Read Aramaic Peshita 1 Samuel 30 Bible Online

1 Samuel 30 - Aramaic Peshita bible

1 Samuel 30

¹ܘܟܲܕ݂ ܐܸܬ̣ܵܐ ܕܵܘܝܼܕ݂ ܘܓܲܒ̣ܪ̈ܵܘܗܝ ܠܨܸܢܩܠܲܓ̣ ܒܝܵܘܡܵܐ ܬܠܝܼܬ̣ܵܝܵܐ: ܘܲܥܡܵܠܩܵܝܹ̈ܐ ܗܲܠܸܟ݂ܘ ܥܲܠ ܢܓܲܒ̣ ܘܥܲܠ ܨܸܢܩܠܲܓ̣: ܘܐܵܘܩܸܕ݂ܘ ܐܸܢܹܝܢ ܒܢܘܼܪܵܐ.

²ܘܲܫܒ̣ܵܘ ܐ̄ܢܵܐ ܕܲܒ̣ܗܹܝܢ: ܡ̣ܢ ܙܥܘܿܪܵܐ ܘܲܥܕܲܡܵܐ ܠܪܲܒܵܐ. ܘܐܲܡܝܼܬ̣ܘ ܓܲܒ̣ܪܹ̈ܐ: ܘܲܕ݂ܒܲܪܘ ܘܐܸܙܲܠܘ ܠܐܘܼܪܚܗܘܿܢ.

³ܘܐܸܬ̣ܵܐ ܕܵܘܝܼܕ݂ ܘܓ̣ܪܗܵܘܗܝ ܠܲܩܪܝܼܬ̣ܵܐ: ܘܗܵܐ ܡܵܘܩܕ݂ܵܐ ܒܢܘܼܪܵܐ: ܘܢܸܫܲܝ̈ܗܘܿܢ ܘܲܒ̣ܢܲܝ̈ܗܘܿܢ ܘܲܒ̣̈ܢܵܬ̣ܗܘܿܢ ܐܸܫܬ̇ܒ̣ܝܼܘ.

⁴ܘܐܲܪܝܼܡ ܕܵܘܝܼܕ݂ ܘܥܲܡܵܐ ܩܵܠܗܘܿܢ ܘܲܒ̣ܟ݂ܵܘ: ܥܕܲܡܵܐ ܕܠܐܵܗ̄ܘ̣ܵܐ ܒܗܘܿܢ ܚܲܝܠܵܐ ܠܡܸܒ̣ܟܵܐ.

⁵ܘܬܲܪܬܹܝܢ ܢܸܫܵܘ̈ܗܝ ܕܕ݂ܵܘܝܼܕ݂ ܐܸܫܬ̇ܒ̣ܝܼ: ܐܲܚܝܼܢܥܸܡ ܕܡ̣ܢ ܐܝܼܙܲܪܥܹܝܠ: ܘܐܲܒ̣ܝܼܓܸܠ ܐܲܢ̄ܬ̇ܬܹܗ ܕܢܵܒ̣ܵܠ ܟܲܪܡ̄ܠܵܝܵܐ.

⁶ܘܥܵܩܲܬ̤ ܠܕ݂ܵܘܝܼܕ݂ ܛܵܒ̣: ܡܸܛܠ ܕܐܸܡܲܪ ܥܲܡܵܐ ܠܡܸܪܓܡܹܗ: ܡܸܛܠ ܕܡܝܼܬܲܬ̤ ܢܲܦ̮ܫܹܗ ܕܟ݂ܠܹܗ ܥܲܡܵܐ ܥܲܠ ܒ̈ܢܲܝܗܘܿܢ ܘܥܲܠ ܒ̈ܢܵـܟܗܘܿܢ. ܘܚܲܡܣܸܢ ܕܵܘܝܼܕ݂ ܒܡܵܪܝܵܐ ܐܲܠܵܗܹܗ.

