼ ܣܲܟ݂ܠܘܼܬ̣ܵܐ: ܩܛܘܿܠܲܝܢܝ ܐܲܢ̄ܬ̇: ܘܲܠܘܵܬ̣ ܐܲܒ̣ܘܼܟ݂ ܠܵܐ ܬܵܘܒܠܲܢܝ.

⁹ܘܐܸܡܲܪ ܝܘܿܢܵܬ̣ܵܢ ܚܵܣ ܠܵܟ݂. ܡܸܛܠ ܕܐܸܢ ܡܸܕܲܥ ܐܸܕܲܥ ܕܓܸܪܡܲܬ̤ ܠܵܗ̇ ܒܝܼܫܬܵܐ ܡ̣ܢ ܠܘܵܬ̣ ܐܵܒ̣ܝ: ܐܹܬܸܐ ܠܘܵܬ̣ܵܟ݂ ܘܐܹܚܵܘܹܝܟ݂.

¹⁰ܘܐܸܡܲܪ ܕܵܘܝܼܕ݂ ܠܝܘܿܢܵܬ̣ܵܢ: ܡܲܢܘܼ ܢܚܵܘܹܝܢܝ : ܕܲܠܡܵܐ ܢܸܥܢܹܝܟ݂ ܐܲܒ̣ܘܼܟ݂ ܩܲܫܝܵܐܝܼܬ̣.

¹¹ܘܐܸܡܲܪ ܠܹܗ ܝܘܿܢܵܬ̣ܵܢ ܠܕ݂ܵܘܝܼܕ݂: ܬܵܐ ܢܸܦܘܿܩ ܠܚܲܩܠܵܐ. ܘܲܢܦܲܩܘ ܬܪ̈ܲܝܗܘܿܢ ܠܚܲܩܠܵܐ.

¹²ܘܐܸܡܲܪ ܝܘܿܢܵܬ̣ܵܢ ܠܕ݂ܵܘܝܼܕ݂: ܢܸܣܗܲܪ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܐܸܢ ܠܵܐ ܐܸܒ̣ܕܲܩܝܼܘܗܝ ܠܐܵܒ̣ܝ ܐܲܝܟ݂ ܗܵܢܵܐ: ܡܚܵܪ ܠܲܬ̣ܠܵܬ̣ ܫܵܥ̈ܝܼܢ: ܐܸܢ ܛܵܒ̣ ܠܵܟ݂: ܘܗܵܝܕܹ̇ܝܢ ܐܸܫܠܘܿܚ ܠܵܟ݂ ܘܐܸܓ̣ܠܸܐ ܠܵܟ݂.

¹³ܗܵܟܲܢܵܐ ܢܸܥܒܸ̇ܕ݂ ܡܵܪܝܑܵ ܠܝܘܿܢܵܬ̣ܵܢ: ܘܗܵܟܲܢܵܐ ܢܵܘܣܸܦ ܠܹܗ: ܐܸܢ ܐܸܛܲܒ̣ ܡ̣ܢ ܐܵܒ̣ܝ ܒܝܼܫܬܵܐ ܕܲܥܠܲܝܟ: ܐܸܓ̣ܠܸܐ ܠܵܟ݂: ܘܐܹܫܲܕܪܲܟ݂ ܘܬܹܐܙܲܠ ܒܲܫܠܵܡܵܐ: ܘܢܸܗܘܸܐ ܡܵܪܝܵܐ ܥܲܡܵܟ݂ ܐܲܝܟ݂ ܕܲܗܘ̤ܵܐ ܥܲܡ ܐܵܒ̣ܝ.

¹⁴ܘܲܠܘܲܝ ܕܹܝܢ ܟܲܕ݂ ܐܸܢܵܐ ܚܲܝ: ܐܸܠܵܐ ܥܒܸܕ݂ ܥܲܡܝ ܛܲܝܒ̇ܘܼܬܹܗ ܕܐܲܠܵܗܑܵ ܥܲܕ݂ܠܵܐ ܐܹܡܘܼܬ̣.

¹⁵ܘܠܵܐ ܬܸܥܢܲܕ݂ ܛܲܝܒ̇ܘܼܬ̣ܵܟ݂ ܡ̣ܢ ܒܲܝܬ̇ܝ ܠܥܵܠܲܡ. ܘܟܲܕ݂ ܢܵܘܒܸܕ݂ ܡܵܪܝܵܐ ܠܲܒ̣ܠܕܒ̣ܵܒ̣ܵܘ̈ܗܝ ܕܕ݂ܵܘܝܼܕ݂ ܡ̣ܢ ܐܲܦܲܝ̈ ܐܲܪܥܑܵܐ.

¹⁶ܢܩܘܼܡ ܝܘܿܢܵܬ̣ܵܢ ܥܲܡ ܕܒܹܝܬ̣ ܕܵܘܝܼܕ݂: ܘܢܸܬ̣ܒܲܥ ܡܵܪܝܵܐ ܡ̣ܢ ܒܥܸܠܕܒ̣ܵܒ̣ܵܘ̈ܗܝ ܕܕ݂ܵܘܝܼܕ݂.

¹⁷ܘܐܵܘܣܸܦ ܝܘܿܢܵܬ̣ܵܢ ܠܡܵܘܡܵܝܘܼܬܹܗ ܠܕ݂ܵܘܝܼܕ݂ ܒܲܕ݂ܪܵܚܹܡ ܗ̄ܘ̣ܵܐ ܠܹܗ: ܡܸܛܠ ܕܪܸܚ̱ܡܬ̣ܵܐ ܕܢܦ̮ܫܹܗ ܪܲܚܡܹܵܗ.

¹⁸ܘܐܸܡܲܪ ܠܹܗ ܝܘܿܢܵܬ̣ܵܢ: ܡܚܵܪ ܪܹܫ ܝܲܪܚܵܐ ܗ̄ܘ̣: ܘܡܸܬ̣ܦܩܸܕ݂ ܐܲܢ̄ܬ̇ ܡܸܛܠ ܕܡܸܬ̣ܦܩܸܕ݂ ܡܵܘܬ̇ܒ̣ܵܟ݂.

¹⁹ܘܠܲܬ̣ܠܵܬ̣ ܫܵܥ̈ܝܼܢ ܡܸܬ̣ܒ̇ܥܑܸ ܐܲܢ̄ܬ̇ ܛܵܒ̣ ܘܬܹܐܬܹܐ ܠܕ݂ܘܼܟ̇ܬ̣ܵܐ ܬܲܡܵܢ ܒܝܵܘܡܵܐ ܕܲܡܚܵܪ: ܘܬܸܬܸ̇ܒ̣ ܥܲܠ ܓܹܢ̄ܒ̣ ܟܹܐܦܵܐ ܗܵܝ̇.

²⁰ܘܐܸܢܵܐ ܗܵܐ ܬܵܪܹܨ ܐ̄ܢܵܐ ܬܠܵܬ̣ܵܐ ܓܹܐܪ̈ܝܼܢ: ܠܡܸܫܕܵܐ ܠܡܲܪܡܵܝܘܼ ܢܝܼܫܵܐ.

²¹ܘܗܵܐ ܡܫܲܕܲܪ ܐ̄ܢܵܐ ܛܲܠܝܵܐ ܐܵܙܹܠ ܠܵܩܹܛ ܓܹܐܪܹ̈ܐ. ܐܸܢ ܐܹܡܲܪ ܠܛܲܠܝܵܐ ܕܗܵܐ ܓܹܐܪܹ̈ܐ ܡܸܢܵܟ݂ ܘܲܠܟ݂ܵܐ: ܣܲܒ̣ ܐܸܢܘܿܢ ܘܬ̣ܵܐ: ܕܲܥ ܘܲܚܙܝܼ ܕܲܫܠܵܡ ܠܵܟ݂: ܘܠܲܝܬ̇ ܡܸܠܵܐ ܒܝܼܫܵܐ: ܚܲܝ ܗ̄ܘ̣ ܡܵܪܝܵܐ.

²²ܘܐܸܢ ܗܵܟܲܢܵܐ ܐܹܡܲܪ ܠܛܲܠܝܵܐ: ܕܗܵܐ ܓܹܐܪܹ̈ܐ ܡܸܢܵܟ݂ ܘܲܠܗܲܠ: ܙܸܠ: ܡܸܛܠ ܕܫܲܕܪܵܟ݂ ܡܵܪܝܵܐ.

