Read Aramaic Peshita 1 Samuel 25 Bible Online

1 Samuel 25 - Aramaic Peshita bible

1 Samuel 25

¹ܘܡܝܼܬ̣ ܫܡܘܼܐܹܝܠ: ܘܐܸܬ̣ܟܲܢܲܫܘ ܟܠܹܗ ܝܼܣܪܵܝܹܠ: ܘܐܲܪܩܸܕ݂ܘ ܥܠܵܘܗܝ: ܘܩܲܒ̣ܪܘܼܗܝ ܒܩܲܒ̣ܪܹܗ ܒܪܵܡܬ̣ܵܐ. ܘܩܵܡ ܕܵܘܝܼܕ݂ ܘܲܢܚܸܬ̣ ܠܡܲܕ݂ܒ̇ܪܵܐ ܕܦܵܪܵܢ.

²ܘܓܲܒ̣ܪܵܐ ܐܝܼܬ̣ ܗ̄ܘ̣ܵܐ ܒܡܵܥܘܿܢ: ܘܲܥܒ̣ܵܕܹܗ ܒܟܲܪܡ̄ܠܵܐ: ܘܓܲܒ̣ܪܵܐ ܪܲܒ̇ ܗ̄ܘ̣ܐ ܛܵܒ̣: ܘܐܝܼܬ̣ ܗ̄ܘ̣ܵܐ ܠܹܗ ܥܵܢܵܐ ܬܠܵܬ̣ܵܐ ܐܲܠܦ̈ܝܼܢ: ܘܐܵܠܹܦ ܥܸܙ̈ܝܼܢ. ܘܲܗܘ̤ܵܐ ܕܟܲܕ݂ ܓܵܐܹܙ ܥܵܢܹ̈ܗ ܒܟܲܪܡ̄ܠܵܐ.

³ܘܲܫܡܹܗ ܕܓܲܒ̣ܪܵܐ ܢܵܒ̣ܵܠ: ܘܲܫܡܵܗ̇ ܕܐܲܢ̄ܬ̇ܬܹܗ ܐܲܒ̣ܝܼܓܸܠ: ܘܐܲܢ̄ܬ̇ܬ̣ܵܐ ܫܲܦܝܼܪ ܗ̄ܘ̣ܵܐ ܚܸܙܘܵܗ̇ ܘܩܘܼܒ̣ܠ̱ܠܵܗ̇: ܘܓܲܒ̣ܪܵܐ ܢܵܒ̣ܵܠ ܩܫܸܐ ܗ̄ܘܑ̣ܵܐ: ܘܒ̣ܝܼܫ ܒܨܸܢ̈ܥܵܬܹܗ ܘܲܟ݂ܠܸܒ̣.

⁴ܘܲܫܡܲܥ ܕܵܘܝܼܕ݂ ܒܡܲܕ݂ܒ̇ܪܵܐ ܕܓ̣ܵܐܹܙ ܢܵܒ̣ܵܠ ܥܵܢܹ̈ܐ.

⁵ܘܫܲܕܲܪ ܕܵܘܝܼܕ݂ ܥܸܣܪܵܐ ܥܠܲܝܡ̈ܝܼܢ: ܘܐܸܡܲܪ ܕܵܘܝܼܕ݂ ܠܲܥܠܲܝܡܹܐ: ܣܲܩܘ ܠܟܲܪܡ̄ܠܵܐ ܘܙܸܠܘ ܠܘܵܬ̣ ܢܵܒ̣ܵܠ: ܘܲܫܐܲܠܘ ܒܲܫܠܵܡܹܗ ܒܫܹܡܝ.

⁶ܘܐܸܡܲܪܘ ܠܹܗ: ܗܵܟܲܢܵܐ ܡ̇ܢ ܕܢܸܗܘܸܐ ܚܲܝ ܘܐܲܢ̄ܬ̇ ܫܠܵܡ ܘܒܲܝܬܵܟ݂.

⁷ܪ̈ܵܥܵܘܵܬ̣ܵܐ ܕܝܼܠܵܟ݂ ܗܘ̤ܵܘ ܥܲܡܲܢ: ܘܠܵܐ ܐܲܗܲܪ̄ܢ ܐܸܢܘܿܢ: ܘܠܵܐ ܛܸܥܵܐ ܠܗܘܿܢ ܡܸܕܸܡ: ܟܠ ܝܵܘ̈ܡܵܬ̣ܵܐ ܕܲܗܘ̤ܵܐ ܒܡܲܕ݂ܒ̇ܪܵܐ.