⁷ܘܐܸܡܲܪ ܕܵܘܝܼܕ݂ ܠܐܲܒ̣ܝܼܬܲܪ ܟܵܗܢܵܐ ܒܲܪ ܐܲܚܝܼܡܲܠܟ: ܩܲܪܒ̣ ܦܸܕܬ̣ܵܐ. ܘܩܲܪܒ̣ ܠܲܒ̣ܝܼܬܲܪ ܦܸܕܬ̣ܵܐ ܠܕ݂ܵܘܝܼܕ݂.

⁸ܘܲܫܐܸܠ ܕܵܘܝܼܕ݂ ܒܡܵܪܝܵܐ ܘܐܸܡܲܪ: ܐܸܪܕܘܿܦ ܒܵܬܲܪ ܓܲܝܣܵܐ ܗܵܢܵܐ: ܡܲܕ݂ܪܸܟ݂ ܐ̄ܢܵܐ ܠܹܗ. ܘܐܸܡܲܪ ܠܹܗ: ܪܕ݂ܘܿܦ: ܡܸܛܠ ܕܒܲܥܓܲܠ ܡܲܕ݂ܪܸܟ݂ ܐܲܢ̄ܬ̇ ܠܹܗ: ܘܲܡܦܲܨܸܐ ܐܲܢܬ̇.

⁹ܘܐܸܙܲܠ ܕܵܘܝܼܕ݂ ܗ̤ܘ ܘܫܸܬ̣ܡܵܐܐ ܓܲܒ̣ܪ̈ܝܼܢ ܕܥܲܡܹܗ: ܘܐܸܬ̣ܵܘ ܥܕܲܡܵܐ ܠܢܲܚܠܵܐ ܕܒ̣ܘܼܨܵܪ. ܘܲܫܒܲܩ ܕܵܘܝܼܕ݂ ܡܲܐܬܹܝܢ ܓܲܒ̣ܪ̈ܝܼܢ.

¹⁰ܘܩܵܡ ܪܕܲܦ ܕܵܘܝܼܕ݂ ܗ̤ܘ ܘܐܲܪܒܲܥܡܵܐ ܓܲܒ̣ܪ̈ܝܼܢ ܘܩܵܡܘ ܡܲܐܬܹܝܢ ܓܲܒ̣ܪ̈ܝܼܢ ܕܦܵܫܘ: ܘܲܢܛܲܪܘ ܕܠܵܐ ܢܸܥܒ̇ܪܘܼܢ ܢܲܚܠܵܐ ܕܒܟܘܼܨܵܪ.

¹¹ܘܐܸܫܟܲܚܘ ܓܲܒ̣ܪܵܐ ܡܸܨܪܵܝܵܐ ܒܚܲܩܠܵܐ: ܘܐܲܝܬ̇ܝܘܼܗܝ ܠܘܵܬ̣ ܕܵܘܝܼܕ݂: ܘܝܲܗ̄ܒ̣ ܠܹܗ ܠܲܚܡܵܐ ܘܲܠܥܸܣ: ܘܐܲܫܩܝܘܼܗܝ ܡܲܝ̈ܵܐ.

¹²ܘܬܲܪܬܹܝܢ ܓܘܼܒ̣̈ܢܝܼܢ: ܘܐܸܟܲܠ ܘܗܸܦܟܲܬ̤ ܥܠܵܘܗܝ ܪܘܼܚܹܗ. ܡܸܛܠ ܕܲܬ̣ܠܵܬ̣ܵܐ ܝܵܘ̈ܡܝܼܢ ܘܲܬ̣ܠܵܬ̣ܵܐ ܠܲܝ̈ܠܵܘܵܢ: ܠܵܐ ܐܸܟܲܠ ܠܲܚܡܵܐ: ܘܠܵܐ ܐܸܫܬ̇ܝܼ ܡܲܝ̈ܵܐ.

