Read Aramaic Peshita 1 Samuel 5 Bible Online

1 Samuel 5 - Aramaic Peshita bible

1 Samuel 5

¹ܘܲܦܠܸܫ̈ܬܵܝܹܐ ܕܒܲܪܘ ܩܹܒ̣ܘܿܬܹܗ ܕܐܲܠܵܗܵܐ: ܘܐܲܝܬ̇ܝܘܼܗ̇ ܡ̣ܢ ܟܹܐܦܵܐ ܕܥܘܼܕ݂ܪܵܢܵܐ ܠܐܲܫܕܘܿܕ݂.

²ܘܲܕ݂ܒܲܪܘ ܦܠܸܫ̈ܬܵܝܹܐ ܠܩܹܒ̣ܘܿܬܹܗ ܕܐܲܠܵܗܵܐ: ܘܐܲܝܬ̇ܝܘܼܗ̇ ܠܒܹܝܬ̣ ܕܵܓ̣ܘܿܢ: ܘܐܲܩܝܼܡܘܼܗ̇ ܥܲܠ ܓܹܢ̄ܒ̣ ܕܵܓ̣ܘܿܢ.

³ܘܩܲܕܸܡܘ ܐܲܫܕܘܿܕ݂ܵܝܹ̈ܐ ܠܝܵܘܡܵܐ ܕܒ̣ܵܬ̣ܪܹܗ: ܘܐܸܫܟ̇ܚܘܼܗܝ ܠܕܵܓ̣ܘܿܢ ܟܲܕ݂ ܪܡܸܐ ܥܲܠ ܐܲܦܘ̈ܗܝ ܥܲܠ ܐܲܪܥܵܐ ܩܕ݂ܵܡ ܩܹܒ̣ܘܿܬܹܗ ܕܐܲܠܵܗܵܐ: ܘܢܲܣܒ̇ܘܼܗܝ ܠܕ݂ܵܓ̣ܘܿܢ ܘܐܲܬ̣ܩܢܘܼܗܝ ܥܲܠ ܕܘܼܟ̇ܬܹܗ.

⁴ܘܩܲܕ݂ܡܘ ܒܨܲܦܪܵܐ ܠܝܵܘܡܵܐ ܐ̄ܚܪܹܢܵܐ: ܘܗܵܐ ܕܵܓ̣ܘܿܢ ܪܡܸܐ ܥܲܠ ܐܲܦܵܘ̈ܗܝ ܥܲܠ ܐܲܪܥܵܐ: ܩܕ݂ܵܡ ܩܹܒ̣ܘܿܬܹܗ ܕܡܵܪܝܵܐ: ܘܪܫܹܗ ܕܕ݂ܵܓ̣ܘܿܢ ܘܬܲܪ̈ܬܲܝܗܹܝܢ ܦܲܣܹ̈ܐ ܕܐܝܼܕ݂ܵܘ̈ܗܝ ܦܣܝܼ̈ܩܵܢ ܥܲܠ ܐܸܣܟ̇ܘܿܦܬ̣ܵܐ ܕܬܲܪܥܵܐ: ܘܓ̣ܘܼܫܡܹܗ ܕܕ݂ܵܓ̣ܘܿܢ ܐܸܫܬ̇ܚܲܪ.

⁵ܡܸܛܠ ܗܵܢܵܐ ܠܵܐ ܕܵܪܟ̇ܝܼܢ ܟܘܼܡܪܹ̈ܐ ܕܕ݂ܵܓ̣ܘܿܢ: ܘܟ݂ܠ ܕܥܵܐܠܝܼܢ ܥܲܠ ܐܸܣܟ̇ܘܿܦܬ̣ܵܐ ܕܕ݂ܵܓ̣ܘܿܢ ܠܐܲܫܕܘܿܕ݂ ܥܕܲܡܵܐ ܠܝܵܘܡܵܢܵܐ.

⁶ܘܥܸܫܢܲܬ̤ ܐܝܼܕܹܗ ܕܡܵܪܝܵܐ ܥܲܠ ܐܲܫ̈ܕܘܿܕ݂ܵܝܹܐ: ܘܲܚܪܒ̣ ܐܸܢܘܿܢ: ܘܲܡܚܵܐ ܐܸܢܘܿܢ ܒܲܛܚܘܿܪ̈ܲܝܗܘܿܢ: ܠܐܲܫܕܘܿܕ݂ ܘܠܲܬ̣ܚܘܼܡܹ̈ܝܗ̇.