⁸ܫܲܐܸܠ ܠܥܲܒ̣ܕܲܝ̈ܟ ܘܲܢܚܵܘܘܿܢܵܟ݂: ܘܗܵܫܵܐ ܢܸܫܟ̇ܚܘܼܢ ܪ̈ܲܚܡܹܐ ܒܥܲܝܢܲܝ̈ܟ: ܡܸܛܠ ܕܥܲܠ ܝܵܘܡܵܐ ܛܵܒ̣ܵܐ ܐܸܬܲܝܢ: ܗܲܒ̣ ܡܸܕܸܡ ܕܨܵܒܹ̇ܐ ܐܲܢ̄ܬ̇ ܠܥܲܒ̣ܕܲܝ̈ܟ ܘܠܲܒ̣ܪܵܟ݂ ܕܵܘܝܼܕ݂.

⁹ܘܐܸܬ̣ܵܘ ܥܠܲܝܡܵܘ̈ܗܝ ܕܕ݂ܵܘܝܼܕ݂: ܘܐܸܡܲܪܘ ܠܢܵܒ̣ܵܠ ܟܠܗܹܝܢ ܡܸܠܹ̈ܐ ܗܵܠܹܝܢ ܒܲܫܡܹܗ ܕܕ݂ܵܘܝܼܕ݂.

¹⁰ܘܲܥܢܵܐ ܢܵܒ̣ܵܠ ܘܐܸܡܲܪ ܠܥܲܒ̣ܕܵܘ̈ܗܝ ܕܕ݂ܵܘܝܼܕ݂: ܡܲܢܘܼ ܒܪܹܗ ܕܐܝܼܫܲܝ: ܝܵܘܡܵܢܵܐ ܣܓ̣ܝܼܘ ܥܲܒ̣̈ܕܹܐ ܕܡܲܪܝܼܕ݂ܝܼܢ ܐ̄ܢܵܫ ܡ̣ܢ ܩܕ݂ܵܡ ܡܵܪܹܗ.

¹¹ܐܸܣܲܒ̣ ܠܲܚ̄ܡܝ ܘܡܲܝ̈: ܘܢܸܟ݂ܣܬ̣ܵܐ ܕܢܸܟ݂ܣܹܬ̣ ܠܓܵܙ̈ܘܿܙܲܝ: ܘܐܸܬܸܠ ܠܓܲܒ̣ܪܹ̈ܐ ܕܠܵܐ ܝܵܕ݂ܥ ܐ̄ܢܵܐ ܡ̣ܢ ܐܲܝܡܸܟܵܐ ܐܸܢܘܿܢ.

¹²ܘܲܗܦܲܟ݂ܘ ܥܠܲܝܡܵܘ̈ܗܝ ܕܕ݂ܵܘܝܼܕ݂ ܠܐܘܼܪܚܗܘܿܢ: ܘܚܵܘܝܼܘ ܠܕ݂ܵܘܝܼܕ݂ ܟܠܗܹܝܢ ܡܸܠܹ̈ܐ ܗܵܠܹܝܢ.

¹³ܘܐܸܡܲܪ ܕܵܘܝܼܕ݂ ܠܓܲܒ̣ܪܹ̈ܐ ܕܥܲܡܹܗ: ܐܲܣܘܿܪܘ ܐ̄ܢܵܫ ܣܲܝܦܹܗ: ܘܐܸܣܲܪܘ ܣܲܝܦܲܝ̈ܗܘܿܢ: ܘܐܵܦ ܕܵܘܝܼܕ݂ ܐܸܣܲܪ ܣܲܝܦܹܗ. ܘܲܣܠܸܩܘ ܒܵܬܲܪ ܕܵܘܝܼܕ݂ ܐܲܝܟ݂ ܐܲܪܒܲܥܡܵܐܐ ܓܲܒ̣ܪ̈ܝܼܢ: ܘܡܲܐܬܹܝܢ ܦܵܫܘ ܠܘܵܬ̣ ܡܵܐܢܹ̈ܐ.

