Read Aramaic Peshita 1 Samuel 24 Bible Online

1 Samuel 24 - Aramaic Peshita bible

1 Samuel 24

¹ܘܲܣܠܸܩ ܕܵܘܝܼܕ݂ ܡ̣ܢ ܬܲܡܵܢ ܘܝܼܬܸܒ̣ ܒܡܸܨܪܵܘܿܬ̣ ܕܲܒ̣ܓܸܒ̣ܥܘܿܬ̣.

²ܘܲܗܘ̤ܵܐ ܕܟܲܕ݂ ܗܦܲܟ݂ ܫܵܐܘܿܠ ܡ̣ܢ ܒܵܬܲܪ ܦܠܸܫ̈ܬܵܝܹܐ: ܚܵܘܝܘܼܗܝ: ܘܐܸܡܲܪܘ ܠܹܗ: ܗܵܐ ܕܵܘܝܼܕ݂ ܒܡܸܨܪܘܿܬ̣ ܕܲܒ̣ܓܸܒ̣ܥܘܿܬ̣.

³ܘܲܕ݂ܒܲܪ ܫܵܐܘܿܠ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܓܲܒܲـ̈ܝܵܐ ܡ̣ܢ ܟܠܹܗ ܝܼܣܪܵܝܹܠ: ܘܐܸܙܲܠ ܠܡܸܒ̣ܥܵܐ ܠܕ݂ܵܘܝܼܕ݂ ܘܲܠܓܲܒ̣ܪ̈ܵܘܗܝ ܥܲܠ ܐܲܦܲܝ̈ ܛܘܼܪܵܐ ܕܕܲܝܨܹ̈ܐ.

⁴ܘܐܸܬ̣ܵܐ ܠܡܲܪܒ̇ܥܵܐ ܕܥܵـ̈ܢܵܐ ܕܒ̣ܐܘܼܪܚܵܐ. ܘܬܲܡܵܢ ܐܝܼܬ̣ ܡܥܲܪܬ̣ܵܐ: ܘܥܲܠ ܫܵܐܘܿܠ ܠܲܡܥܲܪܬ̣ܵܐ ܘܲܕ݂ܡܸܟ݂ ܬܲܡܵܢ: ܘܕ݂ܵܘܝܼܕ݂ ܘܓܲܒ̣ܪܵܘܗܝ ܒܲܫܦ̈ܘܿܠܲܝ ܡܥܲܪܬ̣ܵܐ ܝܵܬ̣ܒ̇ܝܼܢ.

⁵ܘܐܸܡܲܪܘ ܠܹܗ ܓܲܒ̣ܪܵܘܗܝ ܠܕ݂ܵܘܝܼܕ݂: ܗܵܢܵܐ ܗ̄ܘ̣ ܝܵܘܡܵܐ ܕܐܸܡܲܪ ܠܵܟ݂ ܡܵܪܝܵܐ: ܗܵܐ ܡܲܫܠܸܡ ܐ̄ܢܵܐ ܒܥܸܠܕܒ̣ܵܒ̣ܵܟ݂ ܒܐܝܼܕܲܝ̈ܟ: ܥܒܸܕ݂ ܠܹܗ ܐܲܝܟ݂ ܕܫܲܦܝܼܪ ܒܥܲܝܢܲܝ̈ܟ. ܘܩܵܡ ܕܵܘܝܼܕ݂ ܘܦܣܲܩ ܟܸܢܦܵܐ ܕܲܦܪܝܼܣܹܗ ܕܫܵܐܘܿܠ ܪܲܟ̇ܝܼܟ݂ܵܐܝܼܬ̣.

⁶ܘܡ̣ܢ ܒܵܬܲܪܟܸ̇ܢ ܬܘ̣ܵܝܗܝ ܠܸܒܹ̇ܗ ܠܕ݂ܵܘܝܼܕ݂: ܥܲܠ ܕܲܦܣܲܩ ܟܸܢܦܵܐ ܕܲܦܪܝܼܣܹܗ ܕܫܵܐܘܿܠ.

⁷ܘܐܸܡܲܪ ܕܵܘܝܼܕ݂ ܠܓܲܒ̣ܪܹ̈ܐ ܕܥܲܡܹܗ: ܚܵܣ ܠܝܼ ܡ̣ܢ ܡܵܪܝܵܐ ܐܸܢ ܐܸܥܒܸ̇ܕ݂ ܦܸܬ̣ܓ̣ܵܡܵܐ ܗܵܢܵܐ ܠܡܵܪܝ ܠܲܡܫܝܼܚܹܗ ܕܡܵܪܝܵܐ: ܘܐܵܘܫܸܛ ܐܝܼܕ݂ܝ ܒܹܗ: ܡܸܛܠ ܕܲܡܫܝܼܚܹܗ ܗ̄ܘ̣ ܕܡܵܪܝܵܐ.

