Read Aramaic Peshita 1 Samuel 3 Bible Online

1 Samuel 3 - Aramaic Peshita bible

1 Samuel 3

¹ܘܛܲܠܝܵܐ ܫܡܘܼܐܹܝܠ ܡܫܲܡܸܫ ܗ̄ܘ̣ܵܐ ܩܕ݂ܵܡ ܡܵܪܝܵܐ ܩܕ݂ܵܡ ܥܹܠܝܼ ܟܵܗܢܵܐ: ܘܦܸܬ̣ܓ̣ܵܡܹܗ ܕܡܵܪܝܵܐ ܝܲܩܝܼܤ ܗ̄ܘ̣ܵܐ ܒܝܵܘ̈ܡܵܬ̣ܵܐ ܗܵܢܘܿܢ: ܠܲܝܬ̇ ܚܸܙܘܵܐ ܕ݂ܓ̣ܠܸܐ.

²ܘܲܗܘ̤ܵܐ ܒܗܵܢܘܿܢ ܝܵܘ̈ܡܵܬ̣ܵܐ: ܘܥܹܠܝܼ ܕܡܸܟ݂ ܒܕ݂ܘܼܟ̇ܬܹܗ: ܘܥܲܝܢܵܘ̈ܗܝ ܫܲܪܝܼ ܝܵܩܪ̈ܵܢ: ܘܠܵܐ ܡܸܫܟܲܚ ܗ̄ܘ̣ܵܐ ܠܡܸܚܙܵܐ.

³ܘܲܫܪܵܓܹܗ ܕܡܵܪܝܵܐ ܥܕܲܟܹ̇ܝܠ ܠܵܐ ܕܥܸܟ݂. ܘܲܫܡܘܼܐܹܝܠ ܕܡܸܟ݂ ܒܗܲܝܟ̇ܠܹܗ ܕܡܵܪܝܵܐ ܕܬܲܡܵܢ ܩܹܒ̣ܘܿܬܹܗ ܕܐܲܠܵܗܵܐ.

⁴ܘܲܩܪܵܐ ܡܵܪܝܵܐ ܠܲܫܡܘܼܐܹܝܠ: ܘܐܸܡܲܪ ܗܵܐ ܐܸܢܵܐ.

⁵ܘܲܪܗܸܛ ܠܘܵܬ̣ ܥܹܠܝܼ: ܘܐܸܡܲܪ ܗܵܐ ܐܸܢܵܐ ܕܲܩܪܲܝܬܵܢܝ. ܘܐܸܡܲܪ ܠܵܐ ܩܪܹܝܬ̣: ܙܸܠ ܕܡܲܟ݂. ܘܐܸܙܲܠ ܕܡܸܟ݂.

⁶ܘܐܵܘܣܸܦ ܬܘܼܒ̣ ܡܵܪܝܵܐ ܠܡܸܩܪܵܐ ܠܲܫܡܘܼܐܹܝܠ: ܘܩܵܡ ܫܡܘܼܐܹܝܠ ܘܐܸܙܲܠ ܠܘܵܬ̣ ܥܹܠܝܼ: ܘܐܸܡܲܪ ܗܵܐ ܐܸܢܵܐ ܕܲܩܪܲܝܬܵܢܝ. ܘܐܸܡܲܪ ܠܵܐ ܩܪܹܝܬ̣ ܒܹܪܝ: ܙܸܠ ܕܡܲܟ݂.

⁷ܘܲܫܡܘܼܐܹܝܠ ܥܕܲܟܹ̇ܝܠ ܠܵܐ ܝܕܲܥ ܠܡܵܪܝܵܐ: ܘܲܥܕܲܟܹ̇ܝܠ ܠܵܐ ܐܸܬ̣ܓ̇ܠܝܼ ܥܠܵܘܗܝ ܦܸܬ̣ܓ̣ܵܡܹܗ ܕܡܵܪܝܵܐ.

