Read Aramaic Peshita 1 Samuel 26 Bible Online

1 Samuel 26 - Aramaic Peshita bible

1 Samuel 26

¹ܘܐܸܬ̣ܵܘ ܙܝܼܦܵܝܹ̈ܐ ܠܘܵܬ̣ ܫܵܐܘܿܠ ܠܲܓ̣ܒܲܥ: ܘܐܸܡܲܪܘ ܠܹܗ: ܗܵܐ ܕܵܘܝܼܕ݂ ܡܸܬ̇ܛܲܫܸܐ ܒܓ̣ܒ̣ܥܘܿܬ̣ ܚܘܝܼܠܵܐ ܕܲܩܕ݂ܵܡ ܐܲܫܝܼܡܘܿܢ.

²ܘܩܵܡ ܫܵܐܘܿܠ ܘܲܢܚܸܬ̣ ܠܡܲܕ݂ܒ̇ܪܵܐ ܕܙܝܼܦ: ܘܥܲܡܹܗ ܬܠܵܬ̣ܵܐ ܐܲܠܦ̈ܝܼܢ ܓܲܒ̣ܪ̈ܝܼܢ ܓܒܲܝܵܐ ܕܝܼܣܪܵܝܹܠ: ܠܡܸܒ̣ܥܵܐ ܠܕ݂ܵܘܝܼܕ݂ ܒܡܲܕ݂ܒ̇ܪܵܐ ܕܙܝܼܦ.

³ܘܲܫܪܵܐ ܫܵܐܘܿܠ ܒܓ̣ܒ̣ܥܘܿܬ̣ ܚܘܝܼܠܑܵ ܕܲܩܕ݂ܵܡ ܐܲܫܝܼܡܘܿܢ ܒܐܘܼܪܚܵܐ: ܘܕ݂ܵܘܝܼܕ݂ ܝܵܬܹܒ̣ ܒܡܲܕ݂ܒ̇ܪܵܐ. ܘܲܚܙܵܐ ܕܐܸܬ̣ܵܐ ܫܵܐܘܿܠ ܒܵܬ̣ܪܹܗ ܠܡܲܕ݂ܒ̇ܪܵܐ.

⁴ܘܫܲܕܲܪ ܕܵܘܝܼܕ݂ ܓܵܫܘܿܫܹ̈ܐ: ܘܝܼܕܲܥ ܕܐܸܬ̣ܵܐ ܫܵܐܘܿܠ ܒܵܬ̣ܪܹܗ.

⁵ܘܩܵܡ ܕܵܘܝܼܕ݂ ܘܐܸܬ̣ܵܐ ܠܐܲܬ̣ܪܵܐ ܕܲܫܪܸܐ ܬܲܡܵܢ ܫܵܐܘܿܠ: ܘܲܚܙܵܐ ܕܵܘܝܼܕ݂ ܕܘܼܟ̇ܬ̣ܵܐ ܕܲܕ݂ܡܸܟ݂ ܬܲܡܵܢ ܫܵܐܘܿܠ: ܘܐܲܒ̣ܢܹܝܪ ܒܲܪ ܢܹܝܪ ܪܲܒ ܚܲܝܠܹܗ ܕܫܵܐܘܿܠ ܕܡ̣ܢ ܒܲܫܒ̣ܝܼܠܵܐ: ܘܥܲܡܵܐ ܫܪܸܐ ܚܕ݂ܵܪ̈ܵܘܗܝ.

⁶ܘܲܥܢܵܐ ܕܵܘܝܼܕ݂ ܘܐܸܡܲܪ ܠܐܲܚܝܼܡܲܠܟ ܚܹܬ̣ܵܝܵܐ: ܘܠܲܐܒ̣ܝܼܫܲܝ ܒܲܪ ܨܘܿܪܝܵܐ ܐܲܚܘܼܗܝ ܕܝܘܿܐܵܒ̣: ܘܐܸܡܲܪ: ܡ̇ܢ ܢܵܚܹܬ̣ ܥܲܡܝ ܠܘܵܬ̣ ܫܵܐܘܿܠ ܠܡܲܫܪܝܼܬ̣ܵܐ. ܘܐܸܡܲܪ ܐܲܒ̣ܝܼܫܲܝ: ܐܸܢܵܐ ܢܵܚܹܬ̣ ܐ̄ܢܵܐ ܥܲܡܵܟ݂.