⁸ܘܬ̣ܵܘܝܼ ܕܵܘܝܼܕ݂ ܠܓܲܒ̣ܪܹ̈ܐ ܕܥܲܡܹܗ ܒܡܸܠܹ̈ܐ ܗܵܠܹܝܢ: ܘܠܵܐ ܫܒܲܩ ܐܸܢܘܿܢ ܠܲܡܩܵܡ ܥܲܠ ܫܵܐܘܿܠ. ܘܫܵܐܘܿܠ ܩܵܡ ܡ̣ܢ ܡܥܲܪܬ̣ܵܐ ܘܐܸܙܲܠ ܒܐܘܼܪܚܵܐ.

⁹ܘܩܵܡ ܕܵܘܝܼܕ݂ ܡ̣ܢ ܒܵܬܲܪܟܸ̇ܢ: ܘܲܢܦܲܩ ܡ̣ܢ ܡܥܲܪܬ̣ܵܐ: ܘܲܩܪܵܐ ܒܵܬܲܪ ܫܵܐܘܿܠ ܘܐܸܡܲܪ. ܡܵܪܝ ܡܲܠܟܵܐ: ܘܐܸܬ̣ܦܢܝ ܫܵܐܘܿܠ ܠܒܸܣܬ̇ܪܹܗ. ܘܲܢܦܲܠ ܕܵܘܝܼܕ݂ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ ܘܲܣܓ̣ܕ݂.

¹⁰ܘܐܸܡܲܪ ܕܵܘܝܼܕ݂ ܠܫܵܐܘܿܠ: ܠܵܐ ܬܸܫܡܲܥ ܡܸܠܹ̈ܐ ܕܐ̄ܢܵܫܹܐ ܕܐܵܡܪܝܼܢ: ܕܗܵܐ ܕܵܘܝܼܕ݂ ܒܵܥܹܐ ܠܒ̣ܝܼܫܬܵܟ݂.

¹¹ܗܵܐ ܚܙܝܼ ܝܵܘܡܵܢܵܐ ܒܥܲܝܢܲܝ̈ܟ: ܕܐܲܫ̱ܠܡܵܟ݂ ܡܵܪܝܵܐ ܒܐܝܼܕܲܝ̈ ܝܵܘܡܵܢܵܐ ܒܲܡܥܲܪܬ̣ܵܐ. ܘܐܸܡܲܪܘ ܓܲܒ̣ܪܹ̈ܐ ܕܥܲܡܝ ܠܡܸܩܛܠܵܟ݂: ܘܚܵܣܹܬ ܥܠܲܝܟ: ܘܐܸܡ̇ܪܹܬ̣ ܠܵܐ ܐܵܘܫܸܛ ܐܝܼܕ݂ܝ ܒܡܵܪܝ: ܡܸܛܠ ܕܲܡܫܝܼܚܹܝܗ ܗ̄ܘ̣ ܕܡܵܪܝܵܐ.

¹²ܘܐܸܬ̣ܦܲܢܝ̄ ܘܲܚܙܝܼ ܐܵܦ ܟܸܢܦܵܐ ܕܲܦܪܝܼܣܵܟ݂ ܒܐܝܼܕ݂ܝ: ܡܸܛܠ ܕܟܲܕ݂ ܦܸܣܩܹܬ̣ ܟܸܢܦܵܐ ܕܲܦܪܝܼܣܵܟ݂ ܠܵܐ ܩܛܲܠܬܵܟ݂. ܕܲܥ ܘܲܚܙܝܼ ܕܠܲܝܬ̇ ܒܐܝܼܕܲܝ̈ ܒܝܼܫܬܵܐ ܘܣܲܟ݂ܠܘܼܬܑ̣ܵܐ: ܘܠܵܐ ܚܛܹܝܬ̣ ܠܵܟ݂: ܘܐܲܢ̄ܬ̇ ܡܨܲܝܼܕ݂ ܐܲܢ̄ܬ̇ ܠܡܸܣܲܒ̣ ܢܲܦ̮ܫܝ.

¹³ܢܕ݂ܘܼܢ ܡܵܪܝܵܐ ܒܲܝܢܲܝ ܘܠܵܟ݂: ܘܢܸܬ̣ܒ̇ܥܲܢܝ ܡܵܪܝܵܐ ܒܐܝܼܕܲܝ̈ܟ: ܘܐܝܼܕ݂ܝ ܠܵܐ ܬܸܗܘܸܐ ܒܵܟ݂.

¹⁴ܐܲܝܟ݂ ܕܐܲܡܝܼܪ ܒܡܲܬ̣ܠܵܐ ܩܲܕ݂ܡܵܝܵܐ: ܕܡ̣ܢ ܪܲܫܝܼܥܵܐ ܢܸܦܘܿܩ ܪܘܼܫܥܵܐ: ܘܐܝܼܕ݂ܝ ܠܵܐ ܬܸܗܘܸܐ ܒܵܟ݂.