¹⁴ܘܠܲܐܒ̣ܝܼܓܸܠ ܐܲܢ̄ܬ̇ܬܹܗ ܕܢܵܒ̣ܵܠ: ܚܵܘܝܼ ܛܲܠܝܵܐ ܚܲܕ݂ ܡ̣ܢ ܥܠܲܝܡܹ̈ܐ ܘܐܸܡܲܪ: ܫܲܕܲܪ ܕܵܘܝܼܕ݂ ܐܝܼܙ̈ܓܲܕܹܐ ܡ̣ܢ ܡܲܕ݂ܒ̇ܪܵܐ ܠܲܡܒܲܪܵܟ݂ܘܼܬܹ̈ ܠܡܵܪܲܢ ܘܡܸܐܢܲܬ̤ ܠܹܗ ܒܗܘܿܢ.

¹⁵ܘܓܲܒ̣ܪܹ̈ܐ ܛܵܒ̣ܝܼܢ ܗ̄ܘ̣ܵܘ ܠܲܢ ܛܵܒ̣: ܘܠܵܐ ܐܲܗܪܘܼܢ: ܘܠܵܐ ܐܲܛܥܝܼܘ ܠܲܢ ܡܸܕܸܡ: ܟܠ ܝܵܘ̈ܡܵܬ̣ܵܐ ܕܗܲܠܸܟ݂ܢ ܥܲܡܗܘܿܢ.

¹⁶ܟܲܕ݂ ܗܸܘܲܝܢ ܒܡܲܕ݂ܒ̇ܪܵܐ ܫܘܼܪܵܐ ܗܘ̤ܘܵܐ ܠܲܢ: ܐܵܦ ܒܠܸܠܝܵܐ ܐܵܦ ܒܐܝܼܡܵܡܵܐ: ܟܠ ܝܵܘ̈ܡܵܬ̣ܵܐ ܕܲܗ̤ܘܲܝܢ ܥܲܡܗܘܿܢ: ܘܪܵܥܹܝܢ ܗ̄ܘܲܝܢ ܥـܢ̈ܵܐ.

¹⁷ܗܵܫܵܐ ܕܲܥܝ ܘܲܚܙܵܝ ܡܵܢܵܐ ܥܵܒ̣ܕܵܐ ܐܲܢ̄ܬ̇ܝ. ܡܸܛܠ ܕܓܸܪܡܲܬ̤ ܒܝܼܫܬܵܐ ܥܲܠ ܡܵܪܲܢ ܘܥܲܠ ܟܠܹܗ ܒܲܝܬܹ̇ܗ: ܘܢܵܒ̣ܵܠ ܠܘܵܬ̣ ܪܵܥـ̈ܘܵܬ̣ܵܐ ܗ̄ܘܼܵܐ.

¹⁸ܘܐܸܣܬܲܪ̱ܗܒܲܬ̤ ܐܲܒ̣ܝܼܓܸܠ: ܘܢܸܣܒܲܬ̤ ܡܲܐܬܹܝܢ ܕܠܲܚܡܵܐ: ܘܲܬ̣ܪܹܝܢ ܓܪ̈ܵܒ̣ܝܼܢ ܕܚܲܡܪܵܐ: ܘܚܲܡܸܫ ܥـܵ̈ܢܵܐ ܟܲܕ݂ ܡܲܬ̣ܩ̈ܢܵܢ: ܘܚܲܡܸܫ ܣܐ̈ܝܼܢ ܩܲܠܝܵܬ̣ܵܐ: ܘܲܡܐܵܐ ܓܘܼܒ̣̈ܝܼܢ ܘܡܵܐܬܹܝܢ ܕܸܒ̣̈ܠܝܼܢ: ܘܣܵܡܲܬ̤ ܥܲܠ ܚܡܵܪܹ̈ܐ.

¹⁹ܘܐܸܡܪܲܬ̤ ܠܲܥܠܲܝܡܹ̈ܐ: ܥܒܲܪܘ ܩܕ݂ܵܡܲܝ: ܗܵܐ ܐܸܢܵܐ ܐܵܬ̣ܝܵܐ ܐ̄ܢܵܐ. ܘܲܠܢܵܒ̣ܵܠ ܒܲܥܠܵܗ̇ ܠܵܐ ܚܵܘܝܲܬ̤.