⁸ܘܐܵܘܣܸܦ ܬܘܼܒ̣ ܡܵܪܝܵܐ ܠܡܸܩܪܵܐ ܠܲܫܡܘܼܐܹܝܠ ܕܲܬ̣ܠܵܬ̣ ܙܲܒ̣̈ܢܝܼܢ. ܘܩܵܡ ܫܡܘܼܐܹܝܠ ܘܐܸܙܲܠ ܠܘܵܬ̣ ܥܹܠܝܼ: ܘܐܸܡܲܪ ܗܵܐ ܐܸܢܵܐ ܕܲܩܪܲܝܬܵܢܝ. ܘܐܸܬ̣ܒܲܝܲܢ ܥܹܠܝܼ ܕܡܵܪܝܵܐ ܩܪܵܐ ܠܛܲܠܝܵܐ.

⁹ܘܐܸܡܲܪ ܥܹܠܝܼ ܠܲܫܡܘܼܐܹܝܠ: ܙܸܠ ܕܡܲܟ݂. ܘܐܸܢ ܢܸܩܪܹܝܢ ܐܸܡܲܪ: ܡܲܠܸܠ ܡܵܪܝܵܐ ܡܸܛܠ ܕܫܵܡܲܥ ܥܲܒ̣ܕܵܟ݂. ܘܐܸܙܲܠ ܫܡܘܼܐܹܝܠ ܘܲܕ݂ܡܸܟ݂ ܒܕ݂ܘܼܟ̇ܬܹܗ.

¹⁰ܘܐܸܬ̣ܵܐ ܡܵܪܝܵܐ ܘܩܵܡ ܘܲܩܪܵܐ ܬܲܪܬܹܝܢ ܙܲܒ̣ܢ̈ܝܼܢ: ܫܡܘܼܐܹܝܠ: ܫܡܘܼܐܹܝܠ. ܘܐܸܡܲܪ ܫܡܘܼܐܹܝܠ: ܡܲܠܸܠ ܡܵܪܝܵܐ ܕܫܵܡܲܥ ܥܲܒ̣ܕܵܟ݂.

¹¹ܘܐܸܡܲܪ ܡܵܪܝܵܐ ܠܲܫܡܘܼܐܹܝܠ: ܗܵܐ ܥܵܒܹܕ݂ ܐ̄ܢܵܐ ܦܸܬ̣ܓ̣ܵܡܵܐ ܒܝܼܣܪܵܝܹܠ: ܕܟ݂ܠ ܕܢܸܫܡ̱ܥܝܼܘܗܝ. ܢܸܨ̈ܠܵܢ ܬܲܪ̈ܬܲܝܗܹܝܢ ܐܸܕ݂ܢܵܘ̈ܗܝ.

¹²ܒܝܵܘܡܵܐ ܗܵܘ̇ ܐܲܩܝܼܡ ܥܲܠ ܥܹܠܝܼ ܟܠ ܕܐܸܡ̇ܪܹܬ̣ ܥܲܠ ܒܲܝܬܹܗ: ܫܘܼܪܵܝܵܐ ܘܲܓ̣ܡܘܼܪܝܵܐ.

¹³ܘܐܹܚܵܘܹܝܘܗܝ ܕܕ݂ܵܐܹܢ ܐ̄ܢܵܐ ܠܒܲܝܬܹܗ ܠܥܵܠܲܡ: ܒܥܵܘ̣ܠܵܐ ܕܝܵܕܲܥ ܗ̄ܘ̣ܵܐ ܕܲܡܨܲܥܪܝܼܢ ܗ̄ܘ̣ܵܐ ܗܵܠܹܝܢ ܒܢܘ̈ܗܝ ܠܥܲܡܵܐ. ܘܠܵܐ ܟ݂ܐܵܐ ܒܗܘܿܢ.

¹⁴ܡܸܛܠ ܗܵܢܵܐ ܐܲܡܝܼܬ̣ ܠܲܕ݂ܒܹܝܬ̣ ܥܹܠܝܼ: ܘܠܵܐ ܢܸܬ̣ܚܲܣܸܐ ܥܵܘ̣ܠܵܐ ܕܒܹܝܬ̣ ܥܹܠܝܼ: ܒܕܸܒ̣ܚܹ̈ܐ ܘܲܒ̣ܩܘܼܪ̈ܒܵܢܹܐ ܥܕܲܡܵܐ ܠܥܵܠܲܡ.