¹³ܐܵܡܲܪ ܠܹܗ ܕܵܘܝܼܕ݂: ܕܡ̇ܢ ܐܲܢ̄ܬ̇ ܘܡ̣ܢ ܐܲܝܡܸܟ̇ܐ ܐܸܬܲܝܬ̇. ܘܐܸܡܲܪ: ܥܠܲܝܡܵܐ ܡܸܨܪܵܝܵܐ ܐ̄ܢܵܐ: ܥܲܒ̣ܕܵܐ ܐ̄ܢܵܐ ܕܓܲܒ̣ܪܵܐ ܥܡܵܠܩܵܝܵܐ: ܘܫܲܒ̣ܩܲܢܝ ܡܵܪܝ ܡܸܛܠ ܕܐܸܬ̣ܟܲܪܗܹܬ̣. ܗܵܐ ܬܠܵܬ̣ܵܐ ܝܵܘ̈ܡܝܼܢ.

¹⁴ܗܵܐ ܡ̣ܢ ܕܐܸܬܲܝܢ ܡ̣ܢ ܢܓܲܒ̣ ܕܲܝܗܘܼܕ݂ܵܐ: ܘܡ̣ܢ ܢܓܲܒ̣ ܕܟ݂ܵܠܵܒ̣: ܘܡ̣ܢ ܨܸܢܩܠܲܓ̣: ܕܐܵܘܩܸܕܢ ܐܸܢܹܝܢ ܒܢܘܼܪܵܐ.

¹⁵ܐܵܡܪ ܠܹܗ ܕܵܘܝܼܕ݂: ܡܲܚܸܬ̣ ܐܲܢ̄ܬ̇ ܠܝܼ ܥܲܠ ܓܲܝܣܵܐ ܗܵܢܵܐ. ܐܵܡܲܪ ܠܹܗ: ܝܼܡܝܼ ܠܝܼ ܒܡܵܪܝܵܐ ܕܠܵܐ ܬܸܩܛܠܲܢܝ ܘܠܑܵ ܬܲܫ̱ܠܡܲܢܝ ܒܐܝܼܕ݂ܵܐ ܕܡܵܪܝ: ܘܐܸܢܵܐ ܐܹܚܵܘܹܝܟ݂ ܓܲܝܣܵܐ ܗܵܢܵܐ.

¹⁶ܘܝܼܡܵܐ ܠܹܗ ܕܵܘܝܼܕ݂ ܘܐܲܚܬܹܗ: ܘܗܵܐ ܗܸܢܘܿܢ ܫܪܹܝܢ ܥܲܠ ܐܲܦܲܝ̈ ܐܲܪܥܵܐ ܠܵܥܣܝܼܢ ܘܫܵܬܹܝܢ: ܘܚܵܕܹܝܢ ܒ̣ܟ݂ܠܵܗ̇ ܒܙܬ̣ܵܐ ܪܲܒ̇ܬ̣ܵܐ: ܕܲܢܣܲܒ̣ܘ ܡ̣ܢ ܐܵܪܥܵܐ ܕܲܝܗܘܼܕ݂ܵܐ.

¹⁷ܘܲܡܚܵܐ ܐܸܢܘܿܢ ܕܵܘܝܼܕ݂: ܡ̣ܢ ܨܲܦܪܵܐ ܘܲܥܕܲܡܵܐ ܠܪܲܡܫܵܐ ܡ̣ܢ ܒܸܣܬܲܪܗܘܿܢ. ܘܠܵܐ ܐܸܬ̣ܦܲܠܲܛܘ ܡܸܢܗܘܿܢ: ܐܸܠܵܐ ܐܸܢ ܐܲܪܒ̇ܥܡܵܐܐ ܓܲܒ̣ܪ̈ܝܼܢ ܕܲܪܟ݂ܒ̣ܘ ܥܲܠ ܓܲܡ̈ܠܹܗ ܘܲܥܪܲܩܘ.