²⁰ܘܗ̤ܝ ܝܵܬ̣ܒܵܐ ܗ̄ܘ̣ܵܬ̣ ܥܲܠ ܚܡܵܪܵܐ ܘܢܵܚܬܵܐ ܒܓܸܢܝܵܐ ܕܛܘܼܪܵܐ. ܘܕ݂ܵܘܝܼܕ݂ ܘܓܲܒ̣ܪܹ̈ܐ ܕܥܲܡܹܗ ܣܵܠܩܝܼܢ ܠܐܘܼܪܥܵܗ̇: ܘܦܸܓ̣ܥܲܬ̤ ܒܗܘܿܢ.

²¹ܘܕ݂ܵܘܝܼܕ݂ ܐܸܡܲܪ: ܕܲܓܵܠܵܐܝܼܬ̣ ܢܛܲܪܢ ܟܠ ܕܐܝܼܬ̣ ܗ̄ܘ̣ܵܐ ܠܹܗ ܒܡܲܕ݂ܒ̇ܪܵܐ: ܘܠܵܐ ܐܲܛܥܝܼܢ ܡܸܕܸܡ ܡ̣ܢ ܟܠ ܕܐܝܼܬ̣ ܗ̄ܘ̣ܵܐ ܠܹܗ: ܘܦܲܪܥܲܢ ܒܝܼܫܬܵܐ ܚܠܵܦ ܛܵܒ̣ܬ̣ܵܐ.

²²ܗܵܟܲܢܵܐ ܢܸܥܒܸ̇ܕ݂ ܡܵܪܝܵܐ ܠܥܲܒ̣ܕܹܗ ܕܵܘܝܼܕ݂ ܘܗܵܟܲܢܵܐ ܢܵܘܣܸܦ ܠܹܗ: ܐܸܢ ܢܸܫܬ̇ܒܸܩ ܡܸܕܸܡ ܕܐܝܼܬ̣ ܠܹܗ ܥܕܲܡܵܐ ܠܨܲܦܪܵܐ ܕܡܲܬ̣ܩܲܢ ܒܐܸܣܬ̣ܵܐ.

²³ܘܲܚܙܵܬ̤ ܐܲܒ̣ܝܼܓܸܠ ܠܕ݂ܵܘܝܼܕ݂: ܘܐܸܣܬܲܪ̱ܗܒܲܬ̤ ܘܢܸܚܬܲܬ̤ ܡ̣ܢ ܚܡܵܪܵܐ: ܘܢܸܦܠܲܬ̤ ܩܕ݂ܵܡ ܕܵܘܝܼܕ݂ ܥܲܠ ܐܲܦܹܝ̈ܗ̇: ܘܣܸܓ̣ܕܲܬ̤ ܠܹܗ ܥܲܠ ܐܲܪܥܵܐ.

²⁴ܘܢܸܦܠܲܬ̤ ܥܲܠ ܪܸ̈ܓ̣ܠܵܘܗܝ ܘܐܸܡܪܲܬ̤: ܒܵܥܝܵܐ ܐ̄ܢܵܐ ܡܸܢܵܟ݂ ܡܵܪܝ: ܥܠܲܝ ܡܵܪܝ ܣܲܟ݂ܠܘܼܬ̣ܵܐ: ܬܡܲܠܸܠ ܐܲܡܬ̣ܵܟ݂ ܩܕ݂ܵܡܲܝܟ ܥܲܠ ܓܲܒ̣ܪܵܐ ܗܵܢܵܐ ܢܵܒ̣ܵܠ.

²⁵ܡܸܛܠ ܕܐܲܝܟ݂ ܫܡܹܗ ܗܵܟܲܢܵܐ ܗ̄ܘ̣: ܢܵܒ̣ܵܠ ܫܡܹܗ: ܘܲܡܨܲܥܪܵܢܘܼܬܹܗ ܥܲܡܹܗ. ܘܐܸܢܵܐ ܐܲܡܬ̣ܵܐ ܠܵܐ ܚܙܹܝܬ̣ ܠܲܥܠܲܝܡܹ̈ܐ ܕܫܲܕܲܪ ܡܵܪܝ.