⁷ܘܲܚܙܵܘ ܒ̈ܢܲܝ ܐܲܫܕܘܿܕ݂ ܕܗܵܟܲܢܵܐ ܗܘ̤ܵܐ ܐܸܢܘܿܢ: ܘܐܸܡܲܪܘ ܠܵܐ ܬܸܬܸ̇ܒ̣ ܩܹܒ̣ܘܿܬܹܗ ܕܐܲܠܵܗܵܐ ܕܝܼܣܪܵܝܹܠ ܥܲܡܲܢ: ܡܸܛܠ ܕܥܸܫܢܲܬ̤ ܐܝܼܕܹܗ ܥܠܲܝܢ ܘܥܲܠ ܕܵܓ̣ܘܿܢ ܐܲܠܵܗܲܢ.

⁸ܘܫܲܕܲܪܘ ܘܟܲܢܸܫܘ ܠܟ݂ܠܗܘܿܢ ܛܪ̈ܘܼܢܹܐ ܕܲܦܠܸܫ̈ܬܵܝܹܐ ܠܘܵܬ̣ܗܘܿܢ: ܘܐܸܡܲܪܘ: ܡܵܢܵܐ ܢܸܥܒܸ̇ܕ݂ ܠܩܹܒ̣ܘܿܬܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ. ܘܐܸܡܲܪܘ: ܠܓ̣ܵܬ̣ ܬܸܗܦܘܿܟ݂ ܩܹܒ̣ܘܿܬܹܗ ܕܡܵܪܝܵܐ ܐܲܠܵܗܵܐ ܕܝܼܣܪܵܝܹܠ.

⁹ܘܐܲܗܦܟ݂ܘܼܗ̇ ܠܩܹܒ̣ܘܿܬܹܗ ܕܡܵܪܝܑܵ ܐܲܠܵܗܵܐ ܕܝܼܣܪܵܝܹܠ. ܘܡ̣ܢ ܒܵܬܲܪ ܕܐܲܗܦܟ݂ܘܼܗ̇: ܗܘ̤ܵܬ̣ ܐܝܼܕܹܗ ܕܡܵܪܝܵܐ ܒܲܩܪܝܼܬ̣ܵܐ ܡܚܘܿܬ̣ܵܐ ܪܲܒܬ̣ܵܐ ܕܛܵܒ̣. ܘܲܡܚܵܐ ܠܐ̄ܢܵܫܹ̈ܗ̇ ܕܲܩܪܝܼܬ̣ܵܐ: ܡ̣ܢ ܙܥܘܿܪܵܐ ܘܲܥܕܲܡܵܐ ܠܪܲܒܵܐ. ܘܐܸܣܬܲܬܲܪܘ ܥܠܲܝܗܘܿܢ ܛܚܘܿܪ̈ܲܝܗܘܿܢ.

¹⁰ܘܫܲܕܪܘܼܗ̇ ܠܩܹܒ̣ܘܿܬܹܗ ܕܐܲܠܵܗܵܐ ܠܥܸܩܪܘܿܢ: ܘܐܲܝܠܸܠܘ ܥܸܩܪ̈ܘܿܢܵܝܹܐ: ܐܲܗܦܸܟ݂ܘ ܥܠܲܝܢ ܩܹܒ̣ܘܿܬܹܗ ܕܐܲܠܵܗܵܐ ܕܝܼܣܪܵܝܹܠ: ܕܬܸܩܛܠܲܢ ܠܲܢ ܘܲܠܥܲܡܲܢ.

¹¹ܘܫܲܕܲܪܘ ܘܟܲܢܸܫܘ ܠܟ݂ܠܗܘܿܢ ܛܪ̈ܘܼܢܹܐ ܕܲܦܠܸܫ̈ܬܵܝܹܐ: ܘܐܸܡܲܪܘ: ܫܲܕܪܘܼܗ̇ ܠܩܹܒ̣ܘܿܬܹܗ ܕܐܲܠܵܗܵܐ ܕܝܼܣܪܵܝܹܠ: ܘܬܸܗܦܘܿܟ݂ ܠܕ݂ܘܼܟ̇ܬ̣ܵܗ̇: ܕܠܵܐ ܬܸܩܛܠܲܢ ܠܲܢ ܘܲܠܥܲܡܲܢ: ܡܸܛܠ ܕܲܗܘ̤ܵܬ̣ ܫܓ̣ܝܫܬܵܐ ܕܡܵܘܬܵܐ ܒܟ݂ܠܵܗ̇ ܩܪܝܼܬ̣ܵܐ. ܘܥܸܫܢܲܬ̤ ܛܵܒ̣ ܐܝܼܕܹܗ ܕܐܲܠܵܗܵܐ ܬܲܡܵܢ.

¹²ܘܐ̄ܢܵܫܵܐ ܕܠܵܐ ܡܝܼܬ̣ܘ: ܐܸܬ̱ܡܚܝܼܘ ܒܲܚܘܿܪ̈ܲܝܗܘܿܢ: ܘܣܸܠܩܲܬ̤ ܓܥܵܬ̣ܵܐ ܕܲܩܪܝܼܬ̣ܵܐ ܥܕܲܡܵܐ ܠܲܫܡܲܝܵܐ.