¹⁸ܘܦܲܨܝܼ ܕܵܘܝܼܕ݂ ܠܟ݂ܠ ܕܲܢܣܲܒ̣ܘ ܥܡܵܠܩܵܝܹ̈ܐ: ܘܬܲܪܬܹܝܢ ܢܸܫܵܘ̈ܗܝ ܒܝܵܘܡܵܐ ܗܵܘ̇.

¹⁹ܘܠܵܐ ܛܥܵܐ ܠܗܘܿܢ ܡܸܕܸܡ: ܐܸܠܵܐ ܟܠ ܡܸܕܸܡ ܐܲܗܦܸܟ݂ ܕܵܘܝܼܕ݂.

²⁰ܘܲܕ݂ܒܲܪ ܕܵܘܝܼܕ݂ ܟܠܵܗ̇ ܥܵܢ̈ܵܐ ܘܬ̣ܵܘܪܹ̈ܐ: ܠܦܘܼܬ̣ ܩܸܢܝܵܢܵܐ ܗܵܘ̇: ܘܐܸܡܲܪܘ ܗܵܢܵܐ ܡܕܸܡ ܕܐܲܥܕܲܝܼ ܕܵܘܝܼܕ݂.

²¹ܘܐܸܬ̣ܵܐ ܕܵܘܝܼܕ݂ ܠܘܵܬ̣ ܡܲܐܬܹܝܢ ܓܲܒ̣ܪ̈ܝܼܢ ܕܦܵܫܘ ܠܡܸܛܲܪ ܡܵܐܢܹ̈ܐ: ܕܐܵܘܬܸܒ̣ܘ ܐܸܢܘܿܢ ܠܡܸܛܲܪ ܒܐܘܼܪܚܵܐ ܕܒ̣ܘܼܨܵܪ: ܘܲܢܦܲܩܘ ܠܐܘܼܪܥܹܗ ܕܕ݂ܵܘܝܼܕ݂ ܘܠܐܘܼܪܥܵܐ ܕܥܲܡܵܐ ܕܥܲܡܹܗ. ܘܲܩܪܸܒ̣ܘ ܕܵܘܝܼܕ݂ ܘܥܲܡܵܐ ܘܲܫܐܸܠܘ ܒܲܫܠܵܡܗܘܿܢ.

²²ܘܲܥܢܵܘ ܓܲܒ̣ܪܹ̈ܐ ܒܝܼܫܹ̈ܐ ܘܥܵܘܵܠܹ̈ܐ ܡ̣ܢ ܓܲܒ̣ܪܹ̈ܐ ܕܐܸܙܲܠܘ ܥܲܡ ܕܵܘܝܼܕ݂: ܘܐܸܡܲܪܘ: ܥܲܠ ܕܠܵܐ ܐܸܙܲܠܘ ܥܲܡܲܢ: ܠܵܐ ܬܸܬ̣ܝܼܗܸܒ̣ ܠܗܘܿܢ ܡܢܵܬ̣ܵܐ ܡ̣̱ܢ ܒܸܙܬ̣ܵܐ ܕܦܲܨܝܼܢ: ܐܸܠܵܐ ܢܸܕ݂ܒ̇ܪܘܼܢ ܓܒܲܪ ܐܲܢ̄ܬ̇ܬܹܗ ܘܲܒ̣ܢܵܘ̈ܗܝ.

²³ܘܐܸܡܲܪ ܕܵܘܝܼܕ݂: ܠܵܐ ܬܸܥܒ̇ܕ݂ܘܼܢ ܗܵܟܲܢܵܐ ܐܲܚܝ̈ܢ: ܕܝܲܗ̄ܒ̣ ܠܲܢ ܡܵܪܝܵܐ ܘܢܲܛܪܲܢ: ܘܐܲܫܠܸܡ ܒܐܝܼܕܲܝ̈ܢ ܓܲܝܣܵܐ ܕܐܸܬ̣ܵܐ ܥܠܲܝܢ.

