Read Aramaic Peshita 1 Samuel 31 Bible Online

1 Samuel 31 - Aramaic Peshita bible

1 Samuel 31

¹ܘܲܦܠܸܫ̈ܬܵܝܹܐ ܡܸܬ̣ܟܲܬ̇ܫܝܼܢ ܥܲܡ ܝܼܣܪܵܝܹܠ: ܘܲܥܪܲܩܘ ܐ̄ܢܵܫܵܐ ܕܝܼܣܪܵܝܹܠ ܡ̣ܢ ܩܕ݂ܵܡ ܦܠܸܫ̈ܬܵܝܹܐ: ܘܲܢܦܲܠܘ ܩܛ̈ܝܼܠܹܐ ܒܛܘܼܪܵܐ ܕܲܓ̣ܠܲܒ̇ܘܿܥ.

²ܘܐܲܕ݂ܪܸܟ݂ܘ ܦܠܸܫ̈ܬܵܝܹܐ ܠܫܵܐܘܿܠ ܘܠܲܒ̣ܢܵܘ̈ܗܝ. ܘܩܲܛܸܠܘ ܦܠܸܫܬܵܝܹ̈ܐ ܠܝܘܿܢܵܬ̣ܵܢ ܘܲܠܝܲܫܘܝܼ: ܘܲܠܡܲܠ̣ܝܼܫܘܿܥ ܒܢܵܘ̈ܗܝ ܕܫܵܐܘܿܠ.

³ܘܲܥܫܸܢ ܩܪܵܒ̣ܵܐ ܥܲܠ ܫܵܐܘܿܠ. ܘܐܲܕ݂ܪ̱ܟ݂ܘܼܗܝ ܓܲܒ̣ܪܹ̈ܐ ܩܲܫܵـ̈ـܬܹܐ ܒܩܸܫ̈ܬܵܬ̣ܵܐ. ܘܲܕ݂ܚܸܠ ܛܵܒ̣ ܡ̣ܢ ܩܲܫܵܬܹ̈ܐ.

⁴ܘܐܸܡܲܪ ܫܵܐܘܿܠ ܠܫܵܩܹܠ ܡܵܐܢܵܘ̈ܗܝ: ܫܡܘܿܛ ܣܲܝܦܵܟ݂ ܘܲܕ݂ܩܘܿܪܲܝܢܝ ܒܹܗ: ܕܠܵܐ ܢܹܐܬ̣ܘܿܢ ܥܘܼܪ̈ܠܹܐ ܗܵܠܹܝܢ ܢܸܩܛܠܘܼܢܵܢܝ: ܘܲܢܒܲܙܚܘܼܢ ܒܝܼ. ܘܠܵܐ ܨܒ̣ܵܐ ܫܵܩܹܠ ܡܵܐܢܵܘ̈ܗܝ: ܡܸܛܠ ܕܲܕ݂ܚܸܠ ܛܵܒ̣: ܘܲܢܣܲܒ̣ ܫܵܐܘܿܠ ܣܲܝܦܹܗ ܘܲܢܦܲܠ ܥܠܵܘܗܝ.

⁵ܘܲܚܙܵܐ ܫܵܩܹܠ ܡܵܐܢܵܘ̈ܗܝ ܕܡܝܼܬ̣ ܫܵܐܘܿܠ: ܘܲܢܦܲܠ ܐܵܦ ܗ̤ܘ ܥܲܠ ܣܲܝܦܹܗ ܘܡܝܼܬ̣.

⁶ܘܡܝܼܬ̣ ܫܵܐܘܿܠ ܘܲܬ̣ܠܵܬ̣ܵܐ ܒܢܵܘ̈ܗܝ ܘܫܵܩܹܠ ܡܵܐܢܵܘ̈ܗܝ: ܘܐܵܦ ܟܠܗܘܿܢ ܥܲܒ̣̈ܕܵܘ̈ܗܝ ܒܝܵܘܡܵܐ ܗܵܘ̇ ܐܲܟ݂ܚ̄ܕܵܐ.