⁷ܘܐܸܬ̣ܵܐ ܕܵܘܝܼܕ݂ ܘܐܲܒ̣ܝܼܫܲܝ ܠܘܵܬ̣ ܥܲܡܵܐ ܒܠܸܠܝܵܐ: ܘܗܵܐ ܫܵܐܘܿܠ ܕܡܸܟ݂ ܒܲܫܒ̣ܝܼܠܵܐ: ܘܡܘܿܪܵܢܝܼܬܹܗ ܣܝܼܡܵܐ ܥܲܠ ܐܸܣܵܕ݂ܵܘ̈ܗܝ: ܘܐܲܒ̣ܢܹܝܪ ܘܥܲܡܵܐ ܕܵܡܟ̇ܝܼܢ ܚܕ݂ܵܪ̈ܵܘܗܝ.

⁸ܘܐܸܡܲܪ ܐܲܒ̣ܝܼܫܲܝ ܠܕ݂ܵܘܝܼܕ݂: ܐܲܫܠܸܡ ܝܵܘܡܵܢܵܐ ܐܲܠܵܗܵܟ݂ ܒܥܸܠܕܒ̣ܵܒ̣ܵܟ݂ ܒܐܝܼܕܲܝ̈ܟ: ܗܵܫܵܐ ܐܸܡܚܹܝܘܗܝ ܒܡܘܿܪܵܢܝܼܬ̣ܵܐ ܗܵܕܹܐ ܕܒܐܲܪܥܵܐ ܙܒܲܢ̄ܬܵܐ ܚܕ݂ܵܐ: ܘܠܵܐ ܐܸܬ̣ܢܹܝܘܗܝ.

⁹ܘܐܸܡܲܪ ܕܵܘܝܼܕ݂ ܠܐܲܒ̣ܝܼܫܲܝ ܠܵܐ ܬܚܲܒܸ̇ܠ: ܡܸܛܠ ܕܠܲܝܬ̇ ܕܡܵܘܫܸܛ ܐܝܼܕܹܗ ܥܲܠ ܡܫܝܼܚܹܗ ܕܡܵܪܝܵܐ ܘܙܵܟܹ̇ܐ.

¹⁰ܘܐܸܡܲܪ ܕܵܘܝܼܕ݂: ܚܲܝ ܗ̄ܘ̣ ܡܵܪܝܵܐ: ܐܸܠܵܐ ܐܸܢ ܡܵܪܝܵܐ ܢܸܡܚܹܘܗܝ: ܐܵܘ ܝܵܘܡܹܗ ܢܹܐܬܹܐ ܘܲܢܡܘܼܬ̣: ܐܵܘ ܒܲܩܪܵܒ̣ܵܐ ܢܸܒ̣ܠܲܝ ܘܲܢܡܘܼܬ̣.

¹¹ܚܵܣ ܠܝܼ ܡ̣ܢ ܡܵܪܝܵܐ ܕܐܵܘܫܸܛ ܐܝܼܕ݂ܝ ܒܲܡܫܝܼܚܹܗ ܕܡܵܪܝܵܐ. ܗܵܫܵܐ ܣܲܒ̣ ܡܘܼܪܵܢܝܼܬ̣ܵܐ ܕܐܸܣܵܕ݂ܵܘ̈ܗܝ: ܘܩܘܼܩܬ̣ܵܐ ܕܡܲܝ̈ܵܐ: ܘܢܹܐܙܲܠ ܠܲܢ.

¹²ܘܲܢܣܲܒ̣ ܕܵܘܝܼܕ݂ ܡܘܿܪܵܢܝܼܬ̣ܵܐ: ܘܩܘܼܩܬ̣ܵܐ ܕܡܲܝ̈ܵܐ: ܡ̣ܢ ܐܸܣܵܕ݂ܵܘ̈ܗܝ ܕܫܵܐܘܿܠ: ܘܐܸܙܲܠܘ ܠܗܘܿܢ. ܘܐ̄ܢܵܫ ܠܵܐ ܚܙܵܐ ܘܠܵܐ ܝܼܕܲܥ ܘܠܵܐ ܐܸܬ̇ܬ̇ܥܝܼܪ: ܡܸܛܠ ܕܟ݂ܠܗܘܿܢ ܕܵܡܟ̇ܝܼܢ ܗ̄ܘ̣ܵܘ: ܘܫܸܢܬ̣ܵܐ ܕܡܵܪܝܵܐ ܢܸܦܠܲܬ̤ ܥܠܲܝܗܘܿܢ.