²⁶ܘܗܵܫܵܐ ܡܵܪܝ: ܗ̄ܘ̣ ܡܵܪܝܵܐ ܘܚܲܝܵܐ ܗ̄ܝ̣ ܢܲܦ̮ܫܵܟ݂ ܕܝܼܠܵܟ݂ ܡܵܪܝ: ܕܠܵܐ ܬܸܬ̣ܩܲܪܲܒ̣ ܠܲܕ݂ܡܵܐ ܘܦܲܪܩܵܟ݂ ܡܵܪܝܵܐ. ܗܵܫܵܐ ܡܵܪܝ ܢܸܗܘܘܿܢ ܒܥܸܠܕܒ̣ܵܒܲܝ̈ܟ ܐܲܝܟ݂ ܢܵܒ̣ܵܠ: ܘܲܕ݂ܒ̣ܵܥܹܝܢ ܠܵܟ݂ ܒܝܼܫܬܵܐ.

²⁷ܗܵܫܵܐ ܒܘܼܪܟ̇ܬ̣ܵܐ ܗܵܕܹܐ ܐܲܝܬ̇ܝܲܬ̤ ܐܲܡܬ̣ܵܟ݂ ܠܡܵܪܝ: ܒܘܼܪܟ̇ܬ̣ܵܐ ܗܲܒ̣ ܠܲܥܠܲܝܡܹ̈ܐ ܕܲܡܗܲܠܟ݂ܝܼܢ ܠܲܪܓܸܠ ܡܵܪܝ.

²⁸ܘܲܫܒ̣ܘܿܩ ܣܘܼܪܚܵܢܵܐ ܠܐܲܡܬ̣ܵܟ݂: ܡܸܛܠ ܕܡܸܥܒܲܕ݂ ܥܵܒܹܕ݂ ܡܵܪܝܵܐ ܠܡܵܪܝ ܒܲܝܬܵܐ ܡܗܲܝܡܢܵܐ. ܡܸܛܠ ܕܬܲܟ݂ܬ̇ܫܵܘ̈ܗܝ ܕܡܵܪܝܵܐ: ܡܵܪܝ ܡܸܬ̣ܟܲܬܲܫ: ܘܒ̣ܝܼܫܬܵܐ ܠܵܐ ܐܸܫܟ̇ܚܲܬ̤ ܒܵܟ݂ ܡ̣ܢ ܝܵܘ̈ܡܲܝܟ.

²⁹ܘܒܲܪܢܵܫܵܐ ܣܵܡ ܠܡܸܪܕܦܵܟ݂ ܘܲܠܡܸܒ̣ܥܵܐ ܢܲܦ̮ܫܵܟ݂. ܘܲܗܘ̤ܵܬ̣ ܢܲܦ̮ܫܹܗ ܕܡܵܪܝ: ܨܪܝܼܪܵܐ ܒܲܨܪܵܪܑܵ ܕܚܲܝܹ̈ܐ ܥܲܡ ܡܵܪܝܵܐ ܐܲܠܵܗܵܟ݂. ܘܢܲܦ̮ܫܵܐ ܕܲܒ̣ܥܸܠܕܒ̣ܵܒܲܝ̈ܟ ܢܸܫܕܹܝܗ̇ ܡܵܪܝܵܐ ܒܓ̣ܵܘ ܟܲܦܬ̣ܵܐ ܕܩܸܠܥܵܐ.

³⁰ܘܢܸܗܘܸܐ ܕܟܲܕ݂ ܢܸܥܒܸ̇ܕ݂ ܡܵܪܝܵܐ ܠܡܵܪܝ ܛܵܒ̣ܬ̣ܵܐ ܥܠܲܝܟ: ܘܢܸܦܩܕ݂ܵܟ݂ ܠܲܡܕܲܒܪܵܢܵܐ ܥܲܠ ܝܼܣܪܵܝܹܠ.

³¹ܠܵܐ ܬܸܗܘܸܐ ܠܵܟ݂ ܗܵܕܹܐ ܠܙܵܘܸܥܬ̣ܵܐ: ܘܲܠܬ̣ܘܼܩ̱ܠܬ̣ܵܐ ܕܠܸܒܵܟ݂: ܠܡܹܐܫܲܕ݂ ܕܡܵܐ ܕܡܲܓܵܢ. ܘܟܲܕ݂ ܢܲܛܐܸܒ̣ ܠܵܟ݂ ܡܵܪܝܵܐ: ܐܸܬ̣ܕܲܟ݂ܪܝܼܗ̇ ܠܐܲܡܬ̣ܵܟ݂.