⁷ܘܲܚܙܵܘ ܐ̄ܢܵܫܵܐ ܕܝܼܣܵܝܹܠ ܕܲܒ̣ܥܸܒ̣ܪܵܐ ܕܲܒ̣ܥܘܼܡܩܵܐ ܕܝܘܿܪܕܢܵܢ: ܕܲܥܪܲܩܘ ܐ̄ܢܵܫܵܐ ܕܝܼܣܪܵܝܹܠ ܘܲܕ݂ܡܝܼܬ̣ ܫܵܐܘܿܠ ܘܲܒ̣ܢܵܘ̈ܗܝ: ܘܲܫܒܲܩܘ ܩܘܼܪ̈ܝܵܐ ܘܲܥܪܲܩܘ: ܘܐܸܬ̣ܵܘ ܦܠܸܫ̈ܬܵܝܹܐ ܘܝܼܬܸܒ̣ܘ ܒܗܹܝܢ.

⁸ܘܲܠܝܵܘܡܵܐ ܐ̄ܚܪܹܢܵܐ: ܐܸܬ݂ܵܘ ܦܠܸܫ̈ܬܵܝܹܐ ܠܲܡܫܲܠܵܚܘܼ ܩܛ̈ܝܼܠܹܐ: ܘܐܸܫܟܲܚܘ ܠܫܵܐܘܿܠ ܘܠܲܬ̣ܠܵܬ̣ܵܐ ܒܢܵܘ̈ܗܝ: ܟܲܕ݂ ܪܡܹܝܢ ܒܛܘܼܪܵܐ ܕܲܓ̣ܠܒ̇ܘܿܥ.

⁹ܘܲܦܣܲܩܘ ܪܹܫܹܗ: ܘܫܲܠܲܚܘ ܡܵܐܢܵܘ̈ܗܝ: ܘܫܲܕܲܪܘ ܠܲܡܣܲܒܵܪܘܼ ܒܐܲܪܥܵܐ ܕܲܦܠܸܫ̈ܬܵܝܹܐ: ܘܲܒ̣ܥܲܡܵܐ ܘܒܹܝܬ̣ ܦܬܲܟ݂ܪ̈ܝܗܘܿܢ.

¹⁰ܘܣܵܡܘ ܡܵܐܘܵܘ̈ܗܝ ܒܹܝܬ̣ ܓܸܢ̈ܝܵܬ̣ܵܐ: ܘܓ̣ܘܼܫܡܹܗ ܩܒܲܥܘ ܒܫܘܼܪܵܐ ܕܒܹܝܬ̣ ܝܵܫܵܢ.

¹¹ܘܲܫܡܲܥܘ ܝܵܬ̣ܒܲܝ̈ ܝܵܒ̣ܝܼܫ ܕܓܸܠܥܵܕ݂: ܡܸܕܸܡ ܕܲܥܒܲܕ݂ܘ ܦܠܸܫ̈ܬܵܝܹܐ ܒܫܵܐܘܿܠ ܘܒܲܒ̣ܢܵܘ̈ܗܝ.

¹²ܘܩܵܡܘ ܟܠ ܓܒܲܪ ܚܲܝܠܬ̣ܵܢ: ܘܐܸܙܲܠܘ ܟܠܹܗ ܠܸܠܝܵܐ: ܘܲܢܣܲܒ̣ܘ ܦܲܓ̣ܪܹܗ ܕܫܵܐܘܿܠ: ܘܦܲܓ̣ܪܹ̈ܐ ܕܲܒ̣̈ܢܵܘܗܝ ܡ̣ܢ ܫܘܼܪܵܐ ܕܒܹܝܬ̣ ܝܵܫܵܢ: ܘܐܲܝܬ̇ܝܘ ܠܝܵܒ̣ܝܼܫ ܘܐܵܘܩܸܕ݂ܘ ܐܸܢܘܿܢ ܬܲܡܵܢ.

¹³ܘܲܢܣܲܒ̣ܘ ܓܲܪ̈ܡܲܝܗܘܿܢ: ܘܲܩܒܲܪܘ ܬܚܹܝܬ̣ ܠܘܼܙܵܐ ܕܲܒ̣ܝܵܒ̣ܝܼܫ: ܘܨܵܡܘ ܫܲܒ̣ܥܵܐ ܝܘ̈ܡܝܼܢ.