¹³ܘܲܥܒܲܪ ܕܵܘܝܼܕ݂ ܡ̣ܢ ܠܘܵܬ̣ ܫܵܐܘܿܠ: ܘܩܵܡ ܥܲܠ ܪܹܫܹܗ ܕܛܘܼܪܵܐ ܡ̣ܢ ܪܘܼܚܩܵܐ ܣܲܓܝܼܵܐܐ.

¹⁴ܘܲܩܪܵܐ ܕܵܘܝܼܕ݂ ܠܡܲܠܟܵܐ: ܘܠܲܐܒ̣ܢܹܝܪ ܒܲܪ ܢܹܝܪ: ܘܐܸܡܲܪ ܠܵܐ ܥܵܢܹܐ ܐܲܢ̄ܬ̇ ܐܲܒ̣ܢܹܝܪ. ܘܲܥܢܵܐ ܐܲܒ̣ܢܹܝܪ ܘܐܸܡܲܪ: ܡ̇ܢ ܐܲܢ̄ܬ̇ ܕܩܵܪܹܐ ܐܲܢ̄ܬ̇ ܠܡܲܠܟܵܐ.

¹⁵ܘܐܸܡܲܪ ܕܵܘܝܼܕ݂ ܠܐܲܒ̣ܢܹܝܪ: ܗܵܐ ܓܲܢ̄ܒܵܪܵܐ ܐܲܢ̄ܬ̇: ܘܡܲܢܘܼ ܐܲܟ݂ܘܵܬ̣ܵܟ݂ ܒܟ݂ܠܹܗ ܝܼܣܪܵܝܹܠ. ܬܲܝܟܵܘ ܠܵܐ ܢܛܲܪܬ̇ ܠܡܵܪܵܟ݂ ܡܲܠܟܵܐ: ܕܐܸܬ̣ܵܐ ܚܲܕ݂ ܝܵܘܡܵܢܵܐ ܕܲܢܚܲܒ̇ܠܝܼܘܗܝ ܠܡܲܠܟܵܐ ܡܵܪܵܟ݂.

¹⁶ܠܵܐ ܫܲܦܝܼܪ ܥܒܲܕܲܬ̇. ܚܲܝ ܗ̄ܘ̣ ܡܵܪܝܵܐ ܕܲܒ̣̈ܢܲܝ ܡܵܘܬܵܐ ܐܲܢ̄ܬ̇ܘܿܢ: ܕܠܵܐ ܢܛܲܪܬ̇ܘܿܢ ܠܡܵܪܟ݂ܘܿܢ ܠܲܡܫܝܼܚܹܗ ܕܡܵܪܝܵܐ. ܗܵܫܵܐ ܚܙܝܼ ܐܲܝܟܵܐ ܗ̄ܝܼ ܡܘܿܪܵܢܝܼܬܹܗ ܕܡܲܠܟܵܐ: ܘܩܘܼܩܬ̣ܵܐ ܕܡܲܝ̈ܵܐ ܕܐܸܣܵܕ݂ܵܘ̈ܗܝ.

¹⁷ܘܲܫܡܲܥ ܫܵܐܘܿܠ ܩܵܠܹܗ ܕܕ݂ܵܘܝܼܕ݂: ܘܐܸܡܲܪ ܠܹܗ: ܩܵܠܵܟ݂ ܗ̄ܘ̣ ܗܵܢܵܐ: ܒܹܪܝ ܕܵܘܝܼܕ݂. ܘܐܸܡܲܪ: ܩܵܠܝ ܗ̄ܘ̣ ܡܵܪܝ ܡܲܠܟܵܐ.

¹⁸ܘܐܸܡܲܪ ܕܵܘܝܼܕ݂: ܠܡܵܢܵܐ ܪܵܕܹܦ ܐܲܢ̄ܬ̇ ܡܵܪܝ ܒܵܬܲܪ ܥܲܒ̣ܕܵܟ݂: ܡܵܢܵܐ ܥܸܒ̣ܕܹܬ̣: ܘܡܵܢܲܐ ܗ̄ܝ̣ ܒܝܼܫܬܵܐ ܕܒ̣ܐܝܼܕܲܝ̈.