³²ܘܐܸܡܲܪ ܕܵܘܝܼܕ݂ ܠܐܲܒ̣ܝܼܓܸܠ: ܒܪܝܼܟ݂ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܫܲܕܲܪܹܟ݂ܝ ܝܵܘܡܵܢܵܐ ܠܐܘܼܪܥ̄ܝ.

³³ܒܪܝܼܟ݂ ܛܲܥܡܹܟ݂ܝ: ܘܲܒ̣ܪܝܼܟ݂ܵܐ ܐܲܢ̄ܬ̇ܝ: ܕܲܟ݂ܠܲܝܬ̇ܝܼܢܝ ܝܵܘܡܵܢܵܐ ܠܡܸܥܲܠ ܒܲܕ݂ܡܵܐ: ܘܲܦܪܲܩܬܲܝ ܐܝܼ̈ܕܲܝ ܝܵܘܡܵܢܵܐ ܡ̣ܢ ܕܡܵܐ.

³⁴ܒܪܲܡ ܚܲܝ ܗ̄ܘ̣ ܡܵܪܝܵܐ ܐܲܠܵܗܵܐ ܕܝܼܣܪܵܝܹܠ: ܕܲܟ݂ܠܵܢܝ ܕܠܵܐ ܐܲܒ̣ܐܸܫ ܠܹܟ݂ܝ: ܕܐܸܠܘܼ ܠܵܐ ܐܸܣܬܲܪܗܲܒ̣ܬ̇ܝ ܐܸܬ̇ܝ̣ܬ̇ܝ ܠܐܘܼܪܥ̄ܝ: ܐܸܢ ܐܸܫܬ̇ܚܲܪ ܠܢܵܒ̣ܵܠ: ܥܕܲܡܵܐ ܕܢܵܗܲܪ ܨܲܦܪܵܐ: ܕܡܲܬ̣ܩܲܢ ܒܐܸܣܬ̣ܵܐ.

³⁵ܘܲܢܣܲܒ̣ ܕܵܘܝܼܕ݂ ܡ̣ܢ ܐܝܼܕܹܝ̈ܗ̇ ܡܸܕܸܡ ܕܐܲܝܬ̇ܝܲܬ̤: ܘܠܵܗ̇ ܐܸܡܲܪ: ܣܲܩܝ ܠܒܲܝܬܹ̇ܟ݂ܝ ܒܲܫܠܵܡܵܐ: ܚܙܵܝ ܕܫܸܡܥܹܬ̣ ܒܩܵܠܹܟ݂ܝ: ܘܢܸܣܒܹܬ̣ ܒܐܲܦܲܝ̈ܟ̇ܝ.

³⁶ܘܐܸܬ̣ܵܬ̤ ܐܲܒ̣ܝܼܓܸܠ ܠܘܵܬ̣ ܢܵܒ̣ܵܠ: ܘܗܵܐ ܐܝܼܬ̣ ܠܹܗ ܡܲܫܬ̇ܝܵܐ ܒܒܲܝܬܹ̇ܗ: ܐܲܝܟ݂ ܡܲܫܬ̇ܝܵܐ ܕܡܲܠܟܵܐ: ܘܠܸܒܹ̇ܗ ܕܢܵܒ̣ܵܠ ܛܵܒ̣ ܥܠܵܘܗܝ: ܘܗ̤ܘ ܪܘܸܐ ܛܵܒ̣. ܘܠܵܐ ܚܵܘܝܵܬܹܗ ܦܸܬ̣ܓ̣ܵܡܵܐ ܥܕܲܡܵܐ ܕܢܸܓ̣ܗܲܬ̤.

³⁷ܘܲܗܘ̤ܵܐ ܕܟܲܕ݂ ܢܸܓ̣ܗܲܬ̤: ܘܢܲܦܨܹܗ ܚܲܡܪܹܗ: ܚܵܘܝܵܬܹܗ ܐܲܢ̄ܬ̇ܬܹܗ ܦܸܬ̣ܓ̣ܵܡܹ̈ܐ ܗܵܠܹܝܢ: ܘܡܝܼܬ̣ ܠܸܒܹ̇ܗ ܒܓ̣ܵܘܹܗ: ܘܲܗܘ̤ܵܐ ܐܲܝܟ݂ ܟܹܐܦܵܐ.