¹⁵ܒܵܬܲܪ ܡܲܢܘܼ ܢܦܲܩܬ̇ ܡܲܠܟܵܐ ܕܝܼܣܪܵܝܹܠ: ܘܒ̣ܵܬܲܪ ܡܲܢܘܼ ܪܵܕܹܦ ܐܲܢ̄ܬ̇. ܒܵܬܲܪ ܟܲܠܒܵܐ ܡܝܼܬ̣ܵܐ: ܘܒ̣ܵܬܲܪ ܦܘܼܪܬܹܥܢܵܐ ܚܲܕ݂.

¹⁶ܢܸܗܘܸܐ ܡܵܪܝܵܐ ܕܲܝܵܢܵܐ: ܘܲܢܕ݂ܘܼܢ ܒܲܝܢܲܝ ܘܠܵܟ݂: ܘܢܸܚܙܸܐ ܘܲܢܕ݂ܘܼܢ ܕܝܼܢܝ: ܘܢܸܬ̣ܒ̇ܥܲܢܝ ܒܐܝܼܕܲܝ̈ܟ.

¹⁷ܘܟܲܕ݂ ܓܲܡܲܪ ܕܵܘܝܼܕ݂ ܠܡܹܐܡܲܪ ܡܸܠܹ̈ܐ ܗܵܠܹܝܢ ܠܫܵܐܘܿܠ: ܐܸܡܲܪ ܠܹܗ ܫܵܐܘܿܠ. ܩܵܠܵܟ݂ ܗ̄ܘ̣ ܗܵܢܵܐ: ܒܹܪܝ ܕܵܘܝܼܕ݂. ܘܐܲܪܝܼܡ ܫܵܐܘܿܠ ܩܵܠܹܗ ܘܲܒ̣ܟ݂ܵܐ.

¹⁸ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܙܲܕܝܼܩ ܐܲܢ̄ܬ̇ ܡܹܢܝ ܡܸܛܠ ܕܐܲܢ̄ܬ̇ ܦܪܲܥܸܬܵܢܝ ܛܵܒ̣ܬ̣ܵܐ: ܘܐܸܢܵܐ ܦܪܲܥܬܵܟ݂ ܒܝܼܫܬܵܐ.

¹⁹ܘܐܲܢ̄ܬ̇ ܚܵܘܝܼܬ̇ ܝܵܘܡܵܢܵܐ ܕܲܥܒܲܕܬ̇ ܠܝܼ ܛܵܒ̣ܬ̣ܵܐ: ܕܐܲܫ̱ܠܡܲܢܝ ܡܵܪܝܵܐ ܒܐܝܼܕܲܝ̈ܟ ܘܠܵܐ ܩܛܲܠܬܵܢܝ.

²⁰ܘܟܲܕ݂ ܢܸܫܟܲܚ ܓܲܒ̣ܪܵܐ ܠܲܒ̣ܥܸܠܕܒ̣ܵܒܹܗ: ܘܲܢܫܲܕܪܝܼܘܗܝ ܒܐܘܼܪܚܵܐ ܛܲܒ̣ܬ̣ܵܐ: ܡܵܪܝܵܐ ܢܸܦܪ̱ܥܝܼܘܗܝ ܛܵܒ̣ܬ̣ܵܐ. ܢܸܦܪ̱ܥܵܟ݂ ܡܵܪܝܵܐ ܚܠܵܦܲܝ ܛܵܒ̣ܬ̣ܵܐ ܝܵܘܡܵܢܵܐ ܕܲܥܒܲܕ̇ܬ̇ ܠܝܼ.

²¹ܘܗܵܫܵܐ ܗܵܐ ܝܼܕ݂ܥܹـܬ̣ ܕܡܲܡܠܵܟ݂ܘܼ ܡܲܡܠܸܟ݂ ܐܲܢ̄ܬ̇: ܘܡܸܬ̣ܩܲܝܡܵܐ ܒܐܝܼܕܲܝ̈ܟ ܡܲܠܟ̇ܘܼܬ̣ܵܐ ܕܝܼܣܪܵܝܹܠ.

²²ܝܼܡܝܼ ܠܝܼ ܒܡܵܪܝܵܐ ܕܠܵܐ ܬܵܘܒܸ̇ܕ݂ ܙܲܪܥܝ ܡ̣ܢ ܒܵܬܲܪܝ: ܘܠܵܐ ܬܵܘܒܸܕ݂ ܫܹܡܝ ܡ̣ܢ ܒܹܝܬ̣ ܐܵܒ̣ܝ.

²³ܘܝܼܡܵܐ ܕܵܘܝܼܕ݂ ܠܫܵܐܘܿܠ: ܘܐܸܙܲܠ ܫܵܐܘܿܠ ܠܒܲܝܬܹ̇ܗ: ܘܕ݂ܵܘܝܼܕ݂ ܘܓܲܒ̣ܪܹ̈ܐ ܕܥܲܡܹܗ ܣܠܸܩܘ ܠܡܲܨܦܝܵܐ.