¹⁹ܗܵܫܵܐ ܢܸܫܡܲܥ ܡܵܪܝ ܡܲܠܟܵܐ ܡܸܠܵܘ̈ܗܝ ܕܥܲܒ̣ܕܹܗ. ܘܐܸܢ ܡܵܪܝܵܐ ܓܲܪܝܵܟ݂ ܒܝܼ: ܢܩܲܪܸܒ̣ ܩܘܼܪܒܵܢܵܐ. ܘܐܸܢ ܒܢܲܝ̈ܢܵܫܵܐ: ܠܝܼܛܝܼܢ ܐܸܢܘܿܢ ܩܕ݂ܵܡ ܡܵܪܝܵܐ: ܡܸܛܠ ܕܛܲܪܕܘܼܢܝ ܕܠܵܐ ܐܸܬ̇ܛܲܦܸܐ ܒܝܵܪܬ̇ܘܼܬܹܗ ܕܡܵܪܝܵܐ: ܠܡܹܐܡܲܪ ܙܸܠ ܦܠܘܿܚ ܠܐܲܠܵܗܹ̈ܐ ܐ̄ܚܪ̈ܵܢܹܐ.

²⁰ܗܵܫܵܐ ܠܵܐ ܢܸܦܸܠ ܕܹܡܝ ܥܲܠ ܐܲܪܥܵܐ ܡ̣ܢ ܩܕ݂ܵܡ ܡܵܪܝܵܐ: ܡܸܛܠ ܕܲܢܦܲܩ ܡܲܠܟܵܐ ܕܝܼܣܪܵܝܹܠ ܠܡܸܒ̣ܥܵܐ ܠܦܘܼܪܬܲܥܢܵܐ ܚܲܕ݂: ܐܲܝܟ݂ ܕܪܵܕܹܦ ܚܲܓ̣ܠܵܐ ܒܛܘܼܪܵܐ.

²¹ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܚܛܹܝܬ̣: ܗܦܘܿܟ݂ ܒܹܪܝ ܕܵܘܝܼܕ݂: ܡܸܛܠ ܕܠܵܐ ܐܲܒ̣ܐܸܫ ܠܵܟ݂ ܬܘܼܒ̣. ܚܠܵܦ ܕܝܼܩܲܬ̤ ܢܲܦ̮ܫܝ ܒܥܲܝܢܲܝ̈ܟ ܝܵܘܡܵܢܵܐ: ܗܵܐ ܐܲܣܟ̇ܠܹܬ̣ ܘܲܚܛܹܝܬ̣ ܛܵܒ̣ ܣܲܓ̇ܝܼ.

²²ܘܲܥܢܵܐ ܕܵܘܝܼܕ݂ ܘܐܸܡܲܪ ܗܵܐ ܡܘܿܪܵܢܝܼܬܹܗ ܕܡܲܠܟܵܐ: ܢܸܥܒܲܪ ܚܲܕ݂ ܡ̣ܢ ܥܠܲܝܡܹ̈ܐ ܢܸܣܒ̣ܝܼܗ̇.

²³ܘܡܵܪܝܵܐ ܢܲܗܦܸܟ݂ ܠܓܲܒ̣ܪܵܐ ܙܲܕܝܼܩܘܼܬܹܗ ܘܗܲܝܡܵܢܘܼܬܹܗ. ܕܐܲܫ̱ܠܡܵܟ݂ ܡܵܪܝܵܐ ܝܵܘܡܵܢܵܐ ܒܐܝܼܕܲܝ̈: ܘܠܵܐ ܨܒܹܝܬ̣ ܠܡܵܘܫܵܛܘܼ ܐܝܼܕ݂ܝ ܒܲܡܫܝܼܚܹܗ ܕܡܵܪܝܵܐ.

²⁴ܐܲܝܟ݂ ܕܝܸܪܒܲܬ̤ ܢܲܦ̮ܫܵܟ݂ ܝܵܘܡܵܢܵܐ ܒܥܲܝܢܲܝ̈: ܗܵܟܲܢܵܐ ܬܹܐܪܲܒ̣ ܢܲܦ̮ܫܝ ܒܥܲܝܢܲܝ̈ ܡܵܪܝܵܐ.

²⁵ܘܐܸܡܲܪ ܫܵܐܘܿܠ ܠܕ݂ܵܘܝܼܕ݂: ܒܪܝܼܟ݂ ܐܲܢ̄ܬ̇ ܒܹܪܝ: ܐܵܦ ܡܸܥܒܲܕ݂ ܥܒܲܕܬ̇: ܐܵܦ ܡܸܙܟܵܐ ܙܟܲܝܬ̇. ܘܐܸܙܲܠ ܕܵܘܝܼܕ݂ ܠܐܘܼܪܚܹܗ: ܘܐܵܦ ܫܵܐܘܿܠ ܗܦܲܟ݂ ܠܒܲܝܬܹ̇ܗ.