³⁸ܘܲܗܘ̤ܵܘ ܐܲܝܟ݂ ܥܸܣܪܵܐ ܝܵܘܡ̈ܝܼܢ: ܘܲܡܚܵܐ ܡܵܪܝܵܐ ܠܢܵܒ̣ܵܠ ܘܡܝܼܬ̣.

³⁹ܘܲܫܡܲܥ ܕܵܘܝܼܕ݂ ܕܡܝܼܬ̣ ܢܵܒ̣ܵܠ ܘܐܸܡܲܪ: ܒܪܝܼܟ݂ ܗ̄ܘ̣ ܡܵܪܝܵܐ ܕܕ݂ܵܢ ܕܝܼܢܵܐ ܕܚܸܣܕܲܝ ܡ̣ܢ ܐܝܼܕܲܝ̈ ܢܵܒ̣ܵܠ: ܘܲܠܥܲܒ̣ܕܹܗ ܚܣܲܟ݂ ܡ̣ܢ ܒܝܼܫܬܵܐ: ܘܒ̣ܝܼܫܬܹ̇ܗ ܕܢܵܒ̣ܵܠ ܐܲܗܦܸܟ݂ ܡܵܪܝܵܐ ܒܪܹܫܹܗ. ܘܫܲܕܲܪ ܕܵܘܝܼܕ݂ ܘܡܲܠܸܠ ܒܐܲܒ̣ܝܼܓܸܠ: ܕܢܸܣܒ̣ܝܼܗ̇ ܠܹܗ ܐܲܢ̄ܬ̇ܬ̣ܵܐ.

⁴⁰ܘܐܸܬ̣ܵܘ ܥܲܒ̣ܕܵܘ̈ܗܝ ܕܕ݂ܵܘܝܼܕ݂ ܠܘܵܬ̣ ܐܲܒ̣ܝܼܓܸܠ ܠܟܲܪ̄ܡܠܵܐ: ܘܐܸܡܲܪܘ ܠܵܗ̇: ܕܵܘܝܼܕ݂ ܫܲܕܪܲܢ ܥܠܲܝܟ̇ܝ ܕܢܸܣܒܹܟ݂ܝ ܠܹܗ ܐܲܢ̄ܬ̇ܬ̣ܵܐ.

⁴¹ܘܩܵܡܲܬ̤ ܥܲܠ ܐܲܦܹܝ̈ܗ̇ ܥܲܠ ܐܲܪܥܵܐ: ܘܐܸܡܪܲܬ̤ ܗܵܐ ܐܲܡܬ̣ܵܐ ܠܲܡܫܵܓ̣ܘܼ ܪܸ̈ܓ̣ܠܹܐ ܕܥܲܒ̣ܕܵܘ̈ܗܝ ܕܡܵܪܝ.

⁴²ܘܐܸܣܬܲܪ̱ܗܒܲܬ̤ ܘܩܵܡܲܬ̤ ܐܲܒ̣ܝܼܓܸܠ: ܘܝܸܬ̣ܒܲܬ̤ ܥܲܠ ܚܡܵܪܵܐ. ܘܚܲܡܸܫ ܥܠܲܝ̈ܡܵܬ̣ܵܗ̇ ܐܵܙܵܠ̈̄ܢ ܠܪܸܓ̣ܠܵܗ̇: ܘܐܸܙܲܠ̄ܬ̤ ܥܲܡ ܡܲܠܲܐܟ݂ܵܘ̈ܗܝ ܕܕ݂ܵܘܝܼܕ݂: ܘܲܗܘ̤ܵܬ̣ ܠܹܗ ܐܲܢ̄ܬ̇ܬ̣ܵܐ.

⁴³ܘܠܲܐܚܝܼܢܥܸܡ ܢܣܲܒ̣ ܕܵܘܝܼܕ݂ ܡ̣ܢ ܐܝܼܙܲܪܥܹܝܠ: ܘܲܗ̤ܘܲܝ̈ ܠܹܗ ܬܲܪ̈ܬܲܝܗܹܝܢ ܢܸܫܹ̈ܐ.

⁴⁴ܘܝܲܗ̄ܒ̣ ܫܵܐܘܿܠ ܠܡܲܠܟܸܠ ܒܲܪܬܹܗ ܐܲܢ̄ܬܲܬ̣ ܕܵܘܝܼܕ݂ ܠܦܲܠܛܝܼ ܒܲܪ ܠܝܼܫ ܕܡ̣ܢ ܓܲܠܝܵܡ.