¹⁵ܘܲܕ݂ܡܸܟ݂ ܫܡܘܼܐܹܝܠ ܥܕܲܡܵܐ ܠܨܲܦܪܵܐ: ܘܲܦܬܲܚ ܬܲܪܥܵܐ ܕܒܲܝܬܹܗ ܕܡܵܪܝܵܐ: ܘܲܫܡܘܼܐܹܝܠ ܕܚܸܠ ܕܲܢܚܵܘܸܐ ܚܸܙܘܵܐ ܠܥܹܠܝܼ.

¹⁶ܘܲܩܪܵܐ ܥܹܠܝܼ ܠܲܫܡܘܼܐܹܝܠ ܘܐܸܡܲܪ: ܫܡܘܼܐܹܝܠ ܒܹܪܝ: ܘܐܸܡܲܪ ܗܵܐ ܐܸܢܵܐ.

¹⁷ܘܐܸܡܲܪ ܠܹܗ: ܡܵܢܵܐ ܗ̄ܘ݂ ܦܸܬ̣ܓ̣ܵܡܵܐ ܕܐܸܡܲܪ ܠܵܟ݂ ܡܵܪܝܵܐ: ܠܵܐ ܬܸܒ̣ܗܲܬ̣ ܡܹܢܝ. ܗܵܟܲܢܵܐ ܢܸܥܒܸ̇ܕ݂ ܠܵܟ݂ ܐܲܠܵܗܵܐ: ܘܗܵܟܲܢܵܐ ܢܵܘܣܸܦ ܠܵܟ݂: ܐܸܢ ܬܟܲܣܸܐ ܡܹܢܝ ܡܸܠܬ̣ܵܐ ܡ̣ܢ ܟܠ ܦܸܬ̣ܓ̣ܵܡܵܐ ܕܐܸܡܲܪ ܠܵܟ݂ ܡܵܪܝܵܐ.

¹⁸ܘܚܵܘܝܹܗ ܫܡܘܼܐܹܝܠ ܟܠܗܹܝܢ ܡܸܠܹ̈ܐ: ܘܠܵܐ ܟܲܣܝܼ ܡܸ̤ܢܹܗ. ܘܐܸܡܲܪ ܥܹܠܝܼ: ܡܵܪܝܵܐ ܗ̄ܘ̣: ܟܠ ܕܫܲܦܝܼܪ ܒܥܲܝܢܵܘ̈ܗܝ ܢܸܥܒܸ̇ܕ݂.

¹⁹ܘܝܼܕܲܥ ܫܡܘܼܐܹܝܠ ܕܡܵܪܝܵܐ ܗ̄ܘ̣ܵܐ ܥܲܡܹܗ: ܘܠܵܐ ܐܲܪܡܝܼ ܡ̣ܢ ܟܠܗܹܝܢ ܡܸܠܵܘ̈ܗܝ ܥܲܠ ܐܲܪܥܵܐ.

²⁰ܘܝܼܕܲܥ ܟܠܹܗ ܝܼܣܪܵܝܹܠ ܡ̣ܢ ܕܵܢ ܘܲܥܕܲܡܵܐ ܠܒܹܪܫܒܲܥ: ܕܐܸܬ̣ܗܲܝܡܲܢ ܫܡܘܼܐܹܝܠ ܢܒ̣ܝܼܵܐ ܠܐܲܠܵܗܵܐ.

²¹ܘܐܵܘܣܸܦ ܬܘܼܒ̣ ܡܵܪܝܵܐ ܠܡܸܬ̣ܓ̇ܠܵܝܘܼ ܒܫܝܼܠܘܿ ܒܦܸܬ̣ܓ̣ܵܡܵܘ̈ܗܝ: ܘܲܗܘ̤ܵܐ ܦܸܬ̣ܓ̣ܵܡܹܗ ܕܲܫܡܘܼܐܹܝܠ ܥܲܠ ܟܠܹܗ ܝܼܣܪܵܝܹܠ.