²⁴ܡܲܢܘܼ ܢܸܫܡܲܥ ܠܡܸܠܲܬ̣ܟ݂ܘܿܢ ܗܵܕܹܐ: ܡܸܛܠ ܕܲܡܢܵܬܹܗ ܕܡ̇ܢ ܕܢܵܚܹܬ̣ ܠܲܩܪܵܒ̣ܵܐ: ܐܲܝܟ݂ ܡܢܵܬܹܗ ܕܡ̇ܢ ܕܝܵܬܹܒ̣ ܓܹܢ̄ܒ̣ ܡܵܐܢܹ̈ܐ: ܘܐܲܟ݂ܚ̄ܕ݂ܵܐ ܡܦܲܠܓ̣ܝܼܢ.

²⁵ܘܲܗܘ̤ܵܐ ܡ̣ܢ ܝܵܘܡܵܐ ܗܵܘ̇. ܘܣܵܡܹܗ ܕܵܘܝܼܕ݂ ܩܝܵܡܵܐ ܗܵܢܵܐ: ܘܙܸܕ݂ܩܵܐ ܥܕܲܡܵܐ ܠܝܵܘܡܵܢܵܐ.

²⁶ܘܐܸܬ̣ܵܐ ܕܵܘܝܼܕ݂ ܠܨܸܢܩܠܲܓ̣: ܘܫܲܕܲܪ ܡ̣ܢ ܒܸܙܬ̣ܵܐ ܠܣܵܒܹ̈ܐ ܕܲܝܗܘܼܕ݂ܵܐ ܘܲܠܚܲܒ̣ܪ̈ܲܝܗܘܿܢ: ܘܐܸܡܲܪ: ܗܵܐ ܠܟ݂ܘܿܢ ܒܘܼܪܟ̇ܬ̣ܵܐ: ܡ̣ܢ ܒܸܙܬ̣ܵܐ ܕܲܒ̣ܥܠܕܒ̣ܵܒܵܘ̈ܗܝ ܕܡܵܪܝܵܐ.

²⁷ܘܫܲܕܲܪ ܠܲܕܒܹܝܬ̣ ܐܹܝܠ: ܘܠܲܕ݂ܒܹܝܬ̣ ܪܵܡܘܼܬ̣ ܢܓܲܒ̣: ܘܠܲܕ݂ܒܹܝܬ̣ ܥܵܢ.

²⁸ܘܠܲܕ݂ܒܹܝܬ̣ ܥܲܕ݂ܘܵܥܝܼܪ: ܘܲܠܕܲܒ̣ܣܲܦ̮ܡܘܼܬ̣: ܘܲܠܕܲܒ̣ܫܸܬ̇ܡܘܿܥ.

²⁹ܘܲܠܕܲܒ̣ܪܲܟܹܝܠ: ܘܲܠܕܲܒ̣ܩܘܼܪ̈ܝܵܐ ܕܝܲܪܚ̄ܡܹܠ: ܘܲܠܕܲܒ̣ܘܼܪ̈ܝܵܐ ܕܩܝܼ̈ܢܵܝܹܐ.

³⁰ܘܲܠܕܲܒ̣ܚܸܪܡܵܐ: ܘܠܲܕ݂ܒ̣ܵܪܥܵܫܵܢ: ܘܲܠܕܲܒ̣ܥܢܵܟ݂: ܘܲܠܕܲܒ̣ܚܸܒ̣ܪܘܿܢ: ܘܲܠܟ݂ܠܗܘܿܢ ܐܲܬ̣ܪ̈ܵܘܵܬ̣ܵܐ ܕܗܲܠܸܟ݂ ܬܲܡܵܢ ܕ݂ܵܘܝܼܕ݂: ܗ̤ܘ ܘܓܲܒ̣ܪܗܵܘܗܝ.