²³ܒܦܸܬ̣ܓ̣ܵܡܵܐ ܕܡܲܠܸܠ̄ܢ ܐܸܢܵܐ ܘܐܲܢ̄ܬ̇: ܗܵܐ ܡܵܪܝܵܐ ܐܲܠܵܗܑܵܐ ܒܲܝܢܲܝ ܘܠܵܟ݂ ܥܕܲܡܵܐ ܠܥܵܠܲܡ.

²⁴ܘܐܸܬ̇ܛܲܫܝܼ ܕܵܘܝܼܕ݂ ܒܚܲܩܠܵܐ: ܘܲܗܘ̤ܵܐ ܪܹܫ ܝܲܪܚܵܐ: ܘܐܸܣܬ̇ܡܸܟ݂ ܡܲܠܟܵܐ ܥܲܠ ܠܲܚܡܵܐ ܠܡܸܠܥܲܣ.

²⁵ܘܐܸܣܬ̇ܡܸܟ݂ ܡܲܠܟܵܐ ܥܲܠ ܣܡܵܟܹܗ ܐܲܝܟ݂ ܕܲܒ̣ܟ݂ܠܙܒܲܢ: ܥܲܠ ܓܹܢ̄ܒ̣ ܐܸܣܬ̣ܵܐ. ܘܩܵܡ ܝܘܿܢܵܬ̣ܵܢ ܘܐܸܣܬ̇ܡܸܟ݂: ܘܐܲܒ̣ܢܝܼܪ ܥܲܠ ܓܹܢ̄ܒ̣ ܫܑܵܘܿܠ: ܘܐܸܬ̣ܦܲܩܕܲܬ̤ ܕܘܼܟ̇ܬܹܗ ܕܕ݂ܵܘܝܼܕ݂.

²⁶ܘܠܵܐ ܐܸܡܲܪ ܫܵܐܘܿܠ ܡܸܕ݂ܡ ܒܝܵܘܡܵܐ ܗܵܘ̇: ܡܸܛܠ ܕܐܸܡܲܪ ܕܓܸܕ݂ܫܵܐ ܗ̄ܘ̣: ܕܲܠܡܵܐ ܕܟܸܐ ܗ̄ܘ̣: ܐܵܘ ܕܲܠܡܵܐ ܠܵܐ ܗ̄ܘ̣ܵܐ ܕܟܸܐ.

²⁷ܘܲܗܘ̤ܵܐ ܠܝܵܘܡܵܐ ܐ̄ܚܪܹܢܵܐ ܕܪܹܫ ܝܲܪܚܵܐ: ܘܐܸܬ̣ܦܲܩܕܲܬ̤ ܕܘܼܟ̇ܬܹܗ ܕܕ݂ܵܘܝܼܕ݂. ܘܐܸܡܲܪ ܫܵܐܘܿܠ ܠܝܘܿܢܵܬ̣ܵܢ ܒܪܹܗ: ܡܸܛܠ ܡܵܢܵܐ ܠܵܐ ܐܸܬ̣ܵܐ ܒܲܪ ܐܝܼܫܲܝ: ܠܵܐ ܐܸܬ̣ܡܵܠܝ ܘܠܵܐ ܝܵܘܡܵܢܵܐ: ܠܠܲܚܡܵܐ.

²⁸ܘܲܥܢܵܐ ܝܘܿܢܵܬ̣ܵܢ ܘܐܸܡܲܪ ܠܫܵܐܘܿܠ ܐܲܒ̣ܘܼܗܝ: ܡܸܫܬ̇ܐܵܠܘܼ ܐܸܫܬ̇ܐܸܠ ܡܹܢܝ ܕܵܘܝܼܕ݂ ܥܕܲܡܵܐ ܠܒܹܝܬ̣ ܠܚܸܡ ܩܪܝܼܬܹܗ.

²⁹ܘܐܸܡܲܪ ܫܲܕܲܪܝܢܝ ܡܸܛܠ ܕܕܸܒ̣ܚܬܵܐ ܕܫܲܪܒ̇ܬ̣ܵܐ ܐܝܼܬ̣ ܠܲܢ ܒܲܩܪܝܼܬ̣ܵܐ: ܘܦܩܕܲܢܝ ܘܐܸܡܲܪ ܠܝܼ: ܐܵܚܝ: ܐܸܢ ܐܸܫܟ̇ܚܹܬ̣ ܪ̈ܲܚܡܹܐ ܒܥܲܝܢܲܝ̈ܟ: ܐܹܙܲܠ ܐܸܚܙܸܐ ܠܐܲܚܲܝ̈: ܡܸܛܠ ܗܵܢܵܐ ܠܵܐ ܐܸܬ̣ܵܐ ܠܦܵܬ̣ܘܿܪܵܐ ܕܡܲܠܟܵܐ.

³⁰ܘܐܸܬ̣ܚܲܡܲܬ̣ ܪܘܼܓ̣ܙܹܗ ܕܫܵܐܘܿܠܘܐܸܡܲܪ ܠܹܗ: ܒܲܪ ܚܲܣܝܼܪܲܬ̣ ܡܲܪܕܘܼܬ̣ܵܐ: ܠܵܐ ܝܵܕ݂ܵܥ ܐ̄ܢܵܐ: ܕܨܵܒܹ̇ܐ ܐܲܢ̄ܬ̇ ܒܲܒ̣ܪܹܗ ܕܐܝܼܫܲܝ: ܠܒܸܗܬ̇ܬ̣ܵܟ݂ ܘܲܠܒܸܗܬܲܬ̣ ܦܘܼܪܣܵܝܗ̇ ܕܐܸܡܵܟ݂.

³¹ܡܸܛܠ ܕܟ݂ܠܗܘܿܢ ܝܵܘ̈ܡܵܬ̣ܵܐ ܕܒܲܪ ܐܝܼܫܲܝ ܚܲܝ ܥܲܠ ܐܲܪܥܵܐ: ܠܵܐ ܬܸܬ̣ܩܲܢ ܐܲܢ̄ܬ̇ ܘܡܲܠܟ̇ܘܼܬ̣ܵܟ݂. ܗܵܫܵܐ ܐܹܫܲܕܲܪ ܐܸܕ݂ܒ̇ܪܝܼܘܗܝ ܠܝܼ: ܡܸܛܠ ܕܒܲܪ ܡܵܘܬܵܐ ܗ̄ܘ̣.

³²ܘܲܥܢܵܐ ܝܘܿܢܵܬ̣ܵܢ ܘܐܸܡܲܪ ܠܫܵܐܘܿܠ ܐܲܒ̣ܘܼܗܝ: ܥܲܠ ܡܢܵܐ ܡܵܐܹܬ̣: ܡܵܢܵܐ ܥܒܲܕ݂.

³³ܘܐܲܪܝܼܡ ܫܵܐܘܿܠ ܡܘܿܪܵܢܝܼܬ̣ܵܐ ܥܠܵܘܗܝ ܠܡܸܡܚܝܹܗ: ܘܝܼܕܲܥ ܝܘܿܢܵܬ̣ܵܢ ܕܓܸܪܡܲܬ̤ ܡ̣ܢ ܠܘܵܬ̣ ܐܲܒ̣ܘܼܗܝ ܠܡܸܫܛܠܹܗ ܠܕ݂ܵܘܝܼܕ݂.

³⁴ܘܩܵܡ ܝܘܿܢܵܬ݂ܵܢ ܡ̣ܢ ܦܵܬ̣ܘܿܪܑܵܐ ܒܚܸܡܬ̣ܵܐ ܥܲܫܝܼܢܬܵܐ: ܘܠܵܐ ܐܸܟܲܠ ܒܝܵܘܡܵܐ ܗܵܘ̇ ܕܲܬ̣ܪܹܝܢ ܕܪܹܫ ܝܲܪܚܵܐ: ܡܸܛܠ ܕܟܸܪܝܲܬ̤ ܠܹܗ ܥܲܠ ܕܵܘܝܼܕ݂: ܕܓܲܪܡܵܗ̇ ܐܲܒ̣ܘܼܗܝ ܥܠܵܘܗܝ.

³⁵ܘܲܗܘ̤ܵܐ ܨܲܦܪܵܐ ܘܲܢܦܲܩ ܝܘܿܢܵܬ̣ܵܢ ܠܚܲܩܠܵܐ ܠܐܘܼܪܥܹܗ ܕܕ݂ܵܘܝܼܕ݂: ܘܛܲܠܝܵܐ ܙܥܘܿܪܵܐ ܥܲܡܹܗ.

³⁶ܘܐܸܡܲܪ ܠܛܲܠܝܵܐ: ܗܲܪ̄ܛ ܠܲܩܸܛ ܓܹܐܪܹ̈ܐ ܕܫܵܕܹܐ ܐ̄ܢܵܐ. ܛܲܠܝܵܐ ܪܗܸܛ: ܘܗ̤ܘ ܫܕ݂ܵܐ ܓܹܐܪܵܐ ܠܡܲܥܒܵܪܘܼܬܹܗ.

³⁷ܘܲܡܛܵܐ ܛܲܠܝܵܐ ܥܕܲܡܵܐ ܠܕ݂ܘܼܟ̇ܬ̣ܵܐ ܕܹ̃ܐܪܵܐ ܕܲܫܕ݂ܵܐ ܝܘܿܢܵܬ̣ܵܢ: ܘܲܩܪܵܐ ܝܘܿܢܵܬ̣ܵܢ ܠܛܲܠܝܵܐ ܘܐܸܡܲܪ: ܗܵܐ ܓܹܐܪܵܐ ܡܸܢܵܟ݂ ܘܲܠܗܲܠ.

³⁸ܘܲܩܪܵܐ ܝܘܿܢܵܬ̣ܵܢ ܒܵܬܲܪ ܛܲܠܝܵܐ: ܐܸܣܬܲܪܗܲܒ̣ ܒܲܥܓܲܠ ܘܠܵܐ ܬܩܘܼܡ. ܘܠܲܩܸܛ ܛܲܠܝܵܐ ܕܝܘܿܢܵܬ̣ܵܢ ܓܹܐܪܹ̈ܐ: ܘܐܲܝܬ̇ܝܼ ܠܡܵܪܹܗ.

³⁹ܘܠܵܐ ܝܼܕܲܥ ܛܲܠܝܵܐ ܡܸܕܸܡ: ܐܸܠܵܐ ܝܘܿܢܵܬ̣ܵܢ ܘܕ݂ܵܘܝܼܕ݂ ܕܝܵܕ݂ܥܝܼܢ ܗ̄ܘ̣ܵܘ ܦܸܬ̣ܓ̣ܵܡܵܐ.

⁴⁰ܘܝܲܗ̄ܒ̣ ܝܘܿܢܵܬ̣ܵܢ ܡܵܐܢܵܘ̈ܗܝ ܠܛܲܠܝܹܗ: ܘܐܸܡܲܪ ܠܹܗ ܙܸܠ ܐܲܥܸܠ ܠܲܩܪܝܼـܬ̣ܵܐ.

⁴¹ܛܲܠܝܵܐ ܥܲܠ: ܘܕ݂ܵܘܝܼܕ݂ ܩܵܡ ܡ̣ܢ ܠܘܵܬ̣ ܟܹܐܦܵܐ: ܘܐܸܬ̣ܵܐ ܠܘܵܬ̣ ܝܘܿܢܵܬ̣ܵܢ: ܘܲܢܦܸܠ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ: ܘܲܣܓܸܕ݂ ܙܲܒ̣ܢ̈ܝܼܢ: ܘܢܲܫܩܘ ܓܒܲܪ ܠܚܲܒ̣ܪܹܗ: ܘܲܒ̣ܟ݂ܵܘ ܓܒܲܪ ܥܲܠ ܚܲܒ̣ܪܹܗ: ܒܪܲܡ ܕܵܘܝܼܕ݂ ܐܲܣܓܝܼ.

⁴²ܘܐܸܡܲܪ ܝܘܿܢܵܬ̣ܵܢ ܠܕ݂ܵܘܝܼܕ݂ ܙܸܠ ܒܲܫܠܵܡܵܐ: ܝܵܡܹܝܢ ܚ̄ܢܲܢ ܕܹܝܢ ܬܪ̈ܲܝܢ ܒܲܫܡܹܗ ܕܡܵܪܝܵܐ ܠܡܹܐܡܲܪ: ܡܵܪܝܵܐ ܒܲܝܢܲܝ ܘܠܵܟ݂: ܘܒܹܝܬ̣ ܙܲܪܥܝ ܠܙܲܪܥܵܟ݂: ܥܕܲܡܵܐ ܠܥܵܠܲܡ.