Read Aramaic Peshita 1 Samuel 21 Bible Online

1 Samuel 21 - Aramaic Peshita bible

1 Samuel 21

¹ܘܩܵܡ ܝܘܿܢܵܬ̣ܵܢ ܘܥܲܠ ܠܲܩܪܝܼܬ̣ܵܐ.

²ܘܐܸܬ̣ܵܐ ܕܵܘܝܼܕ݂ ܠܲܢܟ݂ܵܚ ܠܘܵܬ̣ ܐܲܚܝܼܡܲܠܟ ܟܵܗܢܵܐ: ܘܲܬ̣ܘܲܗ ܐܲܚܝܼܡܲܠܟ ܠܐܘܼܪܥܹܗ ܕܕ݂ܵܘܝܼܕ݂: ܘܐܸܡܲܪ ܠܹܗ: ܡܵܢܵܐ ܗ̄ܘ̣ ܕܐܲܢ̄ܬ̇ ܒܲܠܚܘܿܕܲܝܟ ܐܸܬܲܝ̣ܬ̇ ܘܐ̄ܢܵܫ ܠܲܝܬ̇ ܥܲܡܵܟ݂.

³ܘܐܸܡܲܪ ܕܵܘܝܼܕ݂ ܠܐܲܚܝܼܡܲܠܟ ܟܵܗܢܵܐ: ܡܲܠܟܵܐ ܦܲܩܕܲܢܝ ܦܸܬ̣ܓ̣ܵܡܵܐ: ܘܐܸܡܲܪ ܠܝܼ: ܕܐ̄ܢܵܫ ܠܵܐ ܢܕܲܥ ܡܸܕܸܡ ܕܲܡܫܲܕܲܪ ܐ̄ܢܵܐ ܠܵܟ݂: ܘܲܡܦܲܩܸܕ݂ ܐ̄ܢܵܐ ܠܵܟ݂: ܘܠܲܛܠܵܝܹ̈ܐ ܚܵܘܝܼܬ̣ ܐܲܬ̣ܪܵܐ ܕܲܓܢܸܐ ܘܲܡܛܲܫܲܝ.

⁴ܘܗܵܫܵܐ ܡܵܢܑܵ ܐܝܼܬ̣ ܬܚܹܝܬ̣ ܐܝܼܕܵܟ݂: ܚܲܡܸܫ ܕܠܲܚܡܵܐ ܗܲܒ̣ ܒܐܝܼܕܲܝ̈: ܐܵܘ ܡܸܕܸܡ ܕܡܸܫܬ̇ܟܲܚ.

⁵ܘܲܥܢܵܐ ܟܵܗܢܵܐ ܠܕ݂ܵܘܝܼܕ݂ ܘܐܸܡܲܪ ܠܹܗ: ܠܲܝܬ̇ ܠܲܚܡܵܐ ܫܲܪܝܵܐ ܬܚܹܝܬ̣ ܐܝܼܕ݂ܝ: ܐܸܠܵܐ ܠܲܚܡܵܐ ܕܩܘܼܕ݂ܫܵܐ ܐܝܼܬ̣: ܐܸܢ ܢܛܲܪܘ ܛܠܵܝܹ̈ܐ ܡ̣ܢ ܩܘܼܪܒܵܢܵܐ.

⁶ܘܲܥܢܵܐ ܕܵܘܝܼܕ݂ ܘܐܸܡܲܪ ܠܟ݂ܵܗܢܵܐ: ܩܘܼܪܒܵܢܵܐ ܡܫܲܠܲܛ ܗ̄ܘ̣ ܠܲܢ ܡ̣ܢ ܐܸܬ̣ܡܵܠܝ ܘܡ̣ܢ ܡܢܵܬ̣ܡܵܠܝ ܟܲܕ݂ ܢܸܦܩܹܬ̣: ܘܗܵܐ ܡܵܐܢܹ̈ܐ ܕܲܛܠܵܝܹ̈ܐ ܩܲܕܝܼܫܝܼܢ: ܘܗ̤ܝ ܐܘܼܪܚܵܐ ܫܲܪܝܵܐ: ܘܐܵܦ ܝܵܘܡܵܢܵܐ ܐܸܬ̣ܩܲܕܲܫܘ ܒܡܵܐܢܹ̈ܐ.

⁷ܘܝܲܗ̄ܒ̣ ܠܹܗ ܟܵܗܢܵܐ ܩܘܼܕ݂ܫܵܐ: ܡܸܛܠ ܕܠܵܐ ܗ̄ܘ̣ܵܐ ܬܲܡܵܢ ܠܲܚܡܵܐ: ܐܸܠܵܐ ܐܸܢ ܠܲܚܡܵܐ ܕܐܲܦܹ̈ܐ ܕܡܲܥܒ̇ܪܝܼܢ ܡ̣ܢ ܩܕ݂ܵܡ ܡܵܪܝܵܐ ܠܲܡܣܵܡ ܠܲܚܡܵܐ ܚܲܡܝܼܡܵܐ ܒܝܵܘܡܵܐ ܕܡܸܬ̣ܢ̱ܣܸܒ̣.

⁸ܘܬ̣ܵܡܵܢ ܓܲܒ̣ܪܵܐ ܡ̣ܢ ܥܲܒ̣ܕܵܘ̈ܗܝ ܕܫܵܐܘܿܠ: ܒܝܵܘܡܵܐ ܗܵܘ ܟܠܹܗ ܗ̄ܘ̣ܵܐ ܩܕ݂ܵܡ ܡܵܪܝܵܐ: ܘܲܫܡܹܗ ܕܘܿܐܵܓ̣ ܐܲܕ݂ܘܿܡܵܝܵܐ: ܥܲܫܝܼܢܵܐ ܕܪ̈ܵܥܵܘܵܬ̣ܵܐ ܕܫܵܐܘܿܠ.

⁹ܘܐܸܡܲܪ ܕܵܘܝܼܕ݂ ܠܐܲܚܝܼܡܲܠܟ ܠܲܝܬ̇ ܗܵܪܟܵܐ ܬܚܹܝܬ̣ ܐܝܼܕ݂ܵܟ݂ ܣܲܝܦܵܐ ܐܵܘ ܡܘܿܪܵܢܝܼܬ̣ܵܐ: ܡܸܛܠ ܕܐܵܦ ܣܲܝܦܝ ܐܵܦ ܡܘܿܪܵܢܝܼܬ̣ܝ ܠܵܐ ܢܹܣܒܹ̇ܬ̣ ܒܐܝܼܕ݂ܝ: ܡܸܛܠ ܕܲܗܘ̤ܵܐ ܦܸܬ̣ܓ̣ܵܡܹܗ ܕܡܲܠܟܵܐ ܡܣܲܪܗܲܒ̣.

¹⁰ܘܐܸܡܲܪ ܟܵܗܢܵܐ: ܣܲܝܦܹܗ ܕܓ̣ܘܼܠܝܵܕ݂ ܦܠܸܫܬܵܝܵܐ ܗܵܘ̇ ܕܲܩܛܲܒܬ̇ ܒܥܘܼܡܩܵܐ ܕܒܸܛܡ̱ܬ̣ܵܐ: ܗܵܐ ܟܪܝܼܟ݂ ܒܫܘܿܫܸܦܵܐ ܒܸܣܬܲܪ ܦܸܕܬ̣ܵܐ: ܐܸܢܗ̤ܘ ܕܢܵܣܹܒ̣ ܐܲܢ̄ܬ̇ ܠܹܗ ܣܲܒ̣: ܡܸܛܠ ܕܠܲܝܬ ܠܒܲܪ ܡܸܢܹܗ ܐ̄ܚܪܹܝܢ ܗܵܪܟܵܐ. ܘܐܸܡܲܪ ܕܵܘܝܼܕ݂: ܠܲܝܬ̇ ܐܲܟ݂ܘܵܬܹܗ: ܗܲܒܲܝܗܝ ܠܝܼ.

¹¹ܘܩܵܡ ܕܵܘܝܼܕ݂ ܘܲܥܪܲܩ ܡ̣ܢ ܩܕ݂ܵܡ ܫܵܐܘܿܠ: ܒܝܵܘܡܵܐ ܗܵܘ̣: ܘܐܸܬ̣ܵܐ ܠܘܵܬ̣ ܐܲܟ݂ܝܼܫ ܡܲܠܟܵܐ ܕܓ̣ܵܬ̣.

¹²ܘܐܸܡܲܪܘ ܠܹܗ ܥܲܒ̣ܕܵܘ̈ܗܝ ܠܐܲܟ݂ܝܼܫ: ܗܵܢܵܘ ܡܲܠܟܵܐ ܕܐܲܪܥܵܐ ܕܝܼܣܪܵܝܹܠ: ܠܗܵܢܵܐ ܡܣܲܓ̈ܝܵܢ ܗ̄ܘܲܝ̈ ܒ̈ܢܲܝ ܝܼܣܪܵܝܹܠ ܘܐܵܡܪ̈ܵܢ: ܩܛܲܠ ܫܵܐܘܿܠ ܒܐܲܠܦܹ̈ܐ: ܘܕ݂ܵܘܝܼܕ݂ ܒܪܸ̈ܒ̇ܘܵܬ̣ܵܐ.

¹³ܘܣܵܡ ܕܵܘܝܼܕ݂ ܡܸܠܹ̈ܐ ܗܵܠܹܝܢ ܒܠܸܒܹ̇ܗ: ܘܲܕ݂ܚܸܠ ܛܵܒ̣ ܡ̣ܢ ܩܕ݂ܵܡ ܐܲܟ݂ܝܼܫ ܡܲܠܟܵܐ ܕܓ̣ܵܬ̣.

¹⁴ܘܫܲܢܝܼ ܛܲܥܡܹܗ ܒܥܲܝܢܵܘ̈ܗܝ: ܘܐܸܫܬܲܟܲܪ ܒܥܲܝܬܵܝ̈ܗܘܿܢ. ܘܝܼܬܸܒ̣ ܥܲܠ ܐܸܣܟ̇ܘܿܦܬ̣ܵܐ ܕܬܲܪܥܵܐ: ܘܐܲܪܡܝܼ ܪܝܼܪܹܗ ܥܲܠ ܕܲܩܢܹܗ.

¹⁵ܘܐܸܡܲܪ ܐܲܟ݂ܝܼܫ ܠܥܲܒ̣̈ܕܵܘܗܝ: ܗܵܐ ܚܙܲܝܼܬ̇ܘܿܢ ܠܓܲܒ̣ܪܵܐ ܕܫܵܢܝܵܐ ܗ̄ܘ̱: ܠܡܵܢܵܐ ܐܲܝܬ̇ܝܼܬ̇ܘܿܢܵܝܗܝ ܠܘܵܬ̣ܝ.

¹⁶ܚܲܣܝܼܪ ܛܲܥܡܵܐ ܐ̄ܢܵܐ ܕܐܲܝܬ̇ܝܼܬ̇ܘܿܢ ܗܵܢܵܐ ܕܫܵܛܹܐ ܥܠܲܝ: ܗܵܢܵܐ ܢܸܥܘܿܠ ܠܒܲܝܬ